ಬೆಂಗಳೂರು, ನ.05 www.bengaluruwire.com: ರಾಜಧಾನಿ ಬೆಂಗಳೂರಿನ ಹೊರವಲಯದ ಟ್ರಾಫಿಕ್ ದಟ್ಟಣೆಗೆ ಮುಕ್ತಿ ಹಾಡಲು ರಾಜ್ಯ ಸರ್ಕಾರ ಬಹುನಿರೀಕ್ಷಿತ 134 ಕಿಲೋಮೀಟರ್ ಉದ್ದದ ಅನೇಕಲ್-ಸರ್ಜಾಪುರ-ವರ್ತೂರು-ವಿಮಾನನಿಲ್ದಾಣ-ನೆಲಮಂಗಲ ವರ್ತುಲ ರಸ್ತೆ ಕಾಮಗಾರಿಯನ್ನು ಶೀಘ್ರವಾಗಿ ಪೂರ್ಣಗೊಳಿಸಲು ಹೆಚ್ಚುವರಿಯಾಗಿ ₹1,118.50 ಕೋಟಿ ಅನುದಾನವನ್ನು ಗುರುವಾರ ನಡೆದ 25ನೇ ಸಚಿವ ಸಂಪುಟ ಸಭೆಯಲ್ಲಿ ಮಂಜೂರು ಮಾಡಲಾಗಿದೆ.
₹3,409 ಕೋಟಿಗೆ ಏರಿಕೆಯಾದ ಯೋಜನಾ ವೆಚ್ಚ:
ಕರ್ನಾಟಕ ರಸ್ತೆ ಅಭಿವೃದ್ಧಿ ನಿಗಮ (KRDCL) ವತಿಯಿಂದ ಕೈಗೆತ್ತಿಕೊಳ್ಳಲಾದ ಈ ಯೋಜನೆಗೆ 2017ರಲ್ಲಿ ಮೊದಲ ಬಾರಿಗೆ ಅನುಮೋದನೆ ನೀಡಲಾಗಿತ್ತು. ಆ ವೇಳೆ ಅಂದಾಜು ವೆಚ್ಚ ₹2,290.50 ಕೋಟಿ ಆಗಿತ್ತು. ಆದರೆ, ಭೂಸ್ವಾಧೀನ ವೆಚ್ಚದ ಏರಿಕೆ, ವಿಳಂಬ, ದರ ಪರಿಷ್ಕರಣೆ ಹಾಗೂ ಹೆಚ್ಚುವರಿ ಕಾಮಗಾರಿಗಳ ಸೇರ್ಪಡೆಯಿಂದಾಗಿ ಯೋಜನೆಯ ಒಟ್ಟು ವೆಚ್ಚವು ಇದೀಗ ₹3,409 ಕೋಟಿಗೆ ತಲುಪಿದೆ.
ಮಂಜೂರಾಗಿರುವ ಹೆಚ್ಚುವರಿ ₹1,118.50 ಕೋಟಿ ಮೊತ್ತದ ಪೈಕಿ:
ಭೂಸ್ವಾಧೀನ ಪ್ರಕ್ರಿಯೆಗೆ: ₹266.83 ಕೋಟಿ
ದರ ಹೊಂದಾಣಿಕೆ (Price Escalation) ವೆಚ್ಚಕ್ಕೆ: ₹347.54 ಕೋಟಿ
ಬಾಕಿ ಉಳಿದ ಮೊತ್ತವನ್ನು ಪ್ರಮುಖ ಸಿವಿಲ್ ಕಾಮಗಾರಿಗಳಿಗೆ ಬಳಸಲಾಗುತ್ತದೆ. ಕಾಮಗಾರಿ ವಿಳಂಬದ ಬಗ್ಗೆ ಅಸಮಾಧಾನ ವ್ಯಕ್ತಪಡಿಸಿರುವ ಸಚಿವ ಸಂಪುಟವು, ಯಾವುದೇ ಕಾರಣಕ್ಕೂ ವಿಳಂಬ ಮಾಡದೆ ಶೀಘ್ರ ಮುಕ್ತಾಯಗೊಳಿಸಲು ಅಧಿಕಾರಿಗಳಿಗೆ ಕಟ್ಟುನಿಟ್ಟಿನ ಸೂಚನೆ ನೀಡಿದೆ.
ವರ್ತೂರಿನಲ್ಲಿ ಎಲಿವೇಟೆಡ್ ಕಾರಿಡಾರ್, 6 ಕಡೆ ರೈಲ್ವೆ ಮೇಲ್ಸೇತುವೆ:
ಈ ಯೋಜನೆಯು ಅತ್ತಿಬೆಲೆ, ಸರ್ಜಾಪುರ, ದೊಮ್ಮಸಂದ್ರ, ಗುಂಜೂರು, ವರ್ತೂರು, ವೈಟ್‌ಫೀಲ್ಡ್, ಏರ್‌ಪೋರ್ಟ್ ಮತ್ತು ನೆಲಮಂಗಲ ನಡುವೆ ಅತ್ಯುತ್ತಮ ಸಂಪರ್ಕವನ್ನು ಒದಗಿಸಲಿದೆ.
ವರ್ತೂರು ಎಲಿವೇಟೆಡ್ ಕಾರಿಡಾರ್: ನಿತ್ಯ ವಾಹನ ದಟ್ಟಣೆಯಿಂದ ನಲುಗುವ ವರ್ತೂರು ಜಂಕ್ಷನ್ ಭಾಗದಲ್ಲಿ ₹ ಪರಿಹಾರವಾಗಿ 1.92 ಕಿ.ಮೀ. ಉದ್ದದ ಎಲಿವೇಟೆಡ್ ಕಾರಿಡಾರ್ ನಿರ್ಮಿಸಲಾಗುವುದು.
ರೈಲ್ವೆ ಫ್ಲೈಓವರ್‌ಗಳು: ಗೊಲ್ಲಹಳ್ಳಿ, ಬಸವನಹಳ್ಳಿ, ರಾಜಾನುಕುಂಟೆ, ನಾರಾಯಣಪುರ, ಕಾಡುಗೋಡಿ ಮತ್ತು ವರ್ತೂರು ಜಂಕ್ಷನ್‌ಗಳಲ್ಲಿ ನೂತನ ರೈಲ್ವೆ ಓವರ್ ಬ್ರಿಡ್ಜ್ (ROB) ಕಾಮಗಾರಿಗಳು ಸಾಕಾರಗೊಳ್ಳಲಿವೆ.
“ನಾನು ಖುದ್ದಾಗಿ ಸ್ಥಳ ಪರಿಶೀಲನೆ ನಡೆಸಿದ ಬಳಿಕ ಹೆಚ್ಚುವರಿ ಅನುದಾನ ಕೋರಿ ಪ್ರಸ್ತಾವನೆ ಸಲ್ಲಿಸಲು ಲೋಕೋಪಯೋಗಿ ಇಲಾಖೆಗೆ (PWD) ಸೂಚಿಸಿದ್ದೆ. ಇದೀಗ ₹1,118.50 ಕೋಟಿ ಮಂಜೂರಾಗಿದ್ದು, ಕಾಮಗಾರಿ ಶೀಘ್ರದಲ್ಲೇ ವೇಗ ಪಡೆದುಕೊಳ್ಳಲಿದೆ” ಎಂದು ಗ್ರೇಟರ್ ಬೆಂಗಳೂರು ಅಭಿವೃದ್ಧಿ ಸಚಿವ ಕೃಷ್ಣ ಬೈರೇಗೌಡ ಹೇಳಿದ್ದಾರೆ.
ಹೊಸಕೋಟೆ, ನೆಲಮಂಗಲ ಮತ್ತು ಬಿಡದಿ ಭಾಗದ ಪ್ರಯಾಣಿಕರಿಗೆ ಕೆಂಪೇಗೌಡ ಅಂತರರಾಷ್ಟ್ರೀಯ ವಿಮಾನ ನಿಲ್ದಾಣ ತಲುಪಲು ಈ ಕಾರಿಡಾರ್ ಸುಲಭ ಹಾಗೂ ಕ್ಷಿಪ್ರ ಪರ್ಯಾಯ ಮಾರ್ಗವಾಗಲಿದೆ.
