ಬಿಡಿಎ ಮಹತ್ವದ ಹೆಜ್ಜೆ: ಅಕ್ರಮ-ಸಕ್ರಮ ಶುಲ್ಕ ಇಳಿಕೆ, ಪ್ರೋತ್ಸಾಹದಾಯಕ ನಿವೇಶನ ಘೋಷಣೆ

ಬೆಂಗಳೂರು, ನ.09 www.bengaluruwire.com: ರಾಜಧಾನಿಯ ನಾಗರಿಕರಿಗೆ ದೀಪಾವಳಿ ಹಬ್ಬದ ಪ್ರಯುಕ್ತ ಬೆಂಗಳೂರು ಅಭಿವೃದ್ಧಿ ಪ್ರಾಧಿಕಾರವು (ಬಿಡಿಎ) ಪ್ರಮುಖ ಕೊಡುಗೆಗಳನ್ನು ಘೋಷಿಸಿದೆ. ಬಿಡಿಎ ಕೇಂದ್ರ ಕಚೇರಿಯಲ್ಲಿ ಇಂದು (ನ.09) ಪ್ರಗತಿ ಪರಿಶೀಲನೆ ಸಭೆ ನಡೆಸಿದ ಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್, ಅಕ್ರಮ-ಸಕ್ರಮ ನಿಯಮ 38(ಡಿ) ಅಡಿ ದಂಡ ಶುಲ್ಕವನ್ನು ಶೇ. 50ರಷ್ಟು ಇಳಿಕೆ ಮಾಡುವುದರ ಜತೆಗೆ ಪ್ರೋತ್ಸಾಹದಾಯಕ ನಿವೇಶನ ಹಂಚಿಕೆ, ಅಂಚಿನ ಜಾಗ ಮಂಜೂರಾತಿ ಮತ್ತು ಶುದ್ಧ ಕ್ರಯಪತ್ರ ಮೇಳ ಸೇರಿದಂತೆ ನಾಲ್ಕು ಪ್ರಮುಖ ನಾಗರಿಕ ಸ್ನೇಹಿ ಯೋಜನೆಗಳನ್ನು ಪ್ರಕಟಿಸಿದರು.

1. ಬಿಡಿಎ ಕಾಯ್ದೆ ಕಲಂ 38(ಡಿ) ಅಡಿ ಶುಲ್ಕ ಭಾರಿ ಇಳಿಕೆ

ಬಿಡಿಎ ಭೂಸ್ವಾಧೀನಕ್ಕೊಳಪಟ್ಟ ಜಮೀನಿನಲ್ಲಿ 2008ರ ಜುಲೈ 10ರ ಪೂರ್ವದಲ್ಲಿ ನಿರ್ಮಿಸಲಾದ ಅನಧಿಕೃತ ವಾಸಯೋಗ್ಯ ಮನೆಗಳನ್ನು ಸಕ್ರಮಗೊಳಿಸಲು (ಮರುಮಂಜೂರಾತಿ) ಸರ್ಕಾರ ನಿಗದಿಪಡಿಸಿದ್ದ ಮಾರ್ಗಸೂಚಿ ಮೌಲ್ಯದ ದರವನ್ನು ಅರ್ಧದಷ್ಟು ಇಳಿಸಲಾಗಿದೆ.

• 20×30 ಅಳತೆವರೆಗೆ: ಈ ಹಿಂದೆ ಇದ್ದ ಮಾರ್ಗಸೂಚಿ ಮೌಲ್ಯದ ಶೇ.10ರ ಬದಲಿಗೆ ಈಗ ಕೇವಲ ಶೇ. 5 ನಿಗದಿ.
• 20×30 ರಿಂದ 30×40 ವರೆಗೆ: ಶೇ.25 ರಿಂದ ಶೇ. 12.5ಕ್ಕೆ ಇಳಿಕೆ.
• 30×40 ರಿಂದ 40×60 ವರೆಗೆ: ಶೇ.40 ರಿಂದ ಶೇ. 20ಕ್ಕೆ ಇಳಿಕೆ.
• 40×60 ರಿಂದ 50×80 ವರೆಗೆ: ಶೇ.50 ರ ಬದಲಿಗೆ ಶೇ. 25 ಮತ್ತು ನಿಯಮಾನುಸಾರ ದಂಡ.
• ಸೂಚನೆ: ಮೂಲೆ ನಿವೇಶನಗಳಿಗೆ ಈ ದರದ ಎರಡರಷ್ಟು ಮೊತ್ತ ಅನ್ವಯವಾಗಲಿದೆ.

ಈ ಯೋಜನೆಯಡಿ ಆನ್‌ಲೈನ್ ಮೂಲಕ ಅರ್ಜಿ ಸಲ್ಲಿಸಲು 2026ರ ಡಿಸೆಂಬರ್ 17 ಕೊನೆಯ ದಿನಾಂಕವಾಗಿದೆ (ಕೆಲವೆಡೆ ಡಿ.15 ಎಂದು ತಪ್ಪಾಗಿ ನಮೂದಾಗಿದ್ದು, ಡಿ.17 ಅಂತಿಮ ದಿನ). ಅರ್ಹ ಫಲಾನುಭವಿಗಳು ಅಧಿಕೃತ ಪೋರ್ಟಲ್ 38d.bdakarnataka.in ಮೂಲಕ ಕ್ರಯಪತ್ರ, ಇಸಿ, ಖಾತಾ ನಕಲು ಹಾಗೂ ವಿದ್ಯುತ್/ನೀರಿನ ಸಂಪರ್ಕ ದಾಖಲೆಗಳೊಂದಿಗೆ ಅರ್ಜಿ ಸಲ್ಲಿಸಬೇಕು.

ಉದ್ಯಾನವನ, ಸಿಎ ನಿವೇಶನ, ರಾಜಕಾಲುವೆ, ಕೆರೆ ಅಂಗಳ, ರಿಂಗ್ ರಸ್ತೆ ಹಾಗೂ ಹೈಟೆನ್ಷನ್ ಮಾರ್ಗದ ಕೆಳಗಿರುವ ಕಟ್ಟಡಗಳಿಗೆ ಈ ಸೌಲಭ್ಯ ಅನ್ವಯಿಸುವುದಿಲ್ಲ. ತಿದ್ದುಪಡಿ ಕಾಯ್ದೆ ಜಾರಿಯಾದ 2 ವರ್ಷಗಳೊಳಗೆ ಸಕ್ರಮ ಮಾಡಿಕೊಳ್ಳದಿದ್ದರೆ ಅಂತಹ ಕಟ್ಟಡಗಳನ್ನು ಬಿಡಿಎ ತೆರವುಗೊಳಿಸಲಿದೆ.

2. ಕೆಂಪೇಗೌಡ ಬಡಾವಣೆ: ನಗದು ಪಡೆದ ರೈತರಿಗೆ ಪ್ರೋತ್ಸಾಹದಾಯಕ ನಿವೇಶನ

ನಾಡಪ್ರಭು ಕೆಂಪೇಗೌಡ ಬಡಾವಣೆಗೆ ಭೂಮಿ ನೀಡಿ ಈ ಹಿಂದೆ ಕೇವಲ ನಗದು ಪರಿಹಾರ ಪಡೆದುಕೊಂಡಿದ್ದ ರೈತರಿಗೆ ಅನ್ಯಾಯವಾಗದಂತೆ ತಡೆಯಲು ವಿಶೇಷ ಪ್ರೋತ್ಸಾಹದಾಯಕ ನಿವೇಶನ ಯೋಜನೆಯನ್ನು ಸರ್ಕಾರ ಅನುಮೋದಿಸಿದೆ.

ಒಟ್ಟು 765 ಪ್ರಕರಣಗಳಲ್ಲಿ 521 ಎಕರೆ 4 ಗುಂಟೆ ವಿಸ್ತೀರ್ಣಕ್ಕೆ ಈ ಅವಕಾಶ ಸಿಗಲಿದೆ:

• ಅರ್ಧ ಎಕರೆವರೆಗೆ: 20×30 ಅಳತೆಯ ನಿವೇಶನ
• ಅರ್ಧದಿಂದ ಒಂದು ಎಕರೆವರೆಗೆ: 30×40 ಅಳತೆಯ ನಿವೇಶನ
• ಒಂದು ಎಕರೆಗಿಂತ ಹೆಚ್ಚು: ಪ್ರತಿ ಎಕರೆಗೆ ಒಂದರಂತೆ 40×60 ಅಳತೆಯ ನಿವೇಶನ (ಗರಿಷ್ಠ 10 ಸೈಟ್ ಮಿತಿ)

3. ಅಂಚಿನ ಜಾಗ (Marginal Land) ಹಂಚಿಕೆ ನಿಯಮ

ಬಿಡಿಎ ಹಂಚಿಕೆ ಮಾಡಿರುವ ಸೈಟ್‌ಗಳ ಪಕ್ಕದಲ್ಲಿ ಅಥವಾ ಹಿಂಬದಿಯಲ್ಲಿ ಪ್ರಾಧಿಕಾರಕ್ಕೆ ಸೇರಿದ ಅಂಚಿನ ಜಾಗ ಲಭ್ಯವಿದ್ದಲ್ಲಿ, ಹಂಚಿಕೆದಾರರು itreforms.bdakarnataka.in ಮೂಲಕ 2026ರ ಡಿಸೆಂಬರ್ 17ರೊಳಗೆ ಅರ್ಜಿ ಸಲ್ಲಿಸಬಹುದು. ಅರ್ಜಿ ಸ್ವೀಕರಿಸಿದ 60 ದಿನಗಳಲ್ಲಿ ಪರಿಶೀಲಿಸಿ ಚಾಲ್ತಿ ಮಾರ್ಗಸೂಚಿ ದರದಲ್ಲಿ ಅಂಚಿನ ಜಾಗವನ್ನು ಮಂಜೂರು ಮಾಡಲಾಗುವುದು. ಕೊಳಚೆ ಪ್ರದೇಶದ ನಿವೇಶನಗಳಿಗೆ ಈ ಹಿಂದೆ ಇದ್ದ ಪ್ರತಿ ಚ.ಮೀ.ಗೆ ₹200 ಬದಲಿಗೆ ಚಾಲ್ತಿ ಗೈಡ್‌ಲೈನ್ ದರದ ಶೇ.20 ರಷ್ಟು ಶುಲ್ಕ ವಿಧಿಸಲಾಗುತ್ತದೆ.

4. 20 ಸಾವಿರ ಹಂಚಿಕೆದಾರರಿಗೆ ಶುದ್ಧ ಕ್ರಯಪತ್ರ ಮೇಳ

ಹತ್ತು ವರ್ಷಗಳ ಗುತ್ತಿಗೆ ಅವಧಿ ಮುಗಿದಿದ್ದರೂ ನಾನಾ ಕಾರಣಗಳಿಂದ ಕ್ರಯಪತ್ರ ಪಡೆಯದ ಸುಮಾರು 20,000 ಬಿಡಿಎ ಹಂಚಿಕೆದಾರರ ಅನುಕೂಲಕ್ಕಾಗಿ ‘ಶುದ್ಧ ಕ್ರಯಪತ್ರ ಮೇಳ’ ಆಯೋಜಿಸಲಾಗಿದೆ. ಸಾರ್ವಜನಿಕರು itreforms.bdakarnataka.in/sales-deed ಪೋರ್ಟಲ್ ಮೂಲಕ 2026ರ ಡಿಸೆಂಬರ್ 17ರೊಳಗೆ ಅರ್ಜಿ ಸಲ್ಲಿಸಿದರೆ, ಮುಂದಿನ 60 ದಿನಗಳಲ್ಲಿ ನಿಯಮಾನುಸಾರ ಶುದ್ಧ ಕ್ರಯಪತ್ರವನ್ನು ನೋಂದಾಯಿಸಿಕೊಡಲಾಗುತ್ತದೆ.

ಜತೆಗೆ ಬಿಡಿಎ ಸ್ಥಾಪನೆಯಾಗಿ 50 ವರ್ಷ ಪೂರೈಸಿದ ಹಿನ್ನೆಲೆಯಲ್ಲಿ ‘ಸುವರ್ಣ ಮಹೋತ್ಸವ’ ಆಚರಣೆಗೆ ಸಮಗ್ರ ರೂಪುರೇಷೆ ಸಿದ್ಧಪಡಿಸಲು ಸಿಎಂ ಸೂಚಿಸಿದರು.

ಮೇಖ್ರಿ-ಹೆಬ್ಬಾಳ ಇಂಟಿಗ್ರೇಟೆಡ್ ಕಾರಿಡಾರ್ ಸ್ಥಳ ಪರಿಶೀಲನೆ

ಸಭೆಯ ನಂತರ ಮುಖ್ಯಮಂತ್ರಿಗಳು ಬಿಡಿಎ ಅಧ್ಯಕ್ಷ ಎನ್.ಎ. ಹ್ಯಾರಿಸ್, ಆಯುಕ್ತ ಮೇಜರ್ ಮಣಿವಣ್ಣನ್ ಪಿ., ಸಂಚಾರ ವಿಭಾಗದ ಜಂಟಿ ಪೊಲೀಸ್ ಆಯುಕ್ತ ಕಾರ್ತಿಕ್ ರೆಡ್ಡಿ ಹಾಗೂ ಇಂಜಿನಿಯರ್‌ಗಳೊಂದಿಗೆ ಮೇಖ್ರಿ-ಹೆಬ್ಬಾಳ ಇಂಟಿಗ್ರೇಟೆಡ್ ಕಾರಿಡಾರ್ ಕಾಮಗಾರಿ ಸ್ಥಳಕ್ಕೆ ಭೇಟಿ ನೀಡಿ ಪರಿಶೀಲಿಸಿದರು. ಕಾಮಗಾರಿ ವೇಳೆ ವಾಹನ ಸವಾರರಿಗೆ ತೊಂದರೆಯಾಗದಂತೆ ಪರ್ಯಾಯ ರಸ್ತೆಗಳನ್ನು ಸಜ್ಜುಗೊಳಿಸಲು ಹಾಗೂ ಪ್ರತಿದಿನ ಸಂಚಾರ ಮಾರ್ಗ ಬದಲಾವಣೆ ವಿವರಗಳನ್ನು ಸಾರ್ವಜನಿಕರಿಗೆ ನೀಡಲು ಅಧಿಕಾರಿಗಳಿಗೆ ಸ್ಪಷ್ಟ ನಿರ್ದೇಶನ ನೀಡಿದರು.

Join our WhatsApp Channel