ಬೆಂಗಳೂರು, ಸೆ.10 www.bengaluruwire.com : ರಾಜ್ಯದ ಬಸ್ ಪ್ರಯಾಣಿಕರಿಗೆ ಕರ್ನಾಟಕ ರಸ್ತೆ ಸಾರಿಗೆ ಸಂಸ್ಥೆ (KSRTC) ಭರ್ಜರಿ ಡಿಜಿಟಲ್ ಕೊಡುಗೆ ನೀಡಿದೆ. ಇನ್ಮುಂದೆ ಪ್ರಯಾಣಿಕರು ಕೇವಲ ವಾಟ್ಸಾಪ್ ಸಂದೇಶ ಕಳುಹಿಸುವ ಮೂಲಕವೇ ರಾಜ್ಯದ ಪ್ರಮುಖ ಸಾರಿಗೆ ನಿಗಮಗಳ ಬಸ್ ಟಿಕೆಟ್ಗಳನ್ನು ಸುಲಭವಾಗಿ ಮುಂಗಡ ಕಾಯ್ದಿರಿಸಬಹುದು.
ಸರ್ಕಾರದ 100 ದಿನಗಳ ಸಂಭ್ರಮಾಚರಣೆಯ ಅಂಗವಾಗಿ ಈ ವಿನೂತನ “ಕರ್ನಾಟಕ ಮೊಬಿಲಿಟಿ ಆಪ್” ಹಾಗೂ ವಾಟ್ಸಾಪ್ ಟಿಕೆಟಿಂಗ್ ವ್ಯವಸ್ಥೆಯನ್ನು ಲೋಕಾರ್ಪಣೆಗೊಳಿಸಲಾಗಿದೆ.
ರಾಜ್ಯದ ಪ್ರಮುಖ ನಾಲ್ಕು ನಿಗಮಗಳಾದ ಕೆಎಸ್ಆರ್ಟಿಸಿ (KSRTC), ವಾಯುವ್ಯ ಸಾರಿಗೆ (NWKRTC), ಕಲ್ಯಾಣ ಕರ್ನಾಟಕ ಸಾರಿಗೆ (KKRTC) ಹಾಗೂ ಬಿಎಂಟಿಸಿ (BMTC) ಸೇವೆಗಳನ್ನು ಒಂದೇ ಸೂರಿನಡಿ ತರುವ ಮಹತ್ವದ ಉದ್ದೇಶದಿಂದ ಈ ಯೋಜನೆ ಜಾರಿಗೆ ಬಂದಿದೆ.
ಒಂದೇ ವೇದಿಕೆಯಲ್ಲಿ 4 ಸಾರಿಗೆ ಸಂಸ್ಥೆಗಳು:
ನೂತನ ಕರ್ನಾಟಕ ಮೊಬಿಲಿಟಿ ಆಪ್ ಬಳಕೆದಾರ ಸ್ನೇಹಿ ಇಂಟರ್ಫೇಸ್ ಹೊಂದಿದ್ದು, ಪ್ರಯಾಣಿಕರಿಗೆ ಸುಗಮ ಅನುಭವ ನೀಡುತ್ತದೆ.
ಸುರಕ್ಷಿತ ಲಾಗಿನ್: ಪ್ರಯಾಣಿಕರ ಗುರುತಿನ ದೃಢೀಕರಣ, ಬುಕ್ಕಿಂಗ್ ಹಿಸ್ಟರಿ ಮತ್ತು ವಹಿವಾಟು ನಿರ್ವಹಣೆ ಸುಲಭ.
ದೂರು ಪರಿಹಾರ ವ್ಯವಸ್ಥೆ: ನಾಲ್ಕೂ ಸಂಸ್ಥೆಗಳಿಗೆ ಸಂಬಂಧಿಸಿದ ದೂರುಗಳನ್ನು ಒಂದೇ ಆಪ್ನಲ್ಲಿ ದಾಖಲಿಸಿ, ಪರಿಹಾರದ ಪ್ರಗತಿಯನ್ನು ಟ್ರ್ಯಾಕ್ ಮಾಡಬಹುದು.
ಡಿಜಿಟಲ್ ಮಾಸಿಕ ಪಾಸ್: ಶೀಘ್ರದಲ್ಲೇ ಆನ್ಲೈನ್ ಮೂಲಕ ಬಸ್ ಪಾಸ್ ಬುಕ್ಕಿಂಗ್, ನವೀಕರಣ ಹಾಗೂ QR ಕೋಡ್ ಆಧಾರಿತ ಡಿಜಿಟಲ್ ಪರಿಶೀಲನಾ ಸೌಲಭ್ಯ ಜಾರಿಯಾಗಲಿದೆ.
ವಾಟ್ಸಾಪ್ ಮೂಲಕ ಬಸ್ ಟಿಕೆಟ್ ಬುಕ್ ಮಾಡುವುದು ಹೇಗೆ?:
ಪ್ರಯಾಣಿಕರು ತಮ್ಮ ಮೊಬೈಲ್ನಿಂದ +91 6364940880 ಸಂಖ್ಯೆಗೆ ಸಂದೇಶ ಕಳುಹಿಸುವ ಮೂಲಕ ನೇರವಾಗಿ KSRTC, NWKRTC ಮತ್ತು KKRTC ಬಸ್ ಟಿಕೆಟ್ಗಳನ್ನು ಬುಕ್ ಮಾಡಬಹುದು.
* ಮೊಬೈಲ್ನಲ್ಲಿ +91 6364940880 ಸಂಖ್ಯೆಗೆ “Hi” ಎಂದು ಸಂದೇಶ ಕಳುಹಿಸಿ.
* ಚಾಟ್ಬಾಟ್ ನೀಡುವ ಮಾರ್ಗದರ್ಶನದಂತೆ ಹೊರಡುವ ಸ್ಥಳ, ತಲುಪುವ ಸ್ಥಳ ಮತ್ತು ದಿನಾಂಕ ನಮೂದಿಸಿ.
* ಲಭ್ಯವಿರುವ ಬಸ್ಗಳ ಪಟ್ಟಿಯಿಂದ ನಿಮ್ಮ ಆದ್ಯತೆಯ ಬಸ್ ಮತ್ತು ಸೀಟು ಆಯ್ಕೆ ಮಾಡಿ.
* ಪ್ರಯಾಣಿಕರ ವಿವರಗಳನ್ನು ಭರ್ತಿ ಮಾಡಿ.
* ಯುಪಿಐ (UPI), ಕ್ರೆಡಿಟ್/ಡೆಬಿಟ್ ಕಾರ್ಡ್ ಅಥವಾ ವಾಲೆಟ್ಗಳ ಮೂಲಕ ಹಣ ಪಾವತಿಸಿ.
* ಪಾವತಿ ಮುಗಿಯುತ್ತಿದ್ದಂತೆ ಇ-ಟಿಕೆಟ್ ಮತ್ತು ದೃಢೀಕರಣ ಸಂದೇಶ ವಾಟ್ಸಾಪ್ ಹಾಗೂ ಇ-ಮೇಲ್ಗೆ ತಕ್ಷಣವೇ ಬರಲಿದೆ.
ಟಿಕೆಟ್ ರದ್ದುಗೊಳಿಸುವ ವಿಧಾನ:
ಬುಕ್ ಮಾಡಿದ ಟಿಕೆಟ್ ರದ್ದುಪಡಿಸಬೇಕಿದ್ದರೆ, ಅದೇ ವಾಟ್ಸಾಪ್ ಚಾಟ್ನಲ್ಲಿ ಸಂದೇಶ ಕಳುಹಿಸಿ ‘Ticket Cancellation’ ಆಯ್ಕೆಯನ್ನು ಆರಿಸಿಕೊಳ್ಳಬೇಕು. ಬಳಿಕ PNR ಸಂಖ್ಯೆ, ಮೊಬೈಲ್ ಸಂಖ್ಯೆ ಹಾಗೂ ವಹಿವಾಟು ಪಾಸ್ವರ್ಡ್ (Transaction Password) ನಮೂದಿಸಿದರೆ ರದ್ದತಿ ಪ್ರಕ್ರಿಯೆ ಪೂರ್ಣಗೊಳ್ಳುತ್ತದೆ.
ಸಾರ್ವಜನಿಕ ಸಾರಿಗೆಯನ್ನು ತಂತ್ರಜ್ಞಾನ ಆಧಾರಿತವಾಗಿಸುವ ನಿಟ್ಟಿನಲ್ಲಿ ಈ ಕ್ರಮ ಕೈಗೊಳ್ಳಲಾಗಿದೆ. ಹೆಚ್ಚಿನ ಮಾಹಿತಿಗೆ ಸಹಾಯವಾಣಿ 080-26252625 (24×7) ಅಥವಾ AWATAR ಸೆಲ್ 7760990034 / 7760990035 ಸಂಖ್ಯೆಗಳನ್ನು ಸಂಪರ್ಕಿಸಬಹುದು.
Join our WhatsApp Channel
