ಬೆಂಗಳೂರು, ಜ.1 www.bengaluruwire.com : ಆಸ್ತಿ ತೆರಿಗೆಯನ್ನು ಬಾಕಿ ಉಳಿಸಿಕೊಂಡ ಮಾಲೀಕರೇ ಎಚ್ಚರ..!! ನಗರ ವ್ಯಾಪ್ತಿಯಲ್ಲಿ 2023-24 ಹಾಗೂ ಹಳೆಯ ತೆರಿಗೆ ಕಟ್ಟದ ನಗರದ 6 ಲಕ್ಷ ಮಾಲೀಕರ ಆಸ್ತಿ ತೆರಿಗೆ ಕಟ್ಟಡ ಸ್ಥಿರಾಸ್ತಿಗಳನ್ನು ಬಿಬಿಎಂಪಿ ವಶಪಡಿಸಿಕೊಂಡು, ಮಾರಾಟ ಮಾಡಲಿದೆ ಎಂಬ ಎಚ್ಚರಿಕೆ ಸಂದೇಶ (SMS) ಹೊಸ ವರ್ಷದ ಆರಂಭದ ದಿನದಿಂದ ಇಂತಹ ಮಾಲೀಕರ ಮೊಬೈಲ್ ಗೆ ರವಾನೆಯಾಗುತ್ತಿದೆ.
ಬಿಬಿಎಂಪಿ ಕಾಯಿದೆ 2020ರ ಪ್ರಕಾರ ಆಸ್ತಿ ತೆರಿಗೆ ಕಟ್ಟದ ಮಾಲೀಕರ ಸ್ವತ್ತುಗಳನ್ನು ಮಾರಾಟ ಮಾಡುವ, ಅಟ್ಯಾಚ್ ಮೆಂಟ್ (ಲಗತ್ತಿಸುವಿಕೆ), ಬೀಗಮುದ್ರೆ ಅಥವಾ ಉಪನೋಂದಣಾಧಿಕಾರಿಗಳು ನೀಡುವ ಋಣಭಾರ ರಾಹಿತ್ಯ ಪ್ರಮಾಣಪತ್ರ (Encumbrance Certificate – EC)ದಲ್ಲಿ ಪಾಲಿಕೆಗೆ ಆಸ್ತಿ ಅಟ್ಯಾಚ್ ಮೆಂಟ್ ಮಾಡಿರುವ ಮಾಹಿತಿ ದಾಖಲಾಗುತ್ತದೆ.
ಅಂತಹ ಮಾಲೀಕರ ಬ್ಯಾಂಕ್ ಖಾತೆಗಳಿಂದ ಬಾಕಿ ಆಸ್ತಿ ತೆರಿಗೆ ಹಣ ಪಡೆಯಲು ಕ್ರಮ ಕೈಗೊಳ್ಳುವ ಹಾಗೂ ಅಂತಹ ಆಸ್ತಿ ಮಾಲೀಕರ ಮೇಲೆ ಕ್ರಿಮಿನಲ್‌ ಮೊಕದ್ದಮೆ ಹೂಡುವುದಾಗಿ ಎಚ್ಚರಿಕೆಯನ್ನು ಈ ಹೊಸ ಎಸ್ ಎಂಎಸ್ ಮೂಲಕ ಕಳುಹಿಸಲಾಗುತ್ತಿದೆ ಎಂದು ಬಿಬಿಎಂಪಿ ಕಂದಾಯ ವಿಶೇಷ ಆಯುಕ್ತ ಮುನೀಶ್ ಮುದ್ಗಿಲ್ ಬೆಂಗಳೂರು ವೈರ್ ಗೆ ತಿಳಿಸಿದ್ದಾರೆ.
ತೆರಿಗೆ ಪಾವತಿಸಲು ಇಲ್ಲಿ https:// bbmptax.karnataka.gov.in/ ಕ್ಲಿಕ್ ಮಾಡಿ. ಯಾವುದೇ ಸ್ಪಷ್ಟೀಕರಣಕ್ಕಾಗಿ ನಿಮ್ಮ ಸ್ಥಳೀಯ ವಾರ್ಡ್ ಅಥವಾ ಎಆರ್ ಒ (ARO) ಕಚೇರಿಯನ್ನು ಸಂಪರ್ಕಿಸಿ. ಈಗಾಗಲೇ ಪಾವತಿಸಿದ್ದರೆ ದಯವಿಟ್ಟು ನಿರ್ಲಕ್ಷಿಸಿ ಎಂದೂ ಮೊಬೈಲ್ ಕಿರು ಸಂದೇಶದಲ್ಲಿ ತಿಳಿಸಲಾಗಿದೆ.
ಬಿಬಿಎಂಪಿ ವ್ಯಾಪ್ತಿಯಲ್ಲಿ ಒಟ್ಟು 6 ಲಕ್ಷಕ್ಕೂ ಹೆಚ್ಚು ಆಸ್ತಿ ಮಾಲೀಕರು ಆಸ್ತಿ ತೆರಿಗೆಯನ್ನು ಪಾವತಿಸಿಲ್ಲ ಮತ್ತು ಈ ರೀತಿ ಪಾವತಿಸಬೇಕಾದ ಮೊತ್ತ ಸುಮಾರು 500 ಕೋಟಿ ರೂ. ಗಳಾಗಿದೆ. ಸುಮಾರು 3 ಲಕ್ಷ ಮಂದಿ ಹಲವು ವರ್ಷಗಳಿಂದ ಆಸ್ತಿ ತೆರಿಗೆ ಪಾವತಿಸದಿದ್ದರೆ, ಇನ್ನು 3 ಲಕ್ಷ ಮಂದಿ ಪ್ರಸಕ್ತ ವರ್ಷ ತೆರಿಗೆ ಬಾಕಿ ಉಳಿಸಿಕೊಂಡವರಾಗಿದ್ದಾರೆ ಎಂದು ಬಿಬಿಎಂಪಿ ಕಂದಾಯ ವಿಶೇಷ ಆಯುಕ್ತ ಮುನೀಶ್ ಮುದ್ಗಿಲ್ ಬೆಂಗಳೂರು ವೈರ್ ಗೆ ತಿಳಿಸಿದ್ದಾರೆ.
ಇದರ ಜೊತೆಗೆ ಆಸ್ತಿ ತೆರಿಗೆ ಬಾಕಿ ಉಳಿಸಿಕೊಂಡ ಎಲ್ಲರಿಗೂ ಬಿಬಿಎಂಪಿ ವತಿಯಿಂದ ಎಸ್ ಎಂಎಸ್ ಕಳುಹಿಸಲಾಗಿದೆ. ಅತಿದೊಡ್ಡ ಸುಸ್ತಿದಾರರಿಂದ ಪ್ರಾರಂಭಿಸಿ, ಕೆಳಗಿನ ಅನುಕ್ರಮದ ತನಕ ಬಾಕಿ ಆಸ್ತಿ ತೆರಿಗೆ ಪಾವತಿಯ ಬೇಡಿಕೆ ಸೂಚನೆಯನ್ನು ಕಳುಹಿಸಲಾಗುತ್ತಿದೆ ಎಂದು ಅವರು ಹೇಳಿದ್ದಾರೆ.
Join our WhatsApp Channel
