ಬೆಂಗಳೂರು, ಜೂ.17 www.bengaluruwire.com: ಆಕಾಶ ವೀಕ್ಷಕರಿಗೆ ಮತ್ತು ಖಗೋಳಾಸಕ್ತರಿಗೆ ಇಂದು ಸಂಜೆ ಒಂದು ಅದ್ಭುತವಾದ ಅವಕಾಶ ಕಾದಿದೆ. ಜೂನ್ 17ರ ಬುಧವಾರ ಸಂಜೆ ಸೂರ್ಯಾಸ್ತದ ನಂತರ, ಪಶ್ಚಿಮ ದಿಗಂತದಲ್ಲಿ ಮೂರು ಪ್ರಮುಖ ಗ್ರಹಗಳ ಜೊತೆಗೆ ಬಾಲಚಂದ್ರನು ಒಟ್ಟಿಗೆ ದರ್ಶನ ನೀಡಲಿದ್ದಾನೆ.
ರಾತ್ರಿ ಸುಮಾರು 7.30 ರಿಂದ 8.30 ರ ವರೆಗೆ ಈ ಕೌತುಕವನ್ನು ನೀವು ಯಾವುದೇ ಉಪಕರಣಗಳಿಲ್ಲದೆ, ಬರಿಗಣ್ಣಿನಿಂದಲೇ ವೀಕ್ಷಿಸಬಹುದಾಗಿದೆ.
ಸೂರ್ಯಾಸ್ತವಾಗಿ ಸುಮಾರು 40 ನಿಮಿಷಗಳ ನಂತರ ನೀವು ಪಶ್ಚಿಮ ಆಕಾಶದತ್ತ ಕಣ್ಣು ಹಾಯಿಸಿದರೆ, ಅತ್ಯಂತ ಪ್ರಕಾಶಮಾನವಾಗಿ ಬೆಳಗುವ ಶುಕ್ರ ಗ್ರಹ (Venus) ನಿಮ್ಮ ಗಮನ ಸೆಳೆಯುತ್ತದೆ. ಶುಕ್ರ ಗ್ರಹದಿಂದ ಸ್ವಲ್ಪ ಕೆಳಭಾಗದಲ್ಲಿ ಗಮನಿಸಿದರೆ, ತುಸು ಕಡಿಮೆ ಪ್ರಕಾಶ ಹೊಂದಿರುವ, ಆದರೆ ಇತರ ಆಕಾಶಕಾಯಗಳಿಗಿಂತ ಎದ್ದು ಕಾಣುವ ಗುರು ಗ್ರಹ (Jupiter) ಗೋಚರಿಸುತ್ತದೆ. ಈ ಎರಡೂ ಬೃಹತ್ ಗ್ರಹಗಳ ನಡುವೆ ಸುಂದರವಾದ ಬಾಲಚಂದ್ರ (Crescent Moon) ಕಂಗೊಳಿಸುತ್ತಾನೆ.
ಇಷ್ಟೇ ಅಲ್ಲದೆ, ಪಶ್ಚಿಮ ದಿಗಂತದ (ಹಾರಿಜಾನ್) ಅಂಚಿನಲ್ಲಿ ತುಸು ಸೂಕ್ಷ್ಮವಾಗಿ ಗಮನಿಸಿದರೆ, ಅಪರೂಪಕ್ಕೆ ಮಾತ್ರ ಕಾಣಸಿಗುವ ಬುಧ ಗ್ರಹವನ್ನು (Mercury) ಸಹ ನೀವು ಗುರುತಿಸಬಹುದು. ಇದೇ ವೇಳೆ, ಬಾಲಚಂದ್ರನ ಕತ್ತಲಾಗಿರುವ ಭಾಗದಲ್ಲಿ ಭೂಮಿಯಿಂದ ಪ್ರತಿಫಲಿಸಿದ ಬೆಳಕು (Earthshine) ಬೀಳುವುದರಿಂದ, ಚಂದ್ರನ ಆಕಾರ ಮತ್ತಷ್ಟು ರಮಣೀಯವಾಗಿ ಕಾಣಿಸುತ್ತದೆ.
ಮೋಡಗಳಿಲ್ಲದ, ಸ್ವಚ್ಛವಾದ ಆಕಾಶವಿದ್ದರೆ ಈ ಖಗೋಳ ಕೌತುಕವನ್ನು ಎಲ್ಲರೂ ತಮ್ಮ ಮನೆಯ ಮಹಡಿ ಅಥವಾ ಬಯಲು ಪ್ರದೇಶದಿಂದ ಸುಲಭವಾಗಿ ವೀಕ್ಷಿಸಬಹುದು. ಪ್ರಕೃತಿ ಒದಗಿಸಿರುವ ಈ ಸುಂದರ ದೃಶ್ಯವನ್ನು ನೋಡಲು ಮರೆಯದಿರಿ.
Join our WhatsApp Channel
