ಬೆಂಗಳೂರು, ಜು.27 www.bengaluruwire.com: ರಾಜ್ಯದಲ್ಲಿ ಮುಂಗಾರು ಮಳೆಯ ಕೊರತೆಯಿಂದಾಗಿ ಪ್ರಮುಖ ಜಲಾಶಯಗಳಲ್ಲಿನ ನೀರಿನ ಸಂಗ್ರಹ ಆತಂಕಕಾರಿ ಮಟ್ಟಕ್ಕೆ ಕುಸಿದಿದೆ.
ಜಲಸಂಪನ್ಮೂಲ ಇಲಾಖೆಯ ಅಧಿಕೃತ ವೆಬ್ಸೈಟ್ನಲ್ಲಿ ಲಭ್ಯವಿರುವ ಲೈವ್ ಮಾಹಿತಿಯ ಪ್ರಕಾರ ಜುಲೈ 27ರ (27-07-2026) ಅಂದರೆ ಇಂದು ಬೆಳಗ್ಗೆ 10.25ರ ಸಮಯದ ಪ್ರಕಾರ ರಾಜ್ಯದ 22 ಜಲಾಶಯಗಳಲ್ಲಿ ಕೇವಲ 258.982 ಟಿಎಂಸಿ ನೀರು ಮಾತ್ರ ಸಂಗ್ರಹವಾಗಿದೆ. ಕಳೆದ ವರ್ಷಗಳಿಗೆ ಹೋಲಿಸಿದರೆ ಈ ಬಾರಿ ನೀರಿನ ಮಟ್ಟ ತೀವ್ರ ಕುಸಿತ ಕಂಡಿದ್ದು, ಭವಿಷ್ಯದಲ್ಲಿ ಕುಡಿಯುವ ನೀರಿನ ಹಾಹಾಕಾರ ಸೃಷ್ಟಿಯಾಗುವ ಮುನ್ಸೂಚನೆ ನೀಡಿದೆ.
ಕಾವೇರಿ, ಕೃಷ್ಣಾ ಕಣಿವೆಯ ಪ್ರಮುಖ ಜಲಾಶಯಗಳ ಸ್ಥಿತಿಗತಿ:
ರಾಜ್ಯದ ಪ್ರಮುಖ ಜೀವನಾಡಿಗಳಾದ ಕೃಷ್ಣಾ ಮತ್ತು ಕಾವೇರಿ ಕಣಿವೆಯ ಜಲಾಶಯಗಳ ಸ್ಥಿತಿ ಚಿಂತಾಜನಕವಾಗಿದೆ. ಕೃಷ್ಣಾ ಕಣಿವೆಯ 14 ಪ್ರಮುಖ ಜಲಾಶಯಗಳಲ್ಲಿ ಪ್ರಸ್ತುತ 220.243 ಟಿಎಂಸಿ ನೀರು ಸಂಗ್ರಹವಿದ್ದು, ಇದು ಒಟ್ಟು ಸಾಮರ್ಥ್ಯದ ಕೇವಲ ಶೇ.51 ರಷ್ಟಿದೆ. ಮತ್ತೊಂದೆಡೆ, ಬೆಂಗಳೂರು ಸೇರಿದಂತೆ ದಕ್ಷಿಣ ಕರ್ನಾಟಕದ ದಾಹ ತೀರಿಸುವ ಕಾವೇರಿ ಕಣಿವೆಯ 4 ಜಲಾಶಯಗಳ ಪರಿಸ್ಥಿತಿ ಮತ್ತಷ್ಟು ಬಿಗಡಾಯಿಸಿದ್ದು, ಕೇವಲ ಶೇ.37 ರಷ್ಟು (38.729 ಟಿಎಂಸಿ) ನೀರು ಮಾತ್ರ ಸಂಗ್ರಹವಿದೆ.
ಕೆ.ಆರ್.ಎಸ್ ಮತ್ತು ತುಂಗಭದ್ರಾ ಡ್ಯಾಂ ಲೈವ್ ರಿಪೋರ್ಟ್:
ಕೆ.ಆರ್.ಎಸ್ (KRS): 49.452 ಟಿಎಂಸಿ ಗರಿಷ್ಠ ಸಾಮರ್ಥ್ಯ ಹೊಂದಿರುವ ಕನ್ನಂಬಾಡಿ ಕಟ್ಟೆಯಲ್ಲಿ ಸದ್ಯ ಕೇವಲ 16.976 ಟಿಎಂಸಿ (ಶೇ.34) ನೀರಿದೆ. ಪ್ರಸ್ತುತ 2118 ಕ್ಯೂಸೆಕ್ಸ್ ಒಳಹರಿವು ಇದ್ದು, ಕುಡಿಯುವ ನೀರು ಹಾಗೂ ಇತರ ಉದ್ದೇಶಗಳಿಗಾಗಿ 1322 ಕ್ಯೂಸೆಕ್ಸ್ ನೀರನ್ನು ಹೊರಬಿಡಲಾಗುತ್ತಿದೆ.
ತುಂಗಭದ್ರಾ (Tungabhadra): 105.788 ಟಿಎಂಸಿ ಗರಿಷ್ಠ ಸಾಮರ್ಥ್ಯದ ಡ್ಯಾಂನಲ್ಲಿ ಕೇವಲ 32.596 ಟಿಎಂಸಿ (ಶೇ.30) ನೀರಿನ ಸಂಗ್ರಹವಿದೆ.
ಕಳೆದ ವರ್ಷಗಳಿಗೆ ಹೋಲಿಸಿದರೆ ತೀವ್ರ ಕುಸಿತ:
2024ರ ಜುಲೈ 27ರಂದು ಇದೇ 22 ಜಲಾಶಯಗಳಲ್ಲಿ 376.643 ಟಿಎಂಸಿ ನೀರಿತ್ತು. 2025ರ ಇದೇ ಅವಧಿಯಲ್ಲಿ 390.571 ಟಿಎಂಸಿ ನೀರು ಸಂಗ್ರಹವಾಗಿತ್ತು. ಆದರೆ ಈ ವರ್ಷ (2026) ಬರೋಬ್ಬರಿ 130 ಟಿಎಂಸಿಗೂ ಅಧಿಕ ನೀರು ಕಡಿಮೆಯಾಗಿರುವುದು ಜಲಕ್ಷಾಮದ ಸ್ಪಷ್ಟ ಎಚ್ಚರಿಕೆಯಾಗಿದೆ.
ಕುಡಿಯುವ ನೀರು vs ನೀರಾವರಿ: ಅಧಿಕಾರಿಗಳ ಹರಸಾಹಸ:
ಮುಂಗಾರು ಮಳೆ ವಿಳಂಬ ಹಾಗೂ ಅಸಮಾನ ಹಂಚಿಕೆಯಿಂದಾಗಿ ಜಲಾಶಯಗಳಿಗೆ ನಿರೀಕ್ಷಿತ ಪ್ರಮಾಣದ ಒಳಹರಿವು ಬರುತ್ತಿಲ್ಲ. ಹೀಗಾಗಿ ಕೃಷಿ ಚಟುವಟಿಕೆಗಳಿಗೆ ಕಾಲುವೆಗಳ ಮೂಲಕ ನೀರು ಹರಿಸುವುದು ಮತ್ತು ಬೆಂಗಳೂರು ಸೇರಿದಂತೆ ಪ್ರಮುಖ ನಗರಗಳಿಗೆ ಕುಡಿಯುವ ನೀರು ಕಾಯ್ದಿರಿಸುವ ನಿಟ್ಟಿನಲ್ಲಿ ಅಧಿಕಾರಿಗಳು ಹರಸಾಹಸ ಪಡುತ್ತಿದ್ದಾರೆ. ಪರಿಸ್ಥಿತಿ ಹೀಗೆಯೇ ಮುಂದುವರಿದರೆ ಮುಂಬರುವ ದಿನಗಳಲ್ಲಿ ಕರುನಾಡಿಗೆ, ಅದರಲ್ಲೂ ವಿಶೇಷವಾಗಿ ಸಿಲಿಕಾನ್ ಸಿಟಿಗೆ ಜಲಕಂಟಕ ಎದುರಾಗುವುದು ಖಚಿತ.
ಅದಾಗ್ಯೂ ಕರ್ನಾಟಕದಲ್ಲಿ ವಾಡಿಕೆಯಾಗಿ ನೈಋತ್ಯ ಮಾನ್ಸೂನ್ (ಜೂನ್–ಸೆಪ್ಟೆಂಬರ್) ತನ್ನ ವಾರ್ಷಿಕ ಮಳೆಯ ಸುಮಾರು ಶೇ.74 ಅನ್ನು ನೀಡುತ್ತದೆ. ಈ ಪ್ರಕಾರ ಒಟ್ಟಾರೆಯಾಗಿ ಸರಾಸರಿ 85.2 ಸೆಂ.ಮೀ. ಮಳೆಯಾಗುತ್ತದೆ. ಜೂನ್ 1 ರಿಂದ ಜುಲೈ 27 ರವರೆಗಿನ ಅವಧಿಯಲ್ಲಿ, ಕರಾವಳಿ ಪ್ರದೇಶಗಳಲ್ಲಿ ಭಾರೀ ಮಳೆ ಮತ್ತು ಒಳನಾಡಿನ ಪ್ರದೇಶಗಳಲ್ಲಿ ಒಣಹವೆಯ ನಂತರ, ರಾಜ್ಯವು ಮಧ್ಯಮ ಮಾನ್ಸೂನ್ ಹಂತವನ್ನು ಅನುಭವಿಸಿದೆ. ಇದರಿಂದಾಗಿ ರಾಜ್ಯದಲ್ಲಿ ಸುಮಾರು ಶೇ.30 ರಿಂದ ಶೇ.34 ರಷ್ಟು ಮಳೆ ಕೊರತೆಯನ್ನು ಹೊಂದಿದೆ. (ಮುಖ್ಯ ಚಿತ್ರವು ಪ್ರಾತಿನಿಧಿಕವಾಗಿದೆ)
Join our WhatsApp Channel
