ಸಾಮಾನ್ಯವಾಗಿ ಬೇಸಿಗೆ ರಜೆಯಲ್ಲಿ ವಿದ್ಯಾರ್ಥಿಗಳು ಪಾಕೆಟ್ ಮನಿಗಾಗಿ ಸಣ್ಣಪುಟ್ಟ ಕೆಲಸಗಳನ್ನು ಮಾಡುವುದು ಸಹಜ. ಆದರೆ, ಬೆಲ್ಜಿಯಂನ ಯುವಕ ಕೋಬೆಗೆ ಮಾತ್ರ ಈ ಬೇಸಿಗೆ ಕಾಲದ ಕೆಲಸ, ಬದುಕನ್ನೇ ಬದಲಿಸಬಲ್ಲಂತಹ ಒಂದು ರೋಚಕ ಅನುಭವವನ್ನು ನೀಡಿದೆ.
ಬೆಲ್ಜಿಯಂನ ಸಿಂಟ್-ಗಿಲಿಸ್-ಡೆಂಡರ್ಮೊಂಡೆ ಎಂಬಲ್ಲಿನ ಹಳೆಯ ಬ್ರೂವರಿ (ಮದ್ಯ ತಯಾರಿಕಾ ಘಟಕ) ಪ್ರದೇಶದಲ್ಲಿ ಚರಂಡಿಗಳನ್ನು ನಿರ್ಮಿಸುವ ಕೆಲಸ ನಡೆಯುತ್ತಿತ್ತು. 18 ವರ್ಷದ ವಿದ್ಯಾರ್ಥಿ ಕೋಬೆ ತನ್ನ ಸಹೋದ್ಯೋಗಿಗಳೊಂದಿಗೆ ಕೆಲಸ ಮಾಡುತ್ತಿದ್ದಾಗ, ಗೋಡೆಯೊಂದರ ಹಿಂದೆ ಏನೋ ಅಡಗಿಸಿಟ್ಟಿರುವುದು ಕಂಡುಬಂದಿದೆ. ಆಶ್ಚರ್ಯವೆಂಬಂತೆ, ಅವರು ಇಟ್ಟಿಗೆಯಿಂದ ನಿರ್ಮಿಸಲಾದ ಗುಪ್ತ ಕೋಣೆಯೊಂದನ್ನು ತೆರೆದಾಗ, ಅಲ್ಲಿ ಬಂಗಾರದ ನಾಣ್ಯಗಳು, ಗಟ್ಟಿಗಳು ಮತ್ತು ಚಿನ್ನದ ಇಟ್ಟಿಗೆಗಳ ಬೃಹತ್ ಸಂಗ್ರಹವೇ ಪತ್ತೆಯಾಗಿದೆ.
ಈ ನಿಧಿಯ ಒಟ್ಟು ಮೌಲ್ಯ ಸುಮಾರು 9 ದಶಲಕ್ಷ ಯುರೋಗಳು (ಭಾರತೀಯ ರೂಪಾಯಿಗಳಲ್ಲಿ ಸುಮಾರು 98 ಕೋಟಿ ರೂ.!). ಸಾಮಾನ್ಯವಾಗಿ ಇಷ್ಟೊಂದು ದೊಡ್ಡ ಮೊತ್ತದ ಹಣ ಅಥವಾ ಚಿನ್ನ ಸಿಕ್ಕಾಗ ಯಾರಿಗಾದರೂ ಆಸೆ ಹುಟ್ಟುವುದು ಸಹಜ. ಆದರೆ, ಈ ಯುವಕರು ಕಿಂಚಿತ್ತೂ ಲೋಭ ಪಡದೆ, ತಕ್ಷಣವೇ ಪೊಲೀಸರಿಗೆ ಮಾಹಿತಿ ನೀಡಿದ್ದಾರೆ.
ಪ್ರಸ್ತುತ ಈ ಎಲ್ಲಾ ಚಿನ್ನವನ್ನು ಪೊಲೀಸರು ತಮ್ಮ ಸುಪರ್ದಿಗೆ ಪಡೆದಿದ್ದು, ಭದ್ರತಾ ಕೋಣೆಯಲ್ಲಿ ಇರಿಸಲಾಗಿದೆ. ಈ ನಿಧಿ ಯಾರಿಗೆ ಸೇರಬೇಕು? ಹಳೆಯ ಬ್ರೂವರಿಯ ಮಾಲೀಕರ ವಂಶಸ್ಥರಿಗೋ, ಈಗಿನ ಕಟ್ಟಡದ ಮಾಲೀಕರಿಗೋ ಅಥವಾ ಗುತ್ತಿಗೆದಾರರಿಗೋ ಎಂಬ ಬಗ್ಗೆ ತನಿಖೆ ನಡೆಯುತ್ತಿದೆ. ಕೋಬೆಯ ಈ ಪ್ರಾಮಾಣಿಕತೆ ಇದೀಗ ಸಾಮಾಜಿಕ ಜಾಲತಾಣಗಳಲ್ಲಿ ವ್ಯಾಪಕ ಮೆಚ್ಚುಗೆಗೆ ಪಾತ್ರವಾಗಿದೆ.
Join our WhatsApp Channel
