FIFA World Cup 2026 | ಫಿಫಾ ವಿಶ್ವಕಪ್ 2026: ಅರ್ಜೆಂಟೀನಾ ಮಣಿಸಿ 2ನೇ ಬಾರಿ ವಿಶ್ವ ಚಾಂಪಿಯನ್ ಆದ ಸ್ಪೇನ್

ನ್ಯೂಜೆರ್ಸಿ, ಜು.20 www.bengaluruwire.com: ಅಮೆರಿಕದ ನ್ಯೂಜೆರ್ಸಿಯ ಮೆಟ್‌ಲೈಫ್ ಸ್ಟೇಡಿಯಂನಲ್ಲಿ ಭಾನುವಾರ ನಡೆದ ಫಿಫಾ ವಿಶ್ವಕಪ್ 2026ರ (FIFA World Cup 2026) ಫೈನಲ್ ಪಂದ್ಯದಲ್ಲಿ ಹಾಲಿ ಚಾಂಪಿಯನ್ ಅರ್ಜೆಂಟೀನಾ ತಂಡವನ್ನು 1-0 ಅಂತರದಿಂದ ಮಣಿಸಿದ ಸ್ಪೇನ್, ಎರಡನೇ ಬಾರಿಗೆ ವಿಶ್ವ ಚಾಂಪಿಯನ್ ಆಗಿ ಹೊರಹೊಮ್ಮಿದೆ.

ತೀವ್ರ ಕುತೂಹಲ ಕೆರಳಿಸಿದ್ದ ಈ ಮಹಾ ಕಾದಾಟದಲ್ಲಿ ಹೆಚ್ಚುವರಿ ಸಮಯದಲ್ಲಿ (Extra Time) ದಾಖಲಾದ ಏಕೈಕ ಗೋಲು ಸ್ಪೇನ್ ತಂಡಕ್ಕೆ ಐತಿಹಾಸಿಕ ಜಯ ತಂದುಕೊಟ್ಟಿತು. ಇದರೊಂದಿಗೆ ಸತತ ಎರಡನೇ ಬಾರಿಗೆ ವಿಶ್ವಕಪ್ ಗೆಲ್ಲುವ ಅರ್ಜೆಂಟೀನಾದ ಕನಸು ಭಗ್ನಗೊಂಡಿದ್ದು, ದಿಗ್ಗಜ ಆಟಗಾರ ಲಿಯೋನೆಲ್ ಮೆಸ್ಸಿ ಹಾಗೂ ಅಭಿಮಾನಿಗಳು ಕಣ್ಣೀರಿನಲ್ಲಿ ಮುಳುಗಿದರು.

ಮಾರ್ಟಿನೆಜ್ ಹೋರಾಟ, ಫೆರ್ನಾಂಡಿಸ್‌ಗೆ ರೆಡ್ ಕಾರ್ಡ್:

ಪಂದ್ಯದ ನಿಗದಿತ 90 ನಿಮಿಷಗಳ ಅವಧಿಯಲ್ಲಿ ಎರಡೂ ತಂಡಗಳು ಗೋಲು ಗಳಿಸಲು ತೀವ್ರ ಪೈಪೋಟಿ ನಡೆಸಿದವು. ಸ್ಪೇನ್ ತಂಡ ನಿರಂತರವಾಗಿ ದಾಳಿ ನಡೆಸಿದರೂ ಅರ್ಜೆಂಟೀನಾದ ಗೋಲ್‌ಕೀಪರ್ ಎಮಿಲಿಯಾನೋ ಮಾರ್ಟಿನೆಜ್ ಭದ್ರಕೋಟೆಯಾಗಿ ನಿಂತರು. ಒಟ್ಟು 11 ಅದ್ಭುತ ಸೇವ್‌ಗಳನ್ನು ಮಾಡುವ ಮೂಲಕ ಅವರು ವಿಶ್ವಕಪ್ ಫೈನಲ್ ಇತಿಹಾಸದಲ್ಲೇ ಹೊಸ ದಾಖಲೆ ಬರೆದರು.

ಆದರೆ ದ್ವಿತೀಯಾರ್ಧದ ಇಂಜ್ಯುರಿ ಸಮಯದಲ್ಲಿ (Injury Time) ಅರ್ಜೆಂಟೀನಾದ ಮಿಡ್‌ಫೀಲ್ಡರ್ ಎಂಜೊ ಫೆರ್ನಾಂಡಿಸ್ ಕೆಂಪು ಕಾರ್ಡ್ ಪಡೆದು ಹೊರನಡೆದದ್ದು ಪಂದ್ಯದ ಗತಿಯನ್ನೇ ಬದಲಿಸಿತು. ಇದರಿಂದಾಗಿ ಅರ್ಜೆಂಟೀನಾ ಕೇವಲ 10 ಆಟಗಾರರೊಂದಿಗೆ ಹೆಚ್ಚುವರಿ ಸಮಯದ ಆಟವನ್ನು ಆಡಬೇಕಾದ ಅನಿವಾರ್ಯತೆಗೆ ಸಿಲುಕಿತು.

ಗೆಲುವಿನ ಗೋಲು ಬಾರಿಸಿದ ಫೆರಾನ್ ಟೊರೆಸ್:

ಅರ್ಜೆಂಟೀನಾ 10 ಆಟಗಾರರಿಗೆ ಸೀಮಿತವಾದ ಲಾಭ ಪಡೆದ ಸ್ಪೇನ್, ಹೆಚ್ಚುವರಿ ಸಮಯದಲ್ಲಿ ತನ್ನ ದಾಳಿಯನ್ನು ಮತ್ತಷ್ಟು ಚುರುಕುಗೊಳಿಸಿತು. ಪಂದ್ಯದ 106ನೇ ನಿಮಿಷದಲ್ಲಿ ಪೆಡ್ರೊ ಪೊರೊ ನೀಡಿದ ಅದ್ಭುತ ಪಾಸ್ ಅನ್ನು ಅತ್ಯಂತ ಚಾಕಚಕ್ಯತೆಯಿಂದ ಗೋಲು ಪೆಟ್ಟಿಗೆಗೆ ತಳ್ಳಿದ ಫೆರಾನ್ ಟೊರೆಸ್ (Ferran Torres), ಸ್ಪೇನ್ ಪಾಳಯದಲ್ಲಿ ಸಂಭ್ರಮ ಮುಗಿಲುಮುಟ್ಟುವಂತೆ ಮಾಡಿದರು.

ಟೂರ್ನಿಯ ವೈಯಕ್ತಿಕ ಪ್ರಶಸ್ತಿಗಳಲ್ಲೂ ಸ್ಪೇನ್ ಪ್ರಾಬಲ್ಯ:

ಇಡೀ ಟೂರ್ನಿಯಲ್ಲಿ ಕೇವಲ ಒಂದೇ ಒಂದು ಗೋಲನ್ನು ಎದುರಾಳಿಗಳಿಗೆ ಬಿಟ್ಟುಕೊಡುವ ಮೂಲಕ ಸ್ಪೇನ್ ಅಸಾಧಾರಣ ರಕ್ಷಣಾತ್ಮಕ ಆಟ ಪ್ರದರ್ಶಿಸಿತು. ಪ್ರಶಸ್ತಿ ವಿತರಣಾ ಸಮಾರಂಭದಲ್ಲೂ ಸ್ಪೇನ್ ಆಟಗಾರರು ಪಾರುಪತ್ಯ ಮೆರೆದರು.

ಗೋಲ್ಡನ್ ಬಾಲ್ (ಅತ್ಯುತ್ತಮ ಆಟಗಾರ): ರೊಡ್ರಿ (ಸ್ಪೇನ್)

ಗೋಲ್ಡನ್ ಗ್ಲೌಸ್: ಉನೈ ಸೀಮನ್ (ಸ್ಪೇನ್)

ಉದಯೋನ್ಮುಖ ಆಟಗಾರ: ಪಾವು ಕುಬಾರ್ಸಿ (ಸ್ಪೇನ್, 19 ವರ್ಷ)

ಯೂರೋ ಕಪ್ ಹಾಗೂ ವಿಶ್ವಕಪ್ ಎರಡನ್ನೂ ಸತತವಾಗಿ ಗೆಲ್ಲುವ ಮೂಲಕ ಸ್ಪೇನ್ ಫುಟ್‌ಬಾಲ್ ಜಗತ್ತಿನಲ್ಲಿ ತನ್ನ ಸಾಮರ್ಥ್ಯವನ್ನು ಮತ್ತೊಮ್ಮೆ ಸಾಬೀತುಪಡಿಸಿದೆ. ಸ್ಪೇನ್ ಗೆಲುವು ಸಾಧಿಸಲು ಕಾರಣವಾದ ಆ ಒಂದು ಪ್ರಮುಖ ಗೋಲ್ ದಾಖಲಿಸುವ ಅಪರೂಪದ ದೃಶ್ಯ ಈ ಮುಂದೆ ನೀಡಲಾದ ಫೀಪಾ ವರ್ಲ್ಡ್ ಕಪ್ ಅಧಿಕೃತ ಲಿಂಕ್ ನಲ್ಲಿದೆ: https://fifa.shar.estori.es/go/clip/31606e64-e71a-d868-f101-3a228f5d9f0b?collectionId=wc-2026-all-clips