ಬ್ರಿಸ್ಬೇನ್ (ಆಸ್ಟ್ರೇಲಿಯಾ) ಡಿ.15 www.bengaluruwire.com : ಬೃಹತ್ ಬಹುಮಹಡಿ ಕಟ್ಟಡಗಳ ನಡುವೆ ದೈತ್ಯ ಸೇನಾ ವಿಮಾನವೊಂದು ತೀರಾ ಕೆಳಮಟ್ಟದಲ್ಲಿ ಹಾರಾಟ ನಡೆಸಿ, ಕಟ್ಟಡಕ್ಕೆ ಅಪ್ಪಳಿಸಿಯೇ ಬಿಡುತ್ತೇನೋ ಎಂಬಂತೆ ಭಾಸವಾಗುವ ದೃಶ್ಯವೊಂದು ಸಾಮಾಜಿಕ ಜಾಲತಾಣದಲ್ಲಿ ಭಾರೀ ಸಂಚಲನ ಮೂಡಿಸಿದೆ.
ಆಸ್ಟ್ರೇಲಿಯಾದ ಬ್ರಿಸ್ಬೇನ್‌ನಲ್ಲಿ ನಡೆದ ವಾರ್ಷಿಕ ‘ರಿವರ್‌ಫೈರ್ ಇಂಟರ್ನ್ಯಾಷನಲ್ ಆರ್ಟ್ಸ್ ಫೆಸ್ಟಿವಲ್’ (Riverfire Festival) ನಲ್ಲಿ ರಾಯಲ್ ಆಸ್ಟ್ರೇಲಿಯನ್ ಏರ್‌ಫೋರ್ಸ್‌ನ (RAAF) ಬೋಯಿಂಗ್ ಸಿ-17 ಗ್ಲೋಬ್‌ಮಾಸ್ಟರ್ III (C-17 Globemaster III) ವಿಮಾನವು ಈ ರೋಚಕ ಸಾಹಸ ಪ್ರದರ್ಶಿಸಿದೆ. ಶನಿವಾರ ರಾತ್ರಿ ನಡೆದ ಈ ವೈಮಾನಿಕ ಪ್ರದರ್ಶನವನ್ನು ಕಂಡು ಸಾವಿರಾರು ಪ್ರೇಕ್ಷಕರು ರೋಮಾಂಚನಗೊಂಡಿದ್ದಾರೆ.
ಏನಿದು ಘಟನೆ? :
ಸಾಮಾನ್ಯವಾಗಿ ಯುದ್ಧ ಮತ್ತು ಸಾರಿಗೆಗೆ ಬಳಸುವ ಈ ದೈತ್ಯ ವಿಮಾನವು ಬ್ರಿಸ್ಬೇನ್ ನಗರದ ಗಗನಚುಂಬಿ ಕಟ್ಟಡಗಳ ಮೇಲೆ ಹಾದುಹೋಗುವಾಗ, ಕಟ್ಟಡದ ಮೇಲ್ಛಾವಣಿಗೆ ತೀರಾ ಸನಿಹದಲ್ಲಿ ಹಾರಿದೆ. ಎಕ್ಸ್ (ಟ್ವಿಟರ್) ಮತ್ತು ಇನ್‌ಸ್ಟಾಗ್ರಾಮ್‌ಗಳಲ್ಲಿ ಹರಿದಾಡುತ್ತಿರುವ ವಿಡಿಯೋಗಳಲ್ಲಿ, ವಿಮಾನವು ಕಟ್ಟಡದ ಸಮೀಪ ಬರುತ್ತಿದ್ದಂತೆ ಅದರ ಇಂಜಿನ್‌ನ ಭಾರಿ ಶಬ್ದಕ್ಕೆ ಜನರ ಹರ್ಷೋದ್ಗಾರ ಮುಗಿಲು ಮುಟ್ಟಿತ್ತು.
ನೆಟ್ಟಿಗರ ಪ್ರತಿಕ್ರಿಯೆ :
ಈ ವಿಡಿಯೋ ರಾತ್ರೋರಾತ್ರಿ ಲಕ್ಷಾಂತರ ವೀಕ್ಷಣೆಗಳನ್ನು ಕಂಡಿದೆ. ನೆಟ್ಟಿಗರು ಇದನ್ನು “ಎಪಿಕ್” (Epic) ಮತ್ತು “ಹಾರ್ಟ್ ಸ್ಟಾಪ್ಪಿಂಗ್” (ಎದೆ ಬಡಿತ ನಿಲ್ಲುವಂತಿದೆ) ಎಂದು ಬಣ್ಣಿಸಿದ್ದಾರೆ. ಇನ್ನು ಕೆಲವರು ಪೈಲಟ್‌ನ ಚಾಕಚಕ್ಯತೆಯನ್ನು ಕೊಂಡಾಡಿದ್ದು, ಕಟ್ಟುನಿಟ್ಟಾದ ಸುರಕ್ಷತಾ ಮಾನದಂಡಗಳ ನಡುವೆಯೂ ಇಷ್ಟು ನಿಖರವಾಗಿ ವಿಮಾನ ಚಲಾಯಿಸಿರುವುದು ಅದ್ಭುತ ಎಂದು ಏವಿಯೇಷನ್ ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ.
ಅಧಿಕಾರಿಗಳು ಹೇಳಿದ್ದೇನು? :
ಈ ಬಗ್ಗೆ ಪ್ರತಿಕ್ರಿಯಿಸಿರುವ ಆಯೋಜಕರು ಮತ್ತು ಆರ್‌ಎಎಫ್ ವಕ್ತಾರರು, “ಇದು ಆಸ್ಟ್ರೇಲಿಯಾದ ರಕ್ಷಣಾ ಸಾಮರ್ಥ್ಯವನ್ನು ಪ್ರದರ್ಶಿಸುವ ಮತ್ತು ನಮ್ಮ ನಗರದ ವೈಭವವನ್ನು ಕೊಂಡಾಡುವ ಒಂದು ಭಾಗವಾಗಿದೆ. ಎಲ್ಲಾ ಸುರಕ್ಷತಾ ಕ್ರಮಗಳನ್ನು ಪಾಲಿಸಿಯೇ ಈ ಪ್ರದರ್ಶನ ನೀಡಲಾಗಿದೆ,” ಎಂದು ಸ್ಪಷ್ಟಪಡಿಸಿದ್ದಾರೆ. ಯಾವುದೇ ಅಹಿತಕರ ಘಟನೆಗಳು ವರದಿಯಾಗಿಲ್ಲ ಎಂದು ಅವರು ತಿಳಿಸಿದ್ದಾರೆ.
ಒಟ್ಟಿನಲ್ಲಿ ಬ್ರಿಸ್ಬೇನ್‌ನ ಆಕಾಶದಲ್ಲಿ ನಡೆದ ಈ ರೋಚಕ ಕಸರತ್ತು ಈಗ ಜಗತ್ತಿನಾದ್ಯಂತ ವೈಮಾನಿಕ ಪ್ರಿಯರ ಗಮನ ಸೆಳೆದಿದೆ. (Photo & Video Credit : X)
Join our WhatsApp Channel
