ಬೆಂಗಳೂರು, ಸೆ.01 www.bengaluruwire.com: ಸರ್ಕಾರಿ ನೌಕರಿಯ ಕನಸು ಕಾಣುತ್ತಿರುವ ರಾಜ್ಯದ ನಿರುದ್ಯೋಗಿ ಯುವಜನತೆಗೆ ಕರ್ನಾಟಕ ಪರೀಕ್ಷಾ ಪ್ರಾಧಿಕಾರ (KEA) ಸಿಹಿಸುದ್ದಿ ನೀಡಿದೆ.
ವಿವಿಧ ಸರ್ಕಾರಿ ಇಲಾಖೆಗಳು, ನಿಗಮ ಮತ್ತು ಮಂಡಳಿಗಳಲ್ಲಿ ಖಾಲಿಯಿರುವ ಪದವಿ, ಪಿಯುಸಿ ಹಾಗೂ ಡಿಪ್ಲೊಮಾ ಮಟ್ಟದ ತಾಂತ್ರಿಕ ಮತ್ತು ತಾಂತ್ರಿಕೇತರ ಹುದ್ದೆಗಳ ನೇರ ನೇಮಕಾತಿಗೆ ಸಂಬಂಧಿಸಿದಂತೆ ಪ್ರಾಧಿಕಾರವು ಅಧಿಕೃತ ಪ್ರಕಟಣೆ ಹೊರಡಿಸಿದೆ.
ಈ ನೇಮಕಾತಿಗೆ ಸಂಬಂಧಿಸಿದಂತೆ ಸೆಪ್ಟೆಂಬರ್ ಮಾಹೆಯಲ್ಲಿ ಅಧಿಕೃತ ಅಧಿಸೂಚನೆ (Notification) ಹೊರಬೀಳಲಿದ್ದು, ನವೆಂಬರ್ ಮತ್ತು ಡಿಸೆಂಬರ್ ತಿಂಗಳಲ್ಲಿ ಸ್ಪರ್ಧಾತ್ಮಕ ಪರೀಕ್ಷೆಗಳು ನಡೆಯಲಿವೆ ಎಂದು ಕೆಇಎ ಸ್ಪಷ್ಟಪಡಿಸಿದೆ.
ಪ್ರಮುಖ ಹುದ್ದೆಗಳು ಮತ್ತು ವಿದ್ಯಾರ್ಹತೆಯ ವಿವರ:
1. ಪದವಿ ಮಟ್ಟದ ತಾಂತ್ರಿಕೇತರ ಹುದ್ದೆಗಳು (ಒಟ್ಟು 2,421 ಹುದ್ದೆಗಳು):
ಪ್ರಮುಖ ಹುದ್ದೆಗಳು: ಲೆಕ್ಕ ಸಹಾಯಕರು (502), ಸಮಾಜ ಕಲ್ಯಾಣ & ಹಿಂದುಳಿದ ವರ್ಗಗಳ ಇಲಾಖೆಯ ವಾರ್ಡನ್/ನಿಲಯ ಮೇಲ್ವಿಚಾರಕರು (705+), ಗ್ರಾಮ ಪಂಚಾಯಿತಿ ಕಾರ್ಯದರ್ಶಿ (ಗ್ರೇಡ್-1) ಮತ್ತು ಗ್ರಾಮೀಣಾಭಿವೃದ್ಧಿ ಸಹಾಯಕ (184), ವಾಣಿಜ್ಯ ತೆರಿಗೆ ಪರಿವೀಕ್ಷಕರು (CTI – 50), ಉಪ ನೋಂದಣಾಧಿಕಾರಿ (17), ಸಚಿವಾಲಯ / ಕೆಪಿಎಸ್ಸಿ ಸಹಾಯಕರು ಹಾಗೂ ವಿವಿಧ ಇಲಾಖೆಗಳ ಪ್ರಥಮ ದರ್ಜೆ ಸಹಾಯಕರು (FDA).
ವೃಂದವಾರು ವಿಂಗಡಣೆ: ಉಳಿಕೆ ಮೂಲ ವೃಂದ (RPC) – 1,912, ಕಲ್ಯಾಣ ಕರ್ನಾಟಕ (KK) – 509.
2. ಪಿಯುಸಿ ಮಟ್ಟದ ತಾಂತ್ರಿಕೇತರ ಹುದ್ದೆಗಳು (ಒಟ್ಟು 1,800+ ಹುದ್ದೆಗಳು):
ಪ್ರಮುಖ ಹುದ್ದೆಗಳು: ವಾಣಿಜ್ಯ ತೆರಿಗೆ ಇಲಾಖೆಯ ದ್ವಿತೀಯ ದರ್ಜೆ ಸಹಾಯಕರು (SDA – 590), ಗ್ರಾಮೀಣಾಭಿವೃದ್ಧಿ ಮತ್ತು ಪಂಚಾಯತ್ ರಾಜ್ ಇಲಾಖೆಯ ಪಂಚಾಯಿತಿ ಕಾರ್ಯದರ್ಶಿ (ಗ್ರೇಡ್-2 – 322) ಹಾಗೂ ಎಸ್ಡಿಎ (309), ಲೆಕ್ಕಪತ್ರ ಇಲಾಖೆಯ ಕಿರಿಯ ಲೆಕ್ಕ ಸಹಾಯಕರು (130), ವಿವಿಧ ಇಲಾಖೆಗಳ ಕಿರಿಯ ಸಹಾಯಕರು / ಎಸ್ಡಿಎ ಹುದ್ದೆಗಳು.
3. ಡಿಪ್ಲೊಮಾ ಮಟ್ಟದ ತಾಂತ್ರಿಕ ಹುದ್ದೆಗಳು (ಒಟ್ಟು 216 ಹುದ್ದೆಗಳು):
ಪ್ರಮುಖ ಹುದ್ದೆಗಳು: ನಗರ ಮತ್ತು ಗ್ರಾಮಾಂತರ ಯೋಜನಾ ಇಲಾಖೆಯ ಸಹಾಯಕ ನಗರ ಯೋಜಕರು (119), ಗ್ರೇಟರ್ ಬೆಂಗಳೂರು ಪ್ರಾಧಿಕಾರದ ಜೂನಿಯರ್ ಇಂಜಿನಿಯರ್ (ಸಿವಿಲ್ – 50), ಕರ್ನಾಟಕ ಗೃಹ ಮಂಡಳಿ (20), ಕೆಆರ್ಐಡಿಎಲ್ (15), ಅಂತರ್ಜಲ ನಿರ್ದೇಶನಾಲಯ (5), ಪ್ರಾರೂಪಕರು (2) ಮುಂತಾದ ಹುದ್ದೆಗಳು.
ವೃಂದವಾರು ವಿಂಗಡಣೆ: ಉಳಿಕೆ ಮೂಲ ವೃಂದ – 185, ಕಲ್ಯಾಣ ಕರ್ನಾಟಕ – 31.
ಪರೀಕ್ಷಾ ಪದ್ಧತಿ ಹಾಗೂ ಪಠ್ಯಕ್ರಮ:
ತಾಂತ್ರಿಕೇತರ ಹುದ್ದೆಗಳು: ಪದವಿ ಹಾಗೂ ಪಿಯುಸಿ ಮಟ್ಟದ ತಾಂತ್ರಿಕೇತರ ಹುದ್ದೆಗಳಿಗೆ ಕರ್ನಾಟಕ ನಾಗರಿಕ ಸೇವಾ (ನೇರ ನೇಮಕಾತಿ) (ಸಾಮಾನ್ಯ) ನಿಯಮಗಳು, 2021ರ ಅನ್ವಯ ಪತ್ರಿಕೆ-1 (ಸಾಮಾನ್ಯ ಜ್ಞಾನ) ಮತ್ತು ಪತ್ರಿಕೆ-2 (ಸಾಮಾನ್ಯ ಕನ್ನಡ/ಇಂಗ್ಲಿಷ್/ಕಂಪ್ಯೂಟರ್ ಜ್ಞಾನ) ಪರೀಕ್ಷೆಗಳನ್ನು ನಡೆಸಲಾಗುತ್ತದೆ.
ತಾಂತ್ರಿಕ ಹುದ್ದೆಗಳು: ನಿಯಮಗಳ ಪ್ರಕಾರ ಪತ್ರಿಕೆ-1 ಸಾಮಾನ್ಯ ಪತ್ರಿಕೆಯಾಗಿದ್ದು, ಪತ್ರಿಕೆ-2 ಅನ್ನು ನಿರ್ದಿಷ್ಟ ತಾಂತ್ರಿಕ ವಿಷಯಕ್ಕೆ (Specific Paper) ಸಂಬಂಧಿಸಿದಂತೆ ನಡೆಸಲಾಗುತ್ತದೆ.
(ಗಮನಿಸಿ: ಇಲಾಖಾವಾರು ಹುದ್ದೆಗಳ ಅಂತಿಮ ಸಂಖ್ಯೆ ಹಾಗೂ ವಿವರಗಳು ಅಧಿಕೃತ ಅಧಿಸೂಚನೆ ಹೊರಬೀಳುವ ವೇಳೆಗೆ ಬದಲಾವಣೆಗೆ ಒಳಪಟ್ಟಿರುತ್ತವೆ).
Join our WhatsApp Channel
