ಬೆಂಗಳೂರು, ಸೆ.29 www.bengaluruwire.com: ರಾಜಧಾನಿ ಬೆಂಗಳೂರಿನಲ್ಲಿ ಕುಡಿಯುವ ನೀರು ಪೂರೈಕೆ ಮಾಡುವ ಬೆಂಗಳೂರು ನೀರು ಸರಬರಾಜು ಮತ್ತು ಒಳಚರಂಡಿ ಮಂಡಳಿ (BWSSB) ಕಾರ್ಯವೈಖರಿ ಜನಸಾಮಾನ್ಯರ ಆಕ್ರೋಶಕ್ಕೆ ಕಾರಣವಾಗಿದೆ.
ಮನೆಯ ಸಂಪಿನಲ್ಲಿ ಹನಿ ನೀರೂ ಬೀಳದಿದ್ದರೂ, ಪೈಪ್ಲೈನ್ನಲ್ಲಿ ಬರುವ ಗಾಳಿಯ ರಭಸಕ್ಕೆ ವಾಟರ್ ಮೀಟರ್ ಗಿರಗಿರನೆ ತಿರುಗುತ್ತಿರುವ ಆಘಾತಕಾರಿ ವಿಡಿಯೋವೊಂದು ಸಾಮಾಜಿಕ ಜಾಲತಾಣ ‘ಎಕ್ಸ್’ (ಟ್ವಿಟರ್)ನಲ್ಲಿ ವೈರಲ್ ಆಗಿದೆ. ಬರದ ಹೊಡೆತ ಹಾಗೂ ನೀರಿನ ಅಭಾವದಿಂದ ತತ್ತರಿಸಿರುವ ಬೆಂಗಳೂರಿಗರಿಗೆ, ಈಗ ಜಲಮಂಡಳಿ ಪೈಪಿನಲ್ಲಿ ಹರಿಯುವ ‘ಬರೀ ಗಾಳಿಗೂ’ ಮೀಟರ್ ರೀಡಿಂಗ್ ಎತ್ತಿ ಬಿಲ್ ವಸೂಲಿ ಮಾಡುತ್ತಿದೆ ಎಂಬ ಆಕ್ರೋಶದ ಕೂಗು ವ್ಯಾಪಕವಾಗಿದೆ.
ಏನಿದು ಘಟನೆ? ವಿಡಿಯೋದಲ್ಲೇನಿದೆ?:
ಬೆಂಗಳೂರಿನ ಶ್ರೀನಗರದ ಜಲ್ಗೇರಮ್ಮ ದೇವಸ್ಥಾನದ 2ನೇ ಕ್ರಾಸ್ ರಸ್ತೆಯ ನಿವಾಸಿಯೊಬ್ಬರು ಹಂಚಿಕೊಂಡಿರುವ ವಿಡಿಯೋದಲ್ಲಿ, ಜಲಮಂಡಳಿಯ ಎಡವಟ್ಟು ಬಟಾಬಯಲಾಗಿದೆ. ಮನೆಗೆ ಸಂಪರ್ಕ ಕಲ್ಪಿಸಿರುವ ಕಾವೇರಿ ನೀರಿನ ಪೈಪ್ನಲ್ಲಿ ನೀರು ಸಂಪೂರ್ಣವಾಗಿ ಶೂನ್ಯವಾಗಿದೆ. ಪೈಪ್ನಿಂದ ಕೇವಲ ಗಾಳಿಯ ಸದ್ದು ಬರುತ್ತಿದೆ. ಆದರೆ ಆಶ್ಚರ್ಯವೆಂದರೆ, ಮನೆಯ ಹೊರಗಡೆ ಅಳವಡಿಸಿರುವ ಹೊಸ ಕೊನಾರ್ಕ್ (KONARAK) ವಾಟರ್ ಮೀಟರ್ ಮಾತ್ರ ನೀರಿನ ಹರಿವಿಗಿಂತಲೂ ಅತಿ ವೇಗವಾಗಿ ಗಿರಗಿರನೆ ತಿರುಗುತ್ತಿದೆ! ವಾಲ್ವ್ ಆಫ್ ಮಾಡಿದಾಗ ಮಾತ್ರ ನಿಲ್ಲುವ ಮೀಟರ್, ಆನ್ ಮಾಡಿದ ತಕ್ಷಣವೇ ಗಾಳಿಯ ಒತ್ತಡಕ್ಕೇ ಯದ್ವಾತದ್ವಾ ಓಡುತ್ತಿದೆ.
ಹೊಸ ಮೀಟರ್ ಬದಲಾವಣೆ ಹಿಂದಿನ ಅಸಲಿ ಮರ್ಮವೇನು?:
ಸ್ಥಳೀಯ ನಿವಾಸಿಗಳ ಪ್ರಕಾರ, ಕಳೆದ 6-7 ತಿಂಗಳ ಹಿಂದೆ ಜಲಮಂಡಳಿಯು ಪೈಪ್ಲೈನ್ ಅಪ್ಗ್ರೇಡ್ ನೆಪದಲ್ಲಿ ರಸ್ತೆ ಅಗೆದು ಹಳೇ ಪೈಪ್ ಹಾಗೂ ಚೆನ್ನಾಗಿ ಕಾರ್ಯನಿರ್ವಹಿಸುತ್ತಿದ್ದ ಹಳೆಯ ಮೀಟರ್ಗಳನ್ನು ಕಿತ್ತುಹಾಕಿ, ಈ ಹೊಸ ಮೀಟರ್ಗಳನ್ನು ಕಡ್ಡಾಯವಾಗಿ ಅಳವಡಿಸಿದೆ. ಈ ಹಿಂದೆ ತಿಂಗಳಿಗೆ ಕೇವಲ ₹250 ರಿಂದ ₹300 ಬರುತ್ತಿದ್ದ ನೀರಿನ ಬಿಲ್, ಈ ಹೊಸ ಮೀಟರ್ ಬಂದಾಗಿನಿಂದ ಏಕಾಏಕಿ ₹800 ದಾಟುತ್ತಿದೆ ಎಂದು ಗ್ರಾಹಕರು ಅಲವತ್ತುಕೊಂಡಿದ್ದಾರೆ.
ಅಂದರೆ, ಪೈಪ್ನಲ್ಲಿ ನೀರು ಸರಬರಾಜು ಇಲ್ಲದಿದ್ದಾಗ ಲೈನ್ಗಳಲ್ಲಿ ನಿರ್ಮಾಣವಾಗುವ ಹೈ-ಪ್ರೆಶರ್ ಗಾಳಿಯೇ ಮೀಟರ್ ಡಯಲ್ಗಳನ್ನು ತಿರುಗಿಸುತ್ತಿದ್ದು, ನೀರೇ ಇಲ್ಲದಿದ್ದರೂ ಸಾವಿರಾರು ರೂಪಾಯಿ ಬಿಲ್ ಸಾರ್ವಜನಿಕರ ತಲೆಮೇಲೆ ಬೀಳುತ್ತಿದೆ.
ನೆಟ್ಟಿಗರ ಹಾಗೂ ಸಾರ್ವಜನಿಕರ ಖಡಕ್ ಆಕ್ರೋಶ:
ಕರ್ನಾಟಕ ರಾಷ್ಟ್ರ ಸಮಿತಿ ಪಕ್ಷ (KRS Party) ತನ್ನ ಅಧಿಕೃತ ಖಾತೆಯಲ್ಲಿ ಈ ವಿಡಿಯೋವನ್ನು ಹಂಚಿಕೊಂಡಿದ್ದು, ಸಾಮಾಜಿಕ ಜಾಲತಾಣದಲ್ಲಿ ನೆಟ್ಟಿಗರು ಜಲಮಂಡಳಿ ಮತ್ತು ಆಡಳಿತ ಯಂತ್ರದ ವಿರುದ್ಧ ಹಿಗ್ಗಾಮುಗ್ಗಾ ವಾಗ್ದಾಳಿ ನಡೆಸಿದ್ದಾರೆ:
ಗಾಳಿಗೂ ಟ್ಯಾಕ್ಸ್: “ಬೆಂಗಳೂರಿನಲ್ಲಿ ಇನ್ಮುಂದೆ ಉಸಿರಾಡುವ ಗಾಳಿಗೂ ಮೀಟರ್ ಹಾಕಿ ಬಿಲ್ ಮಾಡಿದ್ರೂ ಆಶ್ಚರ್ಯವಿಲ್ಲ! ನೀರು ಕೊಡೋ ಯೋಗ್ಯತೆ ಇಲ್ಲ, ಆದ್ರೆ ಗಾಳಿಗೆ ಮೀಟರ್ ಓಡಿಸಿ ಲೂಟಿ ಮಾಡ್ತಿದ್ದಾರೆ” ಎಂದು ನೆಟ್ಟಿಗರು ಕಿಡಿಕಾರಿದ್ದಾರೆ.
ತಾಂತ್ರಿಕ ವಂಚನೆ (ಏರ್ ರಿಲೀಸ್ ವಾಲ್ವ್ ಕೊರತೆ): ಪೈಪ್ಲೈನ್ಗಳಲ್ಲಿ ಏರ್ ರಿಲೀಸ್ ವಾಲ್ವ್ (Air Release Valve) ಅಥವಾ ನಾನ್-ರಿಟರ್ನ್ ವಾಲ್ವ್ ಅಳವಡಿಸದೆ ನೇರವಾಗಿ ಕಡಿಮೆ ದರ್ಜೆಯ ಮೀಟರ್ಗಳನ್ನು ಜನರಿಗೆ ಗಿಫ್ಟ್ ಕೊಟ್ಟರೆ ಹೀಗೇ ಆಗುವುದು. ತಾಂತ್ರಿಕ ನ್ಯೂನತೆಯನ್ನು ಮುಚ್ಚಿಟ್ಟು ಜನರ ಜೇಬಿಗೆ ಕತ್ತರಿ ಹಾಕಲಾಗುತ್ತಿದೆ ಎಂಬ ವಿಶ್ಲೇಷಣೆ ವ್ಯಕ್ತವಾಗಿದೆ.
ಕಮಿಷನ್ ದಂಧೆ ಶಂಕೆ: ಸುಸ್ಥಿತಿಯಲ್ಲಿದ್ದ ಹಳೇ ಮೀಟರ್ಗಳನ್ನು ಏಕಾಏಕಿ ಬದಲಾಯಿಸಿ, ಅವಸರವಸರವಾಗಿ ಇಂತಹ ಹೊಸ ಮೀಟರ್ ಹಾಕಿದ್ದರ ಹಿಂದೆ ಮೀಟರ್ ತಯಾರಕ ಕಂಪನಿ ಮತ್ತು ಅಧಿಕಾರಿಗಳ ಜುಗಲ್ಬಂದಿ ಇದೆಯೇ ಎಂಬ ಅನುಮಾನಗಳನ್ನು ಬಳಕೆದಾರರು ಎತ್ತಿದ್ದಾರೆ.
ತಕ್ಷಣವೇ ತನಿಖೆಗೆ ಆಗ್ರಹ:
ಇದು ಕೇವಲ ಶ್ರೀನಗರದ ಒಬ್ಬ ಗ್ರಾಹಕನ ಸಮಸ್ಯೆಯಲ್ಲ, ನಗರದ ಹಲವೆಡೆ ಹೊಸ ಮೀಟರ್ ಅಳವಡಿಸಿಕೊಂಡಿರುವ ಬಹುತೇಕ ಬಡಾವಣೆಗಳಲ್ಲಿ ಇದೇ ಗೋಳು ಕೇಳಿಬರುತ್ತಿದೆ. ಬೆಂಗಳೂರು ಜಲಮಂಡಳಿ (BWSSB) ಉನ್ನತ ಅಧಿಕಾರಿಗಳು ತಕ್ಷಣ ಸ್ಥಳ ಪರಿಶೀಲನೆ ನಡೆಸಿ, ಇಂತಹ ತಾಂತ್ರಿಕ ಲೋಪವಿರುವ ಮೀಟರ್ಗಳನ್ನು ಪರೀಕ್ಷೆಗೆ ಒಳಪಡಿಸಬೇಕು. ಗಾಳಿಗೆ ಬಿಲ್ ಹಾಕುವುದನ್ನು ನಿಲ್ಲಿಸಿ, ಹೆಚ್ಚುವರಿಯಾಗಿ ವಸೂಲಿ ಮಾಡಿದ ಮೊತ್ತವನ್ನು ಗ್ರಾಹಕರ ಬಿಲ್ನಲ್ಲಿ ಮರುಹೊಂದಾಣಿಕೆ ಮಾಡದಿದ್ದರೆ ಬೀದಿಗಿಳಿದು ಪ್ರತಿಭಟಿಸುವುದು ಅನಿವಾರ್ಯ ಎಂಬ ಎಚ್ಚರಿಕೆ ಸಾರ್ವಜನಿಕ ವಲಯದಿಂದ ವ್ಯಕ್ತವಾಗಿದೆ. Video News: https://www.instagram.com/reel/Dd3ehCAIMDE/?stkn=MW43dmJ3d2txNWtheQ==
Join our WhatsApp Channel
