ಪಿತ್ರಪಕ್ಷಕ್ಕೆ ಗಯಾದಲ್ಲಿ ಇ-ಪಿಂಡದಾನ ಯೋಜನೆ; ಬಿಹಾರ ಟೂರಿಸಂ ವ್ಯವಸ್ಥೆ

ಪಾಟ್ನಾ, ಆ.29 www.bengaluruwire.com : ಬಿಹಾರ ರಾಜ್ಯ ಪ್ರವಾಸೋದ್ಯಮ ಅಭಿವೃದ್ಧಿ ನಿಗಮ (BSTDC) ಪಿತೃಪಕ್ಷದ ಸಂದರ್ಭದಲ್ಲಿ ಗಯಾದಲ್ಲಿ ಸೆಪ್ಟೆಂಬರ್ 6 ರಿಂದ 21 ರವರೆಗೆ ವಿಶೇಷ ಪ್ರವಾಸ ಮತ್ತು ‘ಇ-ಪಿಂಡದಾನ’ ಯೋಜನೆಯನ್ನು ಜಾರಿಗೊಳಿಸಿದೆ. ಈ ಯೋಜನೆಯ ಮೂಲಕ ಗಯಾಕ್ಕೆ ಪ್ರಯಾಣಿಸಲು ಸಾಧ್ಯವಾಗದ ಭಕ್ತರು ಮನೆಯಿಂದಲೇ ಪಿಂಡದಾನ ಕಾರ್ಯವನ್ನು ನೆರವೇರಿಸಬಹುದಾಗಿದೆ.

ಹಿಂದೂ ಧರ್ಮದಲ್ಲಿ ಪೂರ್ವಜರ ಶ್ರಾದ್ಧ, ತರ್ಪಣ ಮತ್ತು ಪಿಂಡದಾನ ಕಾರ್ಯಗಳನ್ನು ನೆರವೇರಿಸುವುದು ಅತ್ಯಂತ ಪವಿತ್ರ ಕಾರ್ಯವಾಗಿದೆ. ಈ ವಿಧಿಗಳನ್ನು ನೆರವೇರಿಸಲು ಬಿಹಾರದ ಗಯಾಕ್ಷೇತ್ರವು ಪ್ರಮುಖ ಪುಣ್ಯಕ್ಷೇತ್ರಗಳಲ್ಲಿ ಒಂದಾಗಿದೆ.

ಪಿತೃಪಕ್ಷದ ಸಮಯದಲ್ಲಿ, ಪೂರ್ವಜರಿಗೆ ಪಿಂಡದಾನ ಮಾಡುವ ಮೂಲಕ ಅವರ ಆತ್ಮಕ್ಕೆ ಶಾಂತಿ ಸಿಗುತ್ತದೆ ಎಂಬುದು ಹಿಂದೂಗಳ ನಂಬಿಕೆ. ಈ ವಿಧಿಗಳನ್ನು ನೆರವೇರಿಸಲು ಲಕ್ಷಾಂತರ ಭಕ್ತರು ದೇಶದಾದ್ಯಂತ ಗಯಾ ಕ್ಷೇತ್ರಕ್ಕೆ ಭೇಟಿ ನೀಡುತ್ತಾರೆ. ಅವರ ಅನುಕೂಲಕ್ಕಾಗಿ, ಬಿಎಸ್‌ಟಿಡಿಸಿ ಈ ವಿಶೇಷ ಪ್ರವಾಸ ಪ್ಯಾಕೇಜ್‌ಗಳನ್ನು ಪ್ರಾರಂಭಿಸಿದೆ. ಈ ಪ್ಯಾಕೇಜ್‌ಗಳು ಭಕ್ತರಿಗೆ ತರ್ಪಣ ಮತ್ತು ಪಿಂಡದಾನ ಕಾರ್ಯಗಳನ್ನು ವಿಷ್ಣುಪಾದ ದೇವಾಲಯ, ಅಕ್ಷಯವತ್ ಮತ್ತು ಫಾಲ್ಗು ನದಿಯ ದಡದಲ್ಲಿ ನೆರವೇರಿಸಲು ನೆರವಾಗಲಿದೆ.

ವೈಯಕ್ತಿಕ ಪ್ರವಾಸ ಪ್ಯಾಕೇಜ್‌ ಕೂಡ ಲಭ್ಯವಿದೆ :

ಪ್ರವಾಸ ಪ್ಯಾಕೇಜ್‌ಗಳಲ್ಲಿ ಒಂದು ಮತ್ತು ಎರಡು ದಿನಗಳ ಆಯ್ಕೆಗಳಿವೆ. ಈ ಪ್ಯಾಕೇಜ್‌ಗಳು ಗಯಾ ಮಾತ್ರವಲ್ಲದೆ, ಪಾಟ್ನಾ, ನಳಂದಾ, ರಾಜಗಿರ್ ಮತ್ತು ಬೋಧ್ ಗಯಾದಂತಹ ಪ್ರಮುಖ ಐತಿಹಾಸಿಕ ಮತ್ತು ಸಾಂಸ್ಕೃತಿಕ ಸ್ಥಳಗಳಿಗೂ ಭೇಟಿ ನೀಡಲು ಅವಕಾಶ ಕಲ್ಪಿಸುತ್ತದೆ. ವಸತಿ ವ್ಯವಸ್ಥೆಯು ಬಜೆಟ್ ಹೋಟೆಲ್‌ಗಳಿಂದ ಮೂರು-ಸ್ಟಾರ್ ಹೋಟೆಲ್‌ಗಳು ಮತ್ತು ರೆಸಾರ್ಟ್‌ಗಳವರೆಗೆ ಲಭ್ಯವಿದೆ. ವೈಯಕ್ತಿಕ ಪ್ರವಾಸ ಪ್ಯಾಕೇಜ್‌ಗಳ ಬೆಲೆ ರೂ. 13,450 ರಿಂದ ಪ್ರಾರಂಭವಾಗುತ್ತದೆ.

ಇ-ಪಿಂಡದಾನ ವ್ಯವಸ್ಥೆ: ನವೀನ ಪ್ರಯತ್ನ

ಇದೇ ಮೊದಲ ಬಾರಿಗೆ, ಬಿಎಸ್‌ಟಿಡಿಸಿ ‘ಇ-ಪಿಂಡದಾನ’ ಎಂಬ ಹೊಸ ಯೋಜನೆಯನ್ನು ಪರಿಚಯಿಸಿದೆ. ಗಯಾಕ್ಕೆ ಹೋಗಲು ಸಾಧ್ಯವಾಗದವರಿಗೆ ಇದು ವರದಾನವಾಗಲಿದೆ. ಈ ವ್ಯವಸ್ಥೆಯ ಮೂಲಕ, ಭಕ್ತರು ಆನ್‌ಲೈನ್‌ನಲ್ಲಿ ನೋಂದಾಯಿಸಿಕೊಳ್ಳಬಹುದು. ನಂತರ, ಅರ್ಹ ಪುರೋಹಿತರು ಅವರ ಪರವಾಗಿ ಮಂತ್ರಗಳನ್ನು ಪಠಿಸಿ, ಪಿಂಡದಾನ ವಿಧಿಗಳನ್ನು ನೆರವೇರಿಸುತ್ತಾರೆ. ಈ ಎಲ್ಲಾ ಕಾರ್ಯಕ್ರಮಗಳನ್ನು ವಿಡಿಯೋ ರೆಕಾರ್ಡ್ ಮಾಡಿ ಪೆನ್ ಡ್ರೈವ್ ನಲ್ಲಿ ಭಕ್ತರಿಗೆ ಕಳುಹಿಸಲಾಗುತ್ತದೆ. ಈ ಇ-ಪಿಂಡದಾನ ಪ್ಯಾಕೇಜ್‌ನ ಬೆಲೆ ರೂ. 23,000 ಆಗಿದೆ. ಇದು ಭಕ್ತರಿಗೆ ಮನೆಯಲ್ಲಿದ್ದೇ ತಮ್ಮ ಕರ್ತವ್ಯಗಳನ್ನು ಪೂರೈಸಲು ಅವಕಾಶ ಕಲ್ಪಿಸುತ್ತದೆ.

ಈ ವಿಶೇಷ ಯೋಜನೆಗಳು ಬಿಹಾರದ ಪ್ರವಾಸೋದ್ಯಮವನ್ನು ಉತ್ತೇಜಿಸುವುದರ ಜೊತೆಗೆ, ಪಿತ್ರಪಕ್ಷದ ಸಂದರ್ಭದಲ್ಲಿ ಭಕ್ತರಿಗೆ ಎಲ್ಲಾ ಸೌಲಭ್ಯಗಳನ್ನು ಒದಗಿಸಲು ಉದ್ದೇಶಿಸಿವೆ. ಹೆಚ್ಚಿನ ಮಾಹಿತಿ ಮತ್ತು ಬುಕಿಂಗ್‌ಗಾಗಿ, ಬಿಎಸ್‌ಟಿಡಿಸಿ ವೆಬ್‌ಸೈಟ್‌ : https://tourism.bihar.gov.in/en/events/2025/pitripaksha ಭೇಟಿ ನೀಡಬಹುದು.