ಬೆಂಗಳೂರು, ನ.04 www.bengaluruwire.com: ರಾಜ್ಯದ ಜನಸಾಮಾನ್ಯರ ನಿತ್ಯದ ಊಟಕ್ಕೆ ಇದೀಗ ಬೆಲೆ ಏರಿಕೆಯ ಬಿಸಿ ತಟ್ಟಿದೆ. ಕರ್ನಾಟಕದಲ್ಲಿ ಚಿಲ್ಲರೆ ಅಕ್ಕಿ ಬೆಲೆಗಳು ಅಭೂತಪೂರ್ವ ಮಟ್ಟದಲ್ಲಿ ಏರಿಕೆಯಾಗಿದ್ದು, ಅಕ್ಟೋಬರ್ ಅಂತ್ಯ ಹಾಗೂ ನವೆಂಬರ್ ಆರಂಭದ ಹೊತ್ತಿಗೆ ರಾಜ್ಯ ಸರಾಸರಿ ಚಿಲ್ಲರೆ ದರ ಪ್ರತಿ ಕೆಜಿಗೆ ₹74.40ಕ್ಕೆ ಮುಟ್ಟಿದೆ.
ಕಳೆದ ನಾಲ್ಕು ತಿಂಗಳಲ್ಲಿ ದೇಶದಲ್ಲೇ ಅತ್ಯಂತ ಕಡಿದಾದ ಬೆಲೆ ಏರಿಕೆ ಕಂಡಿರುವ ರಾಜ್ಯವಾಗಿ ಕರ್ನಾಟಕ ಹೊರಹೊಮ್ಮಿದ್ದು, ಕಾವೇರಿ ಮತ್ತು ಕೃಷ್ಣಾ-ತುಂಗಭದ್ರಾ ಕಣಿವೆಗಳಲ್ಲಿ ಉಂಟಾದ ತೀವ್ರ ಬರ ಪರಿಸ್ಥಿತಿ ಹಾಗೂ ಭತ್ತದ ಪೂರೈಕೆಯ ಕೊರತೆ ಇದಕ್ಕೆ ಪ್ರಮುಖ ಕಾರಣವಾಗಿದೆ.
ಜೂನ್ ತಿಂಗಳಲ್ಲಿ ಪ್ರತಿ ಕೆಜಿಗೆ ಸರಾಸರಿ ₹52.11 ಇದ್ದ ಅಕ್ಕಿ ಬೆಲೆ, ನವೆಂಬರ್ ಹೊತ್ತಿಗೆ ₹74.40ಕ್ಕೆ ಏರಿಕೆಯಾಗುವ ಮೂಲಕ ಒಟ್ಟಾರೆ ಶೇಕಡಾ 43ರಷ್ಟು ಜಿಗಿತ ಕಂಡಿದೆ. ತಿಂಗಳಿನಿಂದ ತಿಂಗಳಿಗೆ (MoM) ಲೆಕ್ಕ ಹಾಕಿದರೆ, ಸೆಪ್ಟೆಂಬರ್‌ನಲ್ಲಿ ₹60 ರಿಂದ ₹62 ಇದ್ದ ದರ ಈಗ ನೇರವಾಗಿ ಕೆಜಿಗೆ ₹12 ರಿಂದ ₹14ರಷ್ಟು ಹೆಚ್ಚಳ ಕಂಡಿದೆ. ಬ್ರ್ಯಾಂಡೆಡ್ ಹಾಗೂ ಹಳೆಯ (Aged) ಪ್ರೀಮಿಯಂ ತಳಿಗಳ ಬೆಲೆಯಂತೂ ಕೆಜಿಗೆ ₹82 ರಿಂದ ₹98ರ ಗಡಿ ದಾಟಿದೆ.
ಪ್ರಮುಖ ತಳಿಗಳ ಬೆಲೆ ವ್ಯತ್ಯಾಸ: ಸಗಟು ವರ್ಸಸ್ ಚಿಲ್ಲರೆ ದರ
ಮಾರುಕಟ್ಟೆಯಲ್ಲಿ ಚಾಲ್ತಿಯಲ್ಲಿರುವ ಪ್ರಮುಖ ಅಕ್ಕಿ ತಳಿಗಳ ಸಗಟು (ಹೋಲ್‌ಸೇಲ್) ಮತ್ತು ಚಿಲ್ಲರೆ (ರೀಟೇಲ್) ದರಗಳ ವಿವರ ಇಲ್ಲಿದೆ:
ಸೋನಾ ಮಸೂರಿ: ನಿತ್ಯ ಬಳಕೆಯ ಈ ಜನಪ್ರಿಯ ತಳಿಯ ಸಗಟು ದರ ಕ್ವಿಂಟಾಲ್‌ ಲೆಕ್ಕದಲ್ಲಿ ಕೆಜಿಗೆ ₹75 ರಿಂದ ₹80 ರಷ್ಟಿದೆ. ಆದರೆ ಚಿಲ್ಲರೆ ಅಂಗಡಿಗಳಲ್ಲಿ ಹಾಗೂ ಸೂಪರ್‌ಮಾರ್ಕೆಟ್‌ಗಳಲ್ಲಿ ಇದು ಕೆಜಿಗೆ ₹95 ರಿಂದ ₹115 ವರೆಗೆ ಮಾರಾಟವಾಗುತ್ತಿದೆ. 26 ಕೆಜಿಯ ಗುಣಮಟ್ಟದ ಹಳೆಯ ಅಕ್ಕಿಯ ಚೀಲಕ್ಕೆ ₹1,800 ರಿಂದ ₹2,450 ವರೆಗೆ ದರ ನಿಗದಿಯಾಗಿದೆ.
ಬುಲೆಟ್ ರೈಸ್ (ಕೋಲಂ): ಹೋಟೆಲ್ ಹಾಗೂ ಕ್ಯಾಟರಿಂಗ್ ವಲಯದಲ್ಲಿ ಅತಿ ಹೆಚ್ಚು ಬೇಡಿಕೆಯಿರುವ ಬುಲೆಟ್ ಅಕ್ಕಿಯ ಸಗಟು ದರ ಕೆಜಿಗೆ ₹85 ರಿಂದ ₹100 ಮುಟ್ಟಿದೆ. ಚಿಲ್ಲರೆ ಮಾರುಕಟ್ಟೆಯಲ್ಲಿ ಗುಣಮಟ್ಟ ಮತ್ತು ಬ್ರ್ಯಾಂಡ್‌ಗೆ ಅನುಗುಣವಾಗಿ ಕೆಜಿಗೆ ₹60 ರಿಂದ ₹100 ವರೆಗೆ ಮಾರಾಟವಾಗುತ್ತಿದೆ.
ಜ್ಯೋತಿ ರೈಸ್: ಇಡ್ಲಿ, ದೋಸೆ ಹಿಟ್ಟಿಗೆ ವ್ಯಾಪಕವಾಗಿ ಬಳಕೆಯಾಗುವ ಜ್ಯೋತಿ ಅಕ್ಕಿಯ ಮೂಲ ತಳಿಗಳ ಸಗಟು ದರ ಕೆಜಿಗೆ ₹50 ರಿಂದ ₹65 ರಷ್ಟಿದ್ದರೆ, ಚಿಲ್ಲರೆ ಮಾರುಕಟ್ಟೆಯಲ್ಲಿ ಸಾರ್ಟೆಕ್ಸ್ ಕ್ಲೀನ್ಡ್ ತಳಿಗಳು ಕೆಜಿಗೆ ₹80 ರಿಂದ ₹82 ರ ದರದಲ್ಲಿ ಸ್ಥಿರವಾಗಿವೆ.
ಆರ್.ಎನ್‌.ಆರ್ (ಸಾಂಬಾ ಮಸೂರಿ / ಬಿಪಿಟಿ: 5204): ಕಡಿಮೆ ಗ್ಲೈಸೆಮಿಕ್ ಇಂಡೆಕ್ಸ್ (Low GI) ಹೊಂದಿರುವ ಕಾರಣ ‘ಡಯಾಬಿಟಿಕ್ ಫ್ರೆಂಡ್ಲಿ’ ಎಂದು ಜನಪ್ರಿಯವಾಗಿರುವ ಈ ತಳಿಯ ಸಗಟು ದರ ಕೆಜಿಗೆ ₹60 ರಿಂದ ₹75 ರಷ್ಟಿದೆ. ನಗರ ಪ್ರದೇಶಗಳ ಚಿಲ್ಲರೆ ಅಂಗಡಿಗಳಲ್ಲಿ ಇದು ಕೆಜಿಗೆ ₹75 ರಿಂದ ₹110 ವರೆಗೆ ಮಾರಾಟವಾಗುತ್ತಿದೆ.
ಎಪಿಎಂಸಿ ಸಗಟು ಮಾರುಕಟ್ಟೆಗಳಲ್ಲಿನ ವಾಸ್ತವ ಚಿತ್ರಣ:
ಕರ್ನಾಟಕ ರಾಜ್ಯ ಕೃಷಿ ಮಾರಾಟ ಮಂಡಳಿ ಹಾಗೂ ಅಗ್ರೋನೆಟ್ (AgMarkNet) ಅಂಕಿ-ಅಂಶಗಳ ಪ್ರಕಾರ, ರಾಜ್ಯದ ಎಪಿಎಂಸಿ ಮಂಡಿಗಳಲ್ಲಿ ಮಧ್ಯಮ ದರ್ಜೆಯ ಅಕ್ಕಿಯ ಸರಾಸರಿ ಮಾದರಿ ಸಗಟು ದರ ಪ್ರತಿ ಕ್ವಿಂಟಾಲ್‌ಗೆ ₹4,960 (ಕೆಜಿಗೆ ₹49.60) ಆಗಿದೆ.
ವಿವಿಧ ಜಿಲ್ಲೆಗಳ ಮಾರುಕಟ್ಟೆಗಳಲ್ಲಿ ಗುಣಮಟ್ಟಕ್ಕೆ ತಕ್ಕಂತೆ ದರಗಳಲ್ಲಿ ಭಾರಿ ವ್ಯತ್ಯಾಸವಿದೆ:
ಬೆಂಗಳೂರಿನ ಯಶವಂತಪುರ ಎಪಿಎಂಸಿ ಮಾರುಕಟ್ಟೆಯಲ್ಲಿ ಸಾಮಾನ್ಯ ತಳಿಯ ಅಕ್ಕಿ ಕ್ವಿಂಟಾಲ್‌ಗೆ ₹6,550 (ಕೆಜಿಗೆ ₹65.50) ಮಾದರಿ ದರದಲ್ಲಿ ವಹಿವಾಟು ನಡೆಸುತ್ತಿದ್ದು, ಹಳೆಯ ಪ್ರೀಮಿಯಂ ದಾಸ್ತಾನು ಗರಿಷ್ಠ ₹6,900 ವರೆಗೆ ತಲುಪಿದೆ. ಬೆಂಗಳೂರು ಗ್ರಾಮಾಂತರ ಮಾರುಕಟ್ಟೆಗಳಲ್ಲಿ ಸರಾಸರಿ ದರ ಕ್ವಿಂಟಾಲ್‌ಗೆ ₹5,783 ರಷ್ಟಿದ್ದು, ಗರಿಷ್ಠ ಬೆಲೆ ₹7,800 ರವರೆಗೆ ದಾಖಲಾಗಿದೆ.
ಉತ್ತರ ಕರ್ನಾಟಕದ ಗದಗ ಎಪಿಎಂಸಿಯಲ್ಲಿ ರಾಜ್ಯದಲ್ಲೇ ಅತ್ಯಧಿಕ ಪ್ರೀಮಿಯಂ ವಹಿವಾಟು ದಾಖಲಾಗಿದ್ದು, ಕ್ವಿಂಟಾಲ್‌ಗೆ ₹8,397 (ಕೆಜಿಗೆ ₹83.97) ವರೆಗೆ ಮಾರಾಟವಾಗಿದೆ. ಇದಕ್ಕೆ ವ್ಯತಿರಿಕ್ತವಾಗಿ, ಶಿವಮೊಗ್ಗದ ತೀರ್ಥಹಳ್ಳಿ ಎಪಿಎಂಸಿಯಲ್ಲಿ ಸ್ಥಳೀಯ ದಪ್ಪ ಅಕ್ಕಿಯ ತಳಿಗಳು ಕ್ವಿಂಟಾಲ್‌ಗೆ ₹2,500 (ಕೆಜಿಗೆ ₹25.00) ದರದಲ್ಲಿ ಲಭ್ಯವಿವೆ.
ಸಗಟು ಮಂಡಿಗಳಲ್ಲಿ ಕೆಜಿಗೆ ₹49.60 ರಿಂದ ₹65.50 ರ ಆಸುಪಾಸಿನಲ್ಲಿರುವ ಅಕ್ಕಿ, ಸಾಗಾಣಿಕೆ ವೆಚ್ಚ, ಮಿಲ್ಲಿಂಗ್ ಶುಲ್ಕ, ಕಮಿಷನ್ ಹಾಗೂ ಚಿಲ್ಲರೆ ವರ್ತಕರ ಲಾಭಾಂಶ ಸೇರಿ ಗ್ರಾಹಕರ ಕೈಸೇರುವಾಗ ಕೆಜಿಗೆ ₹74.40 ರಿಂದ ₹100 ದಾಟುತ್ತಿದೆ.
ಬೆಲೆ ಏರಿಕೆಗೆ ಮುಖ್ಯ ಕಾರಣಗಳೇನು?
ಕೃಷಿ ಬಿಕ್ಕಟ್ಟು ಮತ್ತು ಉತ್ಪಾದನೆ ಕುಸಿತ: ಕಾವೇರಿ ಮತ್ತು ತುಂಗಭದ್ರಾ ನದಿ ಜಲಾನಯನ ಪ್ರದೇಶಗಳಲ್ಲಿ ಉಂಟಾದ ಭೀಕರ ಮಳೆಯ ಕೊರತೆಯಿಂದಾಗಿ ಖಾರಿಫ್ ಹಂಗಾಮಿನ ಭತ್ತದ ಬಿತ್ತನೆ ನಿಗದಿತ ಗುರಿಯ ಅರ್ಧದಷ್ಟು ಮಾತ್ರ ನಡೆದಿದೆ. ಪರಿಣಾಮವಾಗಿ ಎಪಿಎಂಸಿ ಮಂಡಿಗಳಿಗೆ ಹೊಸ ಭತ್ತದ ಆವಕ ಶೇಕಡಾ 10 ರಿಂದ 40ರಷ್ಟು ಕುಸಿದಿದೆ.
ನಗದು ವಹಿವಾಟು ಮತ್ತು ಸಾಲ ಸೌಲಭ್ಯ ಕಡಿತ: ಮಾರುಕಟ್ಟೆಯಲ್ಲಿ ಅಕ್ಕಿ ಬೆಲೆ ಶೀಘ್ರದಲ್ಲೇ ₹100ರ ಗಡಿ ದಾಟಲಿದೆ ಎಂಬ ಆತಂಕ ವ್ಯಾಪಾರಸ್ಥರಲ್ಲಿದೆ. ಈ ಹಿನ್ನೆಲೆಯಲ್ಲಿ ರೈಸ್ ಮಿಲ್ಲರ್‌ಗಳು ಚಿಲ್ಲರೆ ವರ್ತಕರಿಗೆ ನೀಡುತ್ತಿದ್ದ ಸಾಲ ಸೌಲಭ್ಯವನ್ನು (Credit lines) ಕಡಿತಗೊಳಿಸಿದ್ದು, ಮುಂಗಡ ನಗದು ಪಾವತಿಗೆ ಪಟ್ಟುಹಿಡಿಯುತ್ತಿದ್ದಾರೆ.
ಗ್ರಾಹಕರ ಬಜೆಟ್ ಮೇಲೆ ಪರಿಣಾಮ:
ನಗರ ಭಾಗಗಳಲ್ಲಿ ಅಕ್ಕಿ ಬಳಕೆದಾರರ ಆದ್ಯತೆಗಳು ಬದಲಾಗುತ್ತಿವೆ. ಆರೋಗ್ಯದ ದೃಷ್ಟಿಯಿಂದ ಬೆಂಗಳೂರು, ಮೈಸೂರಿನಂತಹ ನಗರಗಳಲ್ಲಿ ಆರ್‌ಎನ್‌ಆರ್ ಅಕ್ಕಿಗೆ ಭಾರೀ ಬೇಡಿಕೆ ಕಂಡುಬರುತ್ತಿದೆ. ಹೋಟೆಲ್ ಉದ್ಯಮಕ್ಕೆ ಅನಿವಾರ್ಯವಾಗಿರುವ ಬುಲೆಟ್ ಅಕ್ಕಿಯ ಸಗಟು ದರ ಶೇ. 33ರಷ್ಟು ಏರಿಕೆಯಾಗಿರುವುದು ಹೋಟೆಲ್ ತಿನಿಸುಗಳ ಬೆಲೆ ಏರಿಕೆಗೂ ಕಾರಣವಾಗುವ ಸಾಧ್ಯತೆಯಿದೆ.
ಸಾಮಾನ್ಯ ಕುಟುಂಬಗಳು ಬಳಸುವ ಸೋನಾ ಮಸೂರಿ ಬೆಲೆ ಚಿಲ್ಲರೆ ಮಾರುಕಟ್ಟೆಯಲ್ಲಿ ₹100 ದಾಟಿರುವುದರಿಂದ, ಮಧ್ಯಮ ವರ್ಗದ ಗ್ರಾಹಕರು ಮಾಸಿಕ ವೆಚ್ಚವನ್ನು ಸರಿದೂಗಿಸಲು ಅಗ್ಗದ ದರ್ಜೆಯ ಸ್ಟೀಮ್ ರೈಸ್ ಅಥವಾ ಸ್ಥಳೀಯ ತಳಿಗಳತ್ತ ಮುಖ ಮಾಡುತ್ತಿದ್ದಾರೆ. ಸರ್ಕಾರ ಕೂಡಲೇ ಮಧ್ಯಪ್ರವೇಶಿಸಿ ಕಾಳಸಂತೆಯನ್ನು ತಡೆದು, ದಾಸ್ತಾನು ನಿಯಂತ್ರಣ ಮಾಡದಿದ್ದರೆ ಮುಂಬರುವ ದಿನಗಳಲ್ಲಿ ಬೆಲೆ ಮತ್ತಷ್ಟು ಏರಿಕೆಯಾಗುವ ಆತಂಕವಿದೆ.
Join our WhatsApp Channel
