ಬೆಂಗಳೂರು, ನ.14 www.bengaluruwire.com: ಉದ್ಯಾನನಗರಿಯಲ್ಲಿ ದಿನೇ ದಿನೇ ಕಣ್ಮರೆಯಾಗುತ್ತಿರುವ ಕೆರೆಗಳು, ಮರಗಳು ಹಾಗೂ ನೈಸರ್ಗಿಕ ತೆರೆದ ಪ್ರದೇಶಗಳ ರಕ್ಷಣೆಗೆ ಒತ್ತಾಯಿಸಿ ಮಕ್ಕಳೇ ಖುದ್ದು ಕೀಟಗಳ ವೇಷ ಧರಿಸಿ ವಿನೂತನವಾಗಿ ಜಾಗೃತಿ ಮೂಡಿಸಿದ್ದಾರೆ.
ಮಕ್ಕಳ ದಿನಾಚರಣೆಯ ಮುನ್ನಾದಿನವಾದ ಶುಕ್ರವಾರ, ಉತ್ತರ ಬೆಂಗಳೂರಿನ 8 ರಿಂದ 13 ವರ್ಷದೊಳಗಿನ ಮಕ್ಕಳ ತಂಡವು ಐತಿಹಾಸಿಕ ಹೆಬ್ಬಾಳ ಕೆರೆಯ ದಂಡೆಯಲ್ಲಿ ಸೇರಿ ಪರಿಸರ ಸಂರಕ್ಷಣೆಯ ಸಂದೇಶ ಸಾರಿತು.
ಮಿಡತೆ, ಜೇಡ, ಇರುವೆ, ನೊಣ, ಚಿಟ್ಟೆ ಹಾಗೂ ಕೀಟಗಳ ಬೃಹತ್ ಗಾತ್ರದ ವೇಷಭೂಷಣಗಳನ್ನು ಧರಿಸಿದ್ದ ಪುಟಾಣಿಗಳು ನಾಗರಿಕರ ಗಮನ ಸೆಳೆದರು. ನಗರದ ಪರಿಸರ ವ್ಯವಸ್ಥೆಯ ಸಮತೋಲನಕ್ಕೆ ಈ ಸಣ್ಣ ಜೀವಿಗಳು ಎಷ್ಟು ಮುಖ್ಯ ಎಂಬುದನ್ನು ಮಕ್ಕಳು ಸಾರಿದರು. ಪರಾಗಸ್ಪರ್ಶ, ಮಣ್ಣಿನ ಫಲವತ್ತತೆ ಹಾಗೂ ಪಕ್ಷಿಗಳ ಆಹಾರ ಸರಪಳಿಯಲ್ಲಿ ಕೀಟಗಳ ಪಾತ್ರ ಅಪಾರವಾಗಿದೆ. ಆದರೆ, ಅಭಿವೃದ್ಧಿಯ ಹೆಸರಿನಲ್ಲಿ ನಗರ ಬೆಳೆದಂತೆ ಮೊದಲು ನೆಲೆ ಕಳೆದುಕೊಳ್ಳುವವು ಈ ಮೂಕ ಜೀವಿಗಳೇ ಎಂಬ ಕಳವಳವನ್ನು ಅಭಿಯಾನದಲ್ಲಿ ವ್ಯಕ್ತಪಡಿಸಲಾಯಿತು.
ಮರ ಕಡಿಯುವ ನಿರ್ಧಾರಕ್ಕೆ ಮಕ್ಕಳ ಆಕ್ರೋಶ: ಹೆಬ್ಬಾಳ ಕೆರೆಗೆ ವಲಸೆ ಬರುವ ಚಳಿಗಾಲದ ಪಕ್ಷಿಗಳನ್ನು ವೀಕ್ಷಿಸಿದ ಮಕ್ಕಳು, ಅಲ್ಲಿನ ಸುರಟ ಹುಣಸೆಕಾಯಿ ಮರಗಳ ಹಣ್ಣುಗಳನ್ನು ಸವಿದರು. ಆದರೆ, ‘ಹೆಬ್ಬಾಳ ಶಾರ್ಟ್ ಟನಲ್’ (ಸುರಂಗ ರಸ್ತೆ) ಯೋಜನೆಗಾಗಿ ತಾವು ಆಟವಾಡುವ ಮತ್ತು ಹಣ್ಣು ತಿನ್ನುವ ಇದೇ ಮರಗಳನ್ನು ಕಡಿಯಲು ಗುರುತು ಮಾಡಿರುವುದನ್ನು ಕಂಡು ಮಕ್ಕಳು ಬೇಸರ ವ್ಯಕ್ತಪಡಿಸಿದರು. ಕೈಯಲ್ಲಿ “ನಾವು ಲೆಕ್ಕವಿಲ್ಲವೇ? (Do You Consider Us?)” ಎಂಬ ಫಲಕಗಳನ್ನು ಹಿಡಿದು, ತಮ್ಮ ಭವಿಷ್ಯಕ್ಕಾಗಿ ಪ್ರಕೃತಿಯನ್ನು ಉಳಿಸುವಂತೆ ದೊಡ್ಡವರಿಗೆ ಮನವಿ ಮಾಡಿದರು.
ಅಪಾಯದಲ್ಲಿ ಐತಿಹಾಸಿಕ ಹೆಬ್ಬಾಳ ಕೆರೆ: ನಾಡಪ್ರಭು ಕೆಂಪೇಗೌಡರು ನಿರ್ಮಿಸಿದ ಬೆಂಗಳೂರಿನ ಅತ್ಯಂತ ಹಳೆಯ ಕೆರೆಗಳಲ್ಲಿ ಒಂದಾದ ಹೆಬ್ಬಾಳ ಕೆರೆ ಸುಮಾರು 150 ಎಕರೆ ಪ್ರದೇಶದಲ್ಲಿ ವ್ಯಾಪಿಸಿದೆ. ಇಲ್ಲಿ ಸುಮಾರು 50 ಜಲಪಕ್ಷಿಗಳು ಸೇರಿದಂತೆ ಒಟ್ಟು 183 ಪ್ರಭೇದದ ಪಕ್ಷಿಗಳನ್ನು ದಾಖಲಿಸಲಾಗಿದೆ. ಆದರೆ, ಹೆಬ್ಬಾಳ ಸುರಂಗ ಯೋಜನೆಗಾಗಿ ಬರೋಬ್ಬರಿ 1,128 ಮರಗಳನ್ನು ಕಡಿಯಲು ಮುಂದಾಗಿರುವುದು ಕೆರೆಯ ಬಫರ್ ವಲಯ ಮತ್ತು ಹಸಿರು ಕಾರಿಡಾರ್‌ಗೆ ಕುತ್ತು ತರಲಿದೆ ಎಂದು ಪರಿಸರವಾದಿಗಳು ಎಚ್ಚರಿಸಿದ್ದಾರೆ. ಹೂಳೆತ್ತುವ ಕಾಮಗಾರಿ ಹಾಗೂ ಸುರಂಗ ಯೋಜನೆಯಿಂದ ಕೆರೆಯ ಬಹುಭಾಗ ಒಣಗಿದ್ದು, ಜಲಚರಗಳು ಹಾಗೂ ವಲಸೆ ಪಕ್ಷಿಗಳ ಮೇಲೆ ಗಂಭೀರ ಪರಿಣಾಮ ಬೀರಿದೆ.
ಕಲಾವಿದೆ ಆಶಾ ಎಸ್. ಕಳವಳ: ಈ ವಿನೂತನ ಕೀಟಗಳ ವೇಷಭೂಷಣಗಳನ್ನು ವಿನ್ಯಾಸಗೊಳಿಸಿದ ಕಲಾವಿದೆ ಮತ್ತು ಶಿಕ್ಷಕಿ ಆಶಾ ಎಸ್. ಮಾತನಾಡಿ, “ಗ್ರೇಟರ್ ಬೆಂಗಳೂರು ಅಭಿವೃದ್ಧಿ ಹೆಸರಿನಲ್ಲಿ ಉಳಿದಿರುವ ನೈಸರ್ಗಿಕ ತಾಣಗಳನ್ನು ನಾಶಪಡಿಸುತ್ತಿರುವುದು ತೀವ್ರ ನೋವು ತಂದಿದೆ. ಮೂಲಸೌಕರ್ಯ ವಿನ್ಯಾಸಗೊಳಿಸುವಾಗ ಮಕ್ಕಳ ಭವಿಷ್ಯದ ಬಗ್ಗೆ ನಾವು ಯೋಚಿಸುತ್ತಿಲ್ಲ. ಕಳೆದ 15 ವರ್ಷಗಳಿಂದ ನಾನು ಹೆಬ್ಬಾಳ ಕೆರೆಯ ಪರಿಸರವನ್ನು ಗಮನಿಸುತ್ತಿದ್ದೇನೆ; ಈಗಾಗುತ್ತಿರುವ ಬದಲಾವಣೆ ಆತಂಕಕಾರಿಯಾಗಿದೆ. ಮಕ್ಕಳು ತಮ್ಮ ಹಕ್ಕಿಗಾಗಿ ತಾವೇ ಧ್ವನಿ ಎತ್ತಲು ಈ ವೇದಿಕೆ ಕಲ್ಪಿಸಲಾಗಿದೆ,” ಎಂದು ತಿಳಿಸಿದರು.
ಪುಟಾಣಿಗಳ ಮನದಾಳದ ನುಡಿಗಳು: ಅಭಿಯಾನದಲ್ಲಿ ಪಾಲ್ಗೊಂಡ ಮಕ್ಕಳು ತಮ್ಮ ಅನಿಸಿಕೆಗಳನ್ನು ಬರಹದ ಮೂಲಕ ಹಂಚಿಕೊಂಡರು:
“ದಿಕ್ಕಾರ ದಿಕ್ಕಾರ ದೊಡ್ಡವರಿಗೆ ದಿಕ್ಕಾರ! ಮರ ಕಡಿಯುವವರಿಗೆ ದಿಕ್ಕಾರ!” – ವರುಣ್ (13 ವರ್ಷ)
“ಕಾಡು ಬೆಳೆಸಿ ನಮ್ಮನ್ನು ಉಳಿಸಿ.” – ನಿಂಗಮ್ಮ (10 ವರ್ಷ)
“ಮರಗಳು ಇಲ್ಲದೆ ನಮಗೆ ತಂಪು ನೆರಳು ಎಲ್ಲಿ? ಕೆರೆ ನೀರು ಇಲ್ಲದೆ ಕಪ್ಪೆ, ಮೀನು, ಪಕ್ಷಿಗಳು ಎಲ್ಲಿ ನೀರು ಕುಡಿಯುವುದು?” – ಶಾಂತಮ್ಮ (8 ವರ್ಷ) ಮತ್ತು ಅನಿತಾ (12 ವರ್ಷ)
“ನೀವು ಮರಗಳನ್ನು ಕಡಿದರೆ ನಾವು ಉಸಿರಾಡುವುದು ಹೇಗೆ? ಕ್ರಿಮಿ ಕೀಟಗಳ ಮನೆ ಉಳಿಸಿ!” – ದೇವಿಕಾ (9 ವರ್ಷ) ಮತ್ತು ಭರತ್ (9 ವರ್ಷ)
Join our WhatsApp Channel 
