ಜಾಗತಿಕ ರಾಜಕೀಯ ಮತ್ತು ಆರ್ಥಿಕ ಅನಿಶ್ಚಿತತೆಯ ನಡುವೆ 2025 ರ ಭಾರತೀಯ ಆಭರಣ ವಲಯವು ವಿರುದ್ಧ ದಿಕ್ಕಿನ ಹರಿವಿನ ಸಾಕ್ಷಿಯಾಗಿದೆ. ಒಂದು ಕಡೆ, ವಜ್ರದ ಬೆಲೆಗಳು ತೀವ್ರ ಕುಸಿತ ಕಂಡಿದ್ದರೆ, ಮತ್ತೊಂದೆಡೆ, ಚಿನ್ನದ ಬೆಲೆಯು ಸಾರ್ವಕಾಲಿಕ ಗರಿಷ್ಠ ಮಟ್ಟಕ್ಕೆ ಏರಿದೆ. ಹೂಡಿಕೆದಾರರು ಮತ್ತು ಸಾಮಾನ್ಯ ಗ್ರಾಹಕರು ಸುರಕ್ಷಿತ ಹೂಡಿಕೆಗಾಗಿ ಚಿನ್ನದತ್ತ ವಾಲುತ್ತಿರುವುದು ಈ ಪ್ರವೃತ್ತಿಗೆ ಮುಖ್ಯ ಕಾರಣವಾಗಿದೆ.
ವಜ್ರದ ಉದ್ಯಮಕ್ಕೆ ತೀವ್ರ ಹಿನ್ನಡೆ :
ಕಳೆದ ಎರಡು ವರ್ಷಗಳಿಂದ ಕಚ್ಚಾ ವಜ್ರದ ಬೆಲೆ ಶೇ. 40ರಷ್ಟು ಕಡಿಮೆಯಾಗಿದೆ. 2024 ರಲ್ಲಿ ಶೇ. 18ರಷ್ಟು ಮತ್ತು 2025ರ ಆರಂಭದಲ್ಲಿ ಮತ್ತಷ್ಟು ಇಳಿಕೆ ಕಂಡಿದೆ.
ಇದಕ್ಕೆ ಮುಖ್ಯವಾಗಿ ಮೂರು ಅಂಶಗಳು ಕಾರಣ:
* ಭಾರಿ ಅಮೆರಿಕಾ ಸುಂಕ (Hefty US Tax): ಏಪ್ರಿಲ್ 2025 ರಲ್ಲಿ, ಭಾರತೀಯ ವಜ್ರಗಳ ಮೇಲೆ ಅಮೆರಿಕಾ ವಿಧಿಸಿದ ಶೇ. 10ರ ಸುಂಕವು ಆಗಸ್ಟ್ನಲ್ಲಿ ಶೇ. 50ರಷ್ಟು ಹೆಚ್ಚಿದ್ದು, ಭಾರತದ ರಫ್ತು ಆದಾಯವನ್ನು ಶೇ. 20-25 ರಷ್ಟು ಕಡಿಮೆ ಮಾಡಿದೆ. ಅಮೆರಿಕಕ್ಕೆ ಅತಿ ಹೆಚ್ಚು ವಜ್ರ ರಫ್ತು ಮಾಡುತ್ತಿದ್ದ ಭಾರತೀಯ ರಫ್ತುದಾರರಿಗೆ ಇದು ಬೃಹತ್ ಆರ್ಥಿಕ ಆಘಾತ ನೀಡಿದೆ.
* ಲ್ಯಾಬ್-ಗ್ರೋನ್ ವಜ್ರಗಳ ಸ್ಪರ್ಧೆ: ಮಾರುಕಟ್ಟೆಯಲ್ಲಿ ಲ್ಯಾಬ್-ಗ್ರೋನ್ ವಜ್ರಗಳ ಲಭ್ಯತೆ ಹೆಚ್ಚಿರುವುದು ನೈಸರ್ಗಿಕ ವಜ್ರಗಳ ಬೇಡಿಕೆ ಮತ್ತು ಬೆಲೆಯ ಮೇಲೆ ಮತ್ತಷ್ಟು ಒತ್ತಡ ಹೇರಿದೆ.
* ಜಾಗತಿಕ ಬೇಡಿಕೆ ಕುಸಿತ: ರಷ್ಯಾ-ಉಕ್ರೇನ್ ಯುದ್ಧದಿಂದಾಗಿ ಅಮೆರಿಕಾ ಮತ್ತು ಯುರೋಪ್ ಮಾರುಕಟ್ಟೆಗಳಲ್ಲಿನ ಆರ್ಥಿಕ ಹಿಂಜರಿತ ಮತ್ತು ಚೀನಾದ ಬೇಡಿಕೆ ಕುಸಿತವು ಭಾರತೀಯ ವಜ್ರ ಉದ್ಯಮಕ್ಕೆ ಹೊಡೆತ ನೀಡಿದೆ.
ಚಿನ್ನದ ಮುನ್ನುಗ್ಗುವಿಕೆ ಮತ್ತು ಹೊಸ ದಾಖಲೆ :
ವಜ್ರದ ಬೆಲೆ ಕುಸಿದಿದ್ದರೆ, ಚಿನ್ನದ ಬೆಲೆ 2025ರಲ್ಲಿ ಶೇ. 47 ರಷ್ಟು ಏರಿಕೆ ಕಂಡು, ಪ್ರತಿ 10 ಗ್ರಾಂಗೆ ₹1,19,400 ರಷ್ಟು ಸಾರ್ವಕಾಲಿಕ ಗರಿಷ್ಠ ಮಟ್ಟವನ್ನು ತಲುಪಿದೆ. ಜಾಗತಿಕ ಹಣದುಬ್ಬರ, ಕರೆನ್ಸಿ ಏರಿಳಿತ ಮತ್ತು ರಷ್ಯಾ-ಉಕ್ರೇನ್ ಯುದ್ಧದ ಕಾರಣದಿಂದ ಹೂಡಿಕೆದಾರರು ಚಿನ್ನವನ್ನು ಸುರಕ್ಷಿತ ಆಶ್ರಯ (Safe-Haven) ಎಂದು ಪರಿಗಣಿಸಿ ಭಾರೀ ಪ್ರಮಾಣದಲ್ಲಿ ಹೂಡಿಕೆ ಮಾಡುತ್ತಿದ್ದಾರೆ.
* ಬೇಡಿಕೆಯ ಮುಂದುವರಿಕೆ: ಬೆಲೆ ಏರಿಕೆಯ ಹೊರತಾಗಿಯೂ, ಚಿನ್ನದ ಬಾರ್ ಮತ್ತು ನಾಣ್ಯಗಳ (Gold Coins and Bars) ಖರೀದಿಗೆ ಗ್ರಾಹಕರು ವಾಲುತ್ತಿದ್ದಾರೆ.
* ಆರ್ ಬಿಐ ಖರೀದಿ: ಭಾರತೀಯ ರಿಸರ್ವ್ ಬ್ಯಾಂಕ್ (RBI) ಮತ್ತು ಇತರೆ ಕೇಂದ್ರ ಬ್ಯಾಂಕುಗಳು ಚಿನ್ನದ ಮೀಸಲು ಹೆಚ್ಚಿಸುತ್ತಿರುವುದು ಬೆಲೆ ಏರಿಕೆಗೆ ಮತ್ತೊಂದು ಪ್ರಮುಖ ಕಾರಣವಾಗಿದೆ. 2025 ರಲ್ಲೂ ದೇಶದ ಚಿನ್ನದ ಬೇಡಿಕೆ 700-800 ಟನ್ಗಳ ನಡುವೆ ಇರಬಹುದೆಂದು ಅಂದಾಜಿಸಲಾಗಿದೆ.
ಅಂಕಿಅಂಶಗಳ ಒಂದು ನೋಟ (FY2025ರಂತೆ) :
* ವಜ್ರ ರಫ್ತು ಆದಾಯ : ₹1.13 ಲಕ್ಷ ಕೋಟಿ (USD 13.3 ಬಿಲಿಯನ್) – ಕುಸಿತ
*ಚಿನ್ನದ ಬೆಲೆ (10 ಗ್ರಾಂ) : ₹1,19,400 (ಗರಿಷ್ಠ ಮಟ್ಟ)- ಶೇ. 47 – ಏರಿಕೆ
* ಭಾರತೀಯ ಆಭರಣ ವಲಯದ ಜಿಡಿಪಿಗೆ ಕೊಡುಗೆ : ಶೇ. 7 – ಸ್ಥಿರ
ಬೆಂಗಳೂರಿನ ಚಿನ್ನಾಭರಣ ವ್ಯಾಪಾರಿಗಳ ಸಂಘ ಏನು ಹೇಳುತ್ತೆ?:
“ಅಮೆರಿಕದ ಸುಂಕನೀತಿ ಆಗುವ ಮೊದಲು ಅಲ್ಲಿಗೆ ರಫ್ತಾಗುತ್ತಿತ್ತು. ದೊಡ್ಡ ವಜ್ರಗಳ ಬೆಲೆಯಲ್ಲಿ ಕಳೆದ ಎರಡು- ಮೂರು ವರ್ಷಗಳಲ್ಲಿ ಸಾಕಷ್ಟು ಬದಲಾವಣೆಯಾಗಿದೆ. ಲ್ಯಾಬ್ ನಲ್ಲಿ ತಯಾರಿಸಿದ ವಜ್ರಗಳು ನೈಜ ವಜ್ರದಂತೆ ನೋಡಲು ಒಂದೇ ರೀತಿ ಇರುತ್ತೆ. ಪರಿಸರಸ್ನೇಹಿ ಹಾಗೂ ಗಣಿಯಿಂದ ತೆಗೆಯುವುದನ್ನು ಅಮೆರಿಕದ ಗ್ರಾಹಕರು ಹೆಚ್ಚು ಇಷ್ಟ ಪಡುವುದಿಲ್ಲ. ಹಾಗಾಗಿ ದೊಡ್ಡ ಅಳತೆಯ ಆಭರಣಕ್ಕೆ ಬಳಸುವ ವಜ್ರದ ಮಾರುಕಟ್ಟೆಯನ್ನ ಲ್ಯಾಬ್ ನಲ್ಲಿ ತಯಾರಿಸಿದ ವಜ್ರ ಆವರಿಸಿಕೊಂಡಿದೆ. ಹೀಗಾಗಿ ದೊಡ್ಡ ವಜ್ರಗಳ ಬೆಲೆ 2-3 ವರ್ಷದಲ್ಲಿ ಕಡಿಮೆಯಾಗಿದೆ” ಎನ್ನುತ್ತಾರೆ ಬೆಂಗಳೂರು ಚಿನ್ನಾಭರಣ ವ್ಯಾಪಾರಿಗಳ ಸಂಘದ ಉಪಾಧ್ಯಕ್ಷ ಅಶೋಕ್ ರಾಥೋಡ್.
. ಆದರೆ ಗುಣಮಟ್ಟದ ಸಣ್ಣ ಪ್ರಮಾಣದ ವಜ್ರಗಳ ಬೆಲೆಯಲ್ಲಿ ಹೆಚ್ಚು ಬದಲಾವಣೆಯಾಗಿಲ್ಲ. ಏಕೆಂದರೆ ಸಣ್ಣ ಪ್ರಮಾಣದ ಉತ್ತಮ ಗುಣಮಟ್ಟದ ವಜ್ರಗಳು ದಕ್ಷಿಣ ಭಾರತದಲ್ಲಿ ಹೆಚ್ಚು ಬಳಕೆಯಾಗುತ್ತಿದೆ. ಕಡಿಮೆ ಗುಣಮಟ್ಟ ಹೊಂದಿದ ವಜ್ರಗಳ ಬೆಲೆಯಲ್ಲಿ ಮಾತ್ರ ಅಲ್ಪ ಬದಲಾವಣೆಯಾಗಿದೆ” ಎಂದಿದ್ದಾರೆ.
“ಪ್ರತಿಷ್ಠಿತ ವಜ್ರಾಭರಣ ಅಂಗಡಿಗಳಲ್ಲಿ ನೈಸರ್ಗಿಕ ಹಾಗೂ ಲ್ಯಾಬ್ ತಯಾರಿತ ವಜ್ರಗಳಿಗೆ ಆಯಾ ವರ್ಗದ ಪ್ರಮಾಣಪತ್ರಗಳು ಸಿಗುತ್ತದೆ. ಎಲ್ಲಿಯಾದರೂ ವಜ್ರಾಭರಣ ಖರೀದಿಸಿದರೂ ಪ್ರಮಾಣಪತ್ರ ಪಡೆಯಿರಿ. ಅದು ವಜ್ರಗಳ ಗುಣಮಟ್ಟ, ಬಣ್ಣ, ಸ್ಪಷ್ಟತೆಯ ದೃಢತೆಯನ್ನು ನೀಡುತ್ತೆ. ಹೀಗಿದ್ದರೂ ಕೆಲ ಅಂಗಡಿಗಳು ಗ್ರಾಹಕರಿಗೆ ನಕಲಿ ವಜ್ರಗಳನ್ನು ಮಾರಾಟ ಮಾಡುವುದನ್ನು ತಳ್ಳಿ ಹಾಕುವಂತಿಲ್ಲ. ಹೀಗಾಗಿ ಗ್ರಾಹಕರು ನೈಸರ್ಗಿಕ, ಲ್ಯಾಬ್ ನಲ್ಲಿ ತಯಾರಿಸಿದ ವಜ್ರಗಳ ಬಗ್ಗೆ ಪ್ರಮಾಣಪತ್ರಗಳನ್ನು ಪಡೆಯುವುದನ್ನು ಮರೆಯದಿರಿ” ಎಂದು ಅಶೋಕ್ ರಾಥೋಡ್ ಗ್ರಾಹಕರಿಗೆ ಸಲಹೆ ನೀಡಿದ್ದಾರೆ.
ಮುಂದಿನ ಹಾದಿ ಎಂದರೆ ವೈವಿಧ್ಯೀಕರಣದ ಅಗತ್ಯ :
ಭಾರತೀಯ ಆಭರಣ ಕ್ಷೇತ್ರವು ಸದ್ಯಕ್ಕೆ ಎರಡು ವಿಭಿನ್ನ ಆರ್ಥಿಕ ಪರಿಸ್ಥಿತಿ ಎದುರಿಸುತ್ತಿದೆ. ವಜ್ರ ವಲಯವು ಜಾಗತಿಕ ಆರ್ಥಿಕ ನೀತಿ ಮತ್ತು ಸುಂಕಗಳ ಹೊಡೆತಕ್ಕೆ ಸಿಲುಕಿದ್ದರೆ, ಚಿನ್ನದ ವಲಯವು ಜಾಗತಿಕ ಅನಿಶ್ಚಿತತೆಯ ಲಾಭ ಪಡೆಯುತ್ತಿದೆ. ಈ ಸವಾಲಿನ ಸನ್ನಿವೇಶದಲ್ಲಿ, ವಜ್ರ ಉದ್ಯಮವು ಅಮೆರಿಕಾ ಹೊರತಾದ ಯುರೋಪ್, ಮಧ್ಯಪ್ರಾಚ್ಯ ಮತ್ತು ಆಗ್ನೇಯ ಏಷ್ಯಾ ಮಾರುಕಟ್ಟೆಗಳತ್ತ ರಫ್ತು ವೈವಿಧ್ಯೀಕರಣಕ್ಕೆ ಒತ್ತು ನೀಡುವುದು ಮತ್ತು ತಂತ್ರಜ್ಞಾನ ಆಧಾರಿತ ವಜ್ರಗಳ ಉತ್ಪಾದನೆಯತ್ತ ಗಮನಹರಿಸುವುದು ತುರ್ತು ಅಗತ್ಯವಾಗಿದೆ.
Join our WhatsApp Channel
