ಬೆಂಗಳೂರು, ಸೆ.9 www.bengaluruwire.com : ಭಾರತೀಯ ದೂರಸಂಪರ್ಕ ನಿಯಂತ್ರಣ ಪ್ರಾಧಿಕಾರ (TRAI) ದ ನಿಯಮಗಳನ್ನು ಗಾಳಿಗೆ ತೂರಿ ಪಾದಚಾರಿ ಮಾರ್ಗದ ಪಕ್ಕದಲ್ಲಿ ನೂರಾರು ಅನಧಿಕೃತ ಟೆಲಿಕಾಮ್ ಟವರ್ (Telecom Tower) ಗಳನ್ನು ಅಳವಡಿಸಿದ್ದ ನಾಲ್ಕು ಟೆಲಿಕಾಮ್ ಮತ್ತಿತರ ಸಂಸ್ಥೆಗಳಿಗೆ ಬಿಬಿಎಂಪಿ ಜಯನಗರ ಉಪವಿಭಾಗ ಕಚೇರಿ ತಲಾ 20 ಲಕ್ಷ ರೂ.ಗಳ ದಂಡ ವಿಧಿಸಿದೆ.
ಜಿಯೋ ಡಿಜಿಟಲ್ ಫೈಬರ್ ಲಿ. (jio Digital Fibre Pvt. Ltd.), ಭಾರತಿ ಏರ್ ಟೆಲ್ (Bharti Airtel Ltd), ಟೆಲಿಸೋನಿಕ್ ನೆಟ್ ವರ್ಕ್ಸ್ (Telesonic Networks Ltd.) ಮತ್ತು ವಾಕ್ ಟೆಲಿಇನ್ ಫ್ರಾ ಸಲ್ಯೂಷನ್ಸ್ VAC Teleinfra Solutions Pvt. Ltd. ಎಂಬ Telecom Service Providers ಸಂಸ್ಥೆಗಳ ವಿರುದ್ಧ ಬಿಬಿಎಂಪಿ ಸ್ಥಳೀಯ ಪೋಲೀಸ್ ಠಾಣೆಗಳಲ್ಲಿ ಪ್ರಕರಣಗಳನ್ನು ದಾಖಲು ಮಾಡಿರುವುದಲ್ಲದೇ, ಪ್ರತಿಯೊಂದು ಸಂಸ್ಥೆಗೂ ತಲಾ 20 ಲಕ್ಷ ರೂಪಾಯಿಗಳನ್ನು ಸೇರಿದಂತೆ ಒಟ್ಟು 80 ಲಕ್ಷ ರೂ.ಗಳನ್ನು ದಂಡ ವಿಧಿಸಲಾಗಿದೆ ಎಂದು ಬಿಜೆಪಿ ಪಕ್ಷದ ಬೆಂಗಳೂರು ದಕ್ಷಿಣ ಜಿಲ್ಲಾ ಬಿಜೆಪಿ ಘಟಕದ ಅಧ್ಯಕ್ಷ ಎನ್.ಆರ್.ರಮೇಶ್ ತಿಳಿಸಿದ್ದಾರೆ.
ಟೆಲಿಕಾಮ್ ಮತ್ತಿತರ ಸೇವಾ ಸಂಸ್ಥೆಗಳ ವಿರುದ್ಧ ಆಗಸ್ಟ್ 8
ರಂದು ಈ ಸಂಬಂಧ ಪಾಲಿಕೆಯ ಮುಖ್ಯ ಆಯುಕ್ತರಿಗೆ, ದಕ್ಷಿಣ ವಲಯ ಆಯುಕ್ತರಿಗೆ, ದಕ್ಷಿಣ ವಲಯದ ಜಂಟಿ ಆಯುಕ್ತರಿಗೆ ಮತ್ತು ಪಾಲಿಕೆಯ ಒಎಫ್ ಸಿ ವಿಭಾಗದ ಮುಖ್ಯ ಆಯುಕ್ತರಿಗೆ ದಾಖಲೆಗಳ ಸಹಿತ ದೂರುಗಳನ್ನು ನೀಡಿದ್ದಾಗಿ ಪತ್ರಿಕಾ ಪ್ರಕಟಣೆಯಲ್ಲಿ ಹೇಳಿದ್ದಾರೆ.
ಜಯನಗರ ವಿಧಾನಸಭಾ ಕ್ಷೇತ್ರದ ಪಟ್ಟಾಭಿರಾಮ ನಗರ ವಾರ್ಡ್ ವ್ಯಾಪ್ತಿಯಲ್ಲಿ ಹೊಸದಾಗಿ ಡಾಂಬರೀಕರಣ ಮಾಡಿದ್ದ ರಸ್ತೆಗಳನ್ನು ಅಗೆದು ಆಪ್ಟಿಕಲ್ ಫೈಬರ್ ಕೇಬಲ್ (OFC Duct) ಗಳನ್ನು ಅಳವಡಿಸಿ ಪಾಲಿಕೆಗೆ ಹತ್ತಾರು ಕೋಟಿ ರೂಪಾಯಿಗಳ ನಷ್ಟ ಉಂಟಾಗಿತ್ತು. ಕೇವಲ ಮೂರ್ನಾಲ್ಕು ಅಡಿಗಳಷ್ಟು ಅಗಲದ ಪಾದಚಾರಿ ಮಾರ್ಗಗಳಲ್ಲಿ ಟೆಲಿಕಾಮ್ ಟವರ್ ಅಳವಡಿಸಿದ್ದನ್ನು ಬಿಬಿಎಂಪಿಯು ತೆಗೆದು ಹಾಕಿದೆ.
ರಾಜ್ಯ ಉಚ್ಛ ನ್ಯಾಯಾಲಯದ ಆದೇಶವನ್ನು ಉಲ್ಲಂಘಿಸಿ ಬೆಂಗಳೂರು ಜಯನಗರ ಉಪವಿಭಾಗದ ಪಟ್ಟಾಭಿರಾಮ ನಗರ ವಾರ್ಡ್ ನಲ್ಲಿನ ವಿವಿಧ ರಸ್ತೆಗಳಲ್ಲಿನ ಮರಗಳ ಕೊಂಬೆಗಳಲ್ಲಿ ಒಎಫ್ ಸಿ (OFC Cable)ಗಳನ್ನು ನೇತು ಹಾಕಲಾಗಿತ್ತು. ಪಾದಾಚಾರಿ ಮಾರ್ಗದಲ್ಲಿ ಅನಧಿಕೃತವಾಗಿ ಟೆಲಿಕಾಮ್ ಟವರ್ ಹಾಕಿದ್ದ ಸಂಸ್ಥೆಗಳಿಗೆ ನೋಟಿಸ್ ನೀಡಿ, ಆ ಟೆಲಿಕಾಮ್ ಸಂಸ್ಥೆಗಳಿಂದ ಪ್ರತ್ಯುತ್ತರ ಬಾರದೆ, ಸೂಕ್ತ ಕ್ರಮ ಕೈಗೊಂಡಿರದ ಹಿನ್ನಲೆಯಲ್ಲಿ ಆ ಟವರ್ ಗಳನ್ನು ತೆಗೆದು ಹಾಕಿ ಬಿಬಿಎಂಪಿ ದಂಡ ವಿಧಿಸಿದೆ.
Join our WhatsApp Channel
