ಬೆಂಗಳೂರು, ಆ.03 www.bengaluruwire.com : ವಿಶೇಷ ವಿಕಲ ಚೇತನ ಅಪ್ರಾಪ್ತ ಬಾಲಕಿಯೊಬ್ಬಳ ಗುಪ್ತಾಂಗಕ್ಕೆ ಚೂಪಾದ ವಸ್ತುವನ್ನು ಬಳಸಿ ಲೈಂಗಿಕ ದೌರ್ಜನ್ಯ ಎಸೆಗಿದ ಶಾಲಾ ಶಿಕ್ಷಕಿಯೊಬ್ಬರ ಕೃತ್ಯವನ್ನು ಆ ಶಾಲೆಯ ಆಡಳಿತ ಮಂಡಳಿ ಪೊಲೀಸ್ ದೂರು ನೀಡಲು ಹಿಂಜರಿದು ಪ್ರಕರಣ ಮುಚ್ಚಿಹಾಕಲು ಪ್ರಯತ್ನ ಮಾಡಿದ ವಿಷಯ ಬಹಿರಂಗವಾಗಿದೆ.
ಕೃತ್ಯದ ಸಂಬಂಧ ವಿವೇಕ್ ನಗರ ಪೊಲೀಸ್ ಠಾಣೆಯಲ್ಲಿ ಪೋಕ್ಸೋ ಕಾಯ್ದೆ ಹಾಗೂ ಬಿಎಎನ್ ಎಸ್ (ಭಾರತೀಯ ನ್ಯಾಯ ಸಂಹಿತೆ) ಕಾಯ್ದೆಯಡಿ ಪ್ರಕರಣ ದಾಖಲಾಗಿ ಪೊಲೀಸರು ಇಂತಹ ಮುಗ್ಧ ಹಾಗೂ ವಿಶೇಷ ವಿಕಲ ಚೇತನ ಬಾಲಕಿ ಮೇಲೆ ಲೈಂಗಿಕ ದೌರ್ಜನ್ಯ ಎಸಗಿದ ಶಾಲಾ ಶಿಕ್ಷಕಿಯನ್ನು, ಪೊಲೀಸರು ಬಂಧಿಸಿದ್ದಾರೆ. ಸದ್ಯ ಆರೋಪಿತ ಶಾಲಾ ಶಿಕ್ಷಕಿ ನ್ಯಾಯಾಂಗ ಬಂಧನದಲ್ಲಿದ್ದಾರೆ ಎಂದು ಉನ್ನತ ಮೂಲಗಳು ಖಚಿತಪಡಿಸಿವೆ.
ಏನಿದು ಪ್ರಕರಣ?:
ಕೋರಮಂಗಲದ ಎಸ್ ಟಿ ಬೆಡ್ ನಲ್ಲಿರುವ ಬೆಥನಿ ವಿಶೇಷ ಶಾಲೆಯಲ್ಲಿ ಓದುತ್ತಿರುವ 10 ವರ್ಷದ ವಿಶೇಷ ವಿಕಲಚೇತನ ಬಾಲಕಿ ಜು.1 ರಂದು ಶಾಲೆ ಮುಗಿಸಿ ಮನೆಗೆ ಬಂದಿದ್ದಳು. ಮನೆಯಲ್ಲಿ ಶೌಚಕ್ಕೆಂದು ಹೋದಾಗ ಆಕೆಯ ಗುಪ್ತಾಂಗದಲ್ಲಿ ನೋವು ಕಾಣಿಸಿಕೊಂಡು, ಬಾಲಕಿ ಅಳುತ್ತಿದ್ದಾಗ ಗಮನಿಸಿದ ತಾಯಿ ಏನೆಂದು ಕೇಳಿದಾಗ, ಆ (ದೈಹಿಕ ವಯಸ್ಸು 10 ವರ್ಷವಾದರೂ ಮಾನಸಿಕ ಬೆಳವಣಿಗೆ ನಾಲ್ಕೈದು ವರ್ಷದ ಮಗುವಿನಂತಿತ್ತು) ಬಾಲಕಿಯು ತನಗಾಗುತ್ತಿರುವ ನೋವಿನ ಬಗ್ಗೆ ಅಸ್ಪಷ್ಟವಾಗಿ ತಿಳಿಸಿದ್ದಳು. ಮರುದಿನ ಇದೇ ರೀತಿ ಪುನಃ ನೋವು ಕಾಣಿಸಿಕೊಂಡಾಗ ತಾಯಿ ಪರೀಕ್ಷಿಸಿ, ಅನುಮಾನ ಬಂದು ಮಗುವನ್ನು ಕೇಳಿದಾಗ, ಶಾಲೆಯಲ್ಲಿ ನಡೆದ ಕೃತ್ಯವನ್ನು ಹೇಳಿತ್ತು.
ಈ ಬಗ್ಗೆ ಕೋರಮಂಗಲದ ಸೇಂಟ್ ಜಾನ್ಸ್ ಆಸ್ಪತ್ರೆಯ ವೈದ್ಯರಲ್ಲಿ ಚಿಕಿತ್ಸೆಗೆಂದು ಕರೆದೊಯ್ದಾಗ ಬಾಲಕಿಯ ಮೂತ್ರವಿಸರ್ಜನಾಂಗಕ್ಕೆ ಚೂಪಾದ ವಸ್ತುವನ್ನು ಹಾಕಿ, ಗಾಯಗೊಳಿಸಿರುವುದನ್ನು ಖಚಿತಪಡಿಸಿದ್ದಾರೆ. ಈ ಬಗ್ಗೆ ಬಾಲಕಿಯ ಮೇಲೆ ದೌರ್ಜನ್ಯ ಆಗಿರುವ ಬಗ್ಗೆ ಆಸ್ಪತ್ರೆಯ ವೈದ್ಯರು, ಈ ವಿಷಯವನ್ನು ತಮ್ಮ ವ್ಯಾಪ್ತಿಯ ಕೋರಮಂಗಲ ಪೊಲೀಸ್ ಠಾಣೆಗೆ ಮಾಹಿತಿ ಕಳಿಸುತ್ತಾರೆ.
ಇನ್ನೊಂದೆಡೆ ಬಾಲಕಿಯ ತಾಯಿ ಶಾಲೆಯಲ್ಲಿ ಶಿಕ್ಷಕಿಯ ಈ ಕೃತ್ಯದ ಬಗ್ಗೆ ಬೆಥನಿ ವಿಶೇಷ ಶಾಲೆ ಕೇಂದ್ರ ಕಚೇರಿಗೆ ದೂರು ನೀಡಿದ್ದರು. ಶಾಲೆಯವರು, ತಮ್ಮ ಶಾಲೆಯಲ್ಲಿ ನಡೆದಿರುವ ಈ ಪ್ರಕರಣ ಹೊರಬಂದರೆ ಹೆಸರು ಹಾಳಾಗುತ್ತದೆ ಎಂಬ ಭಯದಿಂದ ಪೊಲೀಸ್ ಠಾಣೆಗೂ ದೂರು ನೀಡಿರಲಿಲ್ಲ. ಹೀಗಾಗಿ ಬಾಲಕಿಯ ತಾಯಿ ಈ ವಿಷಯವನ್ನು ಸರ್ಕಾರೇತರ ಎನ್ ಜಿಒ ಸಂಸ್ಥೆಗೂ ವಿಷಯ ತಿಳಿಸಿದ್ದರು.
ಈ ಪ್ರಕರಣದ ಗಂಭೀರತೆ ಹೆಚ್ಚಾಗಿ, ಎನ್ ಜಿಒ ಸಿಬ್ಬಂದಿ ಜೊತೆಯಲ್ಲಿ, ಮಗುವಿನ ಬಳಿ ಕೃತ್ಯ ನಡೆದ ಬಗ್ಗೆ ಆಡಿಯೋ, ವಿಡಿಯೋ ಹೇಳಿಕೆಯನ್ನು ಪಡೆದಿದ್ದ ಆಕೆಯ ತಾಯಿ, ಬೆಥನಿ ಶಾಲಾ ಆಡಳಿತ ಮಂಡಳಿ ಗಮನಕ್ಕೆ ತಂದಾಗ, ಕೃತ್ಯ ಎಸಗಿದ ಶಿಕ್ಷಕಿಯನ್ನು ಅಮಾನತು ಮಾಡಿತೇ ವಿನಃ ಆ ಸಂದರ್ಭದಲ್ಲೂ ಇಂತಹ ಗಂಭೀರ ಪ್ರಕರಣದ ಬಗ್ಗೆ ವಿಶೇಷ ವಿಕಲ ಚೇತನ ಬಾಲಕಿಯ ತಾಯಿಯನ್ನು ಸಮಾಧಾನಪಡಿಸಲು ಪ್ರಯತ್ನಿಸಿದರೇ ವಿನಃ ಪೊಲೀಸ್ ಠಾಣೆಗೆ ದೂರು ನೀಡಿರಲಿಲ್ಲ.
ಈ ನಡುವೆ ಪ್ರಕರಣ ಬಗ್ಗೆ ಬಾಲಕಿ ತಂದೆ ಕೆಲಸದ ನಿಮಿತ್ತ ಹೊರಗೆ ಹೋಗಿದ್ದವರಿಗೂ ವಿಷಯ ತಿಳಿದು, ಪ್ರಕರಣವು ವಿವೇಕಾನಂದ ಪೊಲೀಸ್ ಠಾಣೆಗೆ ಮುಟ್ಟಿತು. ಆಗ ಅಲ್ಲಿನ ಪೊಲೀಸ್ ಅಧಿಕಾರಿಗಳು ಕೂಡಲೇ ತನಿಖೆಗೆ ಮುಂದಾದಾಗ, ಸೇಂಟ್ ಜಾನ್ ಆಸ್ಪತ್ರೆಯವರು ಹಿಂದೆ ಕೋರಮಂಗಲ ಠಾಣೆ ಪೊಲೀಸರಿಗೆ ಅಪ್ರಾಪ್ತ ಬಾಲಕಿ ಮೇಲೆ ದೌರ್ಜನ್ಯ ನಡೆಸಿದ ಬಗ್ಗೆ ವಿಷಯ ತಿಳಿಸಿದ್ದರು. ಆದರೆ ಅದರಲ್ಲಿ ಲೈಂಗಿಕ ದೌರ್ಜನ್ಯವಾದ ಬಗ್ಗೆ ಮಾಹಿತಿ ಇರಲಿಲ್ಲ, ಬದಲಿಗೆ ದೌರ್ಜನ್ಯವಾಗಿದೆ ಎಂದು ಹೇಳಲಾಗಿತ್ತು. ಈ ಮಾಹಿತಿ ಪಡೆದುಕೊಂಡ ವಿವೇಕನಗರ ಪೊಲೀಸರು, ಸೇಂಟ್ ಜಾನ್ ಆಸ್ಪತ್ರೆಯಲ್ಲಿ ಸುಧೀರ್ಘ ವಿಚಾರಣೆ ನಡೆಸಿದಾಗ ಅಸಲಿ ವಿಷಯ ಬೆಳಕಿಗೆ ಬಂದಿತ್ತು.
ಆಗ ಸೇಂಟ್ ಜಾನ್ ಆಸ್ಪತ್ರೆಯವರೇ ಈ ಪ್ರಕರಣ ಸಂಬಂಧ ಪೋಕ್ಸೋ ಕಾಯ್ದೆಯಡಿ ವಿವೇಕ್ ನಗರ ಪೊಲೀಸ್ ಠಾಣೆಯಲ್ಲಿ ದೂರು ನೀಡಿತು. ಆಗ ಆರೋಪಿ ಶಿಕ್ಷಕಿಯನ್ನು ಬಂಧಿಸಲಾಯಿತು. ಬೆಥನಿ ಶಾಲೆಯು ಕೋರಮಂಗಲ ಆಸುಪಾಸಿನಲ್ಲಿ ಮೂರು ಶಾಖೆಯನ್ನು ಹೊಂದಿದ ಪ್ರತಿಷ್ಠಿತ ಶಾಲೆಯಾಗಿದೆ. ಇಂತಹ ಪ್ರಕರಣ ಹೊರಬಂದರೆ ಶಾಲೆಯ ಹೆಸರಿಗೆ ಕಳಂಕ ಬರುತ್ತದೆಂಬ ಕಾರಣಕ್ಕೆ ಬೆಥನಿ ವಿಶೇಷ ಶಾಲೆಯಲ್ಲಿ ನಡೆದ ಕೃತ್ಯವನ್ನು ಶಾಲಾ ಆಡಳಿತ ಮಂಡಳಿಯು, ಪೊಲೀಸ್ ಠಾಣೆಗೆ ದೂರು ನೀಡಿರಲಿಲ್ಲ. ಇಂತಹ ಗಂಭೀರ ವಿಷಯದ ಬಗ್ಗೆ ದೂರು ನೀಡಲು ಹಿಂದೇಟು ಹಾಕಿದ ಶಾಲೆಯ ಆಡಳಿ ಮಂಡಳಿಯ ಬಗ್ಗೆ ಪೋಷಕರು ಅಸಮಾಧಾನ ವ್ಯಕ್ತಪಡಿಸಿದ್ದಾರೆ. ಪೋಕ್ಸೋ ಪ್ರಕತಣ ಸಂಬಂಧ ವಿವೇಕ್ ನಗರ ಪೊಲೀಸರು ಎಲ್ಲಾ ಆಯಾಮಗಳಲ್ಲಿ ತನಿಖೆ ಮುಂದುವರೆಸಿದ್ದಾರೆ.
ಪೋಕ್ಸೋ ಕಾಯ್ದೆ ಎಂದರೇನು? :
ಪೋಕ್ಸೋ ಕಾಯ್ದೆ ಅಂದರೆ ಲೈಂಗಿಕ ಅಪರಾಧಗಳಿಂದ ಮಕ್ಕಳ ರಕ್ಷಣೆ ಕಾಯಿದೆ, 2012. ಇದು 18 ವರ್ಷದೊಳಗಿನ ಮಕ್ಕಳನ್ನು ಲೈಂಗಿಕ ದೌರ್ಜನ್ಯ ಮತ್ತು ಶೋಷಣೆಯಿಂದ ರಕ್ಷಿಸುವ ಒಂದು ಕಾನೂನು. ಈ ಕಾಯ್ದೆಯು ಲೈಂಗಿಕ ದೌರ್ಜನ್ಯ, ಲೈಂಗಿಕ ಕಿರುಕುಳ, ಅಶ್ಲೀಲತೆ, ಶೋಷಣೆ ಮತ್ತು ದುರುಪಯೋಗದಿಂದ ಮಕ್ಕಳನ್ನು ರಕ್ಷಿಸುವ ಗುರಿಯನ್ನು ಹೊಂದಿದೆ.
Join our WhatsApp Channel
