ಚೆನ್ನೈ, ಸೆ.10 www.bengaluruwire.com: ಗ್ರಾಹಕರ ಹಿತದೃಷ್ಟಿಯಿಂದ ಚಿನ್ನಾಭರಣಗಳಿಗೆ ಹಾಲ್ಮಾರ್ಕ್ ಕಡ್ಡಾಯಗೊಳಿಸಲಾಗಿದ್ದರೂ ನಿಯಮ ಉಲ್ಲಂಘಿಸಿ ನಕಲಿ ಹಾಗೂ ಹಾಲ್ಮಾರ್ಕ್ ರಹಿತ ಆಭರಣ ಮಾರಾಟ ಮಾಡುತ್ತಿದ್ದ ಜ್ಯುವೆಲ್ಲರಿ ಮಳಿಗೆ ಮೇಲೆ ಅಧಿಕಾರಿಗಳು ಬಿಸಿ ಮುಟ್ಟಿಸಿದ್ದಾರೆ.
ತಮಿಳುನಾಡಿನ ಚೆನ್ನೈನಲ್ಲಿ ಭಾರತೀಯ ಗುಣಮಟ್ಟ ಬ್ಯೂರೋ (BIS) ಅಧಿಕಾರಿಗಳು ಮಿಂಚಿನ ಕಾರ್ಯಾಚರಣೆ ನಡೆಸಿ, ಯಾವುದೇ ಹಾಲ್ಮಾರ್ಕ್ ಇಲ್ಲದ 803.99 ಗ್ರಾಂ ತೂಕದ ಚಿನ್ನಾಭರಣಗಳನ್ನು ವಶಪಡಿಸಿಕೊಂಡಿದ್ದಾರೆ.
ಅಂಬತ್ತೂರಿನ ಮಳಿಗೆ ಮೇಲೆ ದಿಢೀರ್ ದಾಳಿ
ಸ್ಥಳೀಯ ಪೊಲೀಸರ ಸಹಯೋಗದೊಂದಿಗೆ ಚೆನ್ನೈನ ಅಂಬತ್ತೂರಿನಲ್ಲಿರುವ ಜ್ಯುವೆಲ್ಲರಿ ಮಳಿಗೆಯೊಂದರ ಮೇಲೆ ಬಿಐಎಸ್ ಚೆನ್ನೈ ಶಾಖಾ ಕಚೇರಿಯ ಅಧಿಕಾರಿಗಳು ಮತ್ತು ಸಿಬ್ಬಂದಿ ಈ ಶೋಧ ಕಾರ್ಯಾಚರಣೆ ನಡೆಸಿದ್ದಾರೆ. ಭಾರತೀಯ ಗುಣಮಟ್ಟ ಬ್ಯೂರೋ ಕಾಯ್ದೆ 2016ರ ಸೆಕ್ಷನ್ 28ರ ಅಡಿಯಲ್ಲಿ ಈ ಕ್ರಮ ಕೈಗೊಳ್ಳಲಾಗಿದೆ. ಗ್ರಾಹಕರಿಗೆ ಮಾರಾಟ ಮಾಡಲು ಪ್ರದರ್ಶಿಸಲಾಗಿದ್ದ ಆಭರಣಗಳಲ್ಲಿ ಅಧಿಕೃತ ಹಾಲ್ಮಾರ್ಕ್ ಇಲ್ಲದಿರುವುದು ತಪಾಸಣೆ ವೇಳೆ ಬೆಳಕಿಗೆ ಬಂದಿದೆ.
ವಶಪಡಿಸಿಕೊಂಡ ಒಡವೆಗಳ ವಿವರ:
ಅಧಿಕಾರಿಗಳು ಜಪ್ತಿ ಮಾಡಿದ 803.99 ಗ್ರಾಂ ಚಿನ್ನಾಭರಣಗಳಲ್ಲಿ ಕೆಳಗಿನವು ಸೇರಿವೆ:
ಮಾಂಗಲ್ಯ ಸರಗಳು (ತಾಳಿ): 175 (ಒಟ್ಟು ತೂಕ: 671.50 ಗ್ರಾಂ)
ಮಕ್ಕಳ ಬಳೆಗಳು: 12 (ಒಟ್ಟು ತೂಕ: 25.02 ಗ್ರಾಂ)
ಕಿವಿಯೋಲೆಗಳು (Earrings): 40 (ಒಟ್ಟು ತೂಕ: 86.14 ಗ್ರಾಂ)
ಲಾಕೆಟ್/ಪೆಂಡೆಂಟ್ಗಳು: 10 (ಒಟ್ಟು ತೂಕ: 21.33 ಗ್ರಾಂ)
ವಶಪಡಿಸಿಕೊಂಡ ಎಲ್ಲಾ ಆಭರಣಗಳನ್ನು ವಿಸ್ತೃತ ತನಿಖೆ ಹಾಗೂ ಮುಂದಿನ ಕಾನೂನು ಕ್ರಮಗಳಿಗಾಗಿ ಮುಟ್ಟುಗೋಲು ಹಾಕಿಕೊಳ್ಳಲಾಗಿದ್ದು, ತಪ್ಪಿತಸ್ಥರ ವಿರುದ್ಧ ಬಿಐಎಸ್ ಕಾಯ್ದೆಯನ್ವಯ ಕಠಿಣ ಕಾನೂನು ಕ್ರಮ ಕೈಗೊಳ್ಳಲಾಗುತ್ತಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ಗ್ರಾಹಕರಿಗೆ ಅಧಿಕಾರಿಗಳ ಸಲಹೆ:
ಈ ಕುರಿತು ಮಾಹಿತಿ ನೀಡಿರುವ ಬಿಐಎಸ್ ಚೆನ್ನೈ ಶಾಖೆಯ ಮುಖ್ಯಸ್ಥ ಎಸ್.ಡಿ. ದಯಾನಂದ್ ಅವರು, “ಮಾರುಕಟ್ಟೆಯಲ್ಲಿ ಕಳಪೆ ಗುಣಮಟ್ಟದ ಆಭರಣಗಳ ಮಾರಾಟ ತಡೆಯಲು ಮತ್ತು ಬಿಐಎಸ್ ಸ್ಟ್ಯಾಂಡರ್ಡ್ ಮಾರ್ಕ್ ದುರ್ಬಳಕೆ ತಡೆಯಲು ಇಂತಹ ಕಣ್ಗಾವಲು ಕಾರ್ಯಾಚರಣೆ ಮುಂದುವರಿಯಲಿದೆ” ಎಂದು ಎಚ್ಚರಿಸಿದ್ದಾರೆ.
ಚಿನ್ನದ ಆಭರಣಗಳನ್ನು ಖರೀದಿಸುವಾಗ ಗ್ರಾಹಕರು ಬಿಐಎಸ್ ಲೋಗೋ (BIS Logo), ಚಿನ್ನದ ಶುದ್ಧತೆ ಮತ್ತು ಆರು ಅಂಕಿಯ ‘HUID’ (ಹಾಲ್ಮಾರ್ಕ್ ಯುನಿಕ್ ಐಡೆಂಟಿಫಿಕೇಶನ್) ಸಂಖ್ಯೆಯನ್ನು ಪರಿಶೀಲಿಸುವುದು ಕಡ್ಡಾಯವಾಗಿದೆ. ಗ್ರಾಹಕರು ‘BIS CARE’ ಮೊಬೈಲ್ ಆ್ಯಪ್ ಮೂಲಕ ಈ HUID ಸಂಖ್ಯೆಯನ್ನು ನಮೂದಿಸಿ ಚಿನ್ನದ ಅಸಲೀಯತೆಯನ್ನು ಸುಲಭವಾಗಿ ಪರಿಶೀಲಿಸಬಹುದು ಎಂದು ಬಿಐಎಸ್ ಸ್ಪಷ್ಟಪಡಿಸಿದೆ. (ಮುಖ್ಯಚಿತ್ರ ಎಐ ರಚಿತ ಪ್ರಾತಿನಿಧಿಕ ಚಿತ್ರ)
Join our WhatsApp Channel
