ಬೆಳಕಿನ ಹಬ್ಬದಲ್ಲಿ ಕತ್ತಲಾದ ಸಿಲಿಕಾನ್ ಸಿಟಿ ಶ್ವಾಸಕೋಶ: ದೀಪಾವಳಿ ಅಬ್ಬರಕ್ಕೆ ನಲುಗಿದ ಬೆಂಗಳೂರು

ಬೆಂಗಳೂರು, ನ.11 www.bengaluruwire.com: ‘ಉದ್ಯಾನ ನಗರಿ’ ಬೆಂಗಳೂರು ಕ್ರಮೇಣ ವಿಷಕಾರಿ ಹೊಗೆಯ ಗೂಡಾಗಿ ಪರಿವರ್ತನೆಯಾಗುತ್ತಿದೆಯೇ ಎಂಬ ಅನುಮಾನ ಮತ್ತೆ ದಟ್ಟವಾಗಿದೆ. ಬೆಳಕನ್ನು ಹರಡಬೇಕಾದ ದೀಪಾವಳಿ ಹಬ್ಬ ಮುಗಿಯುತ್ತಿದ್ದಂತೆ, ಸಿಲಿಕಾನ್ ಸಿಟಿಯ ಜನರ ಗಂಟಲಿಗೆ ವಿಷಕಾರಿ ಹೊಗೆ ಸಿಲುಕಿಕೊಂಡಿದೆ.

ನ್ಯಾಯಾಲಯದ ಆದೇಶ, ಮಾಲಿನ್ಯ ನಿಯಂತ್ರಣ ಮಂಡಳಿಯ ಹಸಿರು ಪಟಾಕಿ ಮಾರ್ಗಸೂಚಿಗಳು ಮತ್ತು ಸಮಯದ ನಿರ್ಬಂಧಗಳೆಲ್ಲವನ್ನೂ ಗಾಳಿಗೆ ತೂರಿ ಜನತೆ ಸಿಡಿಸಿದ ನಿರಂತರ ಪಟಾಕಿಗಳ ಪರಿಣಾಮವಾಗಿ, ನಗರದ ಗಾಳಿ ಉಸಿರುಗಟ್ಟುವ ಮಟ್ಟಕ್ಕೆ ಕಲುಷಿತಗೊಂಡಿದೆ.

ಸಾಮಾನ್ಯ ದಿನಗಳಲ್ಲಿ 38ರಿಂದ 40ರ ಆಸುಪಾಸಿನಲ್ಲಿದ್ದ ನಗರದ ವಾಯುಮಾಲಿನ್ಯ ಪ್ರಮಾಣ ಏಕಾಏಕಿ ಶೇಕಡ 106ಕ್ಕೆ ಏರಿಕೆಯಾಗಿದ್ದು, ಒಟ್ಟಾರೆ ವಾಯು ಗುಣಮಟ್ಟ ಸೂಚ್ಯಂಕ (AQI) 53ರಿಂದ 132ರ ಗಡಿಯನ್ನೂ ದಾಟಿದೆ.

ಏನಿದು AQI (ಏರ್ ಕ್ವಾಲಿಟಿ ಇಂಡೆಕ್ಸ್)?

AQI (Air Quality Index) ಅಥವಾ ವಾಯು ಗುಣಮಟ್ಟ ಸೂಚ್ಯಂಕ ಎಂದರೆ ನಾವು ಉಸಿರಾಡುವ ಗಾಳಿಯ ಶುದ್ಧತೆ ಮತ್ತು ಅದರಲ್ಲಿರುವ ಮಾಲಿನ್ಯಕಾರಕ ಕಣಗಳ ಮಟ್ಟವನ್ನು ಅಳೆಯುವ ಮಾನದಂಡ. ಕೇಂದ್ರ ಮಾಲಿನ್ಯ ನಿಯಂತ್ರಣ ಮಂಡಳಿ (CPCB) ಗಾಳಿಯಲ್ಲಿರುವ PM2.5, PM10, ಸಾರಜನಕ ಡೈಆಕ್ಸೈಡ್ ಮತ್ತು ಸಲ್ಫರ್ ಡೈಆಕ್ಸೈಡ್‌ನಂತಹ ಮಾರಕ ಸೂಕ್ಷ್ಮ ಕಣಗಳನ್ನು ಅಳೆದು ಈ ಸೂಚ್ಯಂಕವನ್ನು ನಿಗದಿಪಡಿಸುತ್ತದೆ.

0 – 50: ಉತ್ತಮ (Good)

51 – 100: ತೃಪ್ತಿದಾಯಕ (Satisfactory)

101 – 200: ಮಧ್ಯಮ / ಸೂಕ್ಷ್ಮ (Moderate)

201 – 300: ಕಳಪೆ (Poor)

301 – 400: ಅತ್ಯಂತ ಕಳಪೆ (Very Poor)

401 – 500: ತೀವ್ರ ಗಂಭೀರ (Severe)

ಬೆಂಗಳೂರಿನಲ್ಲಿ 53ರಷ್ಟಿದ್ದ ಸೂಚ್ಯಂಕ ರಾತ್ರೋರಾತ್ರಿ 132ಕ್ಕೆ ತಲುಪಿದೆ ಎಂದರೆ, ಆಸ್ತಮಾ, ಉಸಿರಾಟದ ತೊಂದರೆ ಇರುವವರು, ವೃದ್ಧರು ಮತ್ತು ಪುಟ್ಟ ಮಕ್ಕಳಿಗೆ ಇದು ಗಂಭೀರ ಆರೋಗ್ಯ ಸಮಸ್ಯೆಯನ್ನು ತಂದೊಡ್ಡಲಿದೆ ಎಂದರ್ಥ.

ರಾತ್ರೋರಾತ್ರಿ ವಿಷವಾದ ಗಾಳಿ: ಅಂಕಿ-ಅಂಶಗಳ ಆಘಾತಕಾರಿ ಮುಖ:

ಹಿಂದಿನ ವರ್ಷಕ್ಕೆ (2025ರಲ್ಲಿ ಗರಿಷ್ಠ AQI 95) ಹೋಲಿಸಿದರೆ, ಈ ಬಾರಿ ವಾಯುಮಾಲಿನ್ಯದಲ್ಲಿ ಶೇಕಡ 25ಕ್ಕಿಂತ ಹೆಚ್ಚು ಜಿಗಿತ ಕಂಡುಬಂದಿದೆ. ರಾತ್ರಿ 12 ಗಂಟೆಗೆ 102 ದಾಖಲಾಗಿದ್ದ AQI, ಮುಂಜಾನೆ 2 ಗಂಟೆಗೆ 111, ಬೆಳಿಗ್ಗೆ 6 ಗಂಟೆಗೆ 124 ಹಾಗೂ ಬೆಳಿಗ್ಗೆ 9 ಗಂಟೆಯ ಹೊತ್ತಿಗೆ 132ರ ಗರಿಷ್ಠ ಮಟ್ಟ ಮುಟ್ಟಿದೆ.

ನಗರದ ಪ್ರಮುಖ ಬಡಾವಣೆಗಳಲ್ಲಿ ಗಾಳಿಯ ಗುಣಮಟ್ಟ ತೀವ್ರ ಆತಂಕಕಾರಿಯಾಗಿ ಕುಸಿದಿದೆ:

ಕೋರಮಂಗಲ: AQI 190 (ನಗರದಲ್ಲೇ ಅತಿ ಹೆಚ್ಚು)

ಲಾಲ್‌ಬಾಗ್ ವೆಸ್ಟ್: AQI 181

ರಿಚ್ಮಂಡ್ ಟೌನ್: AQI 180

ಸಿಲ್ಕ್ ಬೋರ್ಡ್: AQI 179

ಹೊಂಬೇಗೌಡ ನಗರ: AQI 176

ಹೆಬ್ಬಾಳ: AQI 168

ಜಿಗಣಿ: AQI 143

ಬಾಪೂಜಿ ನಗರ: AQI 136

ಕಸ್ತೂರಿನಗರ: AQI 131

ವಿಶ್ಲೇಷಣೆ: ದೆಹಲಿಯ ಹಾದಿ ಹಿಡಿಯುತ್ತಿದೆಯೇ ಸಿಲಿಕಾನ್ ಸಿಟಿ?

ರಾಷ್ಟ್ರ ರಾಜಧಾನಿ ದೆಹಲಿ ಪ್ರತಿ ಚಳಿಗಾಲ ಹಾಗೂ ದೀಪಾವಳಿ ಸಂದರ್ಭದಲ್ಲಿ ಹೊಗೆಯ ಕೋಣೆಯಾಗಿ (Gas Chamber) ಬದಲಾಗುವುದನ್ನು ನೋಡಿ ನಗುತ್ತಿದ್ದ ಬೆಂಗಳೂರಿಗರು ಈಗ ತಮ್ಮದೇ ನಗರದ ದುಸ್ಥಿತಿಯನ್ನು ಕಣ್ಣಾರೆ ನೋಡುವ ಕಾಲ ಬಂದಿದೆ.

ಕೇವಲ ಎರಡು ಗಂಟೆಗಳ ಕಾಲವಷ್ಟೇ ಪಟಾಕಿ ಹೊಡೆಯಬೇಕೆಂಬ ನಿಯಮವನ್ನು ಯಾರೊಬ್ಬರೂ ಗಂಭೀರವಾಗಿ ಪರಿಗಣಿಸಿಲ್ಲ. ಹಸಿರು ಪಟಾಕಿ ಹೆಸರಿನಲ್ಲಿ ನಿಷೇಧಿತ ಬೇರಿಯಂ ಯುಕ್ತ ರಾಸಾಯನಿಕ ಪಟಾಕಿಗಳು ಎಗ್ಗಿಲ್ಲದೆ ಮಾರಾಟವಾಗಿವೆ. ಬಿಬಿಎಂಪಿ ಮತ್ತು ಮಾಲಿನ್ಯ ನಿಯಂತ್ರಣ ಮಂಡಳಿ ಕೇವಲ ಪ್ರಕಟಣೆಗಳನ್ನು ಹೊರಡಿಸುವುದರಲ್ಲೇ ತೃಪ್ತಿಪಟ್ಟುಕೊಂಡಿರುವುದು ಮಾಲಿನ್ಯ ಇಷ್ಟೊಂದು ವ್ಯಾಪಕವಾಗಲು ಕಾರಣವಾಗಿದೆ.

ಸ್ವಚ್ಛ ಹವೆಗೆ ಹೆಸರಾಗಿದ್ದ ನಗರವನ್ನು ನಾವೇ ಹಾಳುಮಾಡಿಕೊಳ್ಳುತ್ತಿದ್ದೇವೆ ಎಂಬ ಕನಿಷ್ಠ ಜಾಗೃತಿ ನಾಗರಿಕರಿಗೂ ಇಲ್ಲದಿರುವುದು ವಿಪರ್ಯಾಸ. ಕಾಲಮಿತಿಯೊಳಗೆ ಕಠಿಣ ಕ್ರಮ ಕೈಗೊಳ್ಳದಿದ್ದರೆ ಮುಂದಿನ ದಿನಗಳಲ್ಲಿ ಬೆಂಗಳೂರು ಕೂಡ ದೆಹಲಿಯಂತೆಯೇ ಉಸಿರಾಟಕ್ಕೂ ಮಾಸ್ಕ್ ಕಡ್ಡಾಯ ಮಾಡಿಕೊಳ್ಳುವ ದಿನಗಳು ದೂರವಿಲ್ಲ.

Join our WhatsApp Channel