ಅಂಡಮಾನ್ ನ ರಾಜಧಾನಿ ಪೋರ್ಟ್ ಬ್ಲೇರ್ ಇನ್ನು "ಶ್ರೀ ವಿಜಯಪುರಂ" : ಮರು ನಾಮಕರಣ ಮಾಡಿದ ಕೇಂದ್ರ

ನವದೆಹಲಿ, ಸೆ.14 www.bengaluruwire.com : ದೇಶದ ವಸಾಹತುಶಾಹಿ ಕಾಲದಲ್ಲಿ ಅಂಡಮಾನ್ ಮತ್ತು ನಿಕೋಬಾರ್ ದ್ವೀಪಗಳ (Andaman and Nicobar Islands) ರಾಜಧಾನಿ ಪೋರ್ಟ್ ಬ್ಲೇರ್ (Port Blair)ಗೆ ಇಡಲಾಗಿದ್ದ ಹೆಸರನ್ಙು ಕೇಂದ್ರ ಸರ್ಕಾರ “ಶ್ರೀ ವಿಜಯ ಪುರಂ” (Sri Vijaya Puram) ಎಂದು ಮರುನಾಮಕರಣ ಮಾಡಿದೆ.

ದೇಶದ ವಸಾಹತುಶಾಹಿ ಛಾಪನ್ನು ಮುಕ್ತಗೊಳಿಸುವ ಉತ್ಸಾಹದಲ್ಲಿ ಈ ನಿರ್ಧಾರ ತೆಗೆದುಕೊಳ್ಳಲಾಗಿದೆ ಎಂದು ಕೇಂದ್ರ ಗೃಹ ಸಚಿವ ಅಮಿತ್ ಶಾ ಇದೇ ವೇಳೆ ತಿಳಿಸಿದ್ದಾರೆ.

“ಪ್ರಧಾನಿ ನರೇಂದ್ರ ಮೋದಿಯವರ ದೂರದೃಷ್ಟಿಯಿಂದ ಪ್ರೇರಿತರಾಗಿ, ದೇಶವನ್ನು ವಸಾಹತುಶಾಹಿ ಛಾಪಿನಿಂದ ಮುಕ್ತಗೊಳಿಸಲು, ನಾವು ಪೋರ್ಟ್ ಬ್ಲೇರ್ ಅನ್ನು ‘ಶ್ರೀ ವಿಜಯ ಪುರಂ ಎಂದು ಮರುನಾಮಕರಣ ಮಾಡಲು ನಿರ್ಧರಿಸಿದ್ದೇವೆ” ಎಂದು ಅವರು ತಮ್ಮ ಎಕ್ಸ್‌ ಖಾತೆಯಲ್ಲಿ ಪೋಸ್ಟ್ ಮಾಡಿದ್ದಾರೆ.

“ಹಿಂದಿನ ಹೆಸರು ವಸಾಹತುಶಾಹಿ ಪರಂಪರೆಯನ್ನು ಹೊಂದಿದ್ದರೂ, ಶ್ರೀ ವಿಜಯ ಪುರಂ ನಮ್ಮ ಸ್ವಾತಂತ್ರ್ಯ ಹೋರಾಟದಲ್ಲಿ ಸಾಧಿಸಿದ ವಿಜಯವನ್ನು ಸಂಕೇತಿಸುತ್ತದೆ ಮತ್ತು ಅಂಡಮಾನ್ ಮತ್ತು ನಿಕೋಬಾರ್ ದ್ವೀಪಗಳ ವಿಶಿಷ್ಟ ಪಾತ್ರವನ್ನು ಸಂಕೇತಿಸುತ್ತದೆ.” ಭಾರತದ ಸ್ವಾತಂತ್ರ್ಯ ಹೋರಾಟ ಮತ್ತು ಇತಿಹಾಸದಲ್ಲಿ ಅಂಡಮಾನ್ ಮತ್ತು ನಿಕೋಬಾರ್ ದ್ವೀಪಗಳು ಅಪ್ರತಿಮ ಸ್ಥಾನವನ್ನು ಹೊಂದಿವೆ ಎಂದು ಗೃಹ ಸಚಿವರು ಬಣ್ಣಿಸಿದರು.

7 ರಿಂದ 13 ನೇ ಶತಮಾನದವರೆಗೆ ಪ್ರವರ್ಧಮಾನಕ್ಕೆ ಬಂದ ಆಗ್ನೇಯ ಏಷ್ಯಾದ ಪ್ರಬಲ ಕಡಲ ರಾಜವಂಶವಾದ ವಿಜಯ ಸಾಮ್ರಾಜ್ಯದಿಂದ ರಾಜಧಾನಿಯ ಹೊಸ ಹೆಸರು ಪ್ರೇರಿತವಾಗಿದೆ. “ಒಂದು ಕಾಲದಲ್ಲಿ ಚೋಳ ಸಾಮ್ರಾಜ್ಯದ ನೌಕಾನೆಲೆಯಾಗಿ ಸೇವೆ ಸಲ್ಲಿಸಿದ ದ್ವೀಪ ಪ್ರದೇಶವು ಇಂದು ನಮ್ಮ ಕಾರ್ಯತಂತ್ರ ಮತ್ತು ಅಭಿವೃದ್ಧಿಯ ಆಕಾಂಕ್ಷೆಗಳಿಗೆ ನಿರ್ಣಾಯಕ ನೆಲೆಯಾಗಿದೆ. ಇದು ನೇತಾಜಿ ಸುಭಾಷ್ ಚಂದ್ರ ಬೋಸ್ ಮತ್ತು ನಮ್ಮ ಬಾವುಟದ ಮೊದಲ ಅನಾವರಣವನ್ನು ಆಯೋಜಿಸಿದ ಸ್ಥಳವಾಗಿದೆ. ವೀರ್ ಸಾವರ್ಕರ್ ಮತ್ತು ಇತರ ಸ್ವಾತಂತ್ರ್ಯ ಹೋರಾಟಗಾರರು ಸ್ವತಂತ್ರ ರಾಷ್ಟ್ರಕ್ಕಾಗಿ ಹೋರಾಡಿದ ಸೆಲ್ಯುಲಾರ್ ಜೈಲು ಕೂಡ ಇರುವಂತಹ ಸ್ಥಳವಾಗಿದೆ” ಅವರು ಹೇಳಿದರು.

ಅಂಡಮಾನ್ ದ್ವೀಪಗಳು ಮತ್ತು ಚಾಗೋಸ್ ದ್ವೀಪ ಸಮೂಹವನ್ನು ಸಮೀಕ್ಷೆ ಮಾಡಿದ ಬ್ರಿಟಿಷ್ ವಸಾಹತುಶಾಹಿ ನೌಕಾಪಡೆಯ ಅಧಿಕಾರಿ ಕ್ಯಾಪ್ಟನ್ ಆರ್ಚಿಬಾಲ್ಡ್ ಬ್ಲೇರ್ ಅವರ ಹೆಸರನ್ನು ಈ ದ್ವೀಪರಾಜ್ಯದ ರಾಜಧಾನಿಗೆ ಪೋರ್ಟ್ ಬ್ಲೇರ್ ಎಂದು ಹೆಸರಿಡಲಾಯಿತು. ಈಸ್ಟ್ ಇಂಡಿಯಾ ಕಂಪನಿಯು 1788 ರಲ್ಲಿ ಅಂಡಮಾನ್ ಸಮುದ್ರವನ್ನು ಸಮೀಕ್ಷೆ ಮಾಡಲು ಬ್ಲೇರ್ ಅವರನ್ನು ನೇಮಿಸಿತ್ತು. ಅವರು 1789 ರಲ್ಲಿ ಈ ದ್ವೀಪಗಳನ್ನು ತಲುಪಿದರು ಎಂದು ಇತಿಹಾಸದಲ್ಲಿ ದಾಖಲಾಗಿದೆ.

ಜುಲೈನಲ್ಲಿ, ರಾಷ್ಟ್ರಪತಿ ಭವನದ ಸಾಂಪ್ರದಾಯಿಕ ‘ದರ್ಬಾರ್ ಹಾಲ್’ ಮತ್ತು ‘ಅಶೋಕ್ ಹಾಲ್’ ಅನ್ನು ಕ್ರಮವಾಗಿ ‘ಗಣತಂತ್ರ ಮಂಟಪ’ ಮತ್ತು ‘ಅಶೋಕ್ ಮಂಟಪ’ ಎಂದು ಮರುನಾಮಕರಣ ಮಾಡಲಾಗಿತ್ತು.