ಶಿಕ್ಷಕರ ವರ್ಗಾವಣೆ ನಿಯಮಗಳಿಗೆ ತಿದ್ದುಪಡಿ: ರಾಜ್ಯಪತ್ರದಲ್ಲಿ ಕರಡು ಅಧಿಸೂಚನೆ ಪ್ರಕಟ, 15 ದಿನಗಳ ಒಳಗೆ ಆಕ್ಷೇಪಣೆಗೆ ಅವಕಾಶ

ಬೆಂಗಳೂರು, ನ.13 www.bengaluruwire.com: ರಾಜ್ಯದ ಸರ್ಕಾರಿ ಪ್ರಾಥಮಿಕ ಮತ್ತು ಪ್ರೌಢಶಾಲಾ ಶಿಕ್ಷಕರ ವರ್ಗಾವಣೆ ಪ್ರಕ್ರಿಯೆಯನ್ನು ಮತ್ತಷ್ಟು ಪಾರದರ್ಶಕ ಹಾಗೂ ವ್ಯವಸ್ಥಿತಗೊಳಿಸುವ ನಿಟ್ಟಿನಲ್ಲಿ ರಾಜ್ಯ ಸರ್ಕಾರ ಶಿಕ್ಷಕರ ವರ್ಗಾವಣೆಯ ನಿಯಂತ್ರಣ ತಿದ್ದುಪಡಿ ನಿಯಮಗಳ ಕರಡನ್ನು ನ.12ರಂದು ಪ್ರಕಟಿಸಿದೆ.

ಈ ಕರಡು ನಿಯಮಗಳಿಗೆ ಸಂಬಂಧಿಸಿದಂತೆ ಬಾಧಿತರಾಗಬಹುದಾದ ಶಿಕ್ಷಕರು ಅಥವಾ ಸಾರ್ವಜನಿಕರು ರಾಜ್ಯಪತ್ರ ಪ್ರಕಟಗೊಂಡ ದಿನಾಂಕದಿಂದ 15 ದಿನಗಳ ಒಳಗಾಗಿ ತಮ್ಮ ಆಕ್ಷೇಪಣೆ ಅಥವಾ ಸಲಹೆಗಳನ್ನು ಸಲ್ಲಿಸಲು ಅವಕಾಶ ಕಲ್ಪಿಸಿದೆ.

ಕರಡು ತಿದ್ದುಪಡಿ ನಿಯಮಗಳ ಪ್ರಮುಖ ಅಂಶಗಳು:

1. ವೈಟೇಜ್ (Weighted) ಅಂಕಗಳ ಹೊಸ ಲೆಕ್ಕಾಚಾರ: ವರ್ಗಾವಣೆ ಉದ್ದೇಶಕ್ಕಾಗಿ ಶಿಕ್ಷಕರ ವೈಟೇಜ್ ಅಂಕಗಳನ್ನು ನಿಗದಿಪಡಿಸಲು ನಿಯಮ 4ಕ್ಕೆ ತಿದ್ದುಪಡಿ ತರಲಾಗಿದೆ. ಇದರ ಪ್ರಕಾರ:

‘ಸಿ’ ವಲಯದಲ್ಲಿ ಸಲ್ಲಿಸಿದ ಸೇವಾ ವರ್ಷಗಳಿಗೆ x 3 ಅಂಕಗಳು.

‘ಬಿ’ ವಲಯದಲ್ಲಿ ಸಲ್ಲಿಸಿದ ಸೇವಾ ವರ್ಷಗಳಿಗೆ x 2 ಅಂಕಗಳು.

‘ಎ’ ವಲಯದಲ್ಲಿ ಸಲ್ಲಿಸಿದ ಸೇವಾ ವರ್ಷಗಳಿಗೆ x 1 ಅಂಕಗಳು.

ಪ್ರಸ್ತುತ ಶಾಲೆ ಮತ್ತು ವೃಂದದಲ್ಲಿ 3 ವರ್ಷಗಳಿಗಿಂತ ಹೆಚ್ಚು ಸೇವೆ ಸಲ್ಲಿಸಿದ್ದರೆ, ಹೆಚ್ಚುವರಿ ವರ್ಷಗಳಿಗೆ x 1 ಅಂಕ ದೊರೆಯಲಿದೆ.

180 ದಿನಗಳು (6 ತಿಂಗಳು) ಮತ್ತು ಅದಕ್ಕಿಂತ ಹೆಚ್ಚಿನ ಸೇವೆಯನ್ನು ಒಂದು ಪೂರ್ಣ ವರ್ಷವೆಂದು ಹಾಗೂ 180 ದಿನಗಳಿಗಿಂತ ಕಡಿಮೆ ಸೇವೆಯನ್ನು ‘ಶೂನ್ಯ’ ವರ್ಷವೆಂದು ಪರಿಗಣಿಸಲಾಗುತ್ತದೆ.

ನಿರ್ಣಾಯಕ ಹುದ್ದೆಗಳಲ್ಲಿ (Crucial posts) ಪೂರ್ಣಗೊಂಡ ಪ್ರತಿ ವರ್ಷದ ಸೇವೆಗೆ ಎ, ಬಿ ಮತ್ತು ಸಿ ವಲಯಗಳಲ್ಲಿ ಕ್ರಮವಾಗಿ 2, 4 ಮತ್ತು 6 ಅಂಕಗಳನ್ನು ನೀಡಲಾಗುವುದು.

2. ವರ್ಗಾವಣೆ ಮಿತಿ ನಿಗದಿ (Transfer Limit): ನಿಯಮ 5ರ ತಿದ್ದುಪಡಿಯಂತೆ ವಿವಿಧ ವರ್ಗಾವಣೆಗಳಿಗೆ ಶೇಕಡಾವಾರು ಮಿತಿಯನ್ನು ನಿಗದಿಪಡಿಸಲಾಗಿದೆ:

ಕೋರಿಕೆ ವರ್ಗಾವಣೆ (ಜಿಲ್ಲೆಯೊಳಗೆ): 7%

ವಲಯ ವರ್ಗಾವಣೆ (Zonal Transfer): 4%

ಕೋರಿಕೆ ವರ್ಗಾವಣೆ (ವಿಭಾಗದೊಳಗೆ): 2%

ಕೋರಿಕೆ ವರ್ಗಾವಣೆ (ವಿಭಾಗದ ಹೊರಗೆ): 2%

ನಿರ್ಣಾಯಕ ಹುದ್ದೆಗಳಲ್ಲಿ ಶಿಕ್ಷಕರು ಕನಿಷ್ಠ 9 ವರ್ಷಗಳ ಸೇವೆ ಸಲ್ಲಿಸುವುದು ಕಡ್ಡಾಯವಾಗಿದೆ.

3. ವೈದ್ಯಕೀಯ ಮತ್ತು ಆದ್ಯತಾ ವರ್ಗಾವಣೆಗೆ ಕಟ್ಟುನಿಟ್ಟಿನ ನಿಯಮ: ಮಾರಣಾಂತಿಕ ಕಾಯಿಲೆ, ಗಂಭೀರ ಆರೋಗ್ಯ ಸಮಸ್ಯೆ ಅಥವಾ ಶೇ. 40ಕ್ಕಿಂತ ಹೆಚ್ಚು ಅಂಗವೈಕಲ್ಯ ಹೊಂದಿರುವ ಶಿಕ್ಷಕರು ಅಥವಾ ಅವರ ಪತಿ/ಪತ್ನಿ/ಮಕ್ಕಳ ಪ್ರಕರಣಗಳಲ್ಲಿ ಜಿಲ್ಲಾ ವೈದ್ಯಕೀಯ ಮಂಡಳಿಯ ಪ್ರಮಾಣಪತ್ರ ಕಡ್ಡಾಯವಾಗಿದೆ. ವಿಶೇಷವೆಂದರೆ, ಈ ವೈದ್ಯಕೀಯ ಪ್ರಮಾಣಪತ್ರಗಳ ನೈಜತೆ ಮತ್ತು ವಿಶ್ವಾಸಾರ್ಹತೆಯನ್ನು ಪರಿಶೀಲಿಸಲು ತಜ್ಞ ವೈದ್ಯರನ್ನೊಳಗೊಂಡ ‘ವಿಭಾಗೀಯ ವಿಶೇಷ ಸಮಿತಿ’ಯನ್ನು ರಚಿಸಲಾಗುವುದು. ಗರ್ಭಿಣಿ ಶಿಕ್ಷಕಿಯರು ಅಥವಾ 5 ವರ್ಷಕ್ಕಿಂತ ಕಡಿಮೆ ವಯಸ್ಸಿನ ಮಗುವನ್ನು ಹೊಂದಿರುವ ಮಹಿಳಾ ಶಿಕ್ಷಕಿಯರು ಸೂಕ್ತ ಪ್ರಮಾಣಪತ್ರ ಸಲ್ಲಿಸಿ ಆದ್ಯತೆ ಪಡೆಯಬಹುದು.

4. ತಂತ್ರಾಂಶದ (Software) ಮೂಲಕವೇ ಕೌನ್ಸೆಲಿಂಗ್: ಪ್ರಾಥಮಿಕ ಮತ್ತು ಪ್ರೌಢಶಾಲಾ ವಿಭಾಗದ ಎಲ್ಲಾ ವೃಂದದ ಶಿಕ್ಷಕರಿಗೆ ನಿಯಮ 2ರಲ್ಲಿ ಉಲ್ಲೇಖಿಸಲಾದ ಸಕ್ಷಮ ಪ್ರಾಧಿಕಾರಿಗಳು ಕಡ್ಡಾಯವಾಗಿ ತಂತ್ರಾಂಶದ (Software) ಮೂಲಕವೇ ಪಾರದರ್ಶಕವಾಗಿ ಕೌನ್ಸೆಲಿಂಗ್ ಪ್ರಕ್ರಿಯೆಯನ್ನು ನಡೆಸಬೇಕು ಎಂದು ನಿಯಮ 18ರಲ್ಲಿ ಸ್ಪಷ್ಟಪಡಿಸಲಾಗಿದೆ. ಅಲ್ಲದೆ, ಹೆಚ್ಚುವರಿ (Rationalisation) ಶಿಕ್ಷಕರ ಮರು ನಿಯೋಜನೆ ಹಾಗೂ ಬೋಧಕೇತರ ವೃಂದದ (21 ವಿವಿಧ ಹುದ್ದೆಗಳು) ಪಟ್ಟಿಯನ್ನೂ ಕರಡು ನಿಯಮಗಳ ಅನುಸೂಚಿಯಲ್ಲಿ ಸೇರಿಸಲಾಗಿದೆ.