ನವದೆಹಲಿ, ಅ.25 www.bengaluruwire.com : ಇಂದಿರಾ ಗಾಂಧಿ ಅಂತರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ (IGI Airport) ಶುಕ್ರವಾರ ಭಾರೀ ಪ್ರಮಾಣದ ಚಿನ್ನ ಸಾಗಿಸಲು ಯತ್ನಿಸಿದ ಮಹಿಳಾ ಪ್ರಯಾಣಿಕಳನ್ನು ದೆಹಲಿ ಕಸ್ಟಮ್ಸ್ ಅಧಿಕಾರಿಗಳು ಬಂಧಿಸಿದ್ದಾರೆ. ಈ ಮಹಿಳೆಯು ಮ್ಯಾನ್ಮಾರ್‌ನ ಯಾಂಗೋನ್‌ನಿಂದ ಆಗಮಿಸಿದ್ದಳು.
ಒಳ ಉಡುಪಿನಲ್ಲಿ ಬಚ್ಚಿಟ್ಟಿದ್ದ ಚಿನ್ನದ ಬಿಸ್ಕತ್ತು:
ಶುಕ್ರವಾರದಂದು ವಿಮಾನ 8M 620 ರಲ್ಲಿ ಯಾಂಗೋನ್‌ನಿಂದ ದೆಹಲಿಗೆ ಬಂದಿಳಿದ ಮಹಿಳೆಯು ಗ್ರೀನ್ ಚಾನೆಲ್ ಮೂಲಕ ಹೊರಹೋಗಲು ಪ್ರಯತ್ನಿಸಿದ್ದಳು. ಸುಂಕ ವಿಧಿಸಬಹುದಾದ ಯಾವುದೇ ಸರಕು ಇಲ್ಲದವರು ಈ ಚಾನೆಲ್ ಮೂಲಕ ಹೊರ ಹೋಗಬಹುದಾಗಿದೆ. ಆದರೆ, ಅನುಮಾನಗೊಂಡ ಕಸ್ಟಮ್ಸ್ ಅಧಿಕಾರಿಗಳು ಆಕೆಯನ್ನು ಪರಿಶೀಲನೆಗೆ ಒಳಪಡಿಸಿದಾಗ ಅಕ್ರಮ ಬಯಲಾಗಿದೆ.
ಮಹಿಳೆಯು ತನ್ನ ಒಳ ಉಡುಪುಗಳಲ್ಲಿ ಅಡಗಿಸಿ ಇಟ್ಟುಕೊಂಡಿದ್ದ 997.5 ಗ್ರಾಂ ತೂಕದ 6 ಚಿನ್ನದ ಬಿಸ್ಕತ್ತುಗಳನ್ನು ಅಧಿಕಾರಿಗಳು ವಶಪಡಿಸಿಕೊಂಡಿದ್ದಾರೆ. ಈ ಚಿನ್ನದ ಮೌಲ್ಯವನ್ನು ಕಸ್ಟಮ್ಸ್ ಅಧಿಕಾರಿಗಳು ನಿರ್ಧರಿಸುತ್ತಿದ್ದು, ಅದರ ಅಂದಾಜು ಬೆಲೆ ಕೋಟಿಯ ರೂಪಾಯಿಗಳಲ್ಲಿ ಇರಲಿದೆ.
ಕಸ್ಟಮ್ಸ್ ಕಾಯ್ದೆ, 1962 ರ ನಿಬಂಧನೆಗಳ ಅಡಿಯಲ್ಲಿ ವಶಪಡಿಸಿಕೊಂಡಿರುವ ಚಿನ್ನವನ್ನು ಜಪ್ತಿ ಮಾಡಲಾಗಿದೆ. ಚಿನ್ನ ಸಾಗಣೆಗೆ ಯತ್ನಿಸಿದ ಮಹಿಳೆಯ ವಿರುದ್ಧ ಕಾನೂನು ಕ್ರಮ ಜರುಗಿಸಿ, ಹೆಚ್ಚಿನ ತನಿಖೆಗಾಗಿ ಅಧಿಕಾರಿಗಳು ವಶಕ್ಕೆ ಪಡೆದಿದ್ದಾರೆ ಎಂದು ದೆಹಲಿ ಕಸ್ಟಮ್ಸ್ ಮೂಲಗಳು ತಿಳಿಸಿವೆ. ಚಿನ್ನ ಎಲ್ಲಿಂದ ಬಂತು, ಆಕೆ ಯಾರಿಗೆ ತಲುಪಿಸಬೇಕಿತ್ತು ಎಂಬ ಕುರಿತು ತನಿಖೆ ಮುಂದುವರೆದಿದೆ. (ಮಾಹಿತಿ ಮೂಲ : ANI)
Join our WhatsApp Channel
