ಕೋಯಮತ್ತೂರು: 4 ಜ್ಯುವೆಲ್ಲರಿ ಮಳಿಗೆಗಳ ಮೇಲೆ ಬಿಐಎಸ್ ದಾಳಿ, ₹3 ಕೋಟಿ ಮೌಲ್ಯದ ಚಿನ್ನ ಜಪ್ತಿ

ಕೋಯಮತ್ತೂರು, ನ.09 www.bengaluruwire.com: ಕಡ್ಡಾಯವಾಗಿರಬೇಕಾದ 6 ಅಂಕಿಯ ಹಾಲ್‌ಮಾರ್ಕ್ ಯುನಿಕ್ ಐಡೆಂಟಿಫಿಕೇಶನ್ (HUID) ಸಂಖ್ಯೆ ಇಲ್ಲದೆ ಚಿನ್ನಾಭರಣ ಮಾರಾಟ ಮಾಡುತ್ತಿದ್ದ ನಾಲ್ಕು ಜ್ಯುವೆಲ್ಲರಿ ಮಳಿಗೆಗಳ ಮೇಲೆ ಭಾರತೀಯ ಮಾನಕ ಬ್ಯೂರೋ (BIS) ಅಧಿಕಾರಿಗಳು ದಿಢೀರ್ ದಾಳಿ ನಡೆಸಿದ್ದಾರೆ.

ಕಾರ್ಯಾಚರಣೆಯ ವೇಳೆ ಅಂದಾಜು ₹3 ಕೋಟಿ ಮೌಲ್ಯದ 2.085 ಕೆಜಿ ತೂಕದ ಚಿನ್ನಾಭರಣಗಳನ್ನು ವಶಪಡಿಸಿಕೊಳ್ಳಲಾಗಿದೆ.

ಕೋಯಮತ್ತೂರಿನ ಬಿಐಎಸ್ ಶಾಖಾ ಕಚೇರಿಯ ಅಧಿಕಾರಿಗಳು ನವೆಂಬರ್ 4ರಂದು ಈ ಜಪ್ತಿ ಕಾರ್ಯಾಚರಣೆಯನ್ನು ನಡೆಸಿದ್ದಾರೆ. ನಿಯಮಗಳನ್ನು ಉಲ್ಲಂಘಿಸಿ ನಕಲಿ ಅಥವಾ ಹಾಲ್‌ಮಾರ್ಕ್ ರಹಿತ ಆಭರಣಗಳನ್ನು ಮಾರಾಟ ಮಾಡಲಾಗುತ್ತಿದೆ ಎಂಬ ನಿಖರ ಖಚಿತ ಮಾಹಿತಿ ಮೇರೆಗೆ ದಾಳಿ ಕೈಗೊಳ್ಳಲಾಗಿತ್ತು.

ದಾಳಿಗೆ ಒಳಗಾದ ಮಳಿಗೆಗಳು:

ಮೆಸರ್ಸ್ ಕೆಆರ್‌ಟಿ ಜ್ಯುವೆಲ್ಲರ್ಸ್ (M/s KRT Jewellers)

ಮೆಸರ್ಸ್ ಅನುಭವ್ ಜ್ಯುವೆಲ್ಲರ್ಸ್ (M/s Anubhav Jewellers)

ಮೆಸರ್ಸ್ ಶ್ರೀ ವಾಸವಿ ಚೈನ್ಸ್ (M/s Sree Vasavi Chains)

ಮೆಸರ್ಸ್ ಕೆಕೆ ಚೈನ್ಸ್ & ಜ್ಯುವೆಲ್ಸ್ (M/s KK Chains & Jewels)

ಕಾನೂನು ಕ್ರಮ ಮತ್ತು ಕಠಿಣ ಶಿಕ್ಷೆಯ ಎಚ್ಚರಿಕೆ:

ಬಿಐಎಸ್ ಕಾಯ್ದೆ 2016ರ ಸೆಕ್ಷನ್ 28ರ ಅಡಿಯಲ್ಲಿ ಈ ಶೋಧ ಮತ್ತು ಜಪ್ತಿ ಕಾರ್ಯಾಚರಣೆ ನಡೆದಿದೆ. ಹಾಲ್‌ಮಾರ್ಕ್ ನಿಯಮ ಉಲ್ಲಂಘಿಸಿರುವ ಮಳಿಗೆಗಳ ಮಾಲೀಕರ ವಿರುದ್ಧ ಸೆಕ್ಷನ್ 29ರ ಅಡಿಯಲ್ಲಿ ಕಾನೂನು ಕ್ರಮ ಜರುಗಿಸಲಾಗುವುದು ಎಂದು ಬಿಐಎಸ್ ಸ್ಪಷ್ಟಪಡಿಸಿದೆ. ಈ ನಿಯಮದ ಪ್ರಕಾರ, ತಪ್ಪಿತಸ್ಥರಿಗೆ ಒಂದು ವರ್ಷದವರೆಗೆ ಜೈಲು ಶಿಕ್ಷೆ ಅಥವಾ ಕನಿಷ್ಠ ₹1 ಲಕ್ಷ ದಂಡ (ಅಥವಾ ವಶಪಡಿಸಿಕೊಂಡ ಸರಕಿನ ಮೌಲ್ಯದ ಐದು ಪಟ್ಟು ಮೊತ್ತದವರೆಗೆ ದಂಡ) ಅಥವಾ ಎರಡನ್ನೂ ವಿಧಿಸಲು ಕಾನೂನಿನಲ್ಲಿ ಅವಕಾಶವಿದೆ.

ಗ್ರಾಹಕರಿಗೆ ಬಿಐಎಸ್ ಜಾಗೃತಿ ಸಲಹೆ:

ಚಿನ್ನಾಭರಣ ಖರೀದಿಸುವ ಮುನ್ನ ಗ್ರಾಹಕರು ಕಡ್ಡಾಯವಾಗಿ 6 ಅಂಕಿಯ HUID ಹಾಲ್‌ಮಾರ್ಕ್ ಪರಿಶೀಲಿಸಿಯೇ ಖರೀದಿಸಬೇಕು ಎಂದು ಬಿಐಎಸ್ ಮನವಿ ಮಾಡಿದೆ. ಹಾಲ್‌ಮಾರ್ಕಿಂಗ್ ನಿಯಮ ಉಲ್ಲಂಘನೆ ಅಥವಾ ನಕಲಿ ಆಭರಣ ಮಾರಾಟ ಕಂಡುಬಂದಲ್ಲಿ ಸಾರ್ವಜನಿಕರು ತಕ್ಷಣವೇ ‘BIS Care App’ ಮೂಲಕ ದೂರು ದಾಖಲಿಸುವಂತೆ ಇಲಾಖೆ ತಿಳಿಸಿದೆ.