ಬೆಂಗಳೂರು, ಮೇ.28 www.bengaluruwire.com: ಬ್ರ್ಯಾಂಡ್ ಬೆಂಗಳೂರು (Brand Bengaluru) ಯೋಜನೆಯಡಿ ಬಿಬಿಎಂಪಿ ವ್ಯಾಪ್ತಿಯ ಹಳೆಯ ಆಸ್ಪತ್ರೆಗಳನ್ನು ಮೇಲ್ದರ್ಜೆಗೇರಿಸುವ ಕಾರ್ಯ ಭರದಿಂದ ಸಾಗುತ್ತಿದೆ.
ಇದರ ಭಾಗವಾಗಿ ಪಶ್ಚಿಮ ವಲಯದ ವಾರ್ಡ್ ಸಂಖ್ಯೆ 139ರಲ್ಲಿರುವ ಶ್ರೀರಾಮಪುರ ರೆಫರಲ್ ಆಸ್ಪತ್ರೆಯನ್ನು 50 ಹಾಸಿಗೆಗಳ ನೂತನ UCHC ಯಾಗಿ ನಿರ್ಮಿಸಲು ಉದ್ದೇಶಿಸಲಾಗಿದ್ದು, ಸಾರ್ವಜನಿಕರ ಅನುಕೂಲಕ್ಕಾಗಿ ಇಲ್ಲಿನ ಹೆರಿಗೆ ಸೇವೆಯನ್ನು (2ನೇ ಅವಧಿ) ಮಹಾಲಕ್ಷ್ಮೀಪುರಂ ರೆಫರಲ್ ಆಸ್ಪತ್ರೆಗೆ ತಾತ್ಕಾಲಿಕವಾಗಿ ವರ್ಗಾಯಿಸಲಾಗಿದೆ.
ಹಳೆಯ ಕಟ್ಟಡ ನೆಲಸಮ, ನೂತನ ಆಸ್ಪತ್ರೆ ತಲೆ ಎತ್ತಲಿದೆ:
ಹಲವು ದಶಕಗಳಿಂದ ಸೇವೆ ಒದಗಿಸುತ್ತಿದ್ದ ಶ್ರೀರಾಮಪುರ ರೆಫರಲ್ ಆಸ್ಪತ್ರೆಯ ಕಟ್ಟಡ ಶಿಥಿಲಾವಸ್ಥೆ ತಲುಪಿದೆ. ಹೀಗಾಗಿ ಪ್ರಸ್ತುತ ಕಟ್ಟಡವನ್ನು ಸಂಪೂರ್ಣವಾಗಿ ನೆಲಸಮ ಮಾಡಿ, ಅದೇ ಜಾಗದಲ್ಲಿ 50 ಹಾಸಿಗೆಗಳ ಸುಸಜ್ಜಿತ ಹಾಗೂ ಆಧುನಿಕ ಸೌಲಭ್ಯಗಳುಳ್ಳ ನೂತನ ಆಸ್ಪತ್ರೆಯನ್ನು ನಿರ್ಮಿಸಲು ಸರ್ಕಾರದಿಂದ ಸದ್ಯದಲ್ಲೇ ಕಾರ್ಯಾದೇಶ ದೊರೆಯುವ ನಿರೀಕ್ಷೆಯಿದೆ. ಈ ಹಿನ್ನೆಲೆಯಲ್ಲಿ ಆಸ್ಪತ್ರೆಯ ಸೇವೆಗಳಲ್ಲಿ ತಾತ್ಕಾಲಿಕ ಬದಲಾವಣೆ ಮಾಡಲಾಗಿದೆ.
ವಿಶೇಷ ನವಜಾತ ಶಿಶು ಆರೈಕೆ ಘಟಕದ (SNCU) ಸೌಲಭ್ಯ:
ಮಹಾಲಕ್ಷ್ಮೀಪುರಂ ರೆಫರಲ್ ಆಸ್ಪತ್ರೆಯಲ್ಲಿ ಈಗಾಗಲೇ ನವಜಾತ ಶಿಶುಗಳಿಗಾಗಿ ವಿಶೇಷ ಆರೈಕೆ ಘಟಕ (SNCU) ಸೇವೆಗಳು ಆರಂಭಗೊಂಡಿವೆ. ಹೀಗಾಗಿ ತಾಯಿ ಮತ್ತು ಮಗುವಿನ ಸುರಕ್ಷತೆಯ ದೃಷ್ಟಿಯಿಂದ, ಶ್ರೀರಾಮಪುರದಲ್ಲಿ ಕಾರ್ಯನಿರ್ವಹಿಸುತ್ತಿದ್ದ 24/7 ಹೆರಿಗೆ ಸೇವೆಯ ಸಂಜೆ ಮತ್ತು ರಾತ್ರಿ ಪಾಳಿಯ ಜವಾಬ್ದಾರಿಯನ್ನು ಮಹಾಲಕ್ಷ್ಮೀಪುರಂ ಆಸ್ಪತ್ರೆಗೆ ವಹಿಸಲಾಗಿದೆ. ಈ ಬದಲಾವಣೆ ಮುಂದಿನ ಆದೇಶದವರೆಗೂ ಜಾರಿಯಲ್ಲಿರಲಿದೆ.
ಬದಲಾದ ಸೇವಾ ಅವಧಿ ಮತ್ತು ಸಮಯದ ಮಾಹಿತಿ:
ಶ್ರೀರಾಮಪುರ ರೆಫರಲ್ ಆಸ್ಪತ್ರೆಯಲ್ಲಿ:
ಕೆಲಸದ ದಿನಗಳಲ್ಲಿ: ಪ್ರತಿದಿನ ಬೆಳಗ್ಗೆ 9:00 ರಿಂದ ಸಂಜೆ 4:00 ರವರೆಗೆ.
ರಜಾ ದಿನಗಳಲ್ಲಿ: ಬೆಳಗ್ಗೆ 9:00 ರಿಂದ ಮಧ್ಯಾಹ್ನ 1:00 ರವರೆಗೆ ಹೆರಿಗೆ ಸೇವೆ ಮುಂದುವರಿಯಲಿದೆ.
ಮಹಾಲಕ್ಷ್ಮೀಪುರಂ ರೆಫರಲ್ ಆಸ್ಪತ್ರೆಯಲ್ಲಿ (ವರ್ಗಾವಣೆಯಾದ ಸೇವೆ):
ಕೆಲಸದ ದಿನಗಳಲ್ಲಿ: ಸಂಜೆ 4:00 ರಿಂದ ಮರುದಿನ ಬೆಳಗ್ಗೆ 9:00 ರವರೆಗೆ.
ರಜಾ ದಿನಗಳಲ್ಲಿ: ಮಧ್ಯಾಹ್ನ 1:00 ರಿಂದ ಮರುದಿನ ಬೆಳಗ್ಗೆ 9:00 ರವರೆಗೆ.
ಮಹಾಲಕ್ಷ್ಮೀಪುರಂ ಆಸ್ಪತ್ರೆಯ ವಿಳಾಸ:
ಮಹಾಲಕ್ಷ್ಮೀಪುರಂ ರೆಫರಲ್ ಆಸ್ಪತ್ರೆ, ಎನ್.ಜಿ.ಓ. ಕಾಲೋನಿ, ಕಮಲಾನಗರ, ಶಂಕರ್ನಾಗ್ ಬಸ್ ನಿಲ್ದಾಣದ ಹತ್ತಿರ, ಬೆಂಗಳೂರು-560079.
ಹೆಚ್ಚಿನ ಮಾಹಿತಿಗಾಗಿ ಸಂಪರ್ಕಿಸಿ:
ಯಾವುದೇ ತುರ್ತು ಸೇವೆ ಅಥವಾ ಹೆಚ್ಚಿನ ಮಾಹಿತಿಗಾಗಿ ಸಾರ್ವಜನಿಕರು ಈ ಕೆಳಕಂಡ ವೈದ್ಯಾಧಿಕಾರಿಗಳನ್ನು ಸಂಪರ್ಕಿಸುವಂತೆ ಪಾಲಿಕೆ ಪ್ರಕಟಣೆ ಕೋರಿದೆ:
ಡಾ॥ ಸರಸ್ವತಿ (ಆರೋಗ್ಯಾಧಿಕಾರಿ – ಕ್ಲಿನಿಕಲ್): 9480683779
ಡಾ॥ ಲಲಿತ ಕೆ. (ವೈದ್ಯಕೀಯ ಅಧೀಕ್ಷಕರು): 9480683798
ಡಾ॥ ಮಂಜುನಾಥ್ ಎಸ್.ಎಂ. (ಆಡಳಿತ ವೈದ್ಯಾಧಿಕಾರಿ): 9900469886
(ಮೇಲೆ ಬಳಸಿದ ಆಸ್ಪತ್ರೆ ಚಿತ್ರ ಸಾಂದರ್ಭಿಕ)
Join our WhatsApp Channel
