ಬೆಂಗಳೂರು, ಅ.04 www.bengaluruwire.com: ಕರ್ನಾಟಕದ ಜಲಸುರಕ್ಷತೆಯಲ್ಲಿ ಕೆರೆ, ಕಟ್ಟೆಗಳು ಮಹತ್ವದ ಪಾತ್ರ ವಹಿಸುತ್ತಿದ್ದು, ರಾಜ್ಯದಲ್ಲಿ ಬಳಕೆಯಲ್ಲಿರುವ ಒಟ್ಟು ಜಲಮೂಲಗಳ ಪೈಕಿ ಸುಮಾರು ಶೇ.30ರಷ್ಟು ಜಲಮೂಲಗಳು ಅಂತರ್ಜಲ ಮರುಪೂರಣಕ್ಕೆ ಪ್ರಮುಖ ಆಧಾರವಾಗಿವೆ ಎಂದು ಸಣ್ಣ ನೀರಾವರಿ ಹಾಗೂ ವಿಜ್ಞಾನ ಮತ್ತು ತಂತ್ರಜ್ಞಾನ ಸಚಿವ ಡಾ. ಅಜಯ್ ಧರ್ಮಸಿಂಗ್ ತಿಳಿಸಿದ್ದಾರೆ.
ಕೇಂದ್ರ ಜಲಶಕ್ತಿ ಸಚಿವಾಲಯ ನಡೆಸಿರುವ ಎರಡನೇ ಜಲಮೂಲಗಳ ಗಣತಿ ವರದಿಯನ್ನು ಉಲ್ಲೇಖಿಸಿ ಮಾಹಿತಿ ನೀಡಿರುವ ಸಚಿವರು, ಕರ್ನಾಟಕದಲ್ಲಿ ಬಳಕೆಯಲ್ಲಿರುವ 28,075 ಜಲಮೂಲಗಳ ಪೈಕಿ 8,353 (ಶೇ. 29.8) ಜಲಮೂಲಗಳು ನೇರವಾಗಿ ಅಂತರ್ಜಲ ಮರುಪೂರಣಕ್ಕೆ ಬಳಕೆಯಾಗುತ್ತಿವೆ ಎಂದು ಸ್ಪಷ್ಟಪಡಿಸಿದ್ದಾರೆ.
ದಕ್ಷಿಣ ಭಾರತದ ರಾಜ್ಯಗಳ ಅಂಕಿ-ಅಂಶ ಹೋಲಿಕೆ: ಅಂತರ್ಜಲ ಮರುಪೂರಣಕ್ಕಾಗಿ ಜಲಮೂಲಗಳನ್ನು ಬಳಸಿಕೊಳ್ಳುವ ಪ್ರಮಾಣದಲ್ಲಿ ದಕ್ಷಿಣ ಭಾರತದ ಪ್ರಮುಖ ರಾಜ್ಯಗಳ ವಿವರ ಹೀಗಿದೆ:
ತಮಿಳುನಾಡು: ಶೇ. 34.3
ಕರ್ನಾಟಕ: ಶೇ. 29.8
ತೆಲಂಗಾಣ: ಶೇ. 27.5
ಆಂಧ್ರಪ್ರದೇಶ: ಶೇ. 19.2
ಕೇರಳ: ಶೇ. 15.3
ಗ್ರಾಮೀಣ ಭಾಗದ ಜಲಸುರಕ್ಷತೆಗೆ ಒತ್ತು: ರಾಜ್ಯದ ಒಟ್ಟು ಜಲಮೂಲಗಳ ಪೈಕಿ ಶೇ.96ರಷ್ಟು ಗ್ರಾಮೀಣ ಭಾಗಗಳಲ್ಲೇ ಇವೆ. ಅಂತರ್ಜಲ ಮರುಪೂರಣಕ್ಕೆ ಬಳಕೆಯಾಗುತ್ತಿರುವ 8,353 ಜಲಮೂಲಗಳಲ್ಲಿ 5,302 ಸಾಮಾನ್ಯ ಜಲಮೂಲಗಳು, 1,548 ಕೆರೆಗಳು ಹಾಗೂ 1,267 ಕೊಳಗಳು ಒಳಗೊಂಡಿವೆ. ಇವು ಕೃಷಿ, ಕುಡಿಯುವ ನೀರು ಹಾಗೂ ಪಶುಸಂಗೋಪನೆಗೆ ಬೆನ್ನೆಲುಬಾಗಿ ನಿಂತಿವೆ.
ಮಳೆಯ ಏರುಪೇರು ಮತ್ತು ಪದೇಪದೇ ಕಾಡುವ ಬರ ಪರಿಸ್ಥಿತಿಯನ್ನು ಎದುರಿಸಲು ಅಂತರ್ಜಲ ಮರುಪೂರಣವೇ ದೀರ್ಘಕಾಲೀನ ಪರಿಹಾರ. ಮುಂದಿನ ದಿನಗಳಲ್ಲಿ ಜಲಾನಯನ ಪ್ರದೇಶಗಳ ಸಂರಕ್ಷಣೆ, ಕೆರೆಗಳ ಹೂಳು ತೆರವು, ಪುನಶ್ಚೇತನ ಮತ್ತು ಮಳೆನೀರು ಕೊಯ್ಲು ವ್ಯವಸ್ಥೆಗಳನ್ನು ಅಂತರ್ಜಲ ನಿರ್ವಹಣೆಯೊಂದಿಗೆ ಸಮಗ್ರವಾಗಿ ಜೋಡಿಸಲಾಗುವುದು ಎಂದು ಸಚಿವರು ಭರವಸೆ ನೀಡಿದ್ದಾರೆ.
Join our WhatsApp Channel
