ನವದೆಹಲಿ / ಬೆಂಗಳೂರು, ಆ.31 www.bengaluruwire.com: ದೇಶದಾದ್ಯಂತ ಕಾನೂನು, ಆಡಳಿತಾತ್ಮಕ, ವಾಣಿಜ್ಯ ಹಾಗೂ ಸಾರ್ವಜನಿಕ ಸೇವೆಗಳಿಗೆ ‘ಭಾರತೀಯ ಪ್ರಮಾಣಿತ ಸಮಯ’ವನ್ನು (IST) ಏಕೈಕ ಅಧಿಕೃತ ಸಮಯದ ಉಲ್ಲೇಖವಾಗಿ (Single Time Reference) ಕೇಂದ್ರ ಸರ್ಕಾರ ಕಡ್ಡಾಯಗೊಳಿಸಿದೆ.
ಈ ಸಂಬಂಧ ಕೇಂದ್ರ ಗ್ರಾಹಕ ವ್ಯವಹಾರಗಳ ಇಲಾಖೆಯು ‘ಕಾನೂನು ಮಾಪನಶಾಸ್ತ್ರ (ಭಾರತೀಯ ಪ್ರಮಾಣಿತ ಸಮಯ) ನಿಯಮಗಳು-2026’ ಅನ್ನು ಅಧಿಕೃತವಾಗಿ ಅಧಿಸೂಚಿಸಿದೆ.
ಗೆಜೆಟ್‌ನಲ್ಲಿ ಪ್ರಕಟವಾದ ದಿನಾಂಕದಿಂದ 180 ದಿನಗಳಲ್ಲಿ (ಆರು ತಿಂಗಳು) ಈ ನಿಯಮಗಳು ಪೂರ್ಣ ಪ್ರಮಾಣದಲ್ಲಿ ಜಾರಿಗೆ ಬರಲಿವೆ. ಅಲ್ಲಿಯವರೆಗೆ ಸರ್ಕಾರಿ ಇಲಾಖೆಗಳು, ಖಾಸಗಿ ಸಂಸ್ಥೆಗಳು ಮತ್ತು ಟೆಕ್ ಸಂಸ್ಥೆಗಳು ತಮ್ಮ ವ್ಯವಸ್ಥೆಗಳಲ್ಲಿ ಅಗತ್ಯ ತಾಂತ್ರಿಕ ಬದಲಾವಣೆಗಳನ್ನು ಮಾಡಿಕೊಳ್ಳಲು ಕಾಲಾವಕಾಶ ನೀಡಲಾಗಿದೆ.
ಸ್ವದೇಶಿ NavIC ತಂತ್ರಜ್ಞಾನಕ್ಕೆ ಆದ್ಯತೆ:
ಪ್ರಸ್ತುತ ದೇಶದ ಬಹುತೇಕ ಡಿಜಿಟಲ್ ನೆಟ್‌ವರ್ಕ್‌ಗಳು ವಿದೇಶಿ ಉಪಗ್ರಹ ಆಧಾರಿತ ಸಮಯದ ಮೂಲಗಳನ್ನು ಅವಲಂಬಿಸಿವೆ. ಇನ್ನು ಮುಂದೆ ಭಾರತದ ಸ್ವದೇಶಿ ಉಪಗ್ರಹ ಸಂಚರಣೆ ವ್ಯವಸ್ಥೆ ‘NavIC’ ಮತ್ತು ಅನುಮೋದಿತ ಪ್ರಯೋಗಾಲಯಗಳ ಮೂಲಕ ನಿಖರವಾದ IST ಪ್ರಸರಣವಾಗಲಿದೆ. ಇದರಿಂದ ಬಾಹ್ಯ ಮೂಲಗಳ ಮೇಲಿನ ಅವಲಂಬನೆ ತಪ್ಪಲಿದ್ದು, ದೇಶದ ಡಿಜಿಟಲ್ ಸುರಕ್ಷತೆ ಹೆಚ್ಚಲಿದೆ.
ಯಾವೆಲ್ಲಾ ಕ್ಷೇತ್ರಗಳಿಗೆ ಕಡ್ಡಾಯ?:
ಬ್ಯಾಂಕಿಂಗ್ & ಡಿಜಿಟಲ್ ಪಾವತಿ: ಯುಪಿಐ, ನೆಟ್ ಬ್ಯಾಂಕಿಂಗ್ ವಹಿವಾಟುಗಳಿಗೆ ನಿಖರವಾದ ‘ಟೈಮ್ ಸ್ಟ್ಯಾಂಪ್’.
ಸಾರಿಗೆ ವ್ಯವಸ್ಥೆ: ರೈಲ್ವೆ, ವಿಮಾನ ನಿಲ್ದಾಣ ಹಾಗೂ ಮೆಟ್ರೋ ಕಾರ್ಯಾಚರಣೆಗಳ ಸಮನ್ವಯ.
ದೂರಸಂಪರ್ಕ & ಇಂಟರ್ನೆಟ್: ಮೊಬೈಲ್ ನೆಟ್‌ವರ್ಕ್ ಮತ್ತು ಸರ್ವರ್‌ಗಳ ವಿಶ್ವಾಸಾರ್ಹ ಕಾರ್ಯಾಚರಣೆ.
ಇತರ ಸೇವೆಗಳು: ವಿದ್ಯುತ್ ಗ್ರಿಡ್, ಸೈಬರ್ ಭದ್ರತೆ ಹಾಗೂ ಸರ್ಕಾರಿ ಮತ್ತು ನ್ಯಾಯಾಂಗ ಇಲಾಖೆಯ ಅಧಿಕೃತ ದಾಖಲೆಗಳು.
ಬೆಂಗಳೂರಿನಲ್ಲಿ ಯಶಸ್ವಿ ಪ್ರಾಯೋಗಿಕ ಜಾಲ:
’ಒನ್ ನೇಷನ್, ಒನ್ ಟೈಮ್’ ಉಪಕ್ರಮದ ಭಾಗವಾಗಿ ಬೆಂಗಳೂರಿನ ಪ್ರಾದೇಶಿಕ ಉಲ್ಲೇಖ ಪ್ರಮಾಣಿತ ಪ್ರಯೋಗಾಲಯದಲ್ಲಿ (RRSL) ‘ವೈಟ್ ರ್ಯಾಬಿಟ್’ (White Rabbit) ತಂತ್ರಜ್ಞಾನ ಆಧಾರಿತ IST ಪ್ರಸರಣವನ್ನು ಯಶಸ್ವಿಯಾಗಿ ಪ್ರದರ್ಶಿಸಲಾಗಿದೆ. CSIR-NPL, ISRO, SEBI, NSE ಮತ್ತು BSNL ಸಹಯೋಗದೊಂದಿಗೆ ಬೆಂಗಳೂರು ಹಾಗೂ ಚೆನ್ನೈ ಎನ್‌ಎಸ್‌ಇ ನಡುವೆ ಸುರಕ್ಷಿತ ಸಮಯ ಪ್ರಸರಣವನ್ನು ಪರೀಕ್ಷಿಸಲಾಗಿದೆ.
”180 ದಿನಗಳ ಅವಧಿಯಲ್ಲಿ ಎಲ್ಲಾ ಪಾಲುದಾರರು ಅಗತ್ಯ ತಾಂತ್ರಿಕ ಬದಲಾವಣೆಗಳನ್ನು ಪೂರ್ಣಗೊಳಿಸಿ, ಸ್ವದೇಶಿ ಉಪಗ್ರಹ ಆಧಾರಿತ IST ಅನುಷ್ಠಾನಕ್ಕೆ ಸಿದ್ಧರಾಗಬೇಕು.”
— ಪ್ರಲ್ಹಾದ ಜೋಶಿ, ಕೇಂದ್ರ ಗ್ರಾಹಕ ವ್ಯವಹಾರಗಳ ಸಚಿವರು
Join our WhatsApp Channel
