ವಿಮೆ ಇಲ್ಲದ ವಾಹನಗಳಿಗೆ ಪೆಟ್ರೋಲ್, ಡೀಸೆಲ್ ಇಲ್ಲ: ಸುಪ್ರೀಂ ಕೋರ್ಟ್ ಪೈಲೆಟ್ ಯೋಜನೆ ರೂಪಿಸಲು ಕೇಂದ್ರಕ್ಕೆ ಸೂಚನೆ

ನವದೆಹಲಿ, ಆ.05 www.bengaluruwire.com: ರಸ್ತೆ ಸುರಕ್ಷತಾ ಕಾನೂನುಗಳನ್ನು ಮತ್ತಷ್ಟು ಕಠಿಣಗೊಳಿಸುವ ನಿಟ್ಟಿನಲ್ಲಿ ಸುಪ್ರೀಂ ಕೋರ್ಟ್ (Supreme Court) ಐತಿಹಾಸಿಕ ಹೆಜ್ಜೆಯೊಂದನ್ನು ಇಟ್ಟಿದೆ.

ಮಾನ್ಯತೆಯಿರುವ ವಾಹನ ವಿಮೆ (Vehicle Insurance) ಹೊಂದಿರದ ವಾಹನಗಳಿಗೆ ಪೆಟ್ರೋಲ್ ಅಥವಾ ಡೀಸೆಲ್ ನೀಡದಂತೆ ತಡೆಯುವ ಯೋಜನೆಯೊಂದನ್ನು ಸಿದ್ಧಪಡಿಸುವಂತೆ ಭಾರತೀಯ ವಿಮಾ ನಿಯಂತ್ರಣ ಮತ್ತು ಅಭಿವೃದ್ಧಿ ಪ್ರಾಧಿಕಾರ (IRDAI) ಹಾಗೂ ಕೇಂದ್ರ ರಸ್ತೆ ಸಾರಿಗೆ ಮತ್ತು ಹೆದ್ದಾರಿ ಸಚಿವಾಲಯಕ್ಕೆ ಸುಪ್ರೀಂ ಕೋರ್ಟ್ ಕಟ್ಟುನಿಟ್ಟಿನ ಸೂಚನೆ ನೀಡಿದೆ.

ವಿಮೆ ಇಲ್ಲದ ವಾಹನಗಳನ್ನು ರಸ್ತೆಯಿಂದ ದೂರವಿಡುವ ಮುಖ್ಯ ಉದ್ದೇಶದಿಂದ ಆರಂಭಿಕವಾಗಿ ಈ ಯೋಜನೆಯನ್ನು ‘ಪೈಲಟ್ ಪ್ರಾಜೆಕ್ಟ್’ (Pilot Project) ಆಗಿ ಜಾರಿಗೆ ತರಲು ಉದ್ದೇಶಿಸಲಾಗಿದೆ.

ಪೆಟ್ರೋಲ್ ಬಂಕ್‌ಗಳಲ್ಲಿ ಇನ್ಮುಂದೆ ಹೊಸ ನಿಯಮ:

ಈ ಹೊಸ ಪ್ರಸ್ತಾವಿತ ವ್ಯವಸ್ಥೆಯಡಿ, ಪೆಟ್ರೋಲ್ ಬಂಕ್‌ಗಳಲ್ಲಿ (Petrol Bunks) ಇಂಧನ ತುಂಬಿಸುವ ಮುನ್ನವೇ ನಿಮ್ಮ ವಾಹನದ ವಿಮೆ ಚಾಲ್ತಿಯಲ್ಲಿದೆಯೇ ಎಂಬುದನ್ನು ಪರಿಶೀಲಿಸಲಾಗುತ್ತದೆ. ಒಂದು ವೇಳೆ ವಿಮೆ ನವೀಕರಣಗೊಂಡಿಲ್ಲದಿದ್ದರೆ ಅಥವಾ ಅವಧಿ ಮುಗಿದಿದ್ದರೆ, ಅಂತಹ ವಾಹನಗಳಿಗೆ ಇಂಧನ ನೀಡಲು ನಿರಾಕರಿಸುವ ಅವಕಾಶ ಈ ನಿಯಮದಲ್ಲಿ ಇರಲಿದೆ.

ಸ್ವಯಂಚಾಲಿತ ‘ಇ-ಚಲನ್’ ಹಾಗೂ ಸ್ಮಾರ್ಟ್ ತಪಾಸಣೆ:

ANPR ಕ್ಯಾಮೆರಾ ಲಿಂಕ್: ಹೆದ್ದಾರಿಗಳಲ್ಲಿ ಅಳವಡಿಸಲಾಗಿರುವ ಆಟೋಮ್ಯಾಟಿಕ್ ನಂಬರ್ ಪ್ಲೇಟ್ ರೆಕಗ್ನಿಷನ್ (ANPR) ಕ್ಯಾಮೆರಾಗಳನ್ನು ‘ವಾಹನ್’ (VAHAN) ಹಾಗೂ ವಿಮಾ ಡೇಟಾಬೇಸ್‌ಗೆ ನೇರವಾಗಿ ಲಿಂಕ್ ಮಾಡಲಾಗುತ್ತದೆ. ಇದರಿಂದ ವಿಮೆ ಇಲ್ಲದ ವಾಹನಗಳು ರಸ್ತೆಯಲ್ಲಿ ಸಾಗಿದರೆ ಸ್ವಯಂಚಾಲಿತವಾಗಿ ದಂಡದ ‘ಇ-ಚಲನ್’ (e-challan) ಉತ್ಪತ್ತಿಯಾಗಲಿದೆ.

ಪೊಲೀಸರಿಗೆ ಡಿಜಿಟಲ್ ಪವರ್: ಭೌತಿಕ ದಾಖಲೆಗಳ (Physical Documents) ಅಗತ್ಯವಿಲ್ಲದೇ, ಪೊಲೀಸರು ತಕ್ಷಣವೇ ವಾಹನದ ವಿಮೆ ಸ್ಥಿತಿಯನ್ನು ಪರಿಶೀಲಿಸಲು ಅನುಕೂಲವಾಗುವಂತೆ ಮೊಬೈಲ್ ಆಪ್ ಹಾಗೂ ಹ್ಯಾಂಡ್‌ಹೆಲ್ಡ್ ಉಪಕರಣಗಳನ್ನು ನೀಡಲು ನಿರ್ಧರಿಸಲಾಗಿದೆ.

ಹೊಸ ವಾಹನಗಳಿಗೆ ದೀರ್ಘಾವಧಿ ವಿಮೆ ಪ್ರಸ್ತಾವನೆ:

ಮತ್ತೊಂದು ಪ್ರಮುಖ ಬದಲಾವಣೆಯಾಗಿ, ನೂತನವಾಗಿ ಖರೀದಿಸುವ ವಾಹನಗಳ ಕಡ್ಡಾಯ ಥರ್ಡ್ ಪಾರ್ಟಿ ವಿಮೆ (Third Party Insurance) ಅವಧಿಯನ್ನು ವಿಸ್ತರಿಸಲು ಪ್ರಸ್ತಾವಿಸಲಾಗಿದೆ:

ಕಾರುಗಳಿಗೆ: 3 ರಿಂದ 4 ವರ್ಷಗಳಿಗೆ ವಿಸ್ತರಣೆ.

ದ್ವಿಚಕ್ರ ವಾಹನಗಳಿಗೆ: 5 ರಿಂದ 6 ವರ್ಷಗಳಿಗೆ ವಿಸ್ತರಣೆ.

ಇದು ಸದ್ಯಕ್ಕೆ ಪ್ರಸ್ತಾವಿತ ಯೋಜನೆಯಾಗಿದ್ದು, ಸಾರ್ವಜನಿಕರಿಗೆ ಹಾಗೂ ಪೆಟ್ರೋಲ್ ಬಂಕ್‌ಗಳ ದೈನಂದಿನ ಕಾರ್ಯಚಟುವಟಿಕೆಗೆ ಯಾವುದೇ ತೊಂದರೆಯಾಗದಂತೆ ಇದನ್ನು ಹೇಗೆ ಸಮರ್ಪಕವಾಗಿ ಅನುಷ್ಠಾನಗೊಳಿಸಬಹುದು ಎಂಬುದರ ಕುರಿತು ಸಂಬಂಧಪಟ್ಟ ಅಧಿಕಾರಿಗಳು ಪರಿಶೀಲನೆ ನಡೆಸುತ್ತಿದ್ದಾರೆ.