ನವದೆಹಲಿ, ಆ.09 www.bengaluruwire.com : 18 ವರ್ಷಗಳಿಗೆ ಕಾನೂನುಬದ್ಧ ಒಪ್ಪಿಗೆಯ ವಯಸ್ಸು ಅಪ್ರಾಪ್ತ ವಯಸ್ಕರನ್ನು ಲೈಂಗಿಕ ಶೋಷಣೆಯಿಂದ ರಕ್ಷಿಸುವ ಉದ್ದೇಶದಿಂದ “ಉದ್ದೇಶಪೂರ್ವಕ, ಚೆನ್ನಾಗಿ ಪರಿಗಣಿಸಿದ ಮತ್ತು ಸುಸಂಬದ್ಧ” ನೀತಿ ನಿರ್ಧಾರವಾಗಿದೆ ಎಂದು ಕೇಂದ್ರವು ಸುಪ್ರೀಂ ಕೋರ್ಟ್‌ಗೆ ತಿಳಿಸಿದೆ.
ಹಿರಿಯ ವಕೀಲೆ ಮತ್ತು ನ್ಯಾಯಾಂಗ ಮಿತ್ರ (Amicus curiae)ರಾಗಿರುವ ಇಂದಿರಾ ಜೈಸಿಂಗ್ ಅವರು, ‘ಪೋಕ್ಸೋ ಕಾಯ್ದೆಯ ಅಡಿಯಲ್ಲಿ ಬರುವ ಅಪರಾಧಗಳಿಗೆ ಸಂಬಂಧಿಸಿದಂತೆ, ಸಮ್ಮತಿಯ ಒಪ್ಪಿತ ವಯಸ್ಸನ್ನು 18 ರಿಂದ 16 ವರ್ಷಕ್ಕೆ ಇಳಿಸಬೇಕು. ಇದರಿಂದ ಹದಿಹರೆಯದವರ ನಡುವಿನ ಪ್ರೇಮ ಸಂಬಂಧಗಳನ್ನು ಅಪರಾಧವೆಂದು ಪರಿಗಣಿಸುವುದು ತಪ್ಪುತ್ತದೆ,’ ಎಂದು ವಾದಿಸಿದ್ದರು. ಇದಕ್ಕೆ ಪ್ರತಿಕ್ರಿಯಿಸಿದ ಕೇಂದ್ರ ಸರ್ಕಾರ, ಸಮ್ಮತಿಯ ವಯಸ್ಸನ್ನು ಕಡಿಮೆ ಮಾಡುವುದು ಕಾನೂನುಬದ್ಧವಾಗಿ ಸರಿಯಲ್ಲ ಮತ್ತು ಅಪಾಯಕಾರಿ ಎಂದು ಹೇಳಿದೆ.
ಹೆಚ್ಚುವರಿ ಸಾಲಿಸಿಟರ್ ಜನರಲ್ ಐಶ್ವರ್ಯ ಭಾಟಿ ಅವರು, ‘18 ವರ್ಷ ಎಂಬ ಕಾನೂನು ಮಿತಿಯು ಮಕ್ಕಳ ರಕ್ಷಣಾ ಕಾನೂನುಗಳ ಸಮಗ್ರತೆಯನ್ನು ಎತ್ತಿಹಿಡಿಯಲು ಅವಶ್ಯಕವಾಗಿದೆ. ಹದಿಹರೆಯದವರ ಪ್ರೇಮ ಸಂಬಂಧಗಳನ್ನು ಅಪರಾಧವಲ್ಲ ಎಂದು ವಾದಿಸುವುದಕ್ಕಾಗಿ ಈ ನಿಯಮವನ್ನು ದುರ್ಬಲಗೊಳಿಸಬಾರದು,’ ಎಂದು ತಿಳಿಸಿದರು.
ಕಾನೂನು ಸಡಿಲಗೊಳಿಸುವುದರಿಂದ ಮಕ್ಕಳ ಭಾವನಾತ್ಮಕ ಅವಲಂಬನೆ ಅಥವಾ ಮೌನವನ್ನು ದುರುಪಯೋಗಪಡಿಸಿಕೊಳ್ಳುವವರ ರಕ್ಷಣೆಗೆ ಅವಕಾಶ ನೀಡಿದಂತಾಗುತ್ತದೆ ಎಂದು ಕೇಂದ್ರ ಸರ್ಕಾರ ಎಚ್ಚರಿಸಿದೆ. ‘ಪೋಕ್ಸೋ ಕಾಯ್ದೆ (2012) ಮತ್ತು ಭಾರತೀಯ ನ್ಯಾಯ ಸಂಹಿತೆ (ಬಿಎನ್‌ಎಸ್) ಗಳ ತಡೆಗಟ್ಟುವ ಸ್ವಭಾವವನ್ನು ದುರ್ಬಲಗೊಳಿಸಬಹುದು. ಅಪರಾಧವೆಸಗುವವರಿಗೆ ರಕ್ಷಣೆ ನೀಡಿದಂತಾಗುತ್ತದೆ,’ ಎಂದು ಕೇಂದ್ರ ಸರ್ಕಾರ ವಾದಿಸಿದೆ.
ಇದಲ್ಲದೆ, ಕಾನೂನನ್ನು ದುರ್ಬಲಗೊಳಿಸುವುದು ಮಕ್ಕಳ ರಕ್ಷಣೆಯಲ್ಲಿ ದಶಕಗಳ ಪ್ರಗತಿಯನ್ನು ಹಿಮ್ಮೆಟ್ಟಿಸುತ್ತದೆ. ಹದಿಹರೆಯದವರ ಒಪ್ಪಿಗೆಯ ವಯಸ್ಸನ್ನು ಕಡಿಮೆ ಮಾಡುವುದರಿಂದ ಅಥವಾ ಕಾನೂನು ವಿನಾಯಿತಿಗಳನ್ನು ಸೃಷ್ಟಿಸುವುದರಿಂದ ಬಾಲಾಪರಾಧ ಪ್ರಕರಣಗಳಿಗೆ ದಾರಿ ಮಾಡಿಕೊಡುತ್ತದೆ ಎಂದು ಸರ್ಕಾರ ಹೇಳಿದೆ.
ಇಂತಹ ಕಠಿಣ ಕಾನೂನುಗಳು ಮಕ್ಕಳ ದೈಹಿಕ ಸಮಗ್ರತೆಯನ್ನು ರಕ್ಷಿಸಲು ಸಹಾಯ ಮಾಡುತ್ತವೆ ಎಂದು ಕೇಂದ್ರ ತನ್ನ ವಾದ ಮಂಡಿಸಿತು. ಯಾವುದೇ ನಿರ್ಧಾರಗಳನ್ನು ಪ್ರಕರಣ ಆಧಾರಿತವಾಗಿ ನ್ಯಾಯಾಂಗವು ನಿರ್ಧರಿಸಲಿ ಎಂದು ಕೇಂದ್ರ ಸರ್ಕಾರವು ತಿಳಿಸಿದೆ ಎಂದು ಪಿಟಿಐ ವರದಿ ಮಾಡಿದೆ.
Join our WhatsApp Channel
