ಬೆಂಗಳೂರು, ಜೂ.13 www.bengaluruwire.com: ಬೆಂಗಳೂರಿನ ಪ್ರಕೃತಿ ಪ್ರಿಯರಿಗೆ ಹಾಗೂ ವನ್ಯಜೀವಿ ಆಸಕ್ತರಿಗೆ ಬನ್ನೇರುಘಟ್ಟ ಜೈವಿಕ ಉದ್ಯಾನವನ (BBP)ದಲ್ಲಿ ಹೊಸ ಅತಿಥಿಗಳಾದ ಚೀತಾ, ಜೀಬ್ರಾ ಮರಿ, ನೀರುಕುದುರೆ ವೀಕ್ಷಿಸಬಹುದು.
ಹೌದು, ದಕ್ಷಿಣ ಆಫ್ರಿಕಾದಿಂದ ಬಂದಿದ್ದ ಚೀತಾಗಳು ಈಗ ನಿಮ್ಮೆದುರು ಬರುವ ಸಮಯ ಬಂದಿದೆ! ಇದರ ಜೊತೆಗೆ ಮುದ್ದಾದ ಜೆಬ್ರಾ ಮತ್ತು ನೀರುಕುದುರೆ ಮರಿಗಳು ಉದ್ಯಾನವನದ ಆಕರ್ಷಣೆಯನ್ನು ಇಮ್ಮಡಿಗೊಳಿಸಿವೆ.
ದಕ್ಷಿಣ ಆಫ್ರಿಕಾದಿಂದ ಬಂದ ‘ವೇಗದ ಓಟಗಾರ’ರ ದರ್ಶನ:
ಇತ್ತೀಚೆಗೆ ದಕ್ಷಿಣ ಆಫ್ರಿಕಾದಿಂದ ಬನ್ನೇರುಘಟ್ಟಕ್ಕೆ ತರಲಾಗಿದ್ದ ಚೀತಾಗಳು ತಮ್ಮ ಕಡ್ಡಾಯ ಕ್ವಾರಂಟೈನ್ (ದಿಗ್ಬಂಧನ) ಅವಧಿಯನ್ನು ಯಶಸ್ವಿಯಾಗಿ ಮುಕ್ತಾಯಗೊಳಿಸಿವೆ. ಈ ಅವಧಿಯಲ್ಲಿ ಪ್ರಾಣಿ ಆರೈಕೆ ತಂಡವು ಹಗಲಿರುಳು ಇವುಗಳ ಆರೋಗ್ಯ, ಆಹಾರ ಪದ್ಧತಿ ಮತ್ತು ಸ್ಥಳೀಯ ಹವಾಮಾನಕ್ಕೆ ಹೊಂದಿಕೊಳ್ಳುವ ಪ್ರಕ್ರಿಯೆಯ ಮೇಲೆ ಹದ್ದಿನ ಕಣ್ಣಿಟ್ಟಿತ್ತು. ಇದೀಗ ಪಶುವೈದ್ಯಕೀಯ ಮೌಲ್ಯಮಾಪನಗಳು ಯಶಸ್ವಿಯಾಗಿ ಪೂರ್ಣಗೊಂಡಿದ್ದು, ಈ ಸುಂದರ ಚೀತಾಗಳನ್ನು ವಿಶಾಲವಾದ ಹೊರಾಂಗಣ ಆವಾಸಸ್ಥಾನಕ್ಕೆ ಬಿಡಲಾಗಿದೆ.
ಇಂದಿನಿಂದ ಸಾರ್ವಜನಿಕರು ಈ ವೇಗದ ಓಟಗಾರರನ್ನು ಕಣ್ತುಂಬಿಕೊಳ್ಳಬಹುದು. ಇದು ಕೇವಲ ಮನರಂಜನೆಯಷ್ಟೇ ಅಲ್ಲ, ಈ ಪ್ರಭೇದಗಳು ಎದುರಿಸುತ್ತಿರುವ ಸಂರಕ್ಷಣಾ ಸವಾಲುಗಳ ಬಗ್ಗೆ ಜಾಗೃತಿ ಮೂಡಿಸುವ ಪ್ರಯತ್ನವೂ ಹೌದು.
’ಕಬಿನಿ’ಗೆ ಹೆಣ್ಣು ಮರಿಯ ಸಂಭ್ರಮ; 11ಕ್ಕೇರಿದ ಜೆಬ್ರಾಗಳ ಸಂಖ್ಯೆ:
ಉದ್ಯಾನವನದ ಮತ್ತೊಂದು ಆಕರ್ಷಣೆಯಾಗಿ ‘ಕಬಿನಿ’ ಹೆಸರಿನ ಜೆಬ್ರಾ ಮುದ್ದಾದ ಹೆಣ್ಣು ಮರಿಗೆ ಜನ್ಮ ನೀಡಿದೆ. ಮರಿಯು ತಾಯಿಯ ಆರೈಕೆಯಲ್ಲಿ ಆರೋಗ್ಯವಾಗಿ, ಅತ್ಯಂತ ಚುರುಕಾಗಿ ಓಡಾಡಿಕೊಂಡಿದೆ. ಸಿಬ್ಬಂದಿಯ ನಿರಂತರ ನಿಗಾದಲ್ಲಿರುವ ಈ ತಾಯಿ-ಮರಿಯನ್ನು ನೋಡಲು ಎರಡು ಕಣ್ಣುಗಳೇ ಸಾಲದು.
ಈ ಹೊಸ ಅತಿಥಿಯ ಆಗಮನದೊಂದಿಗೆ, ಬನ್ನೇರುಘಟ್ಟದಲ್ಲಿರುವ ಜೆಬ್ರಾಗಳ ಸಂಖ್ಯೆ 11ಕ್ಕೆ ಏರಿಕೆಯಾಗಿದೆ. ನೈಸರ್ಗಿಕ ಆವಾಸಸ್ಥಾನವನ್ನು ಹೋಲುವ ವಾತಾವರಣದಲ್ಲಿ ಈ ಕ್ಯೂಟ್ ಮರಿಯು ಇತರ ಜೆಬ್ರಾಗಳೊಂದಿಗೆ ಆಟವಾಡುವುದನ್ನು ಪ್ರವಾಸಿಗರು ಈಗ ವೀಕ್ಷಿಸಬಹುದಾಗಿದೆ.
ತಾಯಿಯ ಮಡಿಲಲ್ಲಿ ‘ದಶ್ಯ’ ನೀರುಕುದುರೆಯ ಮುದ್ದಾದ ಮರಿ:
ಈ ಸಂಭ್ರಮಕ್ಕೆ ಮತ್ತಷ್ಟು ಮೆರುಗು ನೀಡುವಂತೆ, ‘ದಶ್ಯ’ ಹೆಸರಿನ ಹೆಣ್ಣು ನೀರುಕುದುರೆ (Hippopotamus) ಇತ್ತೀಚೆಗೆ ಮರಿಗೆ ಜನ್ಮ ನೀಡಿದೆ. ನವಜಾತ ಮರಿ ಮತ್ತು ತಾಯಿಗೆ ಯಾವುದೇ ರೀತಿಯ ಒತ್ತಡವಾಗದಂತೆ, ಅತ್ಯಂತ ಶಾಂತಿಯುತ ವಾತಾವರಣವನ್ನು ನಿರ್ಮಿಸಲಾಗಿದೆ. ದಶ್ಯ ತನ್ನ ಮರಿಯನ್ನು ಅಕ್ಕರೆಯಿಂದ ನೋಡಿಕೊಳ್ಳುತ್ತಿದ್ದು, ಬಲವಾದ ತಾಯ್ತನದ ಪ್ರವೃತ್ತಿಯನ್ನು ತೋರುತ್ತಿದ್ದಾಳೆ.
ವೀಕೆಂಡ್ ಪ್ಲಾನ್ ರೆಡಿನಾ?:
ಈ ಮೇಲಿನ ಎಲ್ಲಾ ಬೆಳವಣಿಗೆಗಳು ಬನ್ನೇರುಘಟ್ಟ ಜೈವಿಕ ಉದ್ಯಾನವನದ ವೈಜ್ಞಾನಿಕ ಪ್ರಾಣಿ ನಿರ್ವಹಣೆ ಮತ್ತು ವನ್ಯಜೀವಿ ಸಂರಕ್ಷಣೆಯ ಬದ್ಧತೆಗೆ ಹಿಡಿದ ಕೈಗನ್ನಡಿಯಾಗಿದೆ. ಈ ಹೊಸ ಅತಿಥಿಗಳನ್ನು ಸ್ವಾಗತಿಸಲು ಮತ್ತು ವನ್ಯಜೀವಿಗಳ ಅದ್ಭುತ ಪ್ರಪಂಚವನ್ನು ಕಣ್ತುಂಬಿಕೊಳ್ಳಲು ಬನ್ನೇರುಘಟ್ಟ ಜೈವಿಕ ಉದ್ಯಾನವನವು ಪ್ರವಾಸಿಗರನ್ನು ಪ್ರೀತಿಯಿಂದ ಆಹ್ವಾನಿಸುತ್ತಿದೆ. ಮತ್ಯಾಕೆ ತಡ, ನಿಮ್ಮ ಮುಂದಿನ ವೀಕೆಂಡ್ ಟ್ರಿಪ್ ಬನ್ನೇರುಘಟ್ಟಕ್ಕೇ ಇರಲಿ.
Join our WhatsApp Channel
