ಬೆಂಗಳೂರು, ಅ.27 www.bengaluruwire.com: ರಾಜ್ಯದ ಸರ್ಕಾರಿ ಇಂಗ್ಲಿಷ್ ಮಾಧ್ಯಮ ಶಾಲೆಗಳಲ್ಲಿ ಕಲಿಯುತ್ತಿರುವ ವಿದ್ಯಾರ್ಥಿಗಳಲ್ಲಿ ಕಲಿಕೆಯ ಗುಣಮಟ್ಟ ನಿರೀಕ್ಷಿತ ಮಟ್ಟದಲ್ಲಿಲ್ಲ ಎಂದು ಕನ್ನಡ ಅಭಿವೃದ್ಧಿ ಪ್ರಾಧಿಕಾರ (ಕೆಡಿಎ) ನಡೆಸಿರುವ ಸಮಗ್ರ ಅಧ್ಯಯನ ವರದಿ ತಿಳಿಸಿದೆ.
ಕೇವಲ ಬೋಧನಾ ಮಾಧ್ಯಮವನ್ನು ಇಂಗ್ಲಿಷ್‌ಗೆ ಬದಲಾಯಿಸುವುದರಿಂದಲೇ ಭಾಷಾ ಪ್ರಾವೀಣ್ಯ ಸಾಧ್ಯವಿಲ್ಲ; ಮಾತೃಭಾಷೆಯ ಬಲವಾದ ಅಡಿಪಾಯವಿಲ್ಲದೆ ಇಂಗ್ಲಿಷ್ ಕಲಿಯುವುದು ಕಷ್ಟಕರ ಎಂದು ಪ್ರಾಧಿಕಾರದ ಅಧ್ಯಕ್ಷ ಡಾ. ಪುರುಷೋತ್ತಮ ಬಿಳಿಮಲೆ ಎಚ್ಚರಿಸಿದ್ದಾರೆ.
2019-20ನೇ ಶೈಕ್ಷಣಿಕ ಸಾಲಿನಲ್ಲಿ ಇಂಗ್ಲಿಷ್ ಮಾಧ್ಯಮ ಆರಂಭಿಸಲಾದ ಆಯ್ದ ಸರ್ಕಾರಿ ಶಾಲೆಗಳ 6 ಮತ್ತು 7ನೇ ತರಗತಿ ವಿದ್ಯಾರ್ಥಿಗಳನ್ನು ಈ ಅಧ್ಯಯನಕ್ಕೆ ಒಳಪಡಿಸಲಾಗಿತ್ತು. ಶಿಕ್ಷಣ ತಜ್ಞರಾದ ಡಾ. ಜಿ. ಎಸ್. ಜಯದೇವ ಹಾಗೂ ಡಾ. ಕೃಷ್ಣಮೂರ್ತಿ ಹನೂರು ಅವರ ಸಹಯೋಗದಲ್ಲಿ ಆಲಿಸುವಿಕೆ, ಮಾತನಾಡುವಿಕೆ, ಓದುವಿಕೆ ಮತ್ತು ಬರವಣಿಗೆ (LSRW) ಕೌಶಲಗಳನ್ನು ಆಧರಿಸಿ ಈ ಮೌಲ್ಯಮಾಪನ ಸಿದ್ಧಪಡಿಸಲಾಗಿದೆ.
ಕೆಡಿಎ ವರದಿಯ ಪ್ರಮುಖ ಮುಖ್ಯಾಂಶಗಳು:
ಸಂವಹನ ಹಾಗೂ ಆತ್ಮವಿಶ್ವಾಸದ ಕೊರತೆ: ತರಗತಿಯ ಹೊರಗೆ ಇಂಗ್ಲಿಷ್ ಒಡನಾಟವಿಲ್ಲದ ಕಾರಣ ಮಕ್ಕಳು ಕೇವಲ ಒಂದೇ ಪದದಲ್ಲಿ ಉತ್ತರಿಸುತ್ತಿದ್ದಾರೆ. ಸ್ವತಂತ್ರ ವಾಕ್ಯ ರಚನೆ, ಸರಳ ಸಂಭಾಷಣೆ ಮತ್ತು ವೈಯಕ್ತಿಕ ಅನುಭವ ಹಂಚಿಕೊಳ್ಳುವಲ್ಲಿ ಹಿನ್ನಡೆ ಕಂಡುಬಂದಿದೆ.
ಕಾಗುಣಿತ ಹಾಗೂ ಬರವಣಿಗೆ ದೋಷ: ಚಿತ್ರಗಳನ್ನು ನೋಡಿ ಸಾಮಾನ್ಯ ವಸ್ತುಗಳ ಹೆಸರನ್ನು ಕಾಗುಣಿತ ದೋಷವಿಲ್ಲದೆ ಬರೆಯಲು 7ನೇ ತರಗತಿ ವಿದ್ಯಾರ್ಥಿಗಳೂ ಹೆಣಗಾಡುತ್ತಿದ್ದಾರೆ.
ಗ್ರಹಿಕೆಯಿಲ್ಲದ ಕಂಠಪಾಠ: ಪಠ್ಯವನ್ನು ಗಟ್ಟಿಯಾಗಿ ಓದಬಲ್ಲರಾದರೂ, ಅದರ ಅರ್ಥವನ್ನು ಗ್ರಹಿಸಿ ಸ್ವಂತವಾಗಿ ಉತ್ತರಿಸುವ ಸಾಮರ್ಥ್ಯ ಮಕ್ಕಳಲ್ಲಿ ಬೆಳೆದಿಲ್ಲ. ಕಲಿಕೆಯು ಕೇವಲ ಕಂಠಪಾಠಕ್ಕೆ ಸೀಮಿತವಾಗಿದೆ.
ಮಾತೃಭಾಷೆಯೇ ಶಿಕ್ಷಣಕ್ಕೆ ಮೂಲಾಧಾರ:
“ಮಾತೃಭಾಷೆಯಲ್ಲಿ ಶಿಕ್ಷಣ ನೀಡುವುದೇ ಅತ್ಯುತ್ತಮ ಮಾದರಿ. ಪರಿಚಿತ ಭಾಷೆಯಲ್ಲಿ ಗಟ್ಟಿಯಾದ ತಳಹದಿ ಇದ್ದಾಗ ಮಾತ್ರ ಇತರ ಭಾಷೆಗಳನ್ನು ಸುಲಭವಾಗಿ ಕಲಿಯಲು ಸಾಧ್ಯ. ವಾಸ್ತವ ಹೀಗಿರುವಾಗ ಮಾಧ್ಯಮವನ್ನೇ ಬದಲಾಯಿಸುವುದು ಆತ್ಮಹತ್ಯಾಕಾರಕ ನಿರ್ಧಾರ” ಎಂದು ಡಾ. ಪುರುಷೋತ್ತಮ ಬಿಳಿಮಲೆ ಪ್ರತಿಪಾದಿಸಿದ್ದಾರೆ.
ಪ್ರಾಧಿಕಾರವು ಈ ವರದಿಯನ್ನು ಈಗಾಗಲೇ ಸರ್ಕಾರಕ್ಕೆ ಸಲ್ಲಿಸಿದೆ. ಶಿಕ್ಷಣ ಇಲಾಖೆಯು ಇಂಗ್ಲಿಷ್ ಬೋಧಿಸುವ ಶಿಕ್ಷಕರಿಗೆ ತರಬೇತಿ ನೀಡಲು ಮುಂದಾಗುತ್ತಿದ್ದು, ಮಕ್ಕಳ ಕೇಂದ್ರಿತ ಹಾಗೂ ಸಂವಹನಾಧಾರಿತ ಬೋಧನಾ ವಿಧಾನಗಳು ಜಾರಿಗೆ ಬಂದರೆ ಮಾತ್ರ ಗುಣಮಟ್ಟ ಸುಧಾರಣೆ ಸಾಧ್ಯ ಎಂದು ವರದಿ ಸ್ಪಷ್ಟಪಡಿಸಿದೆ.
Join our WhatsApp Channel
