ಬೆಂಗಳೂರು, ಸೆ.29 www.bengaluruwire.com: ರಾಜಧಾನಿ ಬೆಂಗಳೂರಿನಲ್ಲಿ ರಸ್ತೆಗುಂಡಿಗಳ ಸಮಸ್ಯೆ ಮತ್ತು ಅಧಿಕಾರಿಗಳ ಜವಾಬ್ದಾರಿರಹಿತ ವರ್ತನೆಗೆ ಹಿಡಿದ ಕನ್ನಡಿಯಂತಿರುವ ಘಟನೆಯೊಂದು ಸಾಮಾಜಿಕ ಜಾಲತಾಣಗಳಲ್ಲಿ ತೀವ್ರ ಚರ್ಚೆಗೆ ಗ್ರಾಸವಾಗಿದೆ.
ನಗರದ ಸರ್ ಎಂ. ವಿಶ್ವೇಶ್ವರಯ್ಯ (SMV) ಬಡಾವಣೆಯ 1ನೇ ಬ್ಲಾಕ್ನಲ್ಲಿ ಬೃಹತ್ ರಸ್ತೆಗುಂಡಿಯೊಂದನ್ನು ಮುಚ್ಚಲು ಸತತ 83 ದಿನಗಳ ಕಾಲ ಅಧಿಕಾರಿಗಳ ಬೆನ್ನುಬಿದ್ದರೂ ಯಾವುದೇ ಪ್ರಯೋಜನವಾಗದ ಹಿನ್ನೆಲೆಯಲ್ಲಿ, ನೊಂದ ನಿವಾಸಿಗಳೇ ಸ್ವತಃ ಹಣ ಹಾಕಿ ರಸ್ತೆಗುಂಡಿ ಮುಚ್ಚಿದ ಘಟನೆ ಬೆಳಕಿಗೆ ಬಂದಿದೆ.
‘ಸ್ಮಾರ್ಟ್ ಬೆಂಗಳೂರು’ (Smart Bangalore) ಆ್ಯಪ್ನಲ್ಲಿ ಜೂನ್ 29ರಂದು ದೂರು ದಾಖಲಿಸಲಾಗಿದ್ದರೂ (ದೂರು ಸಂಖ್ಯೆ: 21181459), ಸೆಪ್ಟೆಂಬರ್ 20ರವರೆಗೂ ಸಂಬಂಧಪಟ್ಟ ಎಂಜಿನಿಯರ್ಗಳು ಸ್ಥಳಕ್ಕೆ ಭೇಟಿ ನೀಡಿರಲಿಲ್ಲ. ಅಂತಿಮವಾಗಿ ಯಾವುದೇ ಅಧಿಕಾರಿಗಳು ಬಾರದಿದ್ದಾಗ, ಸ್ಥಳೀಯ ನಾಗರಿಕರೊಬ್ಬರು ತಮ್ಮ ಪತ್ನಿ ಹಾಗೂ ಸ್ನೇಹಿತನ ನೆರವಿನೊಂದಿಗೆ ತಾವೇ ಗುಂಡಿ ಮುಚ್ಚಿ ಸಾರ್ವಜನಿಕರ ಸಂಚಾರಕ್ಕೆ ಅನುವು ಮಾಡಿಕೊಟ್ಟಿದ್ದಾರೆ.
ಜಿಬಿಎ – ಬಿಡಿಎ ಜಟಾಪಟಿ: ನಲುಗಿದ ಸಾರ್ವಜನಿಕರು
ಬಾಧಿತ ನಿವಾಸಿ ಎಕ್ಸ್ (ಟ್ವಿಟರ್) ಖಾತೆಯಲ್ಲಿ ಹಂಚಿಕೊಂಡಿರುವ ಮಾಹಿತಿಯ ಪ್ರಕಾರ:
ಅಧಿಕಾರಿಗಳ ನುಣುಚಿಕೊಳ್ಳುವಿಕೆ: ಗ್ರೇಟರ್ ಬೆಂಗಳೂರು ಪ್ರಾಧಿಕಾರ (GBA) ವ್ಯಾಪ್ತಿಯ ಸಹಾಯಕ ಎಂಜಿನಿಯರ್ (AE) ಈ ರಸ್ತೆ ಬಿಡಿಎಗೆ (BDA) ಸೇರಿದ್ದು ಎಂದು ಜಾರಿಕೊಂಡರೆ, ಬಿಡಿಎ ಅಧಿಕಾರಿಗಳು ರಸ್ತೆಗಳ ಪಟ್ಟಿಯನ್ನು ಕಳುಹಿಸಿ ಇದು ಜಿಬಿಎ ವ್ಯಾಪ್ತಿಗೆ ಬರುತ್ತದೆ ಎಂದು ಸ್ಪಷ್ಟಪಡಿಸಿದ್ದರು.
ವಿಫಲವಾದ ಸಿಟಿಜನ್ಸ್ ಕಾಲ್: ನಾಗರಿಕರ ವೇದಿಕೆಯ ಕಾಲ್ಗಳಲ್ಲಿ ಸತತ 5 ವಾರಗಳ ಕಾಲ “ನಾವು ಸರಿಪಡಿಸುತ್ತೇವೆ” ಎಂಬ ಭರವಸೆ ಸಿಕ್ಕಿತೇ ಹೊರತು ನೆಲಮಟ್ಟದಲ್ಲಿ ಯಾರೂ ಕೆಲಸ ಮಾಡಲಿಲ್ಲ.
ಸ್ವಂತ ಖರ್ಚಿನಲ್ಲಿ ರಸ್ತೆ ದುರಸ್ತಿ: ರಸ್ತೆಗುಂಡಿಯಿಂದಾಗಿ ನಿತ್ಯ ವಾಹನ ಸವಾರರು ಬಿದ್ದು ಗಾಯಗೊಳ್ಳುತ್ತಿದ್ದನ್ನು ಕಂಡು ಸಹಿಸದ ನಿವಾಸಿಗಳು, ಚೆನ್ನೈನಿಂದ ₹7,500 ಖರ್ಚು ಮಾಡಿ 10 ಬ್ಯಾಗ್ ಕೋಲ್ಡ್ ಆಸ್ಫಾಲ್ಟ್ (Cold Asphalt) ತರಿಸಿ ತಾವೇ ಗುಂಡಿಯನ್ನು ಮುಚ್ಚಿದ್ದಾರೆ. “ನಾವು ತೆರಿಗೆಯನ್ನೂ ಕಟ್ಟಬೇಕು, ಗುಂಡಿ ಮುಚ್ಚಲು ಜೇಬಿನಿಂದ ಹಣವನ್ನೂ ಖರ್ಚು ಮಾಡಬೇಕಾ?” ಎಂದು ಅವರು ಆಕ್ರೋಶ ಹೊರಹಾಕಿದ್ದಾರೆ.
ಎಕ್ಸ್ನಲ್ಲಿ ನೆಟ್ಟಿಗರ ಆಕ್ರೋಶ ಹಾಗೂ ಪ್ರಮುಖ ಪ್ರತಿಕ್ರಿಯೆಗಳು
ಈ ಪೋಸ್ಟ್ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗುತ್ತಿದ್ದಂತೆ ನೆಟ್ಟಿಗರು ಅಧಿಕಾರಿಗಳು ಹಾಗೂ ಜನಪ್ರತಿನಿಧಿಗಳ ವಿರುದ್ಧ ತೀವ್ರ ಆಕ್ರೋಶ ವ್ಯಕ್ತಪಡಿಸಿದ್ದಾರೆ:
“ನಾವು ಕಟ್ಟುವ ತೆರಿಗೆ ಹಣ ಎಲ್ಲಿ ಹೋಯಿತು?”: ನಾಗರಿಕರೇ ದುಡ್ಡು ಹಾಕಿ ಗುಂಡಿ ಮುಚ್ಚುವುದಾದರೆ ಸರ್ಕಾರಕ್ಕೆ ರಸ್ತೆ ತೆರಿಗೆ ಮತ್ತು ಆಸ್ತಿ ತೆರಿಗೆ ಏಕೆ ಕಟ್ಟಬೇಕು ಎಂದು ಬಹುತೇಕರು ಪ್ರಶ್ನಿಸಿದ್ದಾರೆ.
“ಅಧಿಕಾರಿಗಳ ಸಂಬಳದಿಂದ ಹಣ ವಸೂಲಿ ಮಾಡಿ”: ಸಾರ್ವಜನಿಕರ ಜೀವರಕ್ಷಣೆ ಮಾಡದ ಮತ್ತು ಕರ್ತವ್ಯ ಲೋಪವೆಸಗಿದ ಅಧಿಕಾರಿಗಳ ಸಂಬಳದಿಂದ ನಾಗರಿಕರು ಖರ್ಚು ಮಾಡಿದ ₹7,500 ಹಣವನ್ನು ಮರುಪಾವತಿಸಬೇಕು ಎಂದು ಹಲವರು ಆಗ್ರಹಿಸಿದ್ದಾರೆ.
“ಇದು ಪ್ರತಿಯೊಂದು ಬಡಾವಣೆಯ ಕಥೆ”: ಕೇವಲ ಎಸ್ಎಂವಿ ಲೇಔಟ್ ಮಾತ್ರವಲ್ಲ, ಬೆಂಗಳೂರಿನ ಬಹುತೇಕ ಬಡಾವಣೆಗಳಲ್ಲಿ ಜಿಬಿಎ, ಬಿಡಿಎ ಹಾಗೂ ಬಿಡಬ್ಲ್ಯೂಎಸ್ಎಸ್ಬಿ ನಡುವಿನ ಸಮನ್ವಯದ ಕೊರತೆಯಿಂದ ಸಾರ್ವಜನಿಕರೇ ಬಲಿಯಾಗುತ್ತಿದ್ದಾರೆ ಎಂದು ನೆಟ್ಟಿಗರು ಕಿಡಿಕಾರಿದ್ದಾರೆ.
Join our WhatsApp Channel
