BDA News | ಬಿಡಿಎ ಪ್ರಗತಿ ವರದಿ : ಕೆಂಪೇಗೌಡ ಬಡಾವಣೆಯ ಶೇ.76 ಪ್ರದೇಶ ಅಭಿವೃದ್ಧಿ

ಬೆಂಗಳೂರು, ನ.11 www.bengaluruwire.com: ಬೆಂಗಳೂರು ಅಭಿವೃದ್ಧಿ ಪ್ರಾಧಿಕಾರದಿಂದ (BDA) ನಿರ್ಮಿಸಲಾಗುತ್ತಿರುವ ನಾಡಪ್ರಭು ಕೆಂಪೇಗೌಡ ಬಡಾವಣೆಯಲ್ಲಿ (Nadaprabhu Kempegowda Layout) ಸುಮಾರು 2,800 ಎಕರೆಗಳಷ್ಟು (ಶೇ. 76ರಷ್ಟು) ಪ್ರದೇಶದಲ್ಲಿ ಅಭಿವೃದ್ಧಿ ಕಾಮಗಾರಿಗಳು ಪೂರ್ಣಗೊಂಡಿದೆ ಎಂದು ಬಿಡಿಎ ತಿಳಿಸಿದೆ.

ಪ್ರಸ್ತುತ, ಬಡಾವಣೆಯಲ್ಲಿ ಈ ಪ್ರದೇಶಗಳಲ್ಲಿನ ರಸ್ತೆ ಡಾಂಬರೀಕರಣ, ಬೀದಿ ದೀಪ ಅಳವಡಿಕೆ ಮತ್ತು ಕೇಬಲ್ ಅಳವಡಿಕೆಯಂತಹ ಉಳಿದ ಕಾಮಗಾರಿಗಳನ್ನು ಮಾರ್ಚ್ 2026ರೊಳಗೆ ಪೂರ್ಣಗೊಳಿಸಲು ಉದ್ದೇಶಿಸಲಾಗಿದೆ ಎಂದು ಪ್ರಾಧಿಕಾರ ಸ್ಪಷ್ಟಪಡಿಸಿದೆ.

ಬಾಕಿ ಉಳಿದ ಪ್ರದೇಶದಲ್ಲಿ ಅಕ್ಟೋಬರ್ 2026ರೊಳಗೆ ಕಾಮಗಾರಿ ಮುಗಿಸುವ ಗುರಿ :

ಅಭಿವೃದ್ಧಿಗೊಳಿಸಲು ಬಾಕಿ ಉಳಿದಿರುವ ಸುಮಾರು 1,064 ಎಕರೆಗಳ ಪ್ರದೇಶವು ಪ್ರಸ್ತುತ ನ್ಯಾಯಾಲಯದ ದಾವೆಗಳಲ್ಲಿ ಸಿಲುಕಿದೆ. ದಾವೆಗಳು ಇತ್ಯರ್ಥಗೊಂಡ ತಕ್ಷಣ ಈ ಪ್ರದೇಶದ ಕಾಮಗಾರಿಗಳನ್ನು ಅಕ್ಟೋಬರ್ 2026ರೊಳಗೆ ಪೂರ್ಣಗೊಳಿಸಲು ಬಿಡಿಎ ಗುರಿ ಹೊಂದಿದೆ. ಪ್ರಮುಖವಾಗಿ, ಎಂ.ಎ.ಆರ್. (Major Arterial Road) ರಸ್ತೆ ನಿರ್ಮಾಣವನ್ನು ಜನವರಿ 2026ರೊಳಗೆ ಪೂರ್ಣಗೊಳಿಸಲು ಯೋಜನೆ ರೂಪಿಸಲಾಗಿದೆ ಎಂದು ಬಿಡಿಎ ಹೇಳಿದೆ.

ಸಭೆಗಳಲ್ಲಿ ಭಾಗವಹಿಸಿ, ಕುಂದುಕೊರತೆ ನಿವಾರಣೆಗೆ ಅವಕಾಶ :

ಕೆಂಪೇಗೌಡ ಬಡಾವಣೆಯ ಪ್ರಗತಿಯ ಕುರಿತು ನಿವೇಶನ ಹಂಚಿಕೆದಾರರಿಗೆ ಪಾರದರ್ಶಕ ಮಾಹಿತಿ ನೀಡಲು ಬಿಡಿಎಯು ಪ್ರತಿ ಬುಧವಾರ ಮಧ್ಯಾಹ್ನ 3 ಗಂಟೆಗೆ ಪ್ರಾಧಿಕಾರದ ಸಭಾ ಕೊಠಡಿಯಲ್ಲಿ ಪ್ರಗತಿ ಪರಿಶೀಲನಾ ಸಭೆಗಳನ್ನು ನಡೆಸುತ್ತಿದೆ. ಈ ಸಭೆಗಳಲ್ಲಿ ಭಾಗವಹಿಸಲು ಆಸಕ್ತ ನಿವೇಶನ ಹಂಚಿಕೆದಾರರು ಬಿಡಿಎಯ ಸಹಾಯವಾಣಿ ಸಂಖ್ಯೆ 94831 66622 ಗೆ ಕರೆ ಮಾಡಿ ನೋಂದಾಯಿಸಿಕೊಳ್ಳಬಹುದು.

ಅಲ್ಲದೆ, ಕುಂದುಕೊರತೆಗಳ ಪರಿಹಾರಕ್ಕಾಗಿ ನಿವೇಶನದಾರರು ಪ್ರತಿ ತಿಂಗಳ 4ನೇ ಗುರುವಾರದಂದು ಬಿಡಿಎ ಕೇಂದ್ರ ಕಚೇರಿಯಲ್ಲಿ ನಡೆಯುವ ಪಶ್ಚಿಮ ವಲಯದ ಸಾರ್ವಜನಿಕ ಮುಕ್ತ ಸಭೆಯಲ್ಲಿ (Open House Meeting) ಸಹ ಭಾಗವಹಿಸಬಹುದಾಗಿದೆ.

ಸಂಘ-ಸಂಸ್ಥೆಗಳ ಸದಸ್ಯತ್ವ ಅಭಿಯಾನದ ಬಗ್ಗೆ ಎಚ್ಚರಿಕೆ :

ಬಡಾವಣೆಯಲ್ಲಿ ಕೆಲವು ಹಂಚಿಕೆದಾರರು ಸ್ಥಾಪಿಸಿರುವ ಸಂಘ-ಸಂಸ್ಥೆಗಳು ಸದಸ್ಯತ್ವ ಅಭಿಯಾನಗಳಲ್ಲಿ ಬೆಂಗಳೂರು ಅಭಿವೃದ್ಧಿ ಪ್ರಾಧಿಕಾರದ ಹೆಸರನ್ನು ಬಳಸುತ್ತಿರುವುದು ಬಿಡಿಎ ಗಮನಕ್ಕೆ ಬಂದಿದೆ. ಈ ಸಂಬಂಧ ಬಿಡಿಎಯು ಮಹತ್ವದ ಸ್ಪಷ್ಟನೆ ನೀಡಿದೆ.

“ಬಿಡಿಎ ಅಥವಾ ಬಿಡಿಎ ನಿರ್ಮಿಸಿರುವ ಬಡಾವಣೆಗಳನ್ನು ಪ್ರತಿನಿಧಿಸುವುದಾಗಿ ಹೇಳಿಕೊಳ್ಳುವ ಯಾವುದೇ ಗುಂಪು, ಸಂಘ ಅಥವಾ ಸಂಸ್ಥೆಯನ್ನು ಪ್ರಾಧಿಕಾರವು ಮಾನ್ಯ ಮಾಡುವುದಿಲ್ಲ” ಎಂದು ಪ್ರಾಧಿಕಾರವು ಕಟ್ಟುನಿಟ್ಟಾಗಿ ಸ್ಪಷ್ಟಪಡಿಸಿದೆ.

ನಾಡಪ್ರಭು ಕೆಂಪೇಗೌಡ ಬಡಾವಣೆಗೆ ಸಂಬಂಧಿಸಿದ ಯಾವುದೇ ಸಮಸ್ಯೆಗಳು ಅಥವಾ ಸ್ಪಷ್ಟೀಕರಣಗಳಿಗಾಗಿ, ನಾಗರಿಕರು ಬಿಡಿಎ ಸಹಾಯವಾಣಿ (94831 66622) ಗೆ ಸಂಪರ್ಕಿಸಬಹುದಾಗಿದೆ. ದೂರುಗಳನ್ನು 30 ದಿನಗಳೊಳಗೆ ಪರಿಹರಿಸಲು ಕ್ರಮ ಕೈಗೊಳ್ಳಲಾಗುವುದು ಎಂದು ಬಿಡಿಎ ಭರವಸೆ ನೀಡಿದೆ. ಬಿಡಿಎ ಅಧಿಕೃತ ಸಂಪರ್ಕ ಮಾಹಿತಿ: 24×7 ಸಹಾಯವಾಣಿ: 94831 66622 ಹಾಗೂ ಅಂತರ್ಜಾಲ: www.kbda.karnataka.gov.in ಇದಕ್ಕೆ ಭೇಟಿ ನೀಡಬಹುದು.