ಗಾಂಧಿನಗರ (ಗುಜರಾತ್), ಸೆ.30 www.bengaluruwire.com: ಅರಬ್ಬೀ ಸಮುದ್ರದಲ್ಲಿ ಅಂತರರಾಷ್ಟ್ರೀಯ ಮಾದಕ ದ್ರವ್ಯ ಕಳ್ಳಸಾಗಣೆ ಜಾಲಕ್ಕೆ ಭಾರತೀಯ ಭದ್ರತಾ ಪಡೆಗಳು ಭರ್ಜರಿ ಪೆಟ್ಟು ನೀಡಿವೆ.
ಭಾರತೀಯ ಕರಾವಳಿ ಕಾವಲು ಪಡೆ (Indian Coast Guard – ICG), ಗುಜರಾತ್ ಎಟಿಎಸ್ (ATS Gujarat) ಹಾಗೂ ಕೇಂದ್ರ ಗುಪ್ತಚರ ಸಂಸ್ಥೆಗಳು ಜಂಟಿಯಾಗಿ ನಡೆಸಿದ ಮಿಂಚಿನ ಕಾರ್ಯಾಚರಣೆಯಲ್ಲಿ ಬರೋಬ್ಬರಿ ₹3,000 ಕೋಟಿಗೂ ಅಧಿಕ ಮೌಲ್ಯದ 526 ಕೆಜಿ ಹೆರಾಯಿನ್ ಮತ್ತು ಮೆಥಾಂಫೆಟಮೈನ್ ಮಾದಕ ವಸ್ತುಗಳನ್ನು ವಶಪಡಿಸಿಕೊಳ್ಳಲಾಗಿದೆ. ಘಟನೆಗೆ ಸಂಬಂಧಿಸಿದಂತೆ ಇರಾನ್ ಮೂಲದ ಬೋಟ್ನಲ್ಲಿದ್ದ ಐವರು ಪಾಕಿಸ್ತಾನಿ ಪ್ರಜೆಗಳನ್ನು ವಶಕ್ಕೆ ಪಡೆಯಲಾಗಿದೆ.
ಲಕ್ಷದ್ವೀಪದ ಪಶ್ಚಿಮ ಭಾಗದಲ್ಲಿ ಮಿಂಚಿನ ಕಾರ್ಯಾಚರಣೆ:
ಕೇಂದ್ರ ಗುಪ್ತಚರ ಇಲಾಖೆ ಹಾಗೂ ಗುಜರಾತ್ ಎಟಿಎಸ್ ನೀಡಿದ ನಿಖರ ಮಾಹಿತಿಯ ಆಧಾರದ ಮೇಲೆ, ಕರಾವಳಿ ಕಾವಲು ಪಡೆಯ ಹಡಗುಗಳು ಮತ್ತು ವಾಯುಪಡೆ ನಿಗಾ ವ್ಯವಸ್ಥೆ ಮೂಲಕ ಸಮುದ್ರದಲ್ಲಿ ಸಂಶಯಾಸ್ಪದ ಇರಾನ್ ಬೋಟ್ (Dhow) ಅನ್ನು ಸತತವಾಗಿ ಹಿಂಬಾಲಿಸಲಾಯಿತು. ಲಕ್ಷದ್ವೀಪದ ಪಶ್ಚಿಮ ಭಾಗದಲ್ಲಿ ಸಮುದ್ರದ ನಡುವೆ ಬೋಟ್ ಅನ್ನು ಸುತ್ತುವರಿದ ಕರಾವಳಿ ಕಾವಲು ಪಡೆಯ ಕಮಾಂಡೋಗಳು, ತ್ವರಿತವಾಗಿ ಬೋಟ್ಗೆ ಲಗ್ಗೆ ಇಟ್ಟು (Tactical Boarding) ಕಳ್ಳಸಾಗಣೆದಾರರನ್ನು ಸೆರೆಹಿಡಿದಿದ್ದಾರೆ.
526 ಕೆಜಿ ಹೆರಾಯಿನ್, ಮೆಥಾಂಫೆಟಮೈನ್ ಜಪ್ತಿ:
ಶೋಧ ಕಾರ್ಯದ ವೇಳೆ ಬೋಟ್ನ ರಹಸ್ಯ ಕೋಣೆಗಳಲ್ಲಿ ಬಚ್ಚಿಟ್ಟಿದ್ದ 526 ಕೆಜಿ ತೂಕದ ಅತ್ಯುನ್ನತ ಗುಣಮಟ್ಟದ ಹೆರಾಯಿನ್ ಮತ್ತು ಮೆಥಾಂಫೆಟಮೈನ್ ಪತ್ತೆಯಾಗಿದೆ. ಅಂತಾರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಇದರ ಅಂದಾಜು ಮೌಲ್ಯ ₹3,000 ಕೋಟಿಗೂ ಅಧಿಕ ಎಂದು ಅಂದಾಜಿಸಲಾಗಿದೆ. ಭಾರತದ ಜಲಪ್ರದೇಶದ ಮೂಲಕ ದೇಶದ ಯುವಜನತೆಯನ್ನು ಗುರಿಯಾಗಿಸಿ ಈ ಮಾದಕ ದ್ರವ್ಯಗಳನ್ನು ಸರಬರಾಜು ಮಾಡಲು ಸಂಚು ರೂಪಿಸಲಾಗಿತ್ತು ಎನ್ನಲಾಗಿದೆ.
ಮುಂಬೈಗೆ ಬೋಟ್ ಸ್ಥಳಾಂತರ, ತೀವ್ರ ವಿಚಾರಣೆ:
ವಶಪಡಿಸಿಕೊಳ್ಳಲಾದ ಬೋಟ್, ಮಾದಕ ವಸ್ತುಗಳು ಹಾಗೂ ಬಂಧಿತ ಐವರು ಪಾಕಿಸ್ತಾನಿ ಸಿಬ್ಬಂದಿಯನ್ನು ಭದ್ರತೆಯೊಂದಿಗೆ ಮುಂಬೈ ಬಂದರಿಗೆ ತರಲಾಗಿದೆ. ವಿವಿಧ ತನಿಖಾ ಸಂಸ್ಥೆಗಳು ಇವರನ್ನು ಜಂಟಿ ವಿಚಾರಣೆಗೆ ಒಳಪಡಿಸಿದ್ದು, ಈ ಜಾಲದ ಹಿಂದೆ ಇರುವ ಗಡಿಯಾಚೆಗಿನ ಕಿಂಗ್ಪಿನ್ಗಳ ಪತ್ತೆಗೆ ಬಲೆ ಬೀಸಲಾಗಿದೆ. ಕೇಂದ್ರ ಸರ್ಕಾರದ ‘ನಶಾ ಮುಕ್ತ್ ಭಾರತ್’ (Nasha Mukt Bharat) ಅಭಿಯಾನದ ಭಾಗವಾಗಿ ಸಮುದ್ರ ಗಡಿಗಳಲ್ಲಿ ಹದ್ದಿನ ಕಣ್ಣಿಡಲಾಗಿದ್ದು, ದೇಶ ವಿರೋಧಿ ಶಕ್ತಿಗಳ ಯಾವುದೇ ಪ್ರಯತ್ನವನ್ನು ಮಟ್ಟಹಾಕಲು ಬದ್ಧವಾಗಿರುವುದಾಗಿ ಭಾರತೀಯ ತಟರಕ್ಷಕ ಪಡೆ ತಿಳಿಸಿದೆ.
Join our WhatsApp Channel
