ಬೆಂಗಳೂರು, ಆ.31 www.bengaluruwire.com: ಡಾ. ಕೆ. ಶಿವರಾಮ ಕಾರಂತ ಬಡಾವಣೆಗೆ ಭೂಮಿ ನೀಡಿದ ಭೂಮಾಲೀಕರಿಗೆ ಹಾಗೂ ರೈತರಿಗೆ ಬೆಂಗಳೂರಿನ ನೆಹರು ತಾರಾಲಯದಲ್ಲಿ ಸೋಮವಾರ ಆಯೋಜಿಸಲಾಗಿದ್ದ ಸಮಾರಂಭದಲ್ಲಿ ಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್ ಪರಿಹಾರ ವಿತರಣೆ ಮಾಡಿದರು.
”ನಾನೂ ಒಬ್ಬ ರೈತನ ಮಗ. ರೈತರು ತಮ್ಮ ಆಸ್ತಿ ಕಳೆದುಕೊಳ್ಳುವಾಗ ಎದುರಿಸುವ ನೋವಿನ ಅರಿವು ನನಗಿದೆ. ಆ ನೋವನ್ನು ಕಡಿಮೆ ಮಾಡುವ ಉದ್ದೇಶದಿಂದ ಸರ್ಕಾರ ಪ್ರಾಮಾಣಿಕ ಪ್ರಯತ್ನ ನಡೆಸಿದೆ” ಎಂದು ಡಿ.ಕೆ. ಶಿವಕುಮಾರ್ ತಿಳಿಸಿದರು.
ವಾಲ್ ಆಫ್ ಗ್ರಾಟಿಟ್ಯೂಡ್ ಮೂಲಕ ರೈತರಿಗೆ ಗೌರವ:
ಶಿವರಾಮ ಕಾರಂತ ಬಡಾವಣೆಯ ನಿರ್ಮಾಣಕ್ಕೆ ಭೂಮಿ ತ್ಯಾಗ ಮಾಡಿದ 3,200 ರೈತರ ಹೆಸರುಗಳನ್ನು ಚಿರಸ್ಥಾಯಿಯಾಗಿ ಉಳಿಸಲು ‘ವಾಲ್ ಆಫ್ ಗ್ರಾಟಿಟ್ಯೂಡ್’ (Wall of Gratitude) ನಿರ್ಮಿಸಿ ಅವರ ಹೆಸರುಗಳನ್ನು ಕೆತ್ತಿಸಲಾಗುವುದು ಎಂದು ಘೋಷಿಸಿದರು.
ಬಡಾವಣೆ ಅಭಿವೃದ್ಧಿ ಹಾಗೂ ಪರಿಹಾರದ ವಿವರ:
ಹೂಡಿಕೆ ಮತ್ತು ವಿಸ್ತೀರ್ಣ: 3,700 ಎಕರೆ ಪ್ರದೇಶದಲ್ಲಿ ತಲೆಎತ್ತುತ್ತಿರುವ ಈ ಬಡಾವಣೆಯ ಅಭಿವೃದ್ಧಿಗೆ ₹16,000 ಕೋಟಿ ಹೂಡಿಕೆ ಮಾಡಲಾಗುತ್ತಿದೆ.
ನಿವೇಶನ ಹಂಚಿಕೆ: ರೈತರಿಗೆ ಒಟ್ಟು 3 ಕೋಟಿ ಚದರ ಅಡಿ ವಿಸ್ತೀರ್ಣದ ಅಭಿವೃದ್ಧಿಪಡಿಸಿದ ನಿವೇಶನಗಳನ್ನು ಹಂಚಿಕೆ ಮಾಡಲಾಗುತ್ತಿದೆ.
ವಿಶೇಷ ಪರಿಹಾರ ಸೂತ್ರ: ರೈತರ ಹಿತದೃಷ್ಟಿಯಿಂದ ಮಾರ್ಗಸೂಚಿ ದರದ (Guidance Value) ದುಪ್ಪಟ್ಟು ಪರಿಹಾರ, ದುಪ್ಪಟ್ಟು ಟಿಡಿಆರ್ (TDR), 35% ವಾಣಿಜ್ಯ ನಿವೇಶನ/ಎಫ್ಎಆರ್ ಅಥವಾ ಪ್ರತಿ ಎಕರೆಗೆ 40% ಅಭಿವೃದ್ಧಿಪಡಿಸಿದ ನಿವೇಶನ ನೀಡುವ ಆಯ್ಕೆ ನೀಡಲಾಗಿದೆ.
ನಿವೇಶನಗಳನ್ನು ಮಾರಿಕೊಳ್ಳಬೇಡಿ: ಕಿವಿಮಾತು:
ರೈತರು ಕಷ್ಟದಲ್ಲಿದ್ದರೂ ತಮಗೆ ಹಂಚಿಕೆಯಾದ ನಿವೇಶನಗಳನ್ನು ತಕ್ಷಣ ಮಾರಾಟ ಮಾಡಿಕೊಳ್ಳಬಾರದು ಎಂದು ಸಲಹೆ ನೀಡಿದ ಅವರು, “ಮುಂದಿನ ದಿನಗಳಲ್ಲಿ ಈ ಪ್ರದೇಶದ ಆಸ್ತಿ ಮೌಲ್ಯ ನೀವು ಊಹಿಸಲಾಗದಷ್ಟು ಹೆಚ್ಚಾಗಲಿದೆ. ಪೆರಿಫೆರಲ್ ರಸ್ತೆ (ಬೆಂಗಳೂರು ಬ್ಯುಸಿನೆಸ್ ಕಾರಿಡಾರ್) ಪೂರ್ಣಗೊಂಡ ಬಳಿಕ ಜಮೀನುಗಳ ಬೆಲೆ ದುಪ್ಪಟ್ಟಾಗಲಿದೆ” ಎಂದರು.
₹26,000 ಕೋಟಿ ವೆಚ್ಚದ ಬೆಂಗಳೂರು ಬ್ಯುಸಿನೆಸ್ ಕಾರಿಡಾರ್:
ನಗರದ ಸಂಚಾರ ದಟ್ಟಣೆ ನಿಯಂತ್ರಿಸಲು ₹26,000 ಕೋಟಿ ವೆಚ್ಚದಲ್ಲಿ ಬೆಂಗಳೂರು ಬ್ಯುಸಿನೆಸ್ ಕಾರಿಡಾರ್ ನಿರ್ಮಿಸಲಾಗುತ್ತಿದೆ. ಕೋಗಿಲು ತನಕ ಕಾಮಗಾರಿ ಪ್ರಗತಿಯಲ್ಲಿದ್ದು, ಶೇ. 80ರಷ್ಟು ಭೂಸ್ವಾಧೀನ ಪ್ರಕ್ರಿಯೆ ಪೂರ್ಣಗೊಂಡಿದೆ ಎಂದು ಮಾಹಿತಿ ನೀಡಿದರು.
ರೈತರಿಗೆ ಆದಾಯ ತರಲಿದೆ ‘ತೇಗದ ಸಿರಿ’:
ವರ್ಷಕ್ಕೆ ಕನಿಷ್ಠ 1 ಕೋಟಿ ತೇಗದ ಸಸಿ ನೆಡುವ 25 ವರ್ಷಗಳ ಮಹತ್ವಾಕಾಂಕ್ಷೆಯ ‘ತೇಗದ ಸಿರಿ’ ಯೋಜನೆ ರೂಪಿಸಲಾಗಿದೆ. ಸರ್ಕಾರವೇ ಉಚಿತವಾಗಿ ಸಸಿಗಳನ್ನು ಒದಗಿಸಲಿದ್ದು, ಮರ ಬೆಳೆದು ಕಟಾವು ಆದಾಗ ಬರುವ ಒಟ್ಟು ಆದಾಯದಲ್ಲಿ ಶೇ. 70ರಷ್ಟು ರೈತರಿಗೆ ಮತ್ತು ಶೇ. 30ರಷ್ಟು ಸರ್ಕಾರಕ್ಕೆ ಸಿಗಲಿದೆ ಎಂದು ತಿಳಿಸಿದರು.
Join our WhatsApp Channel
