ಚೆನ್ನೈ, ಜು.29 www.bengaluruwire.com: ನೀರಿನ ಅಭಾವ ಎದುರಿಸುತ್ತಿರುವ ಇಂದಿನ ದಿನಗಳಲ್ಲಿ ಜಲ ಸಂರಕ್ಷಣೆ ಅತ್ಯಂತ ಪ್ರಮುಖವಾಗಿದೆ. ಯಾವುದೇ ದೊಡ್ಡ ಬಜೆಟ್ ಇಲ್ಲದೆ, ಕೇವಲ ಇಚ್ಛಾಶಕ್ತಿಯಿಂದ ಪರಿಸರದಲ್ಲಿ ಅದ್ಭುತ ಬದಲಾವಣೆ ತರಬಹುದು ಎಂಬುದನ್ನು ತಮಿಳುನಾಡಿನ ಐಎಎಸ್ ಅಧಿಕಾರಿಯೊಬ್ಬರು ಸಾಬೀತುಪಡಿಸಿದ್ದಾರೆ.
ಈ ಮಹತ್ಕಾರ್ಯಕ್ಕೆ ಇದೀಗ ಖ್ಯಾತ ಬಹುಭಾಷಾ ನಟ ಆರ್. ಮಾಧವನ್ (R Madhavan) ಮೆಚ್ಚುಗೆ ವ್ಯಕ್ತಪಡಿಸಿ, ಸಲಾಂ ಎಂದಿದ್ದಾರೆ.
ಬತ್ತಿದ ಬೋರ್ವೆಲ್ಗಳಿಗೆ ಮರುಜೀವ:
ತಮಿಳುನಾಡಿನ ವಿವಿಧ ಭಾಗಗಳಲ್ಲಿ ನೀರಿಲ್ಲದೆ, ಹಾಳಾಗಿ ಕೈಬಿಡಲಾಗಿದ್ದ (Abandoned borewells) ಸುಮಾರು 1200 ಕೊಳವೆಬಾವಿಗಳನ್ನು ಅಧಿಕಾರಿಗಳು ಗುರುತಿಸಿದ್ದರು. ಇವುಗಳನ್ನು ಮುಚ್ಚುವ ಬದಲು ಮಳೆನೀರು ಕೊಯ್ಲು (Rainwater harvesting units) ಘಟಕಗಳಾಗಿ ಪರಿವರ್ತಿಸುವ ವಿನೂತನ ಐಡಿಯಾವನ್ನು ಈ ಐಎಎಸ್ ಅಧಿಕಾರಿ ಕಾರ್ಯಗತಗೊಳಿಸಿದರು. ಅಚ್ಚರಿ ಎಂದರೆ, ಈ ಬೃಹತ್ ಯೋಜನೆಗೆ ಯಾವುದೇ ದೊಡ್ಡ ಮಟ್ಟದ ಬಜೆಟ್ ಅಥವಾ ಸರ್ಕಾರದ ವಿಶೇಷ ಅನುದಾನದ ಅಗತ್ಯ ಬೀಳಲಿಲ್ಲ.
5 ರಿಂದ 10 ಅಡಿ ಏರಿಕೆಯಾದ ಅಂತರ್ಜಲ:
ಈ ಸರಳ ಹಾಗೂ ಅತ್ಯಂತ ಪರಿಣಾಮಕಾರಿ ಯೋಜನೆಯಿಂದಾಗಿ, ಮಳೆಗಾಲದಲ್ಲಿ ವ್ಯರ್ಥವಾಗಿ ಹರಿದು ಹೋಗುತ್ತಿದ್ದ ಲಕ್ಷಾಂತರ ಲೀಟರ್ ನೀರು ನೇರವಾಗಿ ಭೂಮಿಯ ಒಡಲು ಸೇರಿದೆ. ಇದರ ಸಕಾರಾತ್ಮಕ ಪರಿಣಾಮವಾಗಿ ಆಯಾ ಪ್ರದೇಶಗಳಲ್ಲಿ ಅಂತರ್ಜಲ ಮಟ್ಟ ಗಣನೀಯವಾಗಿ ಏರಿಕೆಯಾಗಿದ್ದು, ನೀರಿನ ಮಟ್ಟ ಬರೋಬ್ಬರಿ 5 ರಿಂದ 10 ಅಡಿಗಳಷ್ಟು ಹೆಚ್ಚಾಗಿದೆ. ಇದು ಸುತ್ತಮುತ್ತಲಿನ ರೈತರು ಮತ್ತು ಸಾರ್ವಜನಿಕರಿಗೆ ದೊಡ್ಡ ರಿಲೀಫ್ ನೀಡಿದೆ.
ಮಾಧವನ್ ಮೆಚ್ಚುಗೆಯ ಸುರಿಮಳೆ:
ಐಎಎಸ್ ಅಧಿಕಾರಿಯ ಈ ಪರಿಸರ ಕಾಳಜಿ ಹಾಗೂ ದೂರದೃಷ್ಟಿಯ ಕಾರ್ಯವನ್ನು ಮುಕ್ತಕಂಠದಿಂದ ಶ್ಲಾಘಿಸಿರುವ ನಟ ಮಾಧವನ್, ಎಕ್ಸ್ (ಟ್ವಿಟರ್) ಸೇರಿದಂತೆ ಸಾಮಾಜಿಕ ಜಾಲತಾಣಗಳಲ್ಲಿ ತಮ್ಮ ಹರ್ಷ ವ್ಯಕ್ತಪಡಿಸಿದ್ದಾರೆ. “ಯಾವುದೇ ದೊಡ್ಡ ಬಜೆಟ್ ಇಲ್ಲ! ಕೈಬಿಟ್ಟ 1200 ಬೋರ್ವೆಲ್ಗಳನ್ನು ಮಳೆನೀರು ಕೊಯ್ಲು ಘಟಕಗಳನ್ನಾಗಿ ಮಾಡಿ, 5 ರಿಂದ 10 ಅಡಿ ನೀರು ಹೆಚ್ಚಾಗುವಂತೆ ಮಾಡಿದ ತಮಿಳುನಾಡು ಐಎಎಸ್ ಅಧಿಕಾರಿಗೆ ನನ್ನ ಸೆಲ್ಯೂಟ್” ಎಂದು ಅವರು ಬರೆದುಕೊಂಡಿದ್ದಾರೆ.
ನೀರಿನ ಸಮಸ್ಯೆ ಎದುರಿಸುತ್ತಿರುವ ಬೆಂಗಳೂರು ಸೇರಿದಂತೆ ದೇಶದ ಇತರ ಮಹಾನಗರಗಳಿಗೂ ಹಾಗೂ ಆಡಳಿತ ವ್ಯವಸ್ಥೆಗೂ ಈ ಐಎಎಸ್ ಅಧಿಕಾರಿಯ ಕಾರ್ಯ ಅತ್ಯುತ್ತಮ ಮಾದರಿಯಾಗಿದೆ ಎಂದು ನೆಟ್ಟಿಗರು ಸಹ ಕೊಂಡಾಡುತ್ತಿದ್ದಾರೆ.
Join our WhatsApp Channel
