ಬೆಂಗಳೂರು, ಜು.07 www.bengaluruwire.com: ರಾಜ್ಯದ ಕಟ್ಟಕಡೆಯ ವ್ಯಕ್ತಿಗೂ ಅಭಿವೃದ್ಧಿಯ ಫಲ ತಲುಪಿಸುವ ನಿಟ್ಟಿನಲ್ಲಿ ಕರ್ನಾಟಕ ಸರ್ಕಾರ ಮಹತ್ವದ ಹೆಜ್ಜೆಯನ್ನಿಟ್ಟಿದೆ. ರಾಜ್ಯದಲ್ಲಿ ಇದೇ ಮೊದಲ ಬಾರಿಗೆ 31 ಜಿಲ್ಲೆಗಳ ವ್ಯಾಪ್ತಿಯಲ್ಲಿ ಬರುವ 5,936 ಗ್ರಾಮ ಪಂಚಾಯ್ತಿಗಳ ಮಟ್ಟದಲ್ಲಿ ‘ಮಾನವ ಅಭಿವೃದ್ಧಿ ವರದಿ’ (Human Development Report) ಯನ್ನು ಸಿದ್ಧಪಡಿಸಲಾಗುತ್ತಿದ್ದು, ಇದೇ ಸೆಪ್ಟೆಂಬರ್ 2026ರಲ್ಲಿ ಈ ಬೃಹತ್ ವರದಿ ಬಿಡುಗಡೆಯಾಗಲಿದೆ.
ಮುಖ್ಯಮಂತ್ರಿ ಹಾಗೂ ಯೋಜನೆ, ಕಾರ್ಯಕ್ರಮ ಸಂಯೋಜನೆ ಮತ್ತು ಸಾಂಖ್ಯಿಕ ಇಲಾಖೆ ಸಚಿವರೂ ಆಗಿರುವ ಡಿ.ಕೆ.ಶಿವಕುಮಾರ್ ಅವರ ಸೂಚನೆಯ ಮೇರೆಗೆ ಭವಿಷ್ಯದ ಕರ್ನಾಟಕದ ಅಭಿವೃದ್ಧಿಗೆ ದಿಕ್ಸೂಚಿಯಾಗಬಲ್ಲ ಈ ವರದಿಯ ತಯಾರಿಕಾ ಕಾರ್ಯ ಭರದಿಂದ ಸಾಗುತ್ತಿದೆ.
ಏನಿದು ಹೊಸ ವರದಿ? ಇದರ ಹಿನ್ನೆಲೆ ಏನು?:
ಕರ್ನಾಟಕದಲ್ಲಿ ರಾಜ್ಯ ಮಾನವ ಅಭಿವೃದ್ಧಿ ವರದಿ ಪ್ರಕಟಿಸುವ ಕಾರ್ಯ 1999ರಲ್ಲಿಯೇ ಶುರುವಾಗಿತ್ತು. ಅಲ್ಲಿಂದ ಇಲ್ಲಿಯ ತನಕ ಒಟ್ಟು ನಾಲ್ಕು ವರದಿಗಳು ಪ್ರಕಟವಾಗಿವೆ (ಇತ್ತೀಚೆಗೆ 2022ರಲ್ಲಿ ವರದಿ ಪ್ರಕಟವಾಗಿತ್ತು). ಆದರೆ, ಜಿಲ್ಲಾವಾರು ವರದಿಗಳು ಬಂದಿದ್ದು 2014ರಲ್ಲಿ ಮಾತ್ರ. ಆ ವರ್ಷ 30 ಜಿಲ್ಲೆಗಳ ವರದಿ ಪ್ರಕಟಿಸಲಾಗಿತ್ತು.
2014ರ ನಂತರ ಇಲ್ಲಿಯವರೆಗೆ ಯಾವುದೇ ಜಿಲ್ಲಾ ವರದಿಗಳು ಬಂದಿರಲಿಲ್ಲ. ಇದೀಗ 12 ವರ್ಷಗಳ ಸುದೀರ್ಘ ಗ್ಯಾಪ್ ನಂತರ 31 ಜಿಲ್ಲೆಗಳ ಸಮಗ್ರ ವರದಿ ಹೊರಬರುತ್ತಿದೆ. ಇದರ ಅತಿದೊಡ್ಡ ವಿಶೇಷತೆ ಎಂದರೆ, ಕೇವಲ ಜಿಲ್ಲಾ ಮಟ್ಟಕ್ಕೆ ಸೀಮಿತವಾಗದೆ, ಮೈಸೂರು ವಿಶ್ವವಿದ್ಯಾಲಯ ಸೇರಿದಂತೆ ವಿವಿಧ ವಿವಿಗಳು ಮತ್ತು ಸಂಸ್ಥೆಗಳ ತಜ್ಞರ ನೆರವಿನೊಂದಿಗೆ ರಾಜ್ಯದ 5,936 ಗ್ರಾಮ ಪಂಚಾಯ್ತಿಗಳ ಮಟ್ಟದಲ್ಲಿ ಅಂಕಿ-ಅಂಶಗಳನ್ನು ಕಲೆಹಾಕಿ ಈ ವರದಿ ರೂಪಿಸಲಾಗುತ್ತಿದೆ.
ಜಿಲ್ಲಾ ಸಮಗ್ರ ಹಾಗೂ ಸುಸ್ಥಿರ ಅಭಿವೃದ್ಧಿ: ಯೋಜನೆ-2031 (ISDDP-2031)
ಬರೀ ಮಾನವ ಅಭಿವೃದ್ಧಿ ವರದಿ ಮಾತ್ರವಲ್ಲದೆ, 2031ರ ವೇಳೆಗೆ ರಾಜ್ಯದ ಅಭಿವೃದ್ಧಿ ಹೇಗಿರಬೇಕು ಎಂಬುದರ ಕುರಿತು ‘ಜಿಲ್ಲಾ ಸಮಗ್ರ ಹಾಗೂ ಸುಸ್ಥಿರ ಅಭಿವೃದ್ಧಿ ಯೋಜನೆ-2031’ ಕೂಡ ಸಿದ್ಧವಾಗುತ್ತಿದೆ. ವಿಶ್ವಸಂಸ್ಥೆಯ 17 ಸುಸ್ಥಿರ ಅಭಿವೃದ್ಧಿ ಗುರಿಗಳನ್ನು (SDGs) ತಾಲ್ಲೂಕಾವಾರು ಹಾಗೂ ಜಿಲ್ಲಾವಾರು ಮೌಲ್ಯಮಾಪನ ಮಾಡಲಾಗುತ್ತಿದೆ. ಈ ವರದಿಗಳ ಆಧಾರದ ಮೇಲೆ, 2031ರ ವೇಳೆಗೆ ಪ್ರತಿ ಜಿಲ್ಲೆ ಹಾಗೂ ಇಲಾಖಾವಾರು ಅನುಷ್ಠಾನ ಮಾಡಬಹುದಾದ ನಿರ್ದಿಷ್ಟ ಯೋಜನೆಗಳ ನೀಲನಕ್ಷೆ ತಯಾರಾಗಲಿದೆ.
ಈ ವರದಿಯಿಂದ ರಾಜ್ಯದ ಜನ ಸಾಮಾನ್ಯರಿಗಾಗುವ ಅನುಕೂಲಗಳೇನು?
ಬೆಂಗಳೂರು ವೈರ್ ವಿಶ್ಲೇಷಣೆಯ ಪ್ರಕಾರ, ಈ ವರದಿಯು ಸರ್ಕಾರದ ಕಡತಗಳಿಗೆ ಮಾತ್ರ ಸೀಮಿತವಾಗದೆ, ಜನಸಾಮಾನ್ಯರ ಬದುಕಿನಲ್ಲಿ ನೇರ ಬದಲಾವಣೆ ತರಲಿದೆ:
ನಿಖರವಾದ ಯೋಜನೆಗಳು: ಯಾವ ಗ್ರಾಮ ಪಂಚಾಯ್ತಿಯಲ್ಲಿ ಶಿಕ್ಷಣ, ಆರೋಗ್ಯ, ಮತ್ತು ಮೂಲಸೌಕರ್ಯದ ಕೊರತೆ ಇದೆ ಎಂಬುದು ನಿಖರವಾಗಿ ತಿಳಿಯುವುದರಿಂದ, ಸರ್ಕಾರಿ ಯೋಜನೆಗಳು ನೇರವಾಗಿ ಅರ್ಹರಿಗೆ ತಲುಪಲಿವೆ.
ಪ್ರಾದೇಶಿಕ ಅಸಮತೋಲನ ನಿವಾರಣೆ: ಹಿಂದುಳಿದ ಪ್ರದೇಶಗಳನ್ನು ಗುರುತಿಸಿ, ಅಲ್ಲಿಗೆ ಹೆಚ್ಚಿನ ಅನುದಾನ ಹಾಗೂ ವಿಶೇಷ ಯೋಜನೆಗಳನ್ನು ಒದಗಿಸಲು ಈ ವರದಿ ನೆರವಾಗಲಿದೆ.
ಸಂಪನ್ಮೂಲಗಳ ಸದ್ಬಳಕೆ: ಸರ್ಕಾರದ ತೆರಿಗೆ ಹಣ ಮತ್ತು ಅನುದಾನಗಳು ಪೋಲಾಗದಂತೆ, ಎಲ್ಲಿ ನಿಜವಾದ ಅಗತ್ಯವಿದೆಯೋ ಅಲ್ಲಿ ಮಾತ್ರ ಹೂಡಿಕೆ ಮಾಡಲು ಸಾಧ್ಯವಾಗುತ್ತದೆ.
ಪಾರದರ್ಶಕತೆ ಮತ್ತು ಉತ್ತರದಾಯಿತ್ವ: ಗ್ರಾಮ ಪಂಚಾಯ್ತಿ ಮಟ್ಟದ ಅಭಿವೃದ್ಧಿ ಸೂಚ್ಯಂಕಗಳು (HDI) ಲಭ್ಯವಾಗುವುದರಿಂದ, ಸ್ಥಳೀಯ ಆಡಳಿತದ ಕಾರ್ಯಕ್ಷಮತೆಯನ್ನು ಜನರು ಪ್ರಶ್ನಿಸಲು ಮತ್ತು ಮೌಲ್ಯಮಾಪನ ಮಾಡಲು ಸುಲಭವಾಗುತ್ತದೆ.
ಎಐ ಯುಗದಲ್ಲಿ ಕನ್ನಡಿಗರ ಭವಿಷ್ಯ: 2027ಕ್ಕೆ ಮೆಗಾ ರಿಪೋರ್ಟ್:
ಗ್ರಾಮ ಪಂಚಾಯ್ತಿ ಮತ್ತು ಜಿಲ್ಲಾ ಮಟ್ಟದ ವರದಿಗಳ ಜೊತೆಗೆ, “ಆಧುನಿಕ ಕೃತಕ ಬುದ್ಧಿಮತ್ತೆ (AI) ಯುಗದಲ್ಲಿ ಜನರು ಮತ್ತು ಅವರ ಆಯ್ಕೆಗಳು” ಎಂಬ ವಿನೂತನ ಥೀಮ್ ಅಡಿಯಲ್ಲಿ ‘ಕರ್ನಾಟಕ ರಾಜ್ಯ ಮಾನವ ಅಭಿವೃದ್ಧಿ ವರದಿ-2026’ ಕೂಡ ಸಿದ್ಧವಾಗುತ್ತಿದ್ದು, ಇದು ಮಾರ್ಚ್ 2027ರ ವೇಳೆಗೆ ಬಿಡುಗಡೆಯಾಗುವ ನಿರೀಕ್ಷೆಯಿದೆ.
ಒಟ್ಟಾರೆಯಾಗಿ, ಸಾಂಖ್ಯಿಕ ಇಲಾಖೆಯ ಈ ಸಮಗ್ರ ಉಪಕ್ರಮಗಳು ಕರ್ನಾಟಕವನ್ನು ಪುರಾವೆ ಆಧಾರಿತ (Evidence-based) ಮತ್ತು ವಿಕೇಂದ್ರೀಕೃತ ಅಭಿವೃದ್ಧಿಯತ್ತ ಕೊಂಡೊಯ್ಯಲಿದ್ದು, ತಳಮಟ್ಟದಿಂದಲೇ ನವ ಕರ್ನಾಟಕ ನಿರ್ಮಾಣಕ್ಕೆ ನಾಂದಿ ಹಾಡಲಿವೆ.
ಇಲಾಖೆಯ ಕಾರ್ಯದರ್ಶಿಗಳು ಏನಂತಾರೆ?:
”ಅಭಿವೃದ್ಧಿ ಹಳ್ಳಿಗಳಿಗೂ ತಲುಪಬೇಕು ಎಂಬ ಉದ್ದೇಶದಿಂದ, 5,936 ಗ್ರಾಮ ಪಂಚಾಯ್ತಿಗಳ ‘ಮಾನವ ಅಭಿವೃದ್ಧಿ ವರದಿ’ ಸಿದ್ಧಪಡಿಸುತ್ತಿದ್ದೇವೆ. ಇದು ಕೇವಲ ಅಂಕಿ-ಅಂಶಗಳಲ್ಲ, ಬದಲಾಗಿ ಪ್ರಾದೇಶಿಕ ಅಸಮತೋಲನ ನಿವಾರಿಸಿ, 2031ರ ಸುಸ್ಥಿರ ಗುರಿಗಳನ್ನು ತಲುಪಲು ಮತ್ತು ಸಾಕ್ಷ್ಯಾಧಾರಿತ ಯೋಜನೆಗಳನ್ನು ರೂಪಿಸಲು ಸರ್ಕಾರಕ್ಕೆ ದಿಕ್ಸೂಚಿ.”
– ಮನೋಜ್ ಜೈನ್, ಕಾರ್ಯದರ್ಶಿ, ಯೋಜನೆ, ಕಾರ್ಯಕ್ರಮ ಸಂಯೋಜನೆ ಮತ್ತು ಸಾಂಖ್ಯಿಕ ಇಲಾಖೆ
Join our WhatsApp Channel
