ನಾಡಪ್ರಭು ಕೆಂಪೇಗೌಡ ಬಡಾವಣೆ ಎಂಎಆರ್ ರಸ್ತೆ ಕುಸಿತ: ವೈರಲ್ ಫೋಟೋಗಳ ಹಿಂದಿನ ಅಸಲಿಯತ್ತು ಬಿಚ್ಚಿಟ್ಟ ಬಿಡಿಎ

ಬೆಂಗಳೂರು, ಜೂ.25 www.bengaluruwire.com: ಬಹುನಿರೀಕ್ಷಿತ ನಾಡಪ್ರಭು ಕೆಂಪೇಗೌಡ ಬಡಾವಣೆಯ (Nadaprabhu Kempegowda Layout) ಮುಖ್ಯ ಸಂಪರ್ಕ ರಸ್ತೆಯ (MAR) ಉದ್ಘಾಟನೆಗೆ ಕ್ಷಣಗಣನೆ ಆರಂಭವಾಗಿರುವಾಗಲೇ, ರಸ್ತೆಯೊಂದು ಕುಸಿದಿರುವ ಫೋಟೋಗಳು ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ವೈರಲ್ ಆಗುತ್ತಿವೆ. 

ಈ ಕುರಿತು ಸಾರ್ವಜನಿಕರಲ್ಲಿ ಆತಂಕ ಮತ್ತು ಗೊಂದಲ ಮೂಡಿದ ಬೆನ್ನಲ್ಲೇ, ಬೆಂಗಳೂರು ಅಭಿವೃದ್ಧಿ ಪ್ರಾಧಿಕಾರ (BDA) ಎಚ್ಚೆತ್ತುಕೊಂಡಿದ್ದು, ಈ ವೈರಲ್ ಫೋಟೋಗಳ ಹಿಂದಿನ ನೈಜ ಸತ್ಯಾಂಶವನ್ನು ಎಳೆಎಳೆಯಾಗಿ ಬಿಚ್ಚಿಟ್ಟಿದೆ.

​ವೈರಲ್ ಫೋಟೋಗಳ ಹಿಂದಿನ ಸತ್ಯಾಂಶವೇನು?:

ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿರುವ ಫೋಟೋಗಳು ಇತ್ತೀಚಿನದ್ದಲ್ಲ, ಬದಲಾಗಿ ಅವು ಕಾಮಗಾರಿ ನಡೆಯುತ್ತಿದ್ದ ಹಿಂದಿನ ಹಂತದ ಫೋಟೋಗಳಾಗಿವೆ ಎಂದು ಬಿಡಿಎ ಸ್ಪಷ್ಟಪಡಿಸಿದೆ. ಉದ್ಘಾಟನೆಗೆ ಸಜ್ಜಾಗಿರುವುದು ‘ಮುಖ್ಯ ಕ್ಯಾರೇಜ್ ವೇ’ (Main Carriageway) ಮಾತ್ರ. ನ್ಯಾಯಾಲಯದ ತಡೆಯಾಜ್ಞೆ ಇರುವ ಕಾರಣ 5 ಕಡೆ ಸರ್ವೀಸ್ ರಸ್ತೆಗಳ ಕಾಮಗಾರಿ ಅಪೂರ್ಣವಾಗಿದೆ. ಹೀಗಾಗಿ, ಸರ್ವೀಸ್ ರಸ್ತೆಗಳನ್ನು ಸಾರ್ವಜನಿಕರ ಬಳಕೆಗೆ ಮುಕ್ತಗೊಳಿಸುತ್ತಿಲ್ಲ ಎಂದು ಪ್ರಾಧಿಕಾರ ತಿಳಿಸಿದೆ.

​ಸರ್ವೀಸ್ ರಸ್ತೆಯಲ್ಲಿ ಕುಸಿತ ಉಂಟಾಗಲು ಕಾರಣವೇನು?:

ಹರಿದಾಡುತ್ತಿರುವ ಫೋಟೋದಲ್ಲಿರುವ ಸ್ಥಳವು 6.40 ಕಿ.ಮೀ. ಚೈನೇಜ್ ಬಳಿಯ ಎಡಭಾಗದ (LHS) ಸರ್ವೀಸ್ ರಸ್ತೆಯಲ್ಲಿದೆ. ಇದು ಸೂಲಿಕೆರೆ ಮೀಸಲು ಅರಣ್ಯ ಪ್ರದೇಶದ ವ್ಯಾಪ್ತಿಗೆ ಬರುವುದರಿಂದ, ಕೇಂದ್ರ ಪರಿಸರ ಇಲಾಖೆಯ (MoEF&CC) ಷರತ್ತಿನಂತೆ ವನ್ಯಜೀವಿಗಳ ಓಡಾಟಕ್ಕಾಗಿ 4×4 ಮೀಟರ್ ಅಳತೆಯ ‘ಆರ್.ಸಿ.ಸಿ ಅನಿಮಲ್ ಕ್ರಾಸಿಂಗ್ ಬಾಕ್ಸ್’ (RCC Animal Crossing Box) ಹಾಗೂ 2 ಕಲ್ವರ್ಟ್ ಗಳನ್ನು ನಿರ್ಮಿಸಲಾಗಿದೆ.

​ಇಲ್ಲಿ ರಸ್ತೆಯು ಸುಮಾರು 7 ಮೀಟರ್ ಎತ್ತರವಿದ್ದು, ಅರಣ್ಯ ಪ್ರದೇಶವಾದ್ದರಿಂದ ಭಾರಿ ಯಂತ್ರಗಳನ್ನು ಬಳಸಿ ಮಣ್ಣು ಗಟ್ಟಿಗೊಳಿಸಲು (Compaction) ಸಾಧ್ಯವಾಗಿರಲಿಲ್ಲ. ವೈಬ್ರೇಟರಿ ರೋಲರ್‌ಗಳನ್ನು ಬಳಸಿದರೆ ಕಂಪನದಿಂದ ಆರ್.ಸಿ.ಸಿ ಬಾಕ್ಸ್‌ಗಳಿಗೆ ಹಾನಿಯಾಗುವ ಭೀತಿ ಇತ್ತು. ಹೀಗಾಗಿ ನಿರೀಕ್ಷಿತ ಮಟ್ಟದಲ್ಲಿ ಮಣ್ಣು ಗಟ್ಟಿಯಾಗಿರಲಿಲ್ಲ. ಇದೇ ವೇಳೆ ಸುರಿದ ಭಾರಿ ಮಳೆಯಿಂದಾಗಿ ಅನಿಮಲ್ ಕ್ರಾಸಿಂಗ್ ಬಾಕ್ಸ್ ಪಕ್ಕದ ಮಣ್ಣು ಸುಮಾರು 300 ಮಿ.ಮೀ (30 ಸೆಂ.ಮೀ) ನಷ್ಟು ಕುಸಿದಿತ್ತು. ಆದರೆ, ಯಾವುದೇ ಆರ್.ಸಿ.ಸಿ ರಚನೆಗಳಿಗೆ ಹಾನಿಯಾಗಿರಲಿಲ್ಲ.

​ತಕ್ಷಣವೇ ಸರಿಪಡಿಸಿದ ಬಿಡಿಎ:

ಮಳೆಯಿಂದ ಮಣ್ಣು ಕುಸಿದ ತಕ್ಷಣವೇ ಎಚ್ಚೆತ್ತ ಬಿಡಿಎ, ಗುತ್ತಿಗೆದಾರರ ಮೂಲಕ ಹಾನಿಗೊಳಗಾದ ಪ್ರದೇಶಕ್ಕೆ ಸೂಕ್ತ ಮಣ್ಣು ತುಂಬಿ, ಗಟ್ಟಿಗೊಳಿಸಿ, ಡಾಂಬರೀಕರಣ ಮಾಡಿ ರಸ್ತೆಯನ್ನು ಮೊದಲಿನ ವಿನ್ಯಾಸಕ್ಕೆ ತಂದಿದೆ. ಉದ್ಘಾಟನೆಗೊಳ್ಳಲಿರುವ ಮುಖ್ಯ ರಸ್ತೆಯು ಅತ್ಯುನ್ನತ ಎಂಜಿನಿಯರಿಂಗ್ ಮಾನದಂಡಗಳೊಂದಿಗೆ ನಿರ್ಮಾಣವಾಗಿದ್ದು, ವಾಹನ ಸಂಚಾರಕ್ಕೆ ಸಂಪೂರ್ಣ ಸುರಕ್ಷಿತವಾಗಿದೆ. ಕಾಮಗಾರಿ ಪೂರ್ಣಗೊಂಡ 2 ವರ್ಷಗಳವರೆಗೆ ಏನೇ ನ್ಯೂನತೆ ಕಂಡುಬಂದರೂ ಅದನ್ನು ಸರಿಪಡಿಸಲಾಗುವುದು. ಆದ್ದರಿಂದ ಸಾರ್ವಜನಿಕರು ಹಳೆಯ ಫೋಟೋಗಳನ್ನು ನೋಡಿ ತಪ್ಪು ತಿಳುವಳಿಕೆಗೆ ಒಳಗಾಗಬಾರದು ಎಂದು ಬಿಡಿಎ ಮನವಿ ಮಾಡಿದೆ.

Join our WhatsApp Channel