ಬೆಂಗಳೂರು, ನ.11 www.bengaluruwire.com:
ಜಾಗತಿಕ ಸೆಮಿಕಂಡಕ್ಟರ್ ಹಾಗೂ ಚಿಪ್ ವಿನ್ಯಾಸ ಕ್ಷೇತ್ರದ ಪ್ರಮುಖ ಸಂಸ್ಥೆಯಾದ ಕ್ವಾಲ್ಕಾಮ್ (Qualcomm) ಭಾರತದಲ್ಲಿ ಉದ್ಯೋಗಿಗಳನ್ನು ವಜಾಗೊಳಿಸುವ ಪ್ರಕ್ರಿಯೆಯನ್ನು ಆರಂಭಿಸಿದೆ.
ಕಂಪನಿಯ ಜಾಗತಿಕ ಪುನರ್‌ರಚನಾ ಪ್ರಕ್ರಿಯೆಯ ಅಂಗವಾಗಿ ಈ ಕ್ರಮ ಕೈಗೊಳ್ಳಲಾಗಿದ್ದು, ಮೊದಲ ಹಂತವಾಗಿ ಬೆಂಗಳೂರು ಕೇಂದ್ರದಲ್ಲೇ ಲೇಆಫ್ ಜಾರಿಗೆ ಬಂದಿದೆ. ಭಾರತದಲ್ಲಿ ಸುಮಾರು 1,000ಕ್ಕೂ ಹೆಚ್ಚು ಉದ್ಯೋಗಗಳು ಕಡಿತಗೊಳ್ಳುವ ಭೀತಿ ಎದುರಾಗಿದೆ ಎಂದು ವರದಿಗಳು ತಿಳಿಸಿವೆ.
ಬೆಂಗಳೂರು ಕಚೇರಿಯಲ್ಲಿ ಆರಂಭವಾಗಿರುವ ಈ ವಜಾ ಪ್ರಕ್ರಿಯೆಯಲ್ಲಿ ಹೊಸದಾಗಿ ಸೇರಿದವರು ಮಾತ್ರವಲ್ಲದೆ, ದೀರ್ಘಕಾಲದಿಂದ ಸೇವೆ ಸಲ್ಲಿಸುತ್ತಿದ್ದ ಹಿರಿಯ ಇಂಜಿನಿಯರ್‌ಗಳಿಗೂ ಗೇಟ್‌ಪಾಸ್ ನೀಡಲಾಗಿದೆ. ಭಾರತದಲ್ಲಿ ಕ್ವಾಲ್ಕಾಮ್ ಬೆಂಗಳೂರು, ಹೈದರಾಬಾದ್, ಚೆನ್ನೈ ಹಾಗೂ ದೆಹಲಿ ಎನ್‌ಸಿಆರ್ ಕೇಂದ್ರಗಳಲ್ಲಿ ಸುಮಾರು 20,000ಕ್ಕೂ ಅಧಿಕ ಸಿಬ್ಬಂದಿಯನ್ನು ಹೊಂದಿದೆ. ಕಂಪನಿಯು ತನ್ನ ಜಾಗತಿಕ ಮಟ್ಟದ ಶೇಕಡಾ 7ರಷ್ಟು ಮಾನವ ಸಂಪನ್ಮೂಲವನ್ನು (ಸುಮಾರು 3,600 ಉದ್ಯೋಗಗಳು) ಕಡಿತಗೊಳಿಸಲು ಮುಂದಾಗಿದ್ದು, ಅದರ ಭಾಗವಾಗಿ ಭಾರತದಲ್ಲೂ ಈ ಹೊಡೆತ ಬಿದ್ದಿದೆ.
ಪರಿಹಾರ ಪ್ಯಾಕೇಜ್ (Severance Benefits): ಉದ್ಯೋಗ ಕಳೆದುಕೊಂಡ ಸಿಬ್ಬಂದಿಗೆ ಸಂಸ್ಥೆಯು ಅವರ ಸೇವಾ ಅವಧಿಗೆ ಅನುಗುಣವಾಗಿ ಮೂರು ತಿಂಗಳ ಮೂಲ ವೇತನವನ್ನು ಪರಿಹಾರವಾಗಿ (Severance Pay) ನೀಡುತ್ತಿದೆ ಎಂದು ತಿಳಿದುಬಂದಿದೆ. ಇದರೊಂದಿಗೆ, ನೋಟಿಸ್ ಅಥವಾ ಬಿಡುಗಡೆ ಪತ್ರಗಳಿಗೆ (Relieving documents) ಮೂರು ದಿನಗಳ ಒಳಗೆ ಸಹಿ ಹಾಕುವ ಉದ್ಯೋಗಿಗಳಿಗೆ ಹೆಚ್ಚುವರಿಯಾಗಿ ಒಂದು ತಿಂಗಳ ವೇತನ ನೀಡುವುದಾಗಿ ಆಫರ್ ನೀಡಲಾಗಿದೆ.
ಕಂಪನಿಯು ಈ ಪ್ರಕ್ರಿಯೆಯನ್ನು ಹಂತ ಹಂತವಾಗಿ ಮುಂದುವರಿಸಲಿದ್ದು, ಮುಂಬರುವ ಜನವರಿಯಲ್ಲಿ ಮತ್ತೊಂದು ಸುತ್ತಿನ ಉದ್ಯೋಗ ಕಡಿತ ನಡೆಯುವ ಸಾಧ್ಯತೆಯಿದೆ ಎಂದು ಮಾರುಕಟ್ಟೆ ವಿಶ್ಲೇಷಕರು ಅಂದಾಜಿಸಿದ್ದಾರೆ. ಜಾಗತಿಕವಾಗಿ ಸ್ಮಾರ್ಟ್‌ಫೋನ್ ಚಿಪ್ ಮಾರುಕಟ್ಟೆಯಲ್ಲಿನ ಮಂದಗತಿಯ ಬೇಡಿಕೆ ಹಾಗೂ ಕಾರ್ಯಕ್ಷಮತೆ ಆಧಾರಿತ ಪುನರ್‌ರಚನೆಯ ಕಾರಣದಿಂದ ಈ ಕಠಿಣ ನಿರ್ಧಾರ ತೆಗೆದುಕೊಳ್ಳಲಾಗಿದೆ ಎನ್ನಲಾಗಿದೆ. (ಕೃಪೆ: ಮನಿಕಂಟ್ರೋಲ್.ಕಾಮ್)
Join our WhatsApp Channel 
