ಬೆಂಗಳೂರು, ಡಿ.12 www.bengaluruwire.com : ಸಿಲಿಕಾನ್ ಸಿಟಿ ಬೆಂಗಳೂರಿನಲ್ಲಿ 2024ರ ಹೊಸ ವರ್ಷಾಚರಣೆಗೆ ಯುವಜನರಿಗೆ ಡ್ರಗ್ಸ್ ಮಾರಾಟಕ್ಕೆಂದು ಸಂಗ್ರಹಿಸಿಟ್ಟಿದ್ದ 21 ಕೋಟಿ ರೂ. ಮೌಲ್ಯದ 16 ಕೆಜಿ ಎಂಡಿಎಂಎ, 500 ಗ್ರಾಂ ಕೊಕೆನ್ ಮಾದಕ ವಸ್ತುವನ್ನು ನಗರದ ಸಿಸಿಬಿ ಪೊಲೀಸರು ವಶಕ್ಕೆ ಪಡೆದಿದ್ದಾರೆ.
ಬ್ಯುಸಿನೆಸ್ ವೀಸಾದಡಿ ನೈಜಿರಿಯಾದಿಂದ ಆಗಮಿಸಿದ ಡ್ರಗ್ ಪೆಡ್ಲರ್ ಬೆಂಗಳೂರಿಗೆ ಬಂದು ವಿವಿಧ ರಾಜ್ಯಗಳಿಂದ ಡ್ರಗ್ಸ್ಗಳನ್ನು ಕೊರಿಯರ್ ಮೂಲಕ ತರಿಸಿಕೊಳ್ಳುತ್ತಿದ್ದ ವಿದೇಶಿ ಪ್ರಜೆಯನ್ನು ಪೊಲೀಸರು ಬಂಧಿಸಿದ್ದಾರೆ ಎಂದು ಬೆಂಗಳೂರು ನಗರ ಪೊಲೀಸ್ ಆಯುಕ್ತ ಬಿ ದಯಾನಂದ್ ಪತ್ರಿಕಾಗೋಷ್ಠಿಯಲ್ಲಿ ಈ ವಿಷಯ ತಿಳಿಸಿದ್ದಾರೆ.
ಬ್ಯುಸಿನೆಸ್ ವೀಸಾದಡಿ ಬೆಂಗಳೂರಿಗೆ ಬಂದು ರಾಮಮೂರ್ತಿನಗರದಲ್ಲಿ ವಾಸವಾಗಿದ್ದ ನೈಜಿರಿಯಾ ಮೂಲದ ಪ್ರಜೆ ಲಿಯೋನಾರ್ಡ್ ವಕೂಡಿಲಿ (44) ಬಂಧಿತ ಆರೋಪಿ. ಈತ ತಾನಿರುವ ಕೋಣೆಯಲ್ಲಿ ಬೆಡ್ ಶೀಟ್ ಕವರ್, ಸೋಪ್ ಬಾಕ್ಸ್, ಚಾಕಲೇಟ್ ಬಾಕ್ಸ್ಗಳಲ್ಲಿ ಡ್ರಗ್ಸ್ ಶೇಖರಿಸಿ ಇಟ್ಟುಕೊಂಡಿದ್ದ. ಈ ಕುರಿತಂತೆ ರಾಮಮೂರ್ತಿ ನಗರ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ. ಇನ್ನು ಈ ಡ್ರಗ್ ಪೆಡ್ಲರ್ ಸಿಸಿಬಿ ವಿಚಾರಣೆ ವೇಳೆ ಕೆಲವು ಮಹತ್ವದ ಮಾಹಿತಿಯನ್ನು ಬಿಚ್ಚಿಟ್ಟಿದ್ದಾನೆ.
ತಾನು ದೆಹಲಿ, ಬಾಂಬೆ, ಅಸ್ಸಾಂನಿಂದ ಡ್ರಗ್ಸ್, ಕೊಕೆನ್ ತರಿಸಿಕೊಳ್ಳುತ್ತಿದ್ದು, ದೆಹಲಿಯಲ್ಲಿರುವ ಸ್ನೇಹಿತರಿಗೆ ಈ ಸಂಬಂಧ ಪೋನ್ ಮಾಡುತ್ತಿದ್ದನು ಎಂದು ಪೊಲೀಸ್ ಆಯುಕ್ತರು ಹೇಳಿದ್ದಾರೆ.
ಕರೆ ಮಾಡಿದರೆ ದೆಹಲಿಯಿಂದ ಮಾದಕವಸ್ತು ಪೂರೈಕೆ :
ಒಂದು ಕರೆ ಮಾಡಿದರೆ ದೆಹಲಿಯಲ್ಲಿರೋ ನೈಜಿರಿಯನ್ ಪ್ರಜೆಗಳಿಂದ ಬೆಂಗಳೂರಿಗೆ ಮಾದಕವಸ್ತು ಸಪ್ಲೈ ಮಾಡಲಾಗುತ್ತದೆ. ಬೇಡಿಕೆಗೆ ತಕ್ಕಂತೆ ಕೊಕೆನ್, ಎಂಡಿಎಂಎ ರವಾನೆ ಮಾಡಲಾಗುತ್ತದೆ. ಚೂಡಿದಾರ್, ಬಟ್ಟೆ, ಸೋಪ್ ಬಾಕ್ಸ್ , ಚಾಕಲೇಟ್ ಬಾಕ್ಸ್ ಮೂಲಕ ಡ್ರಗ್ಸ್ ರವಾನೆ ಮಾಡಲಾಗುತ್ತದೆ. ದೆಹಲಿಯಿಂದ ಬಸ್, ಟ್ರೈನ್ ಮೂಲಕ ಆರೋಪಿಗಳು ಬಂದು ಪಾರ್ಸೆಲ್ ಕೊಟ್ಟು ಹೋಗುತ್ತಿದ್ದರು ಎಂಬ ಆತಂಕಕಾರಿ ವಿಷಯವನ್ನು ಪೊಲೀಸರು ಬಿಚ್ಚಿಟ್ಟಿದ್ದಾರೆ.
ಒಂದೊ ,ಎರಡು, ಬಾಕ್ಸ್ ಗಳಲ್ಲಿ ಡ್ರಗ್ಸ್ ಇಟ್ಟು ತೆಗೆದುಕೊಂಡು ಬರುತ್ತಿದ್ದರು. 50 ಚೂಡಿದಾರ್ ಗಳ ಬಾಕ್ಸ್ ಇದ್ದರೆ, ಅದರ ಒಳಗೆ ಒಂದು ಎರಡು ಬಾಕ್ಸ್ ಗಳಲ್ಲಿ ಮಾತ್ರ ಡ್ರಗ್ಸ್ ಇಟ್ಟುಕೊಂಡಿರುತ್ತಿದ್ದರು. ವಿಶೇಷ ಏನಂದರೆ ನಮ್ಮ ಬಸ್ ನಿಲ್ಧಾಣ, ರೈಲ್ವೇ ಸ್ಟೇಷನ್ ಗಳಲ್ಲಿ ಸ್ಕ್ಯಾನ್ ಮಾಡೋ ಯಂತ್ರವೇ ಇಲ್ಲ. ಇದರಿಂದಾಗಿ ಈ ದುಷ್ಕರ್ಮಿಗಳು ಸಲೀಸಾಗಿ ಬಟ್ಟೆಯೊಳಗೆ ಡ್ರಗ್ಸ್, ಕೊಕೆನ್, ಎಂಡಿಎಂಎ ಅಡಗಿಸಿಟ್ಟುಕೊಂಡು ಮಾದಕವಸ್ತುಗಳನ್ನು ರವಾನೆ ಮಾಡುತ್ತಿದ್ದರು.
ನಟ ನಟಿಯರಿಗೆ ಡ್ರಗ್ಸ್ ಪೂರೈಕೆಗೂ ಸಂಚು ರೂಪಿಸಿದ್ದ ಆರೋಪಿ :
ಕೊಕೆನ್ ಒಂದು ಗ್ರಾಂಗೆ ಒಂದು ಲಕ್ಷ ರೂ. ರೇಟಿದೆ. ಕೊಕೆನ್ ಹಾಗೂ ಎಂಡಿಎಂಎ ಡ್ರಗ್ಸ್ ಅನ್ನು ಸಾಮಾನ್ಯವಾಗಿ ನಟ, ನಟಿಯರು ಮತ್ತು ಹೆಚ್ಚಾಗಿ ಸೆಲೆಬ್ರಿಟಿಗಳು ಉಪಯೋಗಿಸುತ್ತಾರೆ. ಡ್ರಗ್ಸ್ ಬೆಂಗಳೂರಿಗರಿಗೆ ಸರಬರಾಜು ಆಗುತ್ತಿರುವುದರ ಬಗ್ಗೆ ಮಾಹಿತಿ ಪಡೆದ ರಾಮಮೂರ್ತಿನಗರ ಪೊಲೀಸರು, ಸಿಸಿಬಿ ಇನ್ಸ್ ಪೆಕ್ಟರ್ ಭರತ್ ಗೌಡ ನೇತೃತ್ವದ ತಂಡ ಆತನ ಮನೆ ಮೇಲೆ ದಾಳಿ ಮಾಡಿದೆ. ಈ ವೇಳೆ ನ್ಯೂ ಇಯರ್ ಗಾಗಿ ಮಾರಾಟ ಮಾಡಲು ತಂದಿದ್ದ ಡ್ರಗ್ಸ್ ವಶಕ್ಕೆ ಪಡೆದುಕೊಂಡಿದ್ದಾರೆ.
ಬೆಂಗಳೂರು ಪೊಲೀಸ್ ಇತಿಹಾಸದಲ್ಲಿಯೇ ಒಂದೇ ದಾಳಿಯಲ್ಲಿ ಸಿಕ್ಕಿದ ಅತಿ ದೊಡ್ಡ ಮೊತ್ತದ ಮಾದಕ ವಸ್ತು ಪ್ರಕರಣ ಇದಾಗಿದೆ ಎಂದು ತಿಳಿದುಬಂದಿದೆ.
Join our WhatsApp Channel
