ಬೆಂಗಳೂರು, ಅ.31 www.bengaluruwire.com: ರಾಜ್ಯದಲ್ಲಿ ನಂದಿನಿ ಹಾಲಿನ ಮಾರಾಟ ದರ ಹೆಚ್ಚಳವಾದ ಬೆನ್ನಲ್ಲೇ ಇದೀಗ ಮೊಸರಿನ ದರದಲ್ಲೂ ಭಾರಿ ಏರಿಕೆ ಮಾಡಲಾಗಿದೆ.
ಕರ್ನಾಟಕ ಸಹಕಾರ ಹಾಲು ಉತ್ಪಾದಕರ ಮಹಾಮಂಡಳ (ಕೆಎಂಎಫ್) ನವೆಂಬರ್ 1ರಿಂದ ಅನ್ವಯವಾಗುವಂತೆ ಮೊಸರಿನ ದರವನ್ನು ಪ್ರತಿ ಲೀಟರ್‌ಗೆ ಬರೋಬ್ಬರಿ ₹14 ಹೆಚ್ಚಳ ಮಾಡಿ ಆದೇಶ ಹೊರಡಿಸಿದೆ. ಇದರಿಂದಾಗಿ ಸಾಮಾನ್ಯ ಜನರ ದಿನನಿತ್ಯದ ಮಾಸಿಕ ಬಜೆಟ್ ಮೇಲೆ ಮತ್ತಷ್ಟು ಹೊರೆ ಬೀಳಲಿದೆ.
ಕೆಎಂಎಫ್ ಬಿಡುಗಡೆ ಮಾಡಿರುವ ಅಧಿಕೃತ ಪರಿಷ್ಕೃತ ದರಪಟ್ಟಿಯ ಅನ್ವಯ, ಈ ಹಿಂದೆ ಪ್ರತಿ ಕೆಜಿಗೆ (1 ಲೀಟರ್ ಪೊಟ್ಟಣ) ₹54 ಇದ್ದ ನಂದಿನಿ ಮೊಸರಿನ ದರವನ್ನು ₹68 ಕ್ಕೆ ನಿಗದಿಪಡಿಸಲಾಗಿದೆ. ಅದೇ ರೀತಿ 500 ಗ್ರಾಂ (ಅರ್ಧ ಲೀಟರ್) ಮೊಸರು ಪೊಟ್ಟಣದ ದರ ₹28 ರಿಂದ ₹34 ಕ್ಕೆ ಏರಿಕೆಯಾಗಿದ್ದು, ₹6 ಹೆಚ್ಚಳ ಕಂಡಿದೆ.
ನಂದಿನಿ ಮೊಸರು ಹಾಗೂ ಪ್ರಮುಖ ಹಾಲಿನ ಪರಿಷ್ಕೃತ ದರಗಳ ಪಟ್ಟಿ:
ಮೊಸರು (1 ಕೆಜಿ ಪೊಟ್ಟಣ): ₹54 ರಿಂದ ₹68 ಕ್ಕೆ ಏರಿಕೆ (₹14 ಹೆಚ್ಚಳ)
ಮೊಸರು (500 ಗ್ರಾಂ ಪೊಟ್ಟಣ): ₹28 ರಿಂದ ₹34 ಕ್ಕೆ ಏರಿಕೆ (₹6 ಹೆಚ್ಚಳ)
ಟೋನ್ಡ್ ಹಾಲು (ಪ್ರತಿ ಲೀಟರ್): ₹46 ರಿಂದ ₹54 ಕ್ಕೆ ಪರಿಷ್ಕರಣೆ
ಹೋಮೋಜಿನೈಸ್ಡ್ ಹಸುವಿನ ಹಾಲು: ₹50 ರಿಂದ ₹58 ಕ್ಕೆ ಪರಿಷ್ಕರಣೆ
ಸ್ಪೆಷಲ್ ಟೋನ್ಡ್ ಹಾಲು: ₹52 ರಿಂದ ₹64 ಕ್ಕೆ ಪರಿಷ್ಕರಣೆ
ಶುಭಂ ಹಾಲು: ₹52 ರಿಂದ ₹64 ಕ್ಕೆ ಪರಿಷ್ಕರಣೆ
ರಾಜ್ಯದಲ್ಲಿ ಸಕಾಲಕ್ಕೆ ಮಳೆಯಾಗದೆ ಮೇವಿನ ಕೊರತೆ, ಪಶು ಆಹಾರ ಹಾಗೂ ನಿರ್ವಹಣಾ ವೆಚ್ಚ ದುಪ್ಪಟ್ಟಾಗಿರುವ ಕಾರಣ ಹಾಲು ಖರೀದಿ ದರ ಹೆಚ್ಚಿಸಬೇಕು ಎಂಬುದು ಹೈನುಗಾರ ರೈತರ ನಿರಂತರ ಬೇಡಿಕೆಯಾಗಿತ್ತು. ಈ ಹಿನ್ನೆಲೆಯಲ್ಲಿ ರೈತರ ಹಿತದೃಷ್ಟಿಯಿಂದ ದರ ಪರಿಷ್ಕರಣೆ ಅನಿವಾರ್ಯವಾಗಿತ್ತು ಎಂದು ಕೆಎಂಎಫ್ ಸ್ಪಷ್ಟಪಡಿಸಿದೆ. ಪರಿಷ್ಕೃತ ದರಗಳು ನವೆಂಬರ್ 1ರಿಂದಲೇ ಜಾರಿಗೆ ಬರಲಿವೆ.
Join our WhatsApp Channel
