ಕಾಡಿನ ರಾಜ ಸಿಂಹ ತನ್ನ ಗಂಭೀರ ನಡಿಗೆಯಿಂದಲೇ ಎಂತಹವರನ್ನು ಸೆಳೆಯುತ್ತೆ. ಹಾಗೆಯೇ ಬೇಟೆಯ ಸಮಯದಲ್ಲಿ ಅದರ ಕಾರ್ಯಾಚರಣೆಯನ್ನು ನೋಡಿದ್ರೂ ಎದೆಯಲ್ಲಿ ನಡುಕ ಮೂಡಿಸುತ್ತದೆ. ಸಾಮಾನ್ಯವಾಗಿ ನಾವು ಟಿವಿ, ಇಂಟರ್ ನೆಟ್ ಅಥವಾ ಮೊಬೈಲ್ ನಲ್ಲಿ ಸಿಂಹಗಳ ಹಾವಭಾವಗಳನ್ನು ಕುತೂಹಲಕ್ಕಾಗಿಯಾದರೂ ನೋಡಿಯೇ ಇರುತ್ತೇವೆ. ಕೀನ್ಯಾದ ಮಸಾಯ್ ಮಾರಾ ರಾಷ್ಟ್ರೀಯ ಮೀಸಲು ಉದ್ಯಾನವನದ ಸಿಂಹವೊಂದರ ಕುಳಿತ ಭಂಗಿ ನೆಟ್ಟಿಗರ ಗಮನವನ್ನು ಸೆಳೆದಿದೆ. ಅಲ್ಲದೆ ಈ ವಿಡಿಯೋ ಸಖತ್ತಾಗಿ ಅಂತರ್ಜಾಲದಲ್ಲಿ ಶೇರ್ ಆಗಿದೆ.
ಮಸಾಯ್ ಮಾರಾ ರಾಷ್ಟ್ರೀಯ ಮೀಸಲು ಉದ್ಯಾನವನದಲ್ಲಿ ಶಾಂತವಾಗಿ ಕುಳಿತ ಸಿಂಹದ ರೇಷ್ಮೆಯಂತಹ ಕೂದಲನ್ನು ಕಂಡು ಬಹಳ ಮಂದಿ ಆಶ್ಚರ್ಯ ವ್ಯಕ್ತಪಡಿಸಿದ್ದಾರೆ. ಕೆಲವರಂತೂ ಈ ಸಿಂಹ ಯಾವ ಕೇಶ ಉತ್ಪನ್ನ ಬಳಸುತ್ತೆ ಎಂತಲ್ಲೇ ಹಾಸ್ಯ ಮಾಡಿದ್ದಾರೆ. ಅಂದಹಾಗೆ ಬೆಂಚಿನ ರೀತಿಯ ಹಲಗೆಯ ಮೇಲೆ ಕುಳಿತ ಸಿಂಹ ನಿಧಾನವಾಗಿ ಬೆಳಕು ಹಾಗೂ ಗಾಳಿಗೆ ತನ್ನ ಮುಖವನ್ನು ತಿರುಗಿಸುತ್ತಿರುವಾಗ, ಅದರ ನೀಳವಾದ ರೇಷ್ಮೆಯಂತಹ ಕೂದಲು ಗಾಳಿಯೊಂದಿಗೆ ತೇಲುತ್ತಿರುವ ಮನಮೋಹಕ ದೃಶ್ಯ ಟ್ವಿಟ್ಟಿಗರನ್ನು ಸೆಳೆದಿದೆ.
ಡಿ.27ರಂದು ಟ್ವಿಟರ್ ನಲ್ಲಿ ಅಪಲೋಡ್ ಮಾಡಲಾದ ಈ ವಿಡಿಯೋ ಕ್ಲಿಪ್ ಅನ್ನು ಈತನಕ 12.1 ದಶಲಕ್ಷ ಜನರು ವೀಕ್ಷಿಸಿದ್ದಾರೆ. ಅಲ್ಲದೆ 12.3 ಸಾವಿರ ಜನರು ಈ ವಿಡಿಯೋವನ್ನು ರೀಟ್ವಿಟ್ ಮಾಡಿದ್ದಾರೆ.
‘ಈ ಸಿಂಹವು ಕೂತಿರುವ ಭವ್ಯವಾದ ಭಂಗಿಯ ವಿಡಿಯೋಗೆ ಹಿನ್ನಲೆ ಸಂಗೀತ ಅಳವಡಿಸಿದ್ದರೆ ಚೆನ್ನಾಗಿರುತ್ತಿತ್ತು’ ಎಂದು ಟ್ವಿಟರ್ ಬಳಕೆದಾರರೊಬ್ಬರು ಪ್ರತಿಕ್ರಿಯಿಸಿದ್ದಾರೆ.
‘ಈ ಭವ್ಯವಾದ ಪ್ರಾಣಿಯು ಸರಿಯಾದ ಬೆಲೆ ಯಾವುದೋ ಬೇಟೆಗಾರ ಬಲೆಗೆ ಬೀಳದಿರಲೆಂದು ಭಾವಿಸೋಣ ಹಾಗೂ ಪ್ರಾರ್ಥಿಸೋಣ, ಇದನ್ನು ನೀವು ಒಪ್ಪಿದರೆ ಮರುಟ್ವೀಟ್ ಮಾಡಿ’ ಎಂದು ಬರೆದುಕೊಂಡಿದ್ದಾರೆ.
‘ಕೂದಲ ಮೇಲೆ ಹದವಾದ ಗಾಳಿ ಬೀಸುತ್ತಿರುವ ಮತ್ತು ಮುಖಕ್ಕೆ ಸೂರ್ಯನ ಕಿರಣಗಳು ತಾಗಿರುವ ಈ ಕ್ಷಣವನ್ನು ಸಿಂಹವು ಉತ್ತಮ ಜೀವನ ನಡೆಸುತ್ತಿರುವುದಕ್ಕೆ ಸಾಕ್ಷಿಯಾಗಿದೆ’ ಎಂದು ಮತ್ತೊಬ್ಬರು ಹೇಳಿದ್ದಾರೆ.
Join our WhatsApp Channel
