ಕೊಯಮತ್ತೂರು, ಸೆ.27 www.bengaluruwire.com: ರೋಹಿತ್ ಶೆಟ್ಟಿ ಸಿನಿಮಾಗಳ ಸಾಹಸ ದೃಶ್ಯಗಳನ್ನು ಕಣ್ಮುಂದೆ ತರುವಂತಹ ರೋಚಕ, ಮೈನವಿರೇಳಿಸುವ ಘಟನೆಯೊಂದು ತಮಿಳುನಾಡಿನ ಕೊಯಮತ್ತೂರು-ತಿರುಪ್ಪೂರು ಹೆದ್ದಾರಿಯಲ್ಲಿ ನಡೆದಿದೆ.
ನಿಷೇಧಿತ ಗುಟ್ಕಾ ಸಾಗಿಸುತ್ತಿದ್ದ ಖದೀಮರನ್ನು ಸೆರೆಹಿಡಿಯಲು ಪೊಲೀಸ್ ಹೆಡ್ ಕಾನ್ಸ್ಟೆಬಲ್ ಒಬ್ಬರು ಚಲಿಸುತ್ತಿದ್ದ ಕಾರಿನ ರೂಫ್ (ಮೇಲ್ಛಾವಣಿ) ಮೇಲೆ ನೇತಾಡಿಕೊಂಡು ಬರೋಬ್ಬರಿ 40 ಕಿಲೋಮೀಟರ್ಗಳವರೆಗೆ ಸಾಹಸಮಯ ಪಯಣ ಬೆಳೆಸಿ, ಕೊನೆಗೂ ಮೂವರು ಆರೋಪಿಗಳನ್ನು ಕಂಬಿ ಎಣಿಸುವಂತೆ ಮಾಡಿದ್ದಾರೆ.
ತಮಿಳುನಾಡು ಪೊಲೀಸ್ ಇಲಾಖೆಯ ಹೆಡ್ ಕಾನ್ಸ್ಟೆಬಲ್ ವೇಲ್ಮುರುಗನ್ ಅವರ ಈ ಅದ್ಭುತ ಕರ್ತವ್ಯನಿಷ್ಠೆ ಹಾಗೂ ಧೈರ್ಯಕ್ಕೆ ಸಾರ್ವಜನಿಕ ವಲಯದಲ್ಲಿ ಭಾರೀ ಮೆಚ್ಚುಗೆ ವ್ಯಕ್ತವಾಗಿದೆ.
ಅಸಲಿಗೆ ನಡೆದಿದ್ದೇನು?:
ಕೊಯಮತ್ತೂರಿನ ಕೋವಿಲ್ಪಾಳ್ಯಂ ಸಮೀಪ ಪೊಲೀಸರು ವಾಹನ ತಪಾಸಣೆ ನಡೆಸುತ್ತಿದ್ದ ವೇಳೆ ಅನುಮಾನಾಸ್ಪದ ಕಾರೊಂದನ್ನು ತಡೆದಿದ್ದಾರೆ. ಕಾರಿನ ಹಿಂಬದಿಯಲ್ಲಿ ಅನುಮಾನಾಸ್ಪದ ಚೀಲಗಳಿರುವುದನ್ನು ಗಮನಿಸಿದ ಸಬ್ ಇನ್ಸ್ಪೆಕ್ಟರ್ ಪರಿಶೀಲನೆಗೆ ಮುಂದಾಗಿದ್ದಾರೆ. ತಕ್ಷಣ ಎಚ್ಚೆತ್ತ ಕಾರಿನಲ್ಲಿದ್ದ ಖದೀಮರು ಪೊಲೀಸರನ್ನು ತಳ್ಳಿ, ಬಾಗಿಲು ಲಾಕ್ ಮಾಡಿ ವೇಗವಾಗಿ ಪರಾರಿಯಾಗಲು ಯತ್ನಿಸಿದ್ದಾರೆ.
ಕ್ಷಣಮಾತ್ರವೂ ಯೋಚಿಸದ ಹೆಡ್ ಕಾನ್ಸ್ಟೆಬಲ್ ವೇಲ್ಮುರುಗನ್, ಕಾರು ತಪ್ಪಿಸಿಕೊಳ್ಳುವುದನ್ನು ತಡೆಯಲು ನೇರವಾಗಿ ಕಾರಿನ ಮೇಲ್ಛಾವಣಿ (ರೂಫ್) ಮೇಲೆಯೇ ಜಿಗಿದು ಗಟ್ಟಿಯಾಗಿ ಹಿಡಿದುಕೊಂಡಿದ್ದಾರೆ.
ಟೋಲ್ ದಾಟಿ 40 ಕಿ.ಮೀ ಹೆದ್ದಾರಿ ಚೇಸ್!:
ಪೊಲೀಸ್ ಪೇದೆ ಕಾರಿನ ಮೇಲಿದ್ದಾನೆಂದು ಗೊತ್ತಿದ್ದರೂ ಚಾಲಕ ಕಾರನ್ನು ನಿಲ್ಲಿಸದೆ ಅತಿವೇಗದಲ್ಲಿ ಚಲಾಯಿಸಿದ್ದಾನೆ. ಅಷ್ಟೇ ಅಲ್ಲದೆ, ಮಾರ್ಗಮಧ್ಯೆ ಇದ್ದ ಟೋಲ್ ಪ್ಲಾಜಾದಲ್ಲಿ ಫಾಸ್ಟ್ಟ್ಯಾಗ್ (FASTag) ಮೂಲಕ ಬ್ಯಾರಿಯರ್ ದಾಟಿಸಿ ಪರಾರಿಯಾಗಲು ಯತ್ನಿಸಿದ್ದಾನೆ. ಕಾರಿನ ರೂಫ್ ಮೇಲೆ ಜೀವದ ಹಂಗು ತೊರೆದು ನೇತಾಡುತ್ತಿದ್ದ ಕಾನ್ಸ್ಟೆಬಲ್ ದೃಶ್ಯವನ್ನು ಕಂಡ ಸಹ ಪ್ರಯಾಣಿಕರು ಬೆಚ್ಚಿಬಿದ್ದು ಮೊಬೈಲ್ಗಳಲ್ಲಿ ವಿಡಿಯೋ ಸೆರೆಹಿಡಿದಿದ್ದಾರೆ.
ತಕ್ಷಣ ಎಚ್ಚೆತ್ತ ನಿಯಂತ್ರಣ ಕೊಠಡಿ ಸಿಬ್ಬಂದಿ, ಪಕ್ಕದ ತಿರುಪ್ಪೂರು ಜಿಲ್ಲೆಯ ಅವಿನಾಶಿ ಪೊಲೀಸ್ ಠಾಣೆ ಮತ್ತು ಸ್ಥಳೀಯ ಆಂಬುಲೆನ್ಸ್ ಚಾಲಕರಿಗೆ ತುರ್ತು ಮಾಹಿತಿ ರವಾನಿಸಿದ್ದಾರೆ. ಸುಮಾರು 40 ಕಿಲೋಮೀಟರ್ಗಳ ರಣರೋಚಕ ಚೇಸ್ ನಂತರ, ಅವಿನಾಶಿ ಸಮೀಪದ ಅನ್ನಪೂರ್ಣ ಹೋಟೆಲ್ ಬಳಿ ಪೊಲೀಸರು ಮತ್ತು ಆಂಬುಲೆನ್ಸ್ಗಳು ಕಾರನ್ನು ಸುತ್ತುವರಿದು ತಡೆದಿವೆ.
ಬೆಂಗಳೂರಿನಿಂದ ಸರಬರಾಜಾಗುತ್ತಿದ್ದ 300 ಕೆಜಿ ಗುಟ್ಕಾ
ಕಾರನ್ನು ನಿಲ್ಲಿಸುತ್ತಿದ್ದಂತೆಯೇ ಇಬ್ಬರು ಪರಾರಿಯಾಗಲು ಯತ್ನಿಸಿದರಾದರೂ, ಪೊಲೀಸರು ಜಾಲ ಬೀಸಿ ಮೂವರನ್ನೂ ಹೆಡೆಮುರಿ ಕಟ್ಟಿದ್ದಾರೆ. ಬಂಧಿತರನ್ನು ರಾಜಸ್ಥಾನ ಮೂಲದ ಬಾಬು ಧಾರಾ (27), ರಾಜೇಶ್ (23) ಹಾಗೂ ಸುರೇಶ್ (20) ಎಂದು ಗುರುತಿಸಲಾಗಿದೆ. ವಿಚಾರಣೆ ವೇಳೆ ಇವರು ಬೆಂಗಳೂರಿನಿಂದ ಸುಮಾರು 300 ಕೆಜಿ ನಿಷೇಧಿತ ಗುಟ್ಕಾ ಹಾಗೂ ತಂಬಾಕು ಪದಾರ್ಥಗಳನ್ನು ತಮಿಳುನಾಡಿನ ಕೊಯಮತ್ತೂರಿಗೆ ಮಾರಾಟಕ್ಕಾಗಿ ಅಕ್ರಮವಾಗಿ ಸಾಗಿಸುತ್ತಿದ್ದರು ಎಂಬ ಆಘಾತಕಾರಿ ಸತ್ಯ ಬಯಲಾಗಿದೆ.
ಸಾಮಾಜಿಕ ಜಾಲತಾಣಗಳಲ್ಲಿ ಹೆಡ್ ಕಾನ್ಸ್ಟೆಬಲ್ ವೇಲ್ಮುರುಗನ್ ಅವರ ಸಾಹಸದ ವಿಡಿಯೋ ವೈರಲ್ ಆಗಿದ್ದು, “ಇವರೇ ನಿಜವಾದ ರಿಯಲ್ ಹೀರೋ” ಎಂದು ನೆಟ್ಟಿಗರು ಕೊಂಡಾಡುತ್ತಿದ್ದಾರೆ. Video News: https://www.instagram.com/reel/DdyuYlAsHBk/?stkn=c2cwdGJlejI1NXFj
Join our WhatsApp Channel
