ಬೆಂಗಳೂರು, ಅ.27 www.bengaluruwire.com: ಜನರ ರಕ್ತ-ಬೆವರ ಹನಿಗಳಿಂದ ಹರಿದುಬಂದ ತೆರಿಗೆ ಹಣಕ್ಕೆ ಬೆಂಗಳೂರು ಅಭಿವೃದ್ಧಿ ಪ್ರಾಧಿಕಾರ (ಬಿಡಿಎ) ಕೊಡುವ ‘ಅಭಿವೃದ್ಧಿ ಬೆಲೆ’ ಇದೇನಾ?
ಬರೋಬ್ಬರಿ ₹671 ಕೋಟಿ ವೆಚ್ಚದಲ್ಲಿ ನಾಡಪ್ರಭು ಕೆಂಪೇಗೌಡ ಬಡಾವಣೆ (NPKL) ವ್ಯಾಪ್ತಿಯಲ್ಲಿ ನಿರ್ಮಾಣವಾದ 10.7 ಕಿ.ಮೀ ಉದ್ದದ, 10 ಪಥಗಳ ‘ಎಸ್.ಎಂ. ಕೃಷ್ಣ ಪ್ರಮುಖ ಅಪಧಮನಿ ರಸ್ತೆ’ (Major Arterial Road) ಕೇವಲ ನಾಲ್ಕು ತಿಂಗಳಲ್ಲಿ ಜಲ್ಲಿ-ಡಾಂಬರು ಕಿತ್ತುಬಂದು ಅಕ್ಷರಶಃ ‘ಡೆತ್ ಟ್ರ್ಯಾಪ್’ ಆಗಿ ಮಾರ್ಪಟ್ಟಿದೆ.
‘ವಿಶ್ವದರ್ಜೆಯ ರಸ್ತೆ’ ಎಂದು ಬಿಂಬಿಸಿ, ರಾಜಕೀಯ ಲಾಭಕ್ಕಾಗಿ ತರಾತುರಿಯಲ್ಲಿ ಉದ್ಘಾಟನೆಗೊಂಡ ಈ ಹೆದ್ದಾರಿ, ಇಂದು ನಗರದ ಅತ್ಯಂತ ದುಬಾರಿ ಕಳಪೆ ಕಾಮಗಾರಿಯ ಜ್ವಲಂತ ನಿದರ್ಶನವಾಗಿ ಜನರ ಜೀವಕ್ಕೆ ಎರವಾಗುತ್ತಿದೆ.
ಜಲ್ಲಿ ಎದ್ದ ರಸ್ತೆ, ಉರುಳಿಬಿದ್ದ ವಾಹನ: 4 ತಿಂಗಳಿಗೆ ಕಿತ್ತುಹೋದ ಬಿಡಿಎ ಮಾನ!
ಅಕ್ಟೋಬರ್ 23ರಂದು ಈ 300 ಅಡಿ ಅಗಲದ ರಸ್ತೆಯಲ್ಲಿ ಬಿದ್ದಿದ್ದ ಬೃಹತ್ ಕಂದಕದಂತ ರಸ್ತೆಗುಂಡಿಗೆ ಸಿಲುಕಿ ವಾಹನವೊಂದು ನಿಯಂತ್ರಣ ತಪ್ಪಿ ಪಲ್ಟಿಯಾಗಿದೆ. ಇದನ್ನು ಸ್ಥಳೀಯ ನಿವಾಸಿಗಳು ಸಾಮಾಜಿಕ ಜಾಲತಾಣ ‘ಎಕ್ಸ್’ನಲ್ಲಿ ಅ.25ರಂದು ಎತ್ತಿ ತೋರಿಸಿ, “ಹೊಸ ರಸ್ತೆ ಸಾವಿನ ಬಲೆಯಾಗಿದೆ” ಎಂದು ಆಕ್ರೋಶ ಹೊರಹಾಕಿದ ಮೇಲಷ್ಟೇ ಕುಂಭಕರ್ಣ ನಿದ್ದೆಯಲ್ಲಿದ್ದ ಬಿಡಿಎ ಕಣ್ಣು ತೆರೆದಿದೆ.
ಅ.27ರ ಬೆಳಗ್ಗೆಯೇ ಬಿಡಿಎ ಅಧಿಕಾರಿಗಳು ರೋಡ್ ಪ್ಯಾಚಿಂಗ್ ಯಂತ್ರಗಳು ಮತ್ತು ಡಾಂಬರು ಮಿಕ್ಸರ್ ಜೊತೆಗೆ ಸ್ಥಳಕ್ಕೆ ಧಾವಿಸಿ ಗುಂಡಿ ಮುಚ್ಚುವ ‘ತೇಪೆ ಹಚ್ಚುವ’ ಕಸರತ್ತು ಆರಂಭಿಸಿದ್ದಾರೆ. ಆದರೆ ನಾಗರಿಕರ ನೇರ ಪ್ರಶ್ನೆ: ₹671 ಕೋಟಿ ಖರ್ಚು ಮಾಡಿದ ಹೆದ್ದಾರಿಗೆ ನಾಲ್ಕೇ ತಿಂಗಳಲ್ಲಿ ತೇಪೆ ಹಚ್ಚುವ ದೌರ್ಭಾಗ್ಯ ಏಕೆ ಬಂತು? ಇದು ತಾಂತ್ರಿಕ ದೋಷವೋ ಅಥವಾ ಬಿಡಿಎ ಎಂಜಿನಿಯರ್‌ಗಳು ಮತ್ತು ಗುತ್ತಿಗೆದಾರರ ಜೇಬು ಸೇರಿದ ‘ಕಮಿಷನ್’ ಫಲಿತಾಂಶವೋ?
ಕಳಪೆ ಕಾಮಗಾರಿ: ಬಿಡಿಎ ಗುತ್ತಿಗೆದಾರರ ರಹಸ್ಯ ಒಪ್ಪಂದ?:
ಒಂದು ದಶಪಥ ಹೆದ್ದಾರಿಯ ಮೂಲಭೂತ ಗುಣಮಟ್ಟ ಪರೀಕ್ಷೆ, ಸಾಯಿಲ್ ಕಾಂಪ್ಯಾಕ್ಷನ್ ಮತ್ತು ಬಿಟುಮಿನ್ ಸಾಂದ್ರತೆಯ ಮಾನದಂಡಗಳನ್ನು ಗಾಳಿಗೆ ತೂರದೇ ಹೋಗಿದ್ದರೆ ಇಷ್ಟು ಬೇಗ ರಸ್ತೆ ಕರಗಿಹೋಗಲು ಸಾಧ್ಯವೇ ಇಲ್ಲ. ಮಳೆಗಾಲದ ನೆಪ ಹೇಳಿ ಜಾರಿಕೊಳ್ಳುವ ಬಿಡಿಎ ಅಧಿಕಾರಿಗಳ ಸಬೂಬು ಇಲ್ಲಿ ನಡೆಯುವುದಿಲ್ಲ. ಏಕೆಂದರೆ, ಸಾಮಾನ್ಯ ಮಳೆಗೇ ಜಲ್ಲಿ ಕಿತ್ತು ಧೂಳು ಹಾರುವ ಮಟ್ಟಕ್ಕೆ ರಸ್ತೆ ಹದಗೆಟ್ಟಿದೆ ಎಂದರೆ, ಡಾಂಬರೀಕರಣದ ನೆಪದಲ್ಲಿ ಕೇವಲ ತೆಳು ಪದರವನ್ನು ಸುರಿದು ಕೋಟಿ ಕೋಟಿ ಹಣ ಗುಳುಂ ಮಾಡಲಾಗಿದೆ ಎಂಬುದು ಸ್ಪಷ್ಟ.
ಸಾರ್ವಜನಿಕ ಆಕ್ರೋಶ: ಅಧಿಕಾರಿಗಳ ವಿರುದ್ಧ ಕ್ರಿಮಿನಲ್ ಕೇಸ್ ದಾಖಲಾಗಲಿ!:
“ನಮ್ಮ ಬಡಾವಣೆಗೆ ಸಂಪರ್ಕ ಕಲ್ಪಿಸುವ ರಸ್ತೆಯನ್ನು ನಂಬಿ ಹೋದರೆ ಆಸ್ಪತ್ರೆ ಸೇರುವುದು ಗ್ಯಾರಂಟಿ. ಗುತ್ತಿಗೆದಾರರಿಗೆ ಕಪ್ಪುಪಟ್ಟಿ ಹಾಕಿ, ಕಾಮಗಾರಿಗೆ ಅನುಮೋದನೆ ನೀಡಿದ ಅಧಿಕಾರಿಗಳ ವಿರುದ್ಧ ಎಫ್‌ಐಆರ್ ದಾಖಲಿಸಬೇಕು” ಎಂದು ಕೆಂಪೇಗೌಡ ಬಡಾವಣೆಯ ನಿವಾಸಿಗಳು ಹಿಡಿಶಾಪ ಹಾಕುತ್ತಿದ್ದಾರೆ.
ಕೇವಲ ಗುಂಡಿ ಮುಚ್ಚುವ ತಾತ್ಕಾಲಿಕ ನಾಟಕದಿಂದ ಈ ಹಗರಣ ಮುಚ್ಚಿಹೋಗಲು ಸಾಧ್ಯವಿಲ್ಲ. ₹671 ಕೋಟಿ ಯೋಜನೆಗೆ ಸಂಬಂಧಿಸಿದ ಸಂಪೂರ್ಣ ಗುಣಮಟ್ಟ ಪರಿಶೀಲನೆ (Third-Party Audit) ನಡೆಯಬೇಕು ಮತ್ತು ದುರಸ್ತಿ ವೆಚ್ಚವನ್ನು ಸಂಬಂಧಪಟ್ಟ ಗುತ್ತಿಗೆದಾರ ಹಾಗೂ ಭ್ರಷ್ಟ ಅಧಿಕಾರಿಗಳ ವೇತನದಿಂದಲೇ ವಸೂಲಿ ಮಾಡಬೇಕೆಂಬ ಕೂಗು ಈಗ ಬೆಂಗಳೂರಿನಾದ್ಯಂತ ತೀವ್ರಗೊಂಡಿದೆ.
Join our WhatsApp Channel
