ಬೆಂಗಳೂರು, ನ.07 www.bengaluruwire.com: ಕೆಲವು ಮಾಧ್ಯಮಗಳಲ್ಲಿ ಪ್ರಕಟವಾದಂತೆ ಹೆಬ್ಬಾಳ ಮೇಲ್ಸೇತುವೆ ಹಾಗೂ ಬಳ್ಳಾರಿ ರಸ್ತೆಯನ್ನು 18 ತಿಂಗಳುಗಳ ಕಾಲ ಸಂಪೂರ್ಣವಾಗಿ ಮುಚ್ಚಲಾಗುವುದಿಲ್ಲ ಎಂದು ಬೆಂಗಳೂರು ಅಭಿವೃದ್ಧಿ ಪ್ರಾಧಿಕಾರ (ಬಿ.ಡಿ.ಎ) ಸ್ಪಷ್ಟಪಡಿಸಿದೆ.
₹445.7 ಕೋಟಿ ವೆಚ್ಚದ ನೂತನ ಎಲಿವೇಟೆಡ್ ಹೈವೇ ನಿರ್ಮಾಣದ ವೇಳೆಯಲ್ಲೂ ನಿಯಂತ್ರಿತ ನಿರ್ಬಂಧಗಳೊಂದಿಗೆ ವಾಹನ ಸಂಚಾರ ಎಂದಿನಂತೆ ಮುಂದುವರಿಯಲಿದೆ.
ಯೋಜನಾ ಸ್ಥಳಕ್ಕೆ ಶನಿವಾರ ಭೇಟಿ ನೀಡಿ ಪರಿಶೀಲಿಸಿದ ಬಿ.ಡಿ.ಎ ಅಧ್ಯಕ್ಷ ಎನ್. ಎ. ಹ್ಯಾರಿಸ್ ಹಾಗೂ ಆಯುಕ್ತ ಮೇಜರ್ ಪಿ. ಮಣಿವಣ್ಣನ್, ಸಾರ್ವಜನಿಕರಿಗೆ ಕನಿಷ್ಠ ಪ್ರಮಾಣದ ಅಡಚಣೆಯಾಗುವಂತೆ ಕ್ರಮ ಕೈಗೊಳ್ಳಲು ಅಧಿಕಾರಿಗಳಿಗೆ ಕಟ್ಟುನಿಟ್ಟಿನ ಸೂಚನೆ ನೀಡಿದ್ದಾರೆ.
ಕೇವಲ ಒಂದು ಲೇನ್‌ಗೆ ಮಾತ್ರ ನಿರ್ಬಂಧ:
ಹಾಲಿ ರಸ್ತೆಯ ಪ್ರತಿ ಬದಿಯಲ್ಲೂ ಮೂರು ಲೇನ್‌ಗಳಿದ್ದು, ಬ್ಯಾರಿಕೇಡ್‌ಗಳನ್ನು ಅಂದಾಜು 4.5 ಮೀಟರ್‌ಗಳಿಗೆ ಮಾತ್ರ ಸೀಮಿತಗೊಳಿಸಲಾಗುವುದು. ಇದರಿಂದ ಕೇವಲ ಒಂದು ಲೇನ್‌ಗೆ ಮಾತ್ರ ಅಡ್ಡಿಯಾಗಲಿದ್ದು, ಉಳಿದ ಎರಡು ಲೇನ್‌ಗಳು ಹಾಗೂ ಸರ್ವಿಸ್ ರಸ್ತೆಗಳಲ್ಲಿ ಎಂದಿನಂತೆ ವಾಹನ ಸಂಚಾರಕ್ಕೆ ಮುಕ್ತ ಅವಕಾಶವಿರಲಿದೆ ಎಂದು ಬಿ.ಡಿ.ಎ ತಿಳಿಸಿದೆ.
₹445.7 ಕೋಟಿ ವೆಚ್ಚದ ಯೋಜನೆ: ಮುಖ್ಯಾಂಶಗಳು:
ಮಾರ್ಗ: ಯುಎಎಸ್ (UAS) ಸಿಬ್ಬಂದಿ ವಸತಿಗೃಹದಿಂದ ಮೇಖ್ರಿ ವೃತ್ತದವರೆಗೆ 4 ಪಥಗಳ ಎಲಿವೇಟೆಡ್ ಕಾರಿಡಾರ್
ಉದ್ದ ಹಾಗೂ ವೆಚ್ಚ: 1.74 ಕಿ.ಮೀ. ಉದ್ದ, ಅಂದಾಜು ₹445.7 ಕೋಟಿ
ಕಾಲಮಿತಿ: ಕಾಮಗಾರಿ ಪೂರ್ಣಗೊಳಿಸಲು 18 ತಿಂಗಳುಗಳ ಗಡುವು
ವಿನ್ಯಾಸ: 49 ಪಿಲ್ಲರ್‌ಗಳು ಮತ್ತು ಮೇಖ್ರಿ ವೃತ್ತದಲ್ಲಿ ಎಲಿವೇಟೆಡ್ ರೋಟರಿ ಜಂಕ್ಷನ್
ಸಂಪರ್ಕ: ಯಶವಂತಪುರ (ಸಿ.ವಿ. ರಾಮನ್ ರಸ್ತೆ) ಮತ್ತು ಜಯಮಹಲ್ ರಸ್ತೆ ಕಡೆಗೆ ಪ್ರತ್ಯೇಕ ಡೌನ್-ರ್ಯಾಂಪ್‌ಗಳು
ಸಂಚಾರ ನಿಯಮಗಳು ಹಾಗೂ ವಾಹನಗಳ ಪ್ರವೇಶ:
ದ್ವಿಚಕ್ರ ವಾಹನಗಳು, ಕಾರುಗಳು, ಶಾಲಾ ಬಸ್‌ಗಳು, ಬಿಎಂಟಿಸಿ ಮತ್ತು ಕೆಎಸ್‌ಆರ್‌ಟಿಸಿ ಬಸ್‌ಗಳ ಸಂಚಾರ ಮುಕ್ತವಾಗಿರಲಿದೆ. ಸಂಚಾರ ಪೊಲೀಸರ ಮಾರ್ಗಸೂಚಿಯಂತೆ ಸರಕು ಸಾಗಣೆ (ಭಾರಿ) ವಾಹನಗಳ ಪ್ರವೇಶಕ್ಕೆ ನಿರ್ಬಂಧ ವಿಧಿಸಲಾಗುತ್ತದೆ.
ವಾಹನ ಸವಾರರಿಗೆ ಪ್ರಮುಖ ಪರ್ಯಾಯ ಮಾರ್ಗಗಳು:
ವಿಮಾನ ನಿಲ್ದಾಣದ (ಕೆಐಎ) ಕಡೆಗೆ ತೆರಳುವವರಿಗೆ:
ಹೆಬ್ಬಾಳ ಕಡೆಯಿಂದ: ಹಳೇ ಹೈಗ್ರೌಂಡ್ಸ್ – ಕಲ್ಪನಾ ಜಂಕ್ಷನ್ – ಹಳೇ ಉದಯ ಟಿವಿ ಜಂಕ್ಷನ್ – ಕಂಟೋನ್ಮೆಂಟ್ – ಟ್ಯಾನರಿ ರಸ್ತೆ – ನಾಗವಾರ ಮಾರ್ಗ.
ಯಶವಂತಪುರ ಕಡೆಯಿಂದ: ಮತ್ತಿಕೆರೆ ರಸ್ತೆ – ಬಿಇಎಲ್ ವೃತ್ತ (ಬಲತಿರುವು) – ಹೊರವರ್ತುಲ ರಸ್ತೆ.
ನಗರ ಕೇಂದ್ರ ಭಾಗಕ್ಕೆ ಬರುವವರಿಗೆ:
ವಿಮಾನ ನಿಲ್ದಾಣದ ಕಡೆಯಿಂದ: ಹೆಬ್ಬಾಳ ಬಳಿ ಎಡಕ್ಕೆ ತಿರುಗಿ ನಾಗವಾರ ಜಂಕ್ಷನ್ – ಬ್ಯಾಂಬೂ ಬಜಾರ್ – ಕ್ವೀನ್ಸ್ ರಸ್ತೆ ಮಾರ್ಗ ಅಥವಾ ಹೆಬ್ಬಾಳ ಬಳಿ ಬಲಕ್ಕೆ ತಿರುಗಿ ಹೊರವರ್ತುಲ ರಸ್ತೆ – ಕುವೆಂಪು ವೃತ್ತ – ಗೊರಗುಂಟೆಪಾಳ್ಯ – ಡಾ. ರಾಜ್‌ಕುಮಾರ್ ರಸ್ತೆ ಮಾರ್ಗ.
ಹೆಬ್ಬಾಳದಿಂದ ಸ್ಥಳೀಯ ಸಂಚಾರ: ಬ್ಯಾಪ್ಟಿಸ್ಟ್ ಆಸ್ಪತ್ರೆ ಮುಂಭಾಗದ ಸರ್ವಿಸ್ ರಸ್ತೆ ಬಳಸಿ ಸಿಬಿಐ ಜಂಕ್ಷನ್ ಮೂಲಕ ಬಳ್ಳಾರಿ ರಸ್ತೆ, ಗಂಗಾನಗರ ಅಥವಾ ಆನಂದ ನಗರ ತಲುಪಬಹುದು.
Join our WhatsApp Channel
