ಬೆಂಗಳೂರು, ಅ.23 www.bengaluruwire.com: ಜಾಗತಿಕ ಮಟ್ಟದಲ್ಲಿ ‘ಸಿಲಿಕಾನ್ ಸಿಟಿ’ ಎಂದು ಬೀಗುತ್ತಿರುವ ಬೆಂಗಳೂರಿನಲ್ಲಿ, ನೆಲದ ಮಕ್ಕಳಿಗೇ ಉದ್ಯೋಗವಿಲ್ಲದಂತಾಗಿದೆಯೇ? ಹೌದು ಎನ್ನುತ್ತಿವೆ ಇತ್ತೀಚಿನ ಬೆಳವಣಿಗೆಗಳು.
ಅಭ್ಯರ್ಥಿಗಳ ರೆಸ್ಯೂಮ್‌ನಲ್ಲಿ (Resume) ಮಾತೃಭಾಷೆ ‘ಕನ್ನಡ’ ಎಂದು ನಮೂದಿಸಿದ್ದರೆ ಸಾಕು, ಅಂತಹ ಅರ್ಜಿಗಳನ್ನು ಮುಲಾಜಿಲ್ಲದೆ ಕಸದ ಬುಟ್ಟಿಗೆ ಎಸೆಯುವ ಅಘೋಷಿತ ನೀತಿಯೊಂದು ರಾಜ್ಯದ ಖಾಸಗಿ ಕಂಪನಿಗಳಲ್ಲಿ ಸದ್ದಿಲ್ಲದೆ ನಡೆಯುತ್ತಿದೆ. ಹೊರ ರಾಜ್ಯಗಳಿಗೆ ತೆರಳಿ ಅಲ್ಲಿ ಕಡಿಮೆ ಸಂಬಳಕ್ಕೆ ಒಪ್ಪುವ ಜಸ್ಟ್ ಪಾಸಾದವರಿಗೆ ನಮ್ಮ ರಾಜ್ಯದ ಕಂಪನಿಗಳು ಕೆಲಸಕ್ಕೆ ನೇಮಿಸಿಕೊಂಡು, ಪ್ರತಿಭಾವಂತ ಕನ್ನಡಿಗ ಅಭ್ಯರ್ಥಿಗಳಿಗೆ ಅನ್ಯಾಯ ಮಾಡುತ್ತಿದ್ದಾರೆ. ಈ ವಿಷಯ ರಾಜ್ಯದ ಕಾರ್ಮಿಕ ಇಲಾಖೆಯ ಅಧಿಕಾರಿಗಳಿಗೆ ತಿಳಿದಿದ್ದರೂ, ಸದ್ಯ ಏನೂ ಮಾಡಲಾರದ ಹಂತಕ್ಕೆ ಬಂದು ತಲುಪಿದೆ ಎಂಬ ಆಘಾತಕಾರಿ ವಿಷಯ ಕೇಳಿಬಂದಿದೆ.
ಈ ಕುರಿತು ಮಹಿಳೆಯೊಬ್ಬರು ಸಾಮಾಜಿಕ ಜಾಲತಾಣದಲ್ಲಿ (Instagram) ಎತ್ತಿರುವ ಧ್ವನಿ ಈಗ ವೈರಲ್ ಆಗಿದ್ದು, ಸರ್ಕಾರದ ಬಣ್ಣ ಬಯಲು ಮಾಡಿದೆ. ಕನ್ನಡಿಗರ ಈ ದಯನೀಯ ಸ್ಥಿತಿಯ ಬಗ್ಗೆ ತೀವ್ರ ಆಕ್ರೋಶ ವ್ಯಕ್ತಪಡಿಸಿರುವ ಆ ಮಹಿಳೆ, ಆಡಳಿತಾರೂಢ ನಾಯಕರ ಕಣ್ಣು ತೆರೆಸುವಂತಹ ಚಾಟಿ ಏಟು ನೀಡಿದ್ದಾರೆ.
ಕನ್ನಡ ನೆಲ, ಜಲ ಬೇಕು; ಆದರೆ ಕನ್ನಡಿಗರು ಬೇಡವೇ?:
ರಾಜ್ಯದ ಭೂಮಿ, ನೀರು, ವಿದ್ಯುತ್ ಹಾಗೂ ತೆರಿಗೆ ವಿನಾಯಿತಿಗಳನ್ನು ಪಡೆದು ಇಲ್ಲಿ ಸಾಮ್ರಾಜ್ಯ ಕಟ್ಟಿಕೊಂಡಿರುವ ಬಹುರಾಷ್ಟ್ರೀಯ ಹಾಗೂ ಖಾಸಗಿ ಕಂಪನಿಗಳಿಗೆ ಈಗ ಕನ್ನಡಿಗರೇ ಅಸ್ಪೃಶ್ಯರಾಗಿದ್ದಾರೆ. “ರೆಸ್ಯೂಮ್‌ನಲ್ಲಿ ಕನ್ನಡ ಎಂದಿದ್ದರೆ ಕೆಲಸ ಕೊಡಲ್ಲ” ಎಂಬ ಕೂಗು ಕೇವಲ ಆರೋಪವಲ್ಲ, ಇದು ಬೆಂಗಳೂರಿನ ಕಾರ್ಪೊರೇಟ್ ವಲಯದಲ್ಲಿ ಬೇರೂರಿರುವ ‘ಭಾಷಾ ದ್ವೇಷ’ ಮತ್ತು ‘ಪ್ರಾದೇಶಿಕ ತಾರತಮ್ಯ’ದ ಕರಾಳ ಮುಖ.
ಹೊರರಾಜ್ಯದವರ ಲಾಬಿಗೆ ಮಣಿದು ಸ್ಥಳೀಯ ಪ್ರತಿಭಾವಂತರನ್ನು ವ್ಯವಸ್ಥಿತವಾಗಿ ಹೊರಗಿಡುವ ಷಡ್ಯಂತ್ರ ಎಗ್ಗಿಲ್ಲದೆ ನಡೆಯುತ್ತಿದ್ದರೂ, ನಮ್ಮನ್ನಾಳುವ ಸರ್ಕಾರ ಮಾತ್ರ ಕಣ್ಣು ಮುಚ್ಚಿ ಕುಳಿತಿರುವುದು ದುರಂತ.
ಡಿ.ಕೆ. ಶಿವಕುಮಾರ್ ಅವರೇ, ಟೌನ್‌ಶಿಪ್ ಇರಲಿ; ಮೊದಲು ಇಲ್ಲಿನ ಅನ್ಯಾಯ ಸರಿಪಡಿಸಿ:
ಬಿಡದಿಯಲ್ಲಿ ಬೃಹತ್ ಟೌನ್‌ಶಿಪ್ ನಿರ್ಮಿಸಿ ಲಕ್ಷಾಂತರ ಉದ್ಯೋಗ ಸೃಷ್ಟಿಸುತ್ತೇವೆ ಎಂದು ಭರವಸೆ ನೀಡುತ್ತಿರುವ ಡಿ.ಕೆ. ಶಿವಕುಮಾರ್ ಅವರ ಹೇಳಿಕೆಯನ್ನು ವೈರಲ್ ವಿಡಿಯೋದಲ್ಲಿ ಮಹಿಳೆಯು ಪ್ರಶ್ನಿಸಿದ್ದಾರೆ. “ಹೊಸ ಟೌನ್‌ಶಿಪ್ ಮಾಡಿ ಉದ್ಯೋಗ ಕೊಡುವುದು ಆಮೇಲಿರಲಿ, ಮೊದಲು ಈಗಾಗಲೇ ರಾಜ್ಯದಲ್ಲಿ ತಲೆಎತ್ತಿರುವ ಸಾವಿರಾರು ಖಾಸಗಿ ಕಂಪನಿಗಳಲ್ಲಿ ಕನ್ನಡಿಗರಿಗೆ ಆಗುತ್ತಿರುವ ಘೋರ ಅನ್ಯಾಯವನ್ನು ತಡೆಯಿರಿ” ಎಂದು ನೇರವಾಗಿ ಹೇಳಿದ್ದಾರೆ. ಃಃಃ
ಇರುವ ಕಂಪನಿಗಳಲ್ಲೇ ಕನ್ನಡಿಗರಿಗೆ ಉದ್ಯೋಗ ಕೊಡಿಸಲು ಸಾಧ್ಯವಾಗದಿದ್ದರೆ, ಹೊಸ ಟೌನ್‌ಶಿಪ್ ನಿರ್ಮಿಸಿ ಯಾರಿಗೆ ಮಣೆ ಹಾಕುತ್ತೀರಿ? ಅಲ್ಲಿಯೂ ಹೊರರಾಜ್ಯದವರನ್ನೇ ತುಂಬುತ್ತೀರಾ? ಎಂಬುದು ಸದ್ಯ ಕನ್ನಡಿಗರ ಮುಂದಿರುವ ಮಿಲಿಯನ್ ಡಾಲರ್ ಪ್ರಶ್ನೆಯಾಗಿದೆ.
ಖಾಸಗಿ ಕಂಪನಿಗಳ ‘ಕನ್ನಡ ವಿರೋಧಿ’ ಧೋರಣೆಗೆ ಕಡಿವಾಣ ಎಂದು?:
ಸರೋಜಿನಿ ಮಹಿಷಿ ವರದಿ ಜಾರಿಯಾಗಬೇಕು, ಖಾಸಗಿ ವಲಯದಲ್ಲಿ ಕನ್ನಡಿಗರಿಗೆ ಮೀಸಲಾತಿ ಸಿಗಬೇಕು ಎಂಬ ಕೂಗು ದಶಕಗಳಿಂದ ಕೇಳಿಬರುತ್ತಲೇ ಇದೆ. ಇತ್ತೀಚೆಗೆ ಸರ್ಕಾರ ಖಾಸಗಿ ವಲಯದ ಮೀಸಲಾತಿ ವಿಧೇಯಕವನ್ನು ತಂದು, ಉದ್ಯಮಿಗಳ ಒತ್ತಡಕ್ಕೆ ಮಣಿದು ತಕ್ಷಣವೇ ಹಿಂದೆ ಸರಿದಿದ್ದು ಸರ್ಕಾರದ ಇಚ್ಛಾಶಕ್ತಿಯ ಕೊರತೆಗೆ ಹಿಡಿದ ಕೈಗನ್ನಡಿ.
ಅಭಿವೃದ್ಧಿ ಎಂದರೆ ಕೇವಲ ರಿಯಲ್ ಎಸ್ಟೇಟ್ ಮತ್ತು ಟೌನ್‌ಶಿಪ್‌ಗಳ ನಿರ್ಮಾಣವಲ್ಲ; ನೆಲದ ಭಾಷಿಕರಿಗೆ ಸ್ವಾಭಿಮಾನದ ಬದುಕು ಕಟ್ಟಿಕೊಡುವುದು. ಇನ್ನಾದರೂ ಸರ್ಕಾರ ಎಚ್ಚೆತ್ತುಕೊಂಡು ಖಾಸಗಿ ಕಂಪನಿಗಳ ಈ ‘ಕನ್ನಡ ವಿರೋಧಿ’ ಧೋರಣೆಗೆ ಕಡಿವಾಣ ಹಾಕದಿದ್ದರೆ, ಕನ್ನಡಿಗರು ತಮ್ಮದೇ ನಾಡಿನಲ್ಲಿ ನಿರಾಶ್ರಿತರಾಗುವ ದಿನ ದೂರವಿಲ್ಲ. (ಚಿತ್ರಕೃಪೆ: ಜೆಮಿನಿ ಎಐ)
Join our WhatsApp Channel
