ಬೆಂಗಳೂರು, ಡಿ.17 www.bengaluruwire.com :ಪರಿಸರ ಸ್ನೇಹಿ ಸಾರಿಗೆ ವ್ಯವಸ್ಥೆಯಲ್ಲಿ ಕ್ರಾಂತಿಕಾರಕ ಬದಲಾವಣೆ ತಂದಿರುವ ಬೆಂಗಳೂರು ಮಹಾನಗರ ಸಾರಿಗೆ ಸಂಸ್ಥೆ (ಬಿಎಂಟಿಸಿ), ರಾಷ್ಟ್ರಮಟ್ಟದಲ್ಲಿ ಮತ್ತೊಮ್ಮೆ ಗುರುತಿಸಿಕೊಂಡಿದೆ.
‘ಮೊಟರಿಂಗ್ ವರ್ಲ್ಡ್ ಗ್ರೀನ್ ಮೊಬಿಲಿಟಿ ಅವಾರ್ಡ್ಸ್–2025’ರಲ್ಲಿ “ಇವಿ ಬಸ್ ಅಳವಡಿಕೆಗೆ ಅತ್ಯುತ್ತಮ ನಗರ” ವಿಭಾಗದಲ್ಲಿ ಬಿಎಂಟಿಸಿ ಬೆಳ್ಳಿ ಪ್ರಶಸ್ತಿಯನ್ನು ಮುಡಿಗೇರಿಸಿಕೊಳ್ಳುವ ಮೂಲಕ ಕರ್ನಾಟಕಕ್ಕೆ ಕೀರ್ತಿ ತಂದಿದೆ.
1,700 ಇವಿ ಬಸ್ಗಳ ಸಾಧನೆಗೆ ಮನ್ನಣೆ :
ಸಾರ್ವಜನಿಕ ವಿದ್ಯುತ್ ಸಾರಿಗೆಯಲ್ಲಿ (Electric Public Transport) ಬೆಂಗಳೂರು ತೋರಿರುವ ನಾಯಕತ್ವವನ್ನು ಈ ಪ್ರಶಸ್ತಿ ಎತ್ತಿ ಹಿಡಿದಿದೆ. ನಗರದಲ್ಲಿ ಈಗಾಗಲೇ 1,700ಕ್ಕೂ ಹೆಚ್ಚು ಎಲೆಕ್ಟ್ರಿಕ್ ಬಸ್ಗಳನ್ನು ಯಶಸ್ವಿಯಾಗಿ ಕಾರ್ಯಾಚರಣೆಗೆ ಇಳಿಸಲಾಗಿದೆ. ಅಲ್ಲದೇ, ಮುಂದಿನ ಹಂತದಲ್ಲಿಯೂ ಇವಿ ಬಸ್ ಸೇವೆಯನ್ನು ವಿಸ್ತರಿಸುವ ಬಿಎಂಟಿಸಿಯ ಮಹತ್ವಾಕಾಂಕ್ಷಿ ಯೋಜನೆ, ದತ್ತಾಂಶ ಆಧಾರಿತ ಕಾರ್ಯವೈಖರಿ ಮತ್ತು ಒಪ್ಪಂದಾಧಾರಿತ ಖರೀದಿ ವ್ಯವಸ್ಥೆಯ ಪಾರದರ್ಶಕತೆಯನ್ನು ಪರಿಗಣಿಸಿ ಈ ಗೌರವ ನೀಡಲಾಗಿದೆ.
ದೆಹಲಿಯಲ್ಲಿ ಪ್ರಶಸ್ತಿ ಪ್ರದಾನ :
ಡಿಸೆಂಬರ್ 16, 2025 ರಂದು ನವದೆಹಲಿಯ ಟ್ರಾವಂಕೋರ್ ಪ್ಯಾಲೇಸ್ನಲ್ಲಿ ನಡೆದ ವರ್ಣರಂಜಿತ ಸಮಾರಂಭದಲ್ಲಿ ಕೇಂದ್ರ ರಸ್ತೆ ಸಾರಿಗೆ ಮತ್ತು ಹೆದ್ದಾರಿ ಸಚಿವ ನಿತಿನ್ ಗಡ್ಕರಿ ಅವರು ಪ್ರಶಸ್ತಿ ಪ್ರದಾನ ಮಾಡಿದರು. ಬಿಎಂಟಿಸಿ ಪರವಾಗಿ ಮುಖ್ಯ ಸಂಚಾರ ವ್ಯವಸ್ಥಾಪಕ (ಆಪರೇಷನ್ಸ್) ಹಾಗೂ ಇವಿ ಬಸ್ ಕಾರ್ಯಾಚರಣೆಗಳ ಮುಖ್ಯಸ್ಥರಾದ ಜಿ.ಟಿ. ಪ್ರಭಾಕರ್ ರೆಡ್ಡಿ ಅವರು ಪ್ರಶಸ್ತಿಯನ್ನು ಸ್ವೀಕರಿಸಿದರು.
ಕಠಿಣ ಮೌಲ್ಯಮಾಪನ :
ದೆಹಲಿ ಪ್ರೆಸ್ ಗ್ರೂಪ್ನ ‘ಮೊಟರಿಂಗ್ ವರ್ಲ್ಡ್ ಮ್ಯಾಗಜಿನ್’ ಆಯೋಜಿಸಿದ್ದ ಈ ಪ್ರಶಸ್ತಿ ಆಯ್ಕೆ ಪ್ರಕ್ರಿಯೆಯು ಅತ್ಯಂತ ಕಠಿಣವಾಗಿತ್ತು. ಆರ್ಟಿಐ (RTI) ಮೂಲಕ ಲಭ್ಯವಾದ ಮಾಹಿತಿ, ಸರ್ಕಾರಿ ಪೋರ್ಟಲ್ ದತ್ತಾಂಶ ಹಾಗೂ ಸಾರ್ವಜನಿಕ ಕಾರ್ಯಕ್ಷಮತಾ ಸೂಚಕಗಳನ್ನು ಆಧರಿಸಿ, ಪರಿಣಿತರನ್ನೊಳಗೊಂಡ ನ್ಯಾಯಮಂಡಳಿಯು ಮೌಲ್ಯಮಾಪನ ನಡೆಸಿ ವಿಜೇತರನ್ನು ಆಯ್ಕೆ ಮಾಡಿದೆ.
ಈ ಪ್ರಶಸ್ತಿಯು ಕರ್ನಾಟಕ ಸರ್ಕಾರದ ಸುಸ್ಥಿರ ಸಾರಿಗೆ ನೀತಿ ಮತ್ತು ಬಿಎಂಟಿಸಿಯ ಪರಿಣಾಮಕಾರಿ ಅನುಷ್ಠಾನಕ್ಕೆ ಸಾಕ್ಷಿಯಾಗಿದ್ದು, ದೇಶದ ಇತರೆ ನಗರಗಳಿಗೆ ಬೆಂಗಳೂರು ಮಾದರಿಯಾಗಿ ನಿಂತಿದೆ.
Join our WhatsApp Channel
