ಬೆಂಗಳೂರು, ಅ.25 www.bengaluruwire.com: ಟಾಲಿವುಡ್ ಹಾಗೂ ಭಾರತೀಯ ಚಿತ್ರರಂಗದ ಮೋಸ್ಟ್ ಫೇವರಿಟ್ ಜೋಡಿ ವಿಜಯ್ ದೇವರಕೊಂಡ ಮತ್ತು ಕೊಡಗಿನ ಬೆಡಗಿ ರಶ್ಮಿಕಾ ಮಂದಣ್ಣ ಅವರ ದಾಂಪತ್ಯ ಜೀವನದ ಕುರಿತು ಸಾಮಾಜಿಕ ಜಾಲತಾಣಗಳಲ್ಲಿ ಹೊಸದೊಂದು ಚರ್ಚೆ ಶುರುವಾಗಿದೆ.
ವಿಜಯ್ ದೇವರಕೊಂಡ ಅವರು ತಮ್ಮ ಇನ್‌ಸ್ಟಾಗ್ರಾಮ್ (Instagram) ಖಾತೆಯಲ್ಲಿ ಪತ್ನಿ ರಶ್ಮಿಕಾ ಅವರನ್ನು ‘ಅನ್‌ಫಾಲೋ’ (Unfollow) ಮಾಡಿದ್ದಾರೆ ಎಂಬ ಸುದ್ದಿ ಕಾಡ್ಗಿಚ್ಚಿನಂತೆ ಹಬ್ಬಿದ್ದು, ಈ ತಾರಾ ಜೋಡಿಯ ನಡುವೆ ಎಲ್ಲವೂ ಸರಿಯಿಲ್ಲವೇ ಎಂಬ ಪ್ರಶ್ನೆ ಅಭಿಮಾನಿಗಳಲ್ಲಿ ಮೂಡಿದೆ.
ಕಳೆದ ಫೆಬ್ರವರಿ 26ರಂದು ಉದಯಪುರದಲ್ಲಿ ತೆಲುಗು ಮತ್ತು ಕೊಡವ ಸಂಪ್ರದಾಯದಂತೆ ಅದ್ಧೂರಿಯಾಗಿ ದಾಂಪತ್ಯ ಜೀವನಕ್ಕೆ ಕಾಲಿಟ್ಟಿದ್ದ ಈ ಜೋಡಿ, ಈಗಾಗಲೇ ವಿಚ್ಛೇದನದ ಹಾದಿ ಹಿಡಿದಿದೆಯೇ ಎಂಬ ಆಘಾತಕಾರಿ ವದಂತಿಗಳನ್ನು ಕೆಲ ನೆಟ್ಟಿಗರು ಹರಿಬಿಟ್ಟಿದ್ದಾರೆ. ಆದರೆ, ಸಾಮಾಜಿಕ ಜಾಲತಾಣಗಳನ್ನು ಕೂಲಂಕಷವಾಗಿ ಪರಿಶೀಲಿಸಿದಾಗ ಈ ವದಂತಿಯ ಹಿಂದಿನ ಅಸಲಿ ಸತ್ಯ ಬೇರೆಯದೇ ಇರುವುದು ಸ್ಪಷ್ಟವಾಗಿದೆ.
ಇನ್‌ಸ್ಟಾಗ್ರಾಮ್ ಅನ್‌ಫಾಲೋ ವದಂತಿ: ಅಸಲಿ ಸತ್ಯವೇನು?:
ಸಾಮಾನ್ಯವಾಗಿ ಸೆಲೆಬ್ರಿಟಿ ದಂಪತಿಗಳ ನಡುವೆ ಮನಸ್ತಾಪ ಮೂಡಿದಾಗ ಮೊದಲಿಗೆ ಇನ್‌ಸ್ಟಾಗ್ರಾಮ್‌ನಲ್ಲಿ ಪರಸ್ಪರ ಅನ್‌ಫಾಲೋ ಮಾಡಿಕೊಳ್ಳುವುದು ಅಥವಾ ಫೋಟೋಗಳನ್ನು ಡಿಲೀಟ್ ಮಾಡುವುದು ಇತ್ತೀಚಿನ ಟ್ರೆಂಡ್ ಆಗಿದೆ. ಇದೇ ಕಾರಣ ಇಟ್ಟುಕೊಂಡು ಕೆಲವರು ವಿಜಯ್ ದೇವರಕೊಂಡ ಅವರ ಇನ್‌ಸ್ಟಾಗ್ರಾಮ್ ಖಾತೆಯನ್ನು ಗಮನಿಸಿದ್ದಾರೆ. ಅಲ್ಲಿ ವಿಜಯ್ ಅವರ ‘ಫಾಲೋಯಿಂಗ್’ (Following) ಸಂಖ್ಯೆ ‘0’ (ಶೂನ್ಯ) ಎಂದಿರುವುದು ಕಂಡುಬಂದಿದೆ. ಪತ್ನಿ ರಶ್ಮಿಕಾ ಅವರನ್ನೂ ವಿಜಯ್ ಫಾಲೋ ಮಾಡುತ್ತಿಲ್ಲ ಎಂಬ ಒಂದೇ ಕಾರಣಕ್ಕೆ ಇಬ್ಬರ ನಡುವೆ ಬಿರುಕು ಮೂಡಿದೆ ಎಂದು ಸೋಶಿಯಲ್ ಮೀಡಿಯಾದಲ್ಲಿ ಗುಲ್ಲೆಬ್ಬಿಸಲಾಗಿದೆ.
ಆದರೆ ಖಚಿತ ಮಾಹಿತಿ ಹಾಗೂ ವಾಸ್ತವ ಏನೆಂದರೆ, ವಿಜಯ್ ದೇವರಕೊಂಡ ಅವರು ಇನ್‌ಸ್ಟಾಗ್ರಾಮ್‌ನಲ್ಲಿ ಈಗ ರಶ್ಮಿಕಾ ಅವರನ್ನು ಹೊಸದಾಗಿ ಅನ್‌ಫಾಲೋ ಮಾಡಿಲ್ಲ! ವಿಜಯ್ ಅವರು ಮೊದಲಿನಿಂದಲೂ ಇನ್‌ಸ್ಟಾಗ್ರಾಮ್‌ನಲ್ಲಿ ‘ಝೀರೋ ಫಾಲೋಯಿಂಗ್’ (Zero Following) ಪಾಲಿಸಿಯನ್ನು ಅನುಸರಿಸುತ್ತಿದ್ದಾರೆ. ಮದುವೆಗೂ ಮುನ್ನ ಹಾಗೂ ಮದುವೆಯ ನಂತರವೂ ಅವರು ರಶ್ಮಿಕಾ ಸೇರಿದಂತೆ ಚಿತ್ರರಂಗದ ಯಾವುದೇ ಗಣ್ಯರನ್ನು ಅಥವಾ ಕುಟುಂಬಸ್ಥರನ್ನು ಇನ್‌ಸ್ಟಾಗ್ರಾಮ್‌ನಲ್ಲಿ ಫಾಲೋ ಮಾಡುತ್ತಿಲ್ಲ. ಮತ್ತೊಂದೆಡೆ, ರಶ್ಮಿಕಾ ಮಂದಣ್ಣ ಅವರು ಈಗಲೂ ಪತಿ ವಿಜಯ್ ದೇವರಕೊಂಡ ಅವರ ಅಧಿಕೃತ ಖಾತೆಯನ್ನು ಫಾಲೋ ಮಾಡುತ್ತಿದ್ದಾರೆ. ಅಲ್ಲದೆ, ಇಬ್ಬರ ಖಾತೆಗಳಲ್ಲೂ ಮದುವೆಯ ಹಾಗೂ ಒಟ್ಟಿಗಿರುವ ರೊಮ್ಯಾಂಟಿಕ್ ಫೋಟೋಗಳು ಹಾಗೆಯೇ ಇವೆ.
’ಕಾಫಿ ವಿತ್ ಕರಣ್ 9′ ಹೇಳಿಕೆ ಮತ್ತು ಟ್ರೋಲ್ ಎಫೆಕ್ಟ್!:
ಇತ್ತೀಚೆಗಷ್ಟೇ ‘ಕಾಫಿ ವಿತ್ ಕರಣ್ ಸೀಸನ್ 9’ (Koffee With Karan 9) ಕಾರ್ಯಕ್ರಮದಲ್ಲಿ ಭಾಗವಹಿಸಿದ್ದ ವಿಜಯ್ ದೇವರಕೊಂಡ, ತಮ್ಮ ಪ್ರೇಮಕಥೆಯ ಬಗ್ಗೆ ಮುಕ್ತವಾಗಿ ಮಾತನಾಡಿದ್ದರು. “ರಶ್ಮಿಕಾ ನನ್ನನ್ನು ಮದುವೆಯಾಗುವಂತೆ ಸುಮಾರು 100 ಬಾರಿ ಕೇಳಿಕೊಂಡಿದ್ದಳು. ನಾನು ಸಂಬಂಧವನ್ನು ಎಲ್ಲಾ ರೀತಿಯಲ್ಲೂ ಪರೀಕ್ಷಿಸಿದ ನಂತರವೇ ಮದುವೆಯ ನಿರ್ಧಾರಕ್ಕೆ ಬಂದೆ” ಎಂದು ವಿಜಯ್ ಹೇಳಿದ್ದರು.
ವಿಜಯ್ ಅವರ ಈ ಹೇಳಿಕೆ ಸೋಶಿಯಲ್ ಮೀಡಿಯಾದಲ್ಲಿ ತೀವ್ರ ಚರ್ಚೆಗೆ ಗ್ರಾಸವಾಗಿತ್ತು. ಕೆಲ ನೆಟ್ಟಿಗರು ವಿಜಯ್ ಅವರ ವರ್ತನೆಯನ್ನು ‘ರೆಡ್ ಫ್ಲ್ಯಾಗ್’ (Red Flag) ಎಂದು ಕರೆದು ಟ್ರೋಲ್ ಮಾಡಿದ್ದರು. ಈ ಬೆಳವಣಿಗೆಯ ಬೆನ್ನಲ್ಲೇ ಕೆಲವರು ವಿಜಯ್ ಅವರ ಇನ್‌ಸ್ಟಾಗ್ರಾಮ್ ಪ್ರೊಫೈಲ್ ಪರಿಶೀಲಿಸಿ, ಹಳೆಯ ‘ಝೀರೋ ಫಾಲೋಯಿಂಗ್’ ವಿಚಾರವನ್ನೇ ಮುಂದಿಟ್ಟುಕೊಂಡು ದಾಂಪತ್ಯದಲ್ಲಿ ಬಿರುಕು ಮೂಡಿದೆ ಎಂಬ ಸುಳ್ಳು ವದಂತಿ ಹಬ್ಬಿಸಿದ್ದಾರೆ.
ವದಂತಿಗಳಿಗೆ ಅಭಿಮಾನಿಗಳ ತಿರುಗೇಟು:
ಇನ್ನು ಈ ಆಧಾರರಹಿತ ವದಂತಿಗಳ ವಿರುದ್ಧ ವಿಜಯ್-ರಶ್ಮಿಕಾ ಅಭಿಮಾನಿಗಳು ತೀವ್ರ ಆಕ್ರೋಶ ವ್ಯಕ್ತಪಡಿಸಿದ್ದಾರೆ. “ವಿಜಯ್ ದೇವರಕೊಂಡ ಕಳೆದ ಹಲವು ವರ್ಷಗಳಿಂದ ಇನ್‌ಸ್ಟಾಗ್ರಾಮ್‌ನಲ್ಲಿ ಯಾರನ್ನೂ ಫಾಲೋ ಮಾಡುತ್ತಿಲ್ಲ. ಸೋಶಿಯಲ್ ಮೀಡಿಯಾದ ಫಾಲೋಯಿಂಗ್ ಲಿಸ್ಟ್ ಇಟ್ಟುಕೊಂಡು ಗಂಡ-ಹೆಂಡತಿಯ ಸಂಬಂಧವನ್ನು ಅಳೆಯುವುದು ಮೂರ್ಖತನ. ಇತ್ತೀಚೆಗಷ್ಟೇ ಕಾರ್ಯಕ್ರಮದಲ್ಲಿ ಪತ್ನಿಯ ಮೇಲಿನ ಪ್ರೀತಿಯನ್ನು ವಿಜಯ್ ವ್ಯಕ್ತಪಡಿಸಿದ್ದಾರೆ” ಎಂದು ಅಭಿಮಾನಿಗಳು ಟ್ರೋಲಿಗರಿಗೆ ತಕ್ಕ ತಿರುಗೇಟು ನೀಡಿದ್ದಾರೆ. ಒಟ್ಟಾರೆಯಾಗಿ, ವಿಜಯ್ ಮತ್ತು ರಶ್ಮಿಕಾ ನಡುವೆ ಯಾವುದೇ ಮನಸ್ತಾಪವಿಲ್ಲ ಹಾಗೂ ಹರಿದಾಡುತ್ತಿರುವ ವಿಚ್ಛೇದನದ ಸುದ್ದಿಗಳು ಕೇವಲ ಕಪೋಲಕಲ್ಪಿತ ವದಂತಿ ಎಂಬುದು ಸ್ಪಷ್ಟವಾಗಿದೆ.
Join our WhatsApp Channel
