ತೇಜಸ್ ಮಾರ್ಕ್- 1ಎ ಯುದ್ಧ ವಿಮಾನ ತಯಾರಿಕೆ ಎರಡನೇ ಕೇಂದ್ರ ಲೋಕಾರ್ಪಣೆ

ಬೆಂಗಳೂರು : ಭಾರತೀಯ ವಾಯುಪಡೆಯ ಬಲ ಹೆಚ್ಚಿಸುವ ಅತ್ಯಾಧುನಿಕ ತೇಜಸ್ ಯುದ್ಧ ವಿಮಾನ ತಯಾರಿಕೆಗೆ ವೇಗ ಗತಿ ಸಿಕ್ಕಿದೆ.

ನಗರದ ದೊಡ್ಡನೆಕ್ಕುಂದಿಯಲ್ಲಿನ ಎಚ್ ಎಎಲ್ ನ ತೇಜಸ್ ಯುದ್ಧ ವಿಮಾನ ತಯಾರಿಕೆಯ ಎರಡನೇ ಉತ್ಪಾದನಾ ಕೇಂದ್ರವನ್ನು ರಕ್ಷಣಾ ಸಚಿವ ರಾಜನಾಥ್ ಸಿಂಗ್ ಮಂಗಳವಾರ ಲೋಕಾರ್ಪಣೆ ಮಾಡಿದರು.

ಇದೇ ಸಂದರ್ಭದಲ್ಲಿ ಮಾತನಾಡಿದ ಅವರು, ಕೋವಿಡ್ ಸಂಕಷ್ಠ ಕಾಲದಲ್ಲೂ ಎಚ್ ಎ ಎಲ್ ತೇಜಸ್ ಯುದ್ಧ ವಿಮಾನ ಉತ್ಪಾದನೆಯ ಎರಡನೇ ಕೇಂದ್ರವನ್ನು ಸಿದ್ದಮಾಡಿದೆ. ಇದರಿಂದ ಮುಂದಿನ ದಿನಗಳಲ್ಲಿ ಭಾರತೀಯ ವಾಯುಪಡೆ ಬಲ ಹೆಚ್ಚಿಸುವ ಅತ್ಯಾಧುನಿಕ ಯುದ್ಧ ವಿಮಾನ ತಯಾರಿಕೆ ವೇಗ ಹೆಚ್ಚಾಗಲಿದೆ ಎಂದು ಮೆಚ್ಚುಗೆ ವ್ಯಕ್ತಪಡಿಸಿದರು.

ರಕ್ಷಣೆ ವಿಚಾರದಲ್ಲಿ ಭಾರತ ಇತರ ರಾಷ್ಟ್ರಗಳ ಮೇಲೆ ಅವಲಂಬನೆಯಾಗದು. ಈ ನಿಟ್ಟಿನಲ್ಲಿ ಸ್ವದೇಶಿ ಕಂಪನಿ ಎಚ್ ಏಲ್ ಗೆ 48 ಸಾವಿರ ಕೋಟಿ ರೂಪಾಯಿ ಮೊತ್ತದ ತೇಜಸ್ ವಿಮಾನ ನಿರ್ಮಾಣ ಯೋಜನೆ ಲಭಿಸಿದೆ.

ಇದು ಪ್ರಧಾನಮಂತ್ರಿಯವರ ಆತ್ಮನಿರ್ಭರ ಭಾರತದ ಕಲ್ಪನೆಗೆ ಬಲ ತುಂಬಿದೆ. ವಿದೇಶದಲ್ಲಿನ ಇದೇ ವಿಭಾಗದ ವಿಮಾನಕ್ಕಿಂತ ತೇಜಸ್ ನಿರ್ಮಾಣ ವೆಚ್ಚ ಕಡಿಮೆಯಿದೆ. ಆದರೆ ಸಾಮರ್ಥ್ಯ ಅವುಗಳಿಗಿಂತ ಹೆಚ್ಚಾಗಿದೆ ಎಂದರು.

ನಾಳೆಯ ಏರ್ ಶೋ ಉದ್ಘಾಟನಾ ಕಾರ್ಯಕ್ರಮಕ್ಕೆ ಪೂರ್ವಭಾವಿಯಾಗಿ ನಗರದ ಖಾಸಗಿ ಹೋಟೆಲ್ ನಲ್ಲಿ ಮಧ್ಯಾಹ್ನ ರಕ್ಷಣಾ ಇಲಾಖೆ ಸಮಾರಂಭ ಏರ್ಪಡಿಸಿತ್ತು.

ಅದರಲ್ಲಿ ಪಾಲ್ಗೊಂಡು ಮಾತನಾಡಿದ ರಾಜನಾಥ್ ಸಿಂಗ್, ರಕ್ಷಣಾ ಸಾಮಗ್ರಿಗಳ ಖರೀದಿಗೆ ಸಂಬಂಧಿಸಿದಂತೆ ದೇಶವು ವಿಶ್ವದಲ್ಲಿಯೇ ದೊಡ್ಡ ಮಾರುಕಟ್ಟೆಯಾಗಿದೆ. ಏರೊ ಇಂಡಿಯಾ 2021 ರಲ್ಲಿ ಈ ಕ್ಷೇತ್ರಕ್ಕೆ ಹೆಚ್ಚಿನ ಹೂಡಿಕೆ ಹರಿದು ಬರುವ ನಿರೀಕ್ಷೆಯಿದೆ ಎಂದು ಹೇಳಿದರು.

ನಂತರ ಮಾತನಾಡಿದ ಮುಖ್ಯಮಂತ್ರಿ ಬಿ.ಎಸ್.ಯಡಿಯೂರಪ್ಪ, ಭಾರತೀಯ ವಾಯುಪಡೆಗೆ 83 ತೇಜಸ್ ಯುದ್ಧ ವಿಮಾನಗಳ ಉತ್ಪಾದನೆಗೆ ಎಚ್ ಎಎಲ್ ಗೆ ಅಗತ್ಯ ಸಹಕಾರ ನೀಡಲಾಗುವುದು. ರಾಜ್ಯದ 100ಕ್ಕೂ ಹೆಚ್ಚು ಸಣ್ಣ ಮತ್ತು ಮಧ್ಯಮ ಕೈಗಾರಿಕೆಗಳು ತೇಜಸ್ ನಿರ್ಮಾಣಕ್ಕೆ ಕೊಡುಗೆ ನೀಡುತ್ತಿವೆ. ನಮ್ಮ ಸರ್ಕಾರ ದೇಶದ ರಕ್ಷಣಾ ಬಲ ಹೆಚ್ಚಿಸಲು ಎಲ್ಲ ರೀತಿಯ ಸಹಕಾರ ನೀಡಲಿದೆ ಎಂದು ತಿಳಿಸಿದ್ದಾರೆ.

ವರ್ಷಕ್ಕೆ ಮಾರ್ಕ್-1ಎ 16 ವಿಮಾನಗಳ ತಯಾರಿಕೆ :
ಎಚ್ ಎಎಲ್ ಭಾರತೀಯ ವಾಯುಪಡೆಯೊಂದಿಗೆ 83 ತೇಜಸ್ ಎಲ್ ಸಿಎ ವಿಮಾನ ಪೂರೈಕೆಗೆ ಒಪ್ಪಂದ ಮಾಡಿಕೊಳ್ಳಲಿದೆ. ಆ ಒಪ್ಪಂದ ಮಾಡಿಕೊಂಡ ದಿನದಿಂದ 36 ತಿಂಗಳ ಒಳಗಾಗಿ ತೇಜಸ್ ಮಾರ್ಕ್ -1ಎ ಮೊದಲ ವಿಮಾನ ಹಸ್ತಾಂತರ ಮಾಡಲಿದ್ದೇವೆ ಎಂದು ಎಚ್ ಎಎಲ್ ಅಧ್ಯಕ್ಷ ಆರ್.ಮಾಧವನ್ ಮಾಧ್ಯಮಗಳ ಪ್ರಶ್ನೆಯೊಂದಕ್ಕೆ ಉತ್ತರಿಸಿದರು.

ಪ್ರತಿ ವರ್ಷ 16 ವಿಮಾನಗಳಂತೆ 6 ವರ್ಷಗಳಲ್ಲಿ 83 ಎಲ್ ಸಿಎ ಯುದ್ಧ ವಿಮಾನವನ್ನು ಭಾರತೀಯ ವಾಯುಪಡೆಗೆ ನೀಡಲಾಗುತ್ತದೆ ಎಂದು ಹೇಳಿದರು.

ಏರ್ ಶೋನಲ್ಲಿ 600 ಪ್ರದರ್ಶಕರು ಭಾಗಿ :
ಏರ್ ಶೋ 2019ರಲ್ಲಿ ಕಳೆದ ಬಾರಿ 403 ಪ್ರದರ್ಶಕರಿದ್ದರು. ಆದರೆ ಈ ಬಾರಿ 600 ಪ್ರದರ್ಶಕರು ಏರೊ ಇಂಡಿಯಾ ಕಾರ್ಯಕ್ರಮದಲ್ಲಿ ಪಾಲ್ಗೊಳ್ಳುತ್ತಿದ್ದಾರೆ.

ಕಳೆದ ಬಾರಿ 168 ವಿದೇಶದ ಎಕ್ಸಿಬಿಟರ್ ಇದ್ದರೆ, ಈ ಬಾರಿ 78 ವಿದೇಶಿ ಪ್ರದರ್ಶಕರು ಭಾಗವಹಿಸುತ್ತಿದ್ದಾರೆ. ಬಹುತೇಕ ವಿದೇಶಿ ಕಂಪನಿಗಳು ದೇಶೀಯ ಕಂಪನಿಗಳ ಜೊತೆ ಜಂಟಿ ಸಹಭಾಗಿತ್ವದಲ್ಲಿ ಕಾರ್ಯನಿರ್ವಹಿಸುತ್ತಿದ್ದಾರೆ.

ದೇಶೀಯವಾಗಿ 522 ಪ್ರದರ್ಶಕರು ರಿಜಿಸ್ಟರ್ ಮಾಡಿದ್ದಾರೆ. ವರ್ಚುವಲ್ ಪ್ಲಾಟ್ ಫಾರಮ್ ನಲ್ಲಿ 203 ಎಕ್ಸಿಬಿಟರ್ ನೋಂದಾಯಿಸಿಕೊಂಡಿದ್ದಾರೆ ಎಂದು ರಕ್ಷಣಾ ಅಧಿಕಾರಿಗಳು ತಿಳಿಸಿದ್ದಾರೆ.

200 ಕ್ಕೂ ಹೆಚ್ಚು ರಕ್ಷಣಾ ಒಪ್ಪಂದಗಳ ಸಹಿ ನಿರೀಕ್ಷೆ :
ಫೆ.5 ರ ಕೊನೆ ದಿನ 200 ಕ್ಕೂ ಹೆಚ್ಚು ಕಂಪನಿಗಳು ರಕ್ಷಣೆ, ವೈಮಾನಿಕ ಕ್ಷೇತ್ರದಲ್ಲಿ ಪರಸ್ಪರ ಒಪ್ಪಂದಗಳಿಗೆ ಬಂಧನ್ ಕಾರ್ಯಕ್ರಮದಲ್ಲಿ ಸಹಿ ಹಾಕುವ ನಿರೀಕ್ಷೆಯಿದೆ.
ಕೊನೆಯ ದಿನ ಸಮಾರೋಪ‌ ಸಮಾರಂಭದಲ್ಲಿ ರಾಷ್ಟ್ರಪತಿ ರಮಾನಾಥ್ ಕೋವಿಂದ್ ವರ್ಚುವಲ್ ಮಾದರಿಯಲ್ಲಿ ಪಾಲ್ಗೊಳ್ಳಲಿದ್ದಾರೆ.

ಏರ್ ಶೋ 2021ರ ಕಾರ್ಯಕ್ರಮಕ್ಕೆ ನಾಳೆ ಬೆಳಗ್ಗೆ 9:30ಕ್ಕೆ ರಕ್ಷಣಾ ಸಚಿವ ರಾಜನಾಥ್ ಸಿಂಗ್ ಚಾಲನೆ ನೀಡಲಿದ್ದಾರೆ.