ಬೆಂಗಳೂರು : ಬಿರು ಬಿಸಿಲಿನಲ್ಲಿ ಕೆಂಪು ಬಿಳಿ ಬಣ್ಣದ ಸೂರ್ಯಕಿರಣ ಯುದ್ಧವಿಮಾನ ಆಕಾಶವನ್ನು ಸೀಳಿ ಮುನ್ನುಗ್ಗುತ್ತಿತ್ತು. ಸಾರಂಗ ಹೆಲಿಕಾಪ್ಟರ್ ಗಗನದಲ್ಲಿ ಸಾಗುತ್ತಾ ನವಿಲಿನ ನರ್ತನ ಮಾಡಿತ್ತು. ಯುದ್ಧ ವಿಮಾನಗಳು ಶಬ್ದಾತೀತ ವೇಗದಲ್ಲಿ ಸಾಗುತ್ತಿದ್ದವು…..!
ನಾಳೆಯಿಂದ ಯಲಹಂಕ ವಾಯುನೆಲೆಯಲ್ಲಿ ಮೂರು ದಿನಗಳ ಕಾಲ ವೈಮಾನಿಕ ಪ್ರದರ್ಶನ ನಡೆಯಲಿದೆ. ಮಂಗಳವಾರ ಪೂರ್ಣ ರೀತಿಯ ಪೂರ್ವ ಸಿದ್ಧತಾ ತಾಲೀಮಿನಲ್ಲಿ ಕಂಡು ಬಂದ ದೃಶ್ಯಗಳು.
ಭಾರತೀಯ ಸೇನೆಯ ಸೂರ್ಯಕಿರಣ ಹಾಗೂ ಸಾರಂಗ್ ಜೊತೆಯಾಗಿ ಇದೇ ಪ್ರಥಮ ಬಾರಿಗೆ ವೈಮಾನಿಕ ಪ್ರದರ್ಶನ ನೀಡುತ್ತಿದೆ. ಇಂದು ನಡೆದ ಪೂರ್ವಭಾವಿ ಪ್ರದರ್ಶನದಲ್ಲಿ ಸೂರ್ಯಕಿರಣ ವಿಮಾನಗಳು ಆಕಾಶದಲ್ಲಿ ಹೃದಯ ಆಕಾರದಲ್ಲಿ ಬಿಡಿಸಿದ ಚಿತ್ತಾರ ಎಲ್ಲರ ಗಮನ ಸೆಳೆಯಿತು.
ಇದಲ್ಲದೆ ಎಲ್ ಸಿಎ ತರಬೇತಿ ವಿಮಾನ, ಎಚ್ ಟಿಟಿ-40, ಐಜೆಟಿ, ಸುಧಾರಿತ ಹಾಕ್, ಎಂಕೆ-132, ಸಿವಿಲ್ ಡಿಒ-228 ತರಬೇತಿ ವಿಮಾನಗಳ ವಿಭಾಗದಲ್ಲಿ ಪ್ರದರ್ಶನಗೊಂಡವು.
ಸುಖೋಯ್ 30 ಎಂಕೆಐ, ಸುಧಾರಿತ ಹಗುರ ಹೆಲಿಕಾಪ್ಟರ್ (ಎಎಲ್ ಎಚ್) ರುದ್ರ, ಹಗುರ ಯುದ್ಧವಿಮಾನ (ಎಲ್ ಸಿಎಚ್), ಹಗುರ ಉಪಯೋಗಿ ಹೆಲಿಕಾಪ್ಟರ್ (ಎಲ್ ಯುಎಚ್) ಕೂಡ ಆಕಾಶದಲ್ಲಿ ಆಕರ್ಷಕ ಪ್ರದರ್ಶನ ನೀಡಿ ನೋಡುಗರನ್ನು ರಂಜಿಸಿದವು.
ಹಿಂದೂಸ್ಥಾನ ಏರೊನಾಟಿಕ್ ಲಿಮಿಟೆಡ್ (ಎಚ್ ಎಎಲ್)
ನಾಳಿನ ಉದ್ಘಾಟನಾ ಕಾರ್ಯಕ್ರಮದಲ್ಲಿ “ಆತ್ಮನಿರ್ಭರ ವೈಮಾನಿಕ ಪ್ರದರ್ಶನ” ನೀಡಲಿದೆ. ಈ ಫಾರ್ಮೇಶನ್ ಫ್ಲೈಟ್ ವೈಮಾನಿಕ ಪ್ರದರ್ಶನದಲ್ಲಿ ಎಚ್ ಎಎಲ್ ರಕ್ಷಣೆ ಹಾಗೂ ವೈಮಾನಿಕ ಕ್ಷೇತ್ರದಲ್ಲಿನ ತನ್ನ ಸಾಮರ್ಥ್ಯವನ್ನು ಪ್ರದರ್ಶಿಸಿದವು.
ಆಕಾಶದಲ್ಲಿ ನಡೆಸುವ ಈ ಆಕರ್ಷಕ ವೈಮಾನಿಕ ಕಸರತ್ತಿನಲ್ಲಿ ಎಚ್ ಎಎಲ್ ನಿರ್ಮಿತ ತರಬೇತಿ ವಿಮಾನಗಳು, ಯುದ್ಧ ವಿಮಾನಗಳು, ಹೆಲಿಕಾಪ್ಟರ್ ಗಳ ಮೂಲಕ ಹಾರಾಟ ನಡೆಸುತ್ತಾ ವಿಶ್ವದ ಮೊದಲ ಹೈಬ್ರೀಡ್ ಪ್ರದರ್ಶನದಲ್ಲಿ ಭಾರತದ ವೈಮಾನಿಕ ಸಾಮರ್ಥ್ಯ ತಿಳಿಸಿಕೊಡಲಿವೆ.
“ಹುಟ್ಟು, ಸ್ವದೇಶಿ, ಸಹಭಾಗಿತ್ವ” ಎಂಬ ಥೀಮ್ ಅಡಿಯಲ್ಲಿ ಈ ಆತ್ಮನಿರ್ಭರ ಪಾರ್ಮೇಶನ್ ಫ್ಲೈಟ್ ವೈಮಾನಿಕ ಪ್ರದರ್ಶನವನ್ನು ಫೆ.3ರಂದು ನೀಡಲಿವೆ. ಇದಕ್ಕೆ ಪೂರ್ವಭಾವಿಯಾಗಿ ಇಂದು ಯಲಹಂಕ ವಾಯುನೆಲೆಯಲ್ಲಿ ಪೂರ್ಣರೂಪದ ಪ್ರದರ್ಶನ ಕೈಗೊಳ್ಳಲಾಯಿತು.
ಎಚ್ ಎಎಲ್ ಸ್ಥಿರ ಪ್ರದರ್ಶನದಲ್ಲಿ ಡಿಒ-228, ಎಚ್ ಟಿಟಿ ಟರ್ಬೊ ಟ್ರೈನರ್,ಎಲ್ ಯುಎಚ್ ಮತ್ತು ಎಎಲ್ ಎಚ್ – ಎಂಕೆ 3 ವಿಮಾನಗಳು ಹಾಗೂ ಹೆಲಿಕಾಪ್ಟರ್ ಗಳನ್ನು ಇಡಲಾಗಿದೆ.
ಪೂರ್ವ ಸಿದ್ಧತಾ ತಾಲೀಮು ನಡೆಯುವ ಫೆ.2 ರಂದು ರಕ್ಷಣಾ ಪಡೆಯಲ್ಲಿ ಕಾರ್ಯನಿರ್ವಹಿಸುತ್ತಿರುವ ಅಧಿಕಾರಿಗಳು ಮತ್ತವರ ಕುಟುಂಬಕ್ಕೆ ವೈಮಾನಿಕ ಸ್ಥಳಕ್ಕೆ ಭೇಟಿ ಕೊಡಲು ಅವಕಾಶ ಕಲ್ಪಿಸಲಾಗಿತ್ತು. ಕೋವಿಡ್ ಸುರಕ್ಷತೆ ನಿಯಮಾವಳಿ ರೀತಿ ಪ್ರದರ್ಶನದಲ್ಲಿ ಭಾಗವಹಿಸಲು ಅವಕಾಶ ಕಲ್ಪಿಸಲಾಗಿತ್ತು. ಸಾವಿರಾರು ಸಂಖ್ಯೆಯಲ್ಲಿ ಆಗಮಿಸಿದ್ದ ಪ್ರೇಕ್ಷಕರು ಲೋಹದ ಹಕ್ಕಿಗಳ ಚಮತ್ಕಾರ ನೋಡಿ ಥ್ರಿಲ್ ಆದರು.
ಇನ್ನೊಂದೆಡೆ ಪ್ರದರ್ಶಕರ ವಿಭಾಗದಲ್ಲಿ ಆಲ್ಫಾ ಡಿಸೈನ್ ಟೆಕ್ನಾಲಜಿ ಸೇರಿದಂತೆ ದೇಶ – ವಿದೇಶಗಳ ಪ್ರದರ್ಶಕರು ಮೂರು ದಿನಗಳ ಏರ್ ಶೋ ನಲ್ಲಿ ತಮ್ಮ ಕಂಪನಿಗಳ ಯುದ್ಧ ಸಾಮಗ್ರಿ, ವೈಮಾನಿಕ ತಂತ್ರಙ್ಞನದ ಪ್ರದರ್ಶನಕ್ಕೆ ಸಿದ್ದರಾಗಿದ್ದಾರೆ.
ಕೋವಿಡ್ ವರದಿ ಇದ್ದರಷ್ಟೆ ಪ್ರವೇಶ :
ಪ್ರತಿವರ್ಷ 5 ದಿನಗಳ ಕಾಲ ಏರ್ ಶೋ ಕಾರ್ಯಕ್ರಮ ನಡೆಯುತ್ತಿತ್ತಿ. ಆದರೆ ಈ ಬಾರಿ ಕೋವಿಡ್ ಸೋಂಕು ಹಿನ್ನಲೆಯಲ್ಲಿ ನಿಗಧಿಪಡಿಸಿದ ಮಿತಿಯಲ್ಲಿ ಇ-ಟಿಕೆಟ್ ಖರೀದಿಸಿ, ಕೋವಿಡ್ ಟೆಸ್ಟ್ ವರದಿ ನೆಗಟಿವ್ ಬಂದವರಿಗಷ್ಟೆ ಪ್ರವೇಶ ಕಲ್ಪಿಸಲಾಗಿದೆ. ಉಳಿದಂತೆ ಆಸಕ್ತರು ಏರೊ ಇಂಡಿಯಾ ಮೊಬೈಲ್ ಆಪ್ ಡೌನ್ ಲೋಡ್ ಮಾಡಿಕೊಂಡು ಹೈಬ್ರೀಡ್ ಮಾದರಿಯ ಏರ್ ಶೋ ಕಾರ್ಯಕ್ರಮ ವೀಕ್ಷಿಸಬಹುದು.
ಕಳೆದ ನಾಲ್ಕೈದು ತಿಂಗಳಿನಿಂದಲೇ ಏರ್ ಶೋ ಕಾರ್ಯಕ್ರಮಕ್ಕೆ ಪೂರ್ವಸಿದ್ಧತೆಗಳನ್ನು ಕೈಗೊಂಡಿದೆ. ತುರ್ತು ಚಿಕಿತ್ಸೆ, ವೈದ್ಯೋಪಚಾರ, ವಿಪತ್ತು ನಿರ್ವಹಣೆ, ವೈಮಾನಿಕ ಅಪಾಯ, ಅನುಮಾನಾಸ್ಪದ ದ್ರೋಣ್ ಹಾರಾಟ ತಡೆಗಟ್ಟುವಿಕೆ ಸೇರಿದಂತೆ ಮತ್ತಿತರ ಪರಿಸ್ಥಿತಿ ಎದುರಿಸಲು ಯಲಹಂಕ ವಾಯುನೆಲೆ ಸಿದ್ಧವಾಗಿದೆ.
ನೆಲಮಟ್ಟದಲ್ಲಿ ಶಸ್ತ್ರಸಜ್ಜಿತ ಭದ್ರತಾ ಪಡೆಗಳನ್ನು ನಿಯೋಜಿಸಲಾಗುವುದೆ. ಯಲಹಂಕ ವಾಯುನೆಲೆಯಲ್ಲಿ ಮೂರು ಹಂತದ ಭದ್ರತೆ ಒದಗಿಸಲಾಗಿದೆ.
ಕಳೆದ ಬಾರಿಯಂತೆ ಅಗ್ನಿ ಅವಘಡ ಸಂಭವಿಸಿದಂತೆ ಎಲ್ಲಾ ಅಗತ್ಯ ಕ್ರಮ ಕೈಗೊಳ್ಳಲಾಗಿದೆ. ವಾಹನ ನಿಲ್ದಾಣದಲ್ಲಿ ಹುಲ್ಲು ಬೆಳೆಯದಂತೆ ಕ್ರಮ ಕೈಗೊಳ್ಳಲಾಗಿದೆ. ಆ ಜಾಗವನ್ನು ಸಮತಟ್ಟು ಮಾಡಲಾಗಿದ್ದು, ಯಾವುದೇ ಅಗ್ನಿ ಅವಘಡ ಆಗದಂತೆ ಮುನ್ನೆಚ್ಚರಿಕೆ ಕೈಗೊಳ್ಳಲಾಗಿದೆ.
ಉದ್ಘಾಟನಾ ದಿನದಂದು 42 ವಿಮಾನಗಳಿಂದ ಕಸರತ್ತು
ಈ ಬಾರಿಯ 13ನೇ ಆವೃತ್ತಿಯ ಏರ್ ಶೋ- 2021ನಲ್ಲಿ 42 ವಿಮಾನಗಳು ಸ್ಥಿರ ಪ್ರದರ್ಶನದಲ್ಲಿರಲಿವೆ. ಫೆ.3 ರ ಉದ್ಘಾಟನಾ ದಿನದಂದು ಎಲ್ ಸಿಎ, ಹಾಕ್, ರಫಾಲ್, ಎಲ್ ಯುಎಚ್, ಜಾಗ್ವಾರ್ ಸೇರಿದಂತೆ 41 ವಿಮಾನಗಳು ವೈಮಾನಿಕ ಕಸರತ್ತು ನಡೆಸಲಿದೆ.
ಹೈಬ್ರೀಡ್ ಮಾದರಿಯ ವೈಮಾನಿಕ ಪ್ರದರ್ಶನ:
ವೈಮಾನಿಕ ಕಸರತ್ತು ಪ್ರತಿದಿನ ಬೆಳಿಗ್ಗೆ 9 ರಿಂದ 12 ಗಂಟೆ ತನಕ ಹಾಗೂ ಮಧ್ಯಾಹ್ನ 2 ರಿಂದ 5 ರ ತನಕ ಇರಲಿದೆ. ಮಾಸ್ಕ್ ಧರಿಸಿಬಂದರಷ್ಟೆ ಏರ್ ಶೋ ಗೆ ಪ್ರವೇಶ.
ಏರ್ ಶೋ ಪ್ರವೇಶಕ್ಕೆ ಮಿತಿ :
13ನೇ ಆವೃತ್ತಿಯಲ್ಲಿ ಏರ್ ಶೋ ಸ್ಥಿರ ಪ್ರದರ್ಶನಕ್ಕೆ ಪ್ರತಿದಿನದ ಪ್ರವೇಶ ಮಿತಿ 15,000 ಆಗಿದ್ದರೆ, ವಾಯು ಪ್ರದರ್ಶನ ಜಾಗಕ್ಕೆ ಪ್ರತಿದಿನ ಕೇವಲ 3,000 ಜನರಿಗೆ ಮಾತ್ರ ಪ್ರವೇಶ ಕಲ್ಪಿಸಲಾಗಿದೆ.
Join our WhatsApp Channel
