ಬೆಂಗಳೂರು, ಜು.16 www.bengaluruwire.com : ರಾಜ್ಯದಾದ್ಯಂತ ಇರುವ ಮಲ್ಟಿಪ್ಲೆಕ್ಸ್ಗಳು ಸೇರಿದಂತೆ ಎಲ್ಲಾ ಚಿತ್ರಮಂದಿರಗಳಲ್ಲಿ ಪ್ರತಿ ಪ್ರದರ್ಶನದ ಟಿಕೆಟ್ ದರವನ್ನು ₹200ಕ್ಕೆ ಸೀಮಿತಗೊಳಿಸಲು ಕರ್ನಾಟಕ ಸರ್ಕಾರ ಮಹತ್ವದ ಕರಡು ಅಧಿಸೂಚನೆಯನ್ನು ಹೊರಡಿಸಿದೆ.
ಜುಲೈ 15ರಂದು ಗೃಹ ಇಲಾಖೆಯು “ಕರ್ನಾಟಕ ಸಿನಿಮಾ (ನಿಯಂತ್ರಣ) (ತಿದ್ದುಪಡಿ) ನಿಯಮಗಳು, 2025″ರ ಕರಡನ್ನು ಪ್ರಕಟಿಸಿದ್ದು, ಮನರಂಜನಾ ತೆರಿಗೆ ಸೇರಿದಂತೆ ಟಿಕೆಟ್ ಗರಿಷ್ಠ ದರ ₹200 ಮೀರಬಾರದು ಎಂದು ಸ್ಪಷ್ಟಪಡಿಸಿದೆ.
ಕರ್ನಾಟಕ ಸಿನಿಮಾ (ನಿಯಂತ್ರಣ) ಕಾಯಿದೆ, 1964ರ ಸೆಕ್ಷನ್ 19ರ ಅಡಿಯಲ್ಲಿ ಪ್ರದತ್ತವಾದ ಅಧಿಕಾರವನ್ನು ಚಲಾಯಿಸಿ ಈ ನಿಯಮಗಳನ್ನು ರೂಪಿಸಲು ಸರ್ಕಾರ ಉದ್ದೇಶಿಸಿದೆ. ಸಾರ್ವಜನಿಕರ ಆಕ್ಷೇಪಣೆ ಮತ್ತು ಸಲಹೆಗಳಿಗೆ 15 ದಿನಗಳ ಕಾಲಾವಕಾಶ ನೀಡಲಾಗಿದೆ. ಕರಡು ಅಧಿಸೂಚನೆಯು ಅಧಿಕೃತ ಗೆಜೆಟ್ನಲ್ಲಿ ಪ್ರಕಟವಾದ ದಿನಾಂಕದಿಂದ 15 ದಿನಗಳ ನಂತರ ಇದನ್ನು ಪರಿಗಣನೆಗೆ ತೆಗೆದುಕೊಳ್ಳಲಾಗುವುದು ಎಂದು ಸರ್ಕಾರ ತಿಳಿಸಿದೆ.
ಆಕ್ಷೇಪಣೆಗಳು ಮತ್ತು ಸಲಹೆಗಳನ್ನು ರಾಜ್ಯ ಸರ್ಕಾರದ ಹೆಚ್ಚುವರಿ ಮುಖ್ಯ ಕಾರ್ಯದರ್ಶಿ, ಗೃಹ ಇಲಾಖೆ, ವಿಧಾನಸೌಧ, ಬೆಂಗಳೂರು-560 001 ವಿಳಾಸಕ್ಕೆ ಕಳುಹಿಸಬಹುದಾಗಿದೆ. ಈ ಕರಡು ನಿಯಮಗಳಲ್ಲಿ, 2014ರ ಕರ್ನಾಟಕ ಸಿನಿಮಾ (ನಿಯಂತ್ರಣ) ನಿಯಮಗಳ ನಿಯಮ 55ರ ಉಪ-ನಿಯಮ (6)ಕ್ಕೆ ಹೊಸ ಷರತ್ತನ್ನು ಸೇರಿಸಲಾಗಿದೆ. ಇದು “ರಾಜ್ಯದ ಎಲ್ಲಾ ಚಿತ್ರಮಂದಿರಗಳಲ್ಲಿ, ಮಲ್ಟಿಪ್ಲೆಕ್ಸ್ಗಳು ಸೇರಿದಂತೆ, ಎಲ್ಲಾ ಭಾಷಾ ಚಲನಚಿತ್ರಗಳ ಪ್ರತಿ ಪ್ರದರ್ಶನದ ಟಿಕೆಟ್ ವೆಚ್ಚವು ಮನರಂಜನಾ ತೆರಿಗೆ ಸೇರಿದಂತೆ ₹200 (ರೂಪಾಯಿ ಇನ್ನೂರು ಮಾತ್ರ) ಮೀರುವಂತಿಲ್ಲ” ಎಂದು ಹೇಳುತ್ತದೆ. ಅಲ್ಲದೆ, ನಿಯಮ 146 ಮತ್ತು ಅದಕ್ಕೆ ಸಂಬಂಧಿಸಿದ ನಮೂದುಗಳನ್ನು ಕೈಬಿಡಲಾಗಿದೆ.
ಕರ್ನಾಟಕ ರಾಜ್ಯಪಾಲರ ಆದೇಶದ ಮೇರೆಗೆ ಮತ್ತು ಅವರ ಹೆಸರಿನಲ್ಲಿ ಗೃಹ ಇಲಾಖೆಯ (ಕಾರಾಗೃಹ ಮತ್ತು ಸಿನಿಮಾ) ಅಧೀನ ಕಾರ್ಯದರ್ಶಿ ಬಿ.ಕೆ. ಭುವನೇಂದ್ರ ಕುಮಾರ್ ಅವರು ಈ ಅಧಿಸೂಚನೆಯನ್ನು ಹೊರಡಿಸಿದ್ದಾರೆ.
Join our WhatsApp Channel
